O le a faapefea ona fesoasoani ia te au ma lo’u aiga le tausia o se api talaaga patino?

Ua faamamafa mai e le Alii ma Ana perofeta le taua o le tausia o faamaumauga. O le tusiaina o se api talaaga faaletagata lava ia o le a aumaia ia i tatou se avanoa e toe mafaufau ai i o tatou olaga ma iloa ai le tele o faamanuiaga ua tuuina mai e le Atua ia i tatou. O a tatou api talaaga e mafai foi ona avea ma se puna o musumusuga ma le malosi i augatupulaga o i le lumanai o o tatou aiga.

Saunia oe lava ia faaleagaga

O a ni aafiaga na aoaoina ai oe i le taua o le tausia o se api talaaga? O i ai ni faamatalaga i lau api talaaga po o se api talaaga o se tuaa lea e mafai ona uunaia ai le autalavou?

O le a faapefea ona faamanuiaina le autalavou i le tausia o se api talaaga patino? O a ni mafuaaga e ono i ai ia i latou mo le le tausia o se api talaaga? E mafai faapefea ona e fesoasoani ia i latou ia iloa mafuaaga faaleagaga mo le tausia o se faamaumauga?

Suesue ma le agaga tatalo ia mau ma punaoa nei. O le a se mea o le a uunaia ai le autalavou o e aoaoina?

1 Nifae 1:1–3; Alema 37:8–9; Mose 6:5, 45–46 (O faataitaiga o le tausia o se faamaumauga i totonu o tusitusiga paia)

1 Nifae 6:3–6 (O le mea e faaaofia i se tala faamaumau patino)

3 Nifae 23:6–13 (Na aoai e le Faaola ia sa Nifae mo le le atoatoa o a latou tala faamaumau)

Henry B. Eyring, “E! Ia Manatua, Ia Manatua Lava,” Ensign po o le Liahona, Nov. 2007, 66–69; tagai foi i le vitio “Ia Manatua, Ia Manatua Lava,”

Aoao atu i le ala a le Faaola

Na fesili atu le Faaola ia i latou o e na Ia aoaoina ma na mafua ai ona latou mafaufau loloto ma lagona. Ona o Lona alofa, sa latou lagona ai le saogalemu o le faasoaina atu o o latou manatu ma lagona patino. E mafai faapefea ona e fatuina se siosiomaga i totonu o lau vasega ina ia lagona ai e le autalavou le toafimalie i le taliina o fesili?

Ia fai fesootaiga

Tagai i isi manatu e aoao mai ai ma aoao atu.

I nai minute muamua o vasega taitasi, fesoasoani i le autalavou e fai ni fesootaiga i le va o mea o loo latou aoaoina i tulaga eseese (e pei o suesuega faaletagata, seminare, isi vasega i le Lotu, po o aafiaga ma a latou uo). E faapefea ona e fesoasoani ia i latou ia iloa le manaomia o le talalelei i aso taitasi o le olaga? O manatu nei e ono fesoasoani ia te oe:

• Valaaulia le autalavou e faasoa mai soo se aafiaga lata mai sa latou mauaina i le molimau atu i se upumoni o le talalelei.

• Afai e mafai, faasoa atu se faamatalaga mai lau lava api talaaga po o le api talaaga o se tuaa (pe valaaulia se tagata o le vasega po o se tasi foi o le uarota e faia lea mea).Aisea na taua ai le faamaumauina o lenei aafiaga? O faapefea ona faamanuiaina isi ona o le tausia e se tagata o se api talaaga?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani i le autalavou ina ia malamalama i le taua o le tausiga o se api talaaga. I le mulimuli ai i le Agaga, filifili se tasi pe sili atu e aoga mo lau vasega:

• Valaaulia le autalavou e faitau ia parakalafa muamua e valu o le saunoaga a Peresitene Henry B. Eyring “ E Ia Manatua, Ia Manatua Lava” (pe faaali le vitio e faatatau i le lauga), ma fai atu ia i latou e vaavaai mo faamanuiaga lea na oo mai ona sa tusia e Peresitene Eyring ona aafiaga i aso uma. O le a se isi mea sa latou aoaoina mai e uiga i le tausia o se api talaaga patino mai le savali a Peresitene Eyring? Faitau faatasi le parakalafa mulimuli o lana saunoaga, ona faasoa atu lea o se aafiaga talu ai nei mai lou olaga lea na e vaaia ai ia aao o le Atua pe na foliga mai sa i ai Sana savali mo oe. Valaaulia le autalavou e mafaufau loloto i a latou lava tali i fesili ia na fautuaina mai e Peresitene Eyring ma faamaumauina o latou manatu.

• Fai atu i talavou taitasi e faitau se tasi o mau nei: 1 Nifae 1:1–3; Alema 37:8–9; Mose 6:5, 45–46. Fai atu i le autalavou e mafaufau e uiga i ai ona faasoa mai lea o nisi o faamanuiaga lea na oo mai ona o le tausia e tagata o i nei mau o se talafaamaumau. O a nisi o mafuaaga e le tausia ai e tagata se api o talaaga patino? O a ni mea na aoaoina e le autalavou mai nei mau lea na fesoasoani ia i latou ina ia iloa le taua o le tausia o se api talaaga? Uunaia i latou e faitau se api talaaga o se tuaa (pe a mafai) pe faatalanoa se matua po o se matua o matua ma tusi i lalo a latou molimau, tala o le liliu mai, aafiaga anoa o le olaga, ma ni manatuaga taua e fiafia i ai.

• Fai i le autalavou e fai se lisi o mea e tusi faatatau i ai i totonu o se api talaaga patino. Faitau faatasi o se vasega le 1 Nifae 6:3–6. Fai i le autalavou e saili po o le a le mea na manao Nifae e faaaofia i ana faamaumauga, ona faaopoopo lea o nei mea i le lisi. Valaaulia le autalavou e mafaufau loloto i mea sa latou lagonaina e tatau ona latou tusia i totonu o a latou api talaaga, ma tuu atu ia i latou se taimi e tusi a ni nai parakalafa o se faamatalaga i le api talaaga.

• Valaaulia le autalavou e faitau le 3 Nifae 23:6–13. Faamata e mafai faapefea ona faatatau lenei mau ia tatou taumafaiga o le tausia o se api talaaga patino? Fai i le autalavou e mafaufau e uiga i soo se aafiaga faaleagaga pe anoa sa latou mauaina latou te lagona e tatau ona faamaumauina. E faapefea ona faamanuiaina ai i latou po o isi e ala i le faitau e uiga i lenei aafiaga? Tuu atu ia i latou se taimi i le vasega e tusi ai e uiga i nei aafiaga.

Fai atu i le autalavou e faasoa mai mea ua latou aoaoina i le aso. O latou malamalama i faamanuiaga o le tausia o se api talaaga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Tomai e suesue ai le talalelei

Mafaufau loloto. I lenei lesona, ua uunaia le autalavou e mafaufau loloto i aafiaga sa latou mauaina ma faamaumauina i totonu o api talaaga. O le mafaufau loloto o lona uiga o le toe manatunatu i ai ma mafaufau loloto i se mea. Valaaulia le autalavou e fesili ifo ia i latou lava ni fesili faapea “O le a se mea o finagalo le Atua ou te aoaoina mai aafiaga o loo ou mauaina?” O le mafaufau loloto e valaauliaina ia faaaliga. Uunaia le autalavou ina ia avea le mafaufau loloto o se vaega masani o a latou suesuega patino o le talalelei.

Vitio: “Saili mo Upu i Tusitusiga Paia”

Matamata atili

Valaaulia e faatino

Tagai i isi manatu e aoao mai ai ma aoao atu.

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.