O le a le uiga o le ave i o tatou luga le suafa o Iesu Keriso?

Pe a papatisoina i tatou, tatou te osi feagaiga e ave i o tatou luga le suafa o Iesu Keriso. Tatou te faafouina lenei feagaiga pe a tatou fetagofi atu i le faamanatuga (tagai MF&F 20:77). Tatou te faataunuuina lenei feagaiga i le faamuamuaina lea o le Alii i o tatou olaga, i le taumafai lea e mafaufau ma amio e pei o le a Ia faia, ma le tutu “o ni molimau a le Atua i taimi uma ma i mea uma, ma i nofoaga uma” (Mosaea 18:9).

Saunia oe lava ia faaleagaga

O le a sou manatu i le uiga o le tauave i ou luga le suafa o Keriso? O le a se mea e te faia ina ia tausia ai lenei feagaiga?

O a luitau ma faamanuiaga e oo mai pe a ave e alii talavou i o latou luga le suafa o Keriso? E faapefea ona e fesoasoani i alii talavou ia faamuamua le Atua i o latou olaga?

O a mau ma punaoa o le a fesoasoani i alii talavou e malamalama ai i le feagaiga na latou osia e ave i o latou luga le suafa o Keriso?

Mosaea 5 (Aisea e taua ai le ave i o latou luga le suafa o Keriso)

3 Nifae 27:27 (E tatau ona tatou taumafai ia faapei o Iesu Keriso)

MF&F 20:37, 77 (O le aveina i o tatou luga o le suafa o Keriso o se vaega o la tatou feagaiga o le papatisoga ma le sauniga o le faamanatuga)

Robert D. Hales, “Avea o se Kerisiano Moni Faapei o Keriso,” Ensign po o le Liahona, Nov. 2012, 90–92

Mervyn B. Arnold, “O le a se Mea ua e Faia i Lo'u Igoa?” Ensign po o le Liahona, Nov. 2010, 105–7

Vitio: “Ia Lototele e Tu Na o Oe”

4:20

Aoao atu i le ala a le Faaola

Na silafia e le Faaola i latou na Ia aoaoina, ma na Ia silafia ituaiga tagata o le a avea ai i latou. Ina ua latou tauivi, Na te lei fiu ia i latou, ae na faaauau pea ona alofa ma auauna atu ia i latou. E faapefea ona e faaalia lou alofa ma le lagolago i alii talavou o loo e aoaoina?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunaia i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e faasoa mai soo se aafiaga talu ai nei na latou maua na faamanatuina ia i latou pe na faamalosia ai se mea na latou aoaoina e uiga i fonotaga a le korama po o isi vasega i le Lotu.
Valaaulia se uso o le koramae tauloto le tatalo o le falaoa o le faamanatuga i (pe faitau mai MF&F 20:77. O le a lo latou talitonuga i le uiga o le “ave i o latou luga le suafa o lou Alo o Iesu Keriso”?

Aoao faatasi

O gaoioiga taitasi nei o le a fesoasoani i uso o le korama e malamalama ai i le uiga o le ave o le suafa o Iesu Keriso i o latou luga. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Faaali le vitio “Ia Lototele e Tu Na o Oe.” O le a le lagona o alii talavou i le autu o le savali a Peresitene Monson i lenei vitio? Na faapefea ona faaalia e le autalavou i le vitio ua latou aveina i o latou luga le suafa o le Faaola? Valaaulia alii talavou e faasoa mai o latou lava aafiaga faapea.

4:20
Faasoa atu le saunoaga lenei mai ia Peresitene Henry B. Eyring: “Ua tatou folafola atu e ave i o tatou luga Lona suafa. O lona uiga e ao ona tatou vaai ia i tatou lava o ni Ona Soo. O le a tatou faamuamua o Ia i o tatou olaga. O le a tatou mananao i mea e finagalo ai o Ia nai lo mea tatou te mananao ai po o mea ua aoao mai le lalolagi ia tatou mananao i ai” (“Ina ia Tasi i Tatou,” Ensign po o Liahona, Iulai 1998). Vaevae le vasega ini vaega se tolu, fai atu i vaega taitasi e talanoaina se tasi o fesili nei: O le a le uiga o le vaai ia i tatou lava oni fanau a Keriso? E faapefea ona tatou faamuamua le Faaola i o tatou olaga? O le a le uiga o le manao faapei ona manao ai le Faaola? Fai atu i se tagata se toatasi mai vaega taitasi e faasoa mai i le vasega le mea na talanoaina e lana vaega.
Valaaulia alii talavou e faitau Mosaea 5, ma vaai mo tali i fesili e pei “O le a le uiga o le ave i o tatou luga le suafa o Keriso?” ma “Aisea e taua ai le ave i o tatou luga le suafa o Keriso?” Fai atu ia i latou e faasoa mai mea na latou maua ma lisi ni mea faapitoa e mafai ona latou faaalia ai ua latou aveina i o latou luga le suafa o le Faaola.
Fesili i alii talavou pe ua latou iloa pe aisea na filifili ai e o latou matua o latou igoa. E faapefea ona uunaia e o latou igoa po o ai i latou ma le ala o loo latou taumafai e ola ai? Valaaulia nisi o alii talavou e faitau Helamana 5:6–8, ma valaaulia isi e faitau parakalafa muamua e tolu o le lauga a Elder Mervyn B. Arnold “O Le a se Mea ua E Faia i Lo'u Igoa?” Fai atu ia i latou e aotele e le tasi ma le isi mea na latou faitauina. Na faapefea e igoa o Nifae, Liae, ma Siaosi Alapati Samita ona uunaia nei tagata ia ola amiotonu? E faapefea e la tatou feagaiga ia ave i o tatou luga le suafa o Iesu Keriso ona musuia i tatou? Faitau faatasi o se korama parakalafa mulimuli e lua o le lauga, ma valaaulia alii talavou e talanoaina le ala o le a latou faaaogaina ai le luitau a Elder Arnold.
Faasoa atu le saunoaga lenei mai ia Elder Robert D. Hales: “O le upu Kerisiano o lona uiga o le tauaveina i o tatou luga o le suafa o Keriso.” Vaevae le lauga a Elder Hales “ Avea o se Kerisiano Moni e Faapei o Keriso ” i alii talavou. Fai atu i alii talavou taitasi e faitau lana vaega, ma vaai mo tali i le fesili “O le a le uiga o le avea o se Kerisiano?” Fai atu ia te ia e faasoa mai mea ua ia maua ma tuuina mai ni faataitaiga o tagata ua ia taua oni Kerisiano moni.

Fai atu i alii talavou e faasoa mai mea na latou aoaoina i le aso. Pe ua latou malamalama i le uiga o le ave i o latou luga le suafa o Iesu Keriso? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa mai ona lagona i le uiga o le aveina i ona luga o le suafa o le Faaola.
Valaaulia isi uso o le korama e mafaufau pe o i ai ni suiga latou te manaomia e fai i o latou olaga ona o mea na latou aoaoina i le aso.