E mafai faapefea ona ou tu o se molimau o le Atua?

Pe a tatou papatiso, ua tatou osi feagaiga e “tutu o ni molimau a le Atua i taimi uma ma i mea uma, ma i nofoaga uma atonu [tatou te] i ai” (Mosaea 18:9). Talu ai ona ua o ese mai tulaga faatonuina a le lalolagi mai poloaiga a le Atua, ua tele lava ina manaomia lo tatou puipuia o lo tatou faatuatuaga. O le faia o lenei mea, ua manaomia ai ona tatou mulimuli i le faataitaiga a le Faaola, o le na lototoa ma alofa i Lona puipuiga o le upumoni. Afai e atinae i tatou i luga o le “papa o lo tatou Togiola,” o le a le mafai e le “afa malosi” o aso amuli ona “i ai sona mana i luga o [i tatou] e toso ifo ai [tatou] i lalo …ona o le papa lea ua [tatou] atinae ai i luga” (Helamana 5:12).

Saunia oe lava ia faaleagaga

O anafea na manaomia ai lou puipuia o ou talitonuga? O le a se mea sa fesoasoani ia te oe ia saunia ai mo ia ituaiga taimi? O a aafiaga e mafai ona e faasoa atu i le autalavou?

O anafea na e vaaia ai le autalavou o tutu atu o ni molimau a le Atua? O a tulaga o feagai ma i latou lea e osofaia ai o latou talitonuga? E mafai faapefea ona latou fefaamalosiai ma lagolagoina le tasi ma le isi?

Ia suesue ma le agaga tatalo ia mau ma punaoa nei. O le a se mea o le a uunaia le autalavou ina ia tutu atu ma le lototele o ni molimau a le Atua?

1 Nifae 8:24–34 (O le faaaliga a Liae i le laau o le ola ma le faletele ma le ateatea)

Roma 1:16–17 (Aua nei ma i le talalelei)

1 Timoteo 4:12 (Fai ma faaa’oa’o i e ua faatuatua)

1 Peteru 3:12–17 (Ia saunia e tali atu ia i latou e fesili mai e uiga i o tatou talitonuga)

MF&F 100:5–8 (O folafolaga ia i latou o e folafola atu le afioga a le Atua)

1 Nifae 17:48–55; Mosaea 13:1–9; 17:1–4; Moronae 1:1–3 (O faataitaiga o tagata o e na tumau faamaoni i le talalelei e ui i sauaga)

Thomas S. Monson, “Ia Faamalosi ma Loto Tele,” Ensign po o le Liahona, Me 2014, 66-69

Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6-9

Neil L. Andersen, “O Asiosio Faaleagaga,” Ensign po o le Liahona, Me 2014, 18-21

Vitio: “Kalapu a le Au Le Palauvavale”

4:57

Ia fai fesootaiga

I uluai minute o vasega taitasi, fesoasoani i le autalavou e faia fesootaiga i le va o mea o loo latou aoaoina i nofoaga eseese (e pei o suesuega faaletagata lava ia, seminare, isi vasega a le Ekalesia, po o aafiaga ma a latou uo). E mafai faapefea ona e fesoasoani ia i latou ia iloa le fesootaiga o le talalelei ma le olaga o aso faisoo? Atonu e fesoasoani manatu o loo i lalo ia te oe:

Fai atu i le autalavou e faasoa mai se aafiaga o le aoao mai po o le aoao atu lata mai nei na latou mauaina i fafo atu o le vasega. Na faapefea ona fesoasoani mataupu faavae na aoaoina i vaiaso ua tuanai ia i latou?
Aumai ni maneta se lua i le vasega, ma faataitai le auala e pipii le tasi maneta i le isi. Ona faafaao lea o le tasi maneta, ma faataitai le auala e teena ai e le tasi le isi. Fesili atu i le atulavou pe faapefea ona faaaogaina maneta nei e faataitai ai le faamatalaga lenei a Peresitene Thomas S. Monson: “I se tasi taimi na tele lava ona tutusa tulaga faatonuina o le Ekalesia ma tulaga faatonuina o malo, o lea ua i ai se va tele i lo tatou va, ma o loo faatupulaia pea lena va” (“Mana o le Perisitua,” Ensign po o le Liahona, Me 2011, 66).

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a uunaia ai le autalavou ina ia tutu o ni molimau o le Atua e ui i le fili. I le mulimuli ai i le taitaiga a le Agaga, filifili se tasi pe sili atu o le a aoga mo lau vasega:

Faitau faatasi o se vasega le 1 Nifae 8:24–34, ma fai atu i le autalavou po o a sootaga o latou vaaia i le va o le vaega lenei o le faaaliga a Liae ma o latou olaga. Faasoa atu se aafiaga patino lea sa manaomia lou tu atu ai mo lou talitonuga e fetaiai ai ma se faitioga po o se tetee. Fai atu i le autalavou e faasoa mai soo se aafiaga sa latou oo i ai.
Valaaulia tagata o le vasega e faasoa mai ni faataitaiga o ni tagata i tusitusiga paia o e na tumau faamaoni i le talalelei e ui i sauaga (o loo aumaia e tusitusiga paia i lenei otootoga nisi o faataitaiga). Faitau faatasi o se vasega ia tala e uiga i nei tagata. O le a se mea na aoaoina e tagata o le vasega mai nei faataitaiga e faatatau ia i latou i lenei vaitaimi? I le avea ai ma se vaega o lenei talanoaga, e mafai e le autalavou ona suesue i nisi o tusitusiga paia o loo fautuaina mai i lenei otootoga.
Fai atu i tagata o le vasega e matamata i le vitio“Kalapu a le Au Le Palauvavale” ma vaavaai mo ni faamatalaga i le vitio na uunaia ai i latou ina ia tutu o ni molimau o le Atua. O a tulaga na fetaiai ma i latou lea na luiina ai o latou talitonuga ma tulaga faatonuina? O a ni mea o latou faia e puipuia ai o latou talitonuga? Mata o faapefea ona latou mulimuli i le faataitaiga i le vitio?

4:57
Vaevae le vasega i vaega e tolu, ma tuu atu ia tofu vaega taitasi ma se tasi o lauga o i lenei otootoga. Fai i vaega e toe iloilo ia lauga ma fai se lisi o ni faamatalaga mamana e mafai ona latou faasoa atu e faamalosiau ai i se tagata ina ia puipuia upumoni o le talalelei. Tuu atu i vaega taitasi e faamatala mai i le vasega atoa le auala e mafai ona latou faasoa atu nei faamatalaga i isi. Mo se faataitaiga, e mafai ona latou fatuina se upusii o le ata ma faasoa mai i isi tagata o le vasega i le aluga o le vaiaso e avea o se faamanatu o mea sa tou talanoaina i le vasega.

Fai atu i le autalavou e faasoa mai mea ua latou aoaoina i le aso. O latou lagona le musuia e tutu o ni molimau o le Atua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

Fesili i le autalavou po o a ni mea ua musuia i latou e fai ona o mea sa latou aoaoina i le aso. Fautuaina i latou e faatino na lagona. Mafaufau i ni auala e mafai ai ona e tulitataoina.