E mafai faapefea ona ou uunaia isi e usiusitai i poloaiga?

I le avea ai ma Au Paia o Aso e Gata Ai— ma o ni faiaoga o le talalelei— e ao ona avea i tatou ma faataitaiga o le ola ai i le talalelei. O a tatou faataitaiga e mafai ona musuiaina isi e usiusitai i poloaiga. Na fetalai le Faaola i Ona soo, “O outou o le malamalama o le lalolagi” (Mataio 5:14). O le filemu ma le fiafia tatou te lagona mai le ola ai i le talalelei o le a faaalia mai ia tatou gaoioiga, ia tatou upu, ma mai le mana o a tatou molimau.

Saunia oe lava ia faaleagaga

Na faapefea ona faaaafiaina oe e faataitaiga a isi o e sa usiusitai i poloaiga? Na faapefea e au taumafaiga e ola i poloaiga ona fesoasoani ia te oe e avea o se faiaoga mataalia o le talalelei?

O a avanoa o maua e le autalavou e avea ai o ni faataitaiga i isi? O a ni mea e mafai ona e faia e fesoasoani ai ia i latou e faaaoga lelei nei avanoa e musuia ai isi e usiusitai i poloaiga?

Ia suesue ma le agaga tatalo ia mau ma punaoa nei. O le a se mea e fesoasoani i le autalavou e malamalama ai o a latou faataitaiga ma molimau e mafai ona musuia isi e usiusitai i poloaiga?

Mataio 5:14–16; 1 Timoteo 4:12; Alema 17:11; 39:11 (O le taua o le avea o se faataitaiga lelei)

Alema 4:19 (O le mana o le molimau mama)

Thomas S. Monson, “Avea ma se Faataitaiga ma se Malamalama,” Ensign po o le Liahona, Nov. 2015, 86–88

L. Tom Perry, “O Le Alofa Atoatoa e Faateaeseina ai le Fefe,” Ensign po o leLiahona, Novema 2011, 41–44

Ann M. Dibb, “Tutulai ma Susulu Atu,” Ensign po o le Liahona, Me 2012, 117–19

Vitio: “Ia Faasusulu Atu lo Outou Malamalama”

4:28

Ia fai fesootaiga

I nai minute muamua lava o vasega taitasi, fesoasoani i le autalavou e faia fesootaiga i le va o mea latou te aoaoina i nofoaga eseese (e pei o suesuega faaletagata lava ia, seminare, isi vasega faale-Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le taua o le talalelei i o latou olaga i aso taitasi? E mafai ona fesoasoani manatu nei:

Fesili i le autalavou po o a poloaiga latou te faalogo soo i ai i vasega o le Ekalesia po o fonotaga. Aisea latou te manatu ai i le mafuaaga o le faamamafaina o nei poloaiga? O a mea ua latou aoaoina? O a ni o latou fesili o i ai?
Valaaulia le autalavou e mafaufau e uiga (ae aua le faailoa atu po o ai) i se tasi latou te iloa latou te moomoo pe mafai ona latou uunaia e usiusitai i poloaiga. Talanoa o se vasega ia auala e musuia ai tagata ina ia ola i le talalelei. E faapefea e faataitaiga, aafiaga, ma molimau a le autalavou ona fesoasoani latou te pai atu ai i loto o tagata latou te alolofa i ai?

Aoao faatasi

O gaoioiga taitasi nei o le a fesoasoani i le autalavou ina ia malamalama i auala e musuia ai isi ia usiusitai i poloaiga. I le mulimuli ai i le Agaga, filifili se tasi pe sili atu e aoga lelei mo lau vasega:

Valaaulia le autalavou e faitau le Mataio 5:16 ma le 1 Timoteo 4:12, o mau na musuia ai le saunoaga a Peresitene Thomas S. Monson “Avea ma se Faataitaiga ma se Malamalama.” O a mea ua aoao mai e nei fuaiupu e uiga i le mana o o latou faataitaiga? Valaaulia le autalavou e suesue le lauga Peresitene Monson ma sue se uiga na ia talosaga i tatou ina ia avea ai o se faataitaiga. Fai atu ia i latou e faasoa mai se taimi na faataitai ai e se tasi lena amio ma talanoaina le aafiaga o lena mea na tupu ia i latou. O le a le mea e mafai e le autalavou ona faia ia avea ai ma faataitaiga sili atu i le aiga, i le initoneti, i le aoga, ma i o latou alalafaga?
Tofi talavou taitasi e faitau se tasi o mau e faatatau i faataitaiga i lenei otootoga ona saili lea o se tasi o le vasega sa faitau i se isi fuaiupu e ese mai ai ma faasoa atu le tasi i le isi i mea na latou aoaoina. Faaauau lenei gaoioiga seia faalogo le autalavou i mau taitasi. Aisea e matua taua ai le avea o se faataitaiga i le aoaoina o le talalelei? Fai i le autalavou e lisi i luga o le laupapa ni avanoa faafaiaoga sa latou maua —aloaia ma le le aloaia.
Faasoa atu le faamatalaga o loo mulimuli mai o le lauga a Elder L. Tom Perry. “O Le Alofa Atoatoa e Faateaeseina ai le Fefe”: “E tatau ona avea o tatou olaga ma faataitaiga o le lelei ma uiga mama, a o tatou taumafai e mulimuli i Ana faataitaiga i le lalolagi. O galuega lelei a i tatou taitasi e mafai ona tauleleia i le Faaola ma Lana Ekalesia. A o outou galulue filifiliga i le faia o le lelei, avea ma alii ma tamaitai faamaoni ma amiotonu, o le a faaalia mai i o outou olaga le Malamalama o Keriso.”Fai atu i le autalavou e faasoa mai ni aafiaga lea na uunaia ai i latou e se faataitaiga lelei a se tasi ina ia ola ai i le talalelei, pe faaali le vitio “Ia Faasusulu Atu lo Outou Malamalama.”Valaaulia i latou e mafaufau loloto i aafiaga o a latou faataitaiga i isi, ma faamalosi atu ina ia latou faatu ni sini a le tagata lava ia e musuia ai isi e tausia poloaiga e ala lea i le faia o ni faataitaiga lelei.

4:28
Faasoa atu se aafiaga faaletagata e faatatau i se taimi na e filifili ai e usiusitai i se tasi o poloaiga a le Atua. A o e faasoa atu, mulimuli i taiala nei: aua nei talanoa e uiga i aafiaga paia sei vagana ai ua uunaia oe e le Agaga, aua e te soona faamatalaina ou aafiaga, aua e te faamatalaina ni aafiaga e faatosina mai ai ia te oe, ma aua e te talanoa e uiga i agasala po o solitulafono ua tea. Talanoa i taiala nei ma le autalavou, ma valaaulia i latou e mulimuli i taiala a o latou faasoa atu o latou aafiaga faaletagata e uiga i le tausia o poloaiga. Fesili atu i le autalavou pe aisea ua latou manatu ai o aafiaga faaletagata o se auala lelei lea e aoao ai isi e uiga i poloaiga.
Valaaulia le vasega e fai se aotelega o le talaaga o le Alema 4:19 (Afai latou te manaomia se fesoasoani, fautua i ai latou te faitau i le ulutala mo le mataupu 4). Faitau faatasi le fuaiupu 19, ma fesili i le autalavou po o le a so latou manatu o le uiga “o le tuuina atu o molimau i le tulaga mama” ma pe faapefea ona musuia tagata o le Ekalesia e usiusitai i poloaiga. Na faapefea ona aafia le autalavou e molimau a isi (e pei o matua, faiaoga, taitai, po o isi talavou)? Fai atu i le autalavou e mafaufau i ni faataitaiga o ni molimau i tusitusiga paia (mo se faataitaiga, Mataio 16:13–19; Mosaea 3:17; Alema 5:45–48; 7:13; MF&F 76:22–24). Faitau faatasi i ai, ma valaaulia le autalavou e faaasoa mai pe aisea ua latou iloa ai o nei molimau e musuia. (Manatua: O lenei gaioiga o se avanoa e aoao atu ai le autalavou i le ala e tuuina atu ai se molimau a o latou aoao atu le talalelei i isi. Mo nisi [faamatalaga] i lenei autu, tagai Aoao Atu i le Ala a le Faaola [2016], 11.)
Fai i le autalavou e faitau se tasi o tala i le lauga a Sister Ann M. Dibb “Tutulai ma Susulu Atu” (o tala ia Samasoni, Tanielu, Ioana, po o Karene). Faiatu ia i latou e talanoaina mea sa latou aoaoina e uiga i le mana o faataitaiga e faaaafia ai isi ina ia usiusitai pe le usiusitai i poloaiga. O a ni aafiaga sa maua e le autalavou lea sa latou uunaia ai se tasi pe sa uunaia ai i latou e se isi tagata ina ia usiusitai?

Fai atu i le autalavou e faasoa mai mea ua latou aoaoina i le aso. Pe o latou malamalama i le auala e musuia isi ina ia usiusitai i poloaiga? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“Faalogo atu ma le faamaoni i manatu faaalia o tagata o loo aoao.O lau faataitaiga o le a uunaia ai i latou e faalogo lelei i isi.Afai e te le malamalama i le manatu o se tasi, ia tuu atu se fesili.E mafai ona e faapea atu, ‘Ou te le o mautinoa pe ua ou malamalama.E mafai ona e toe faamalamalamaina mai le mea lena?’po o le ‘E mafai ona e tuuina mai se faataitaiga o le mea lena e te fai mai ai?’”(O Le Aoao Atu, E Leai Se Isi Valaauga E Sili Ai [1999], 67).

Valaaulia le autalavou e faatino

Valaaulia le autalavou e mafaufau i se mea e mafai ona latou faia e musuia ai se tasi latou te iloa ina ia usiusitai i poloaiga. Pe a talafeagai ai, valaaulia i latou e faasoa atu o latou aafiaga i se vasega o i le lumanai.