O le a le mea na tupu i le muai olaga?

Ae tatou te lei fananau mai, sa tatou mau faatasi ma le Tama Faalelagi o ni Ana fanau faaleagaga. I le Fono i le Lagi, sa faailoa mai ai e le Tama ia i tatou ia Lana ata o le faaolataga, ma o Iesu Keriso sa filifilia e avea ma o tatou Faaola. Sa taumafai Satani e sui le fuafuaga, i le aveese o lo tatou faitalia, ma sa faapea ona tuliesea ai o ia ma e na mulimuli ia te ia. Sa tatou taliaina le fuafuaga a le tatou Tama ma filifili e mulimuli ia Iesu Keriso.

Saunia oe lava ia faaleagaga

Mafaufau i filifiliga ua e faia i le olaga. O a ni aafiaga o lou malamalama i le muai olaga i na filifiliga? O le a faapefea ona aafia lou faasinomaga e faavavau i au filifiliga?

O a ni filifiliga o loo faia e alii talavou i le taimi nei o le a faamanuiaina ai o latou olaga i le faavavau? O a ni filifiliga e mafai ona faia ni aafiaga le lelei i o latou faasinomaga e faavavau?

Ia suesue ma le agaga tatalo ia mau ma punaoa nei. O le a se mea ua e lagona le faaosofia o oe e faasoa atu i le korama?

Ieremia 1:5; Alema 13:3 (Sa valaauina ma filifilia e ua umia le Perisitua a o le’i amataina le lalolagi)

Faaaliga 12:9–11; Mose 4:1–4 (O loo taumafai Satani e faatamaia le faitalia o le tagata ma ua tulia ai i fafo)

Aperaamo 3:22–26 (O a tatou filifiliga i le muai olaga ua mafai ai ona tatou o mai i le lalolagi)

“Ata o le Faaolataga,” Faamaoni i le Faatuatua (2004), 115–16

Vitio: “O Le Ata o le Faaolataga”; tagai foi i le DVD Punaoa Vaaia o le Mataupu Faavae ma Feagaiga

4:19

Aoao atu i le ala a le Faaola

Sa faasoa mai e le Faaola ni tala faigofie, faataoto, ma ni faataitaiga moni o le olaga sa malamalama i ai Ona au soo. O le lesona lenei e tuuina atu ai se avanoa sili mo oe e faasoa atu ai faataitaiga o filifiliga sa e faia ua faapea ona suia ai lou olaga. O a ni aafiaga e mafai ona faasoa mai e alii talavou?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Ia valaaulia alii talavou e faasoa atu se mau latou te manatua mai le fonotaga a le korama i le vaiaso ua tuanai. Fai atu ia i latou e talanoa e uiga i se mea sa latou aoaoina mai ai.
Fai atu i alii talavou e mafaufau e uiga, ma faasoa atu soo se filifiliga amiotonu sa latou faia i le taimi ua tuanai, ma pe o faapefea ona faamanuiaina o latou olaga ona o na filifiliga. Ona fai atu lea i ai e ta’u mai se filifiliga sa latou faia ae latou te le’i fananau mai. O le a se aafiaga o lenei filifiliga i o latou olaga?

Aoao faatasi

O gaoioiga taitasi o loo i lalo o le a fesoasoani i tagata o le korama e aoao ai e uiga i le muai olaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau korama:

Fai atu i alii talavou taitoatasi e faitau se tasi o mau nei: Ieremia 1:5; Alema 13:3; Aperaamo 3:22–23. Valaaulia alii talavou e vaavaai mo upumoni latou te aoaoina mai nei mau e uiga i le muai olaga. E faapefea ona faia e nei upumoni e uiga i le muai olaga se aafiaga i le ala tatou te vaai ai i o tatou olaga i le tino?
Fai atu i alii talavou e fai se lisi o nisi o luitau e feagai ma tagata i le gasologa o le olaga nei. Ia valaaulia i latou e faitau e uiga i le muai olaga i le Faamaoni i le Faatuatua (itulau 115–16), ma vaavaai mo upumoni e mafai ona fesoasoani ai i tagata e mafaufau i se tasi o ono manaomia ona iloa nei upumoni, ma uunaia i latou e mafaufau i ni auala e mafai ona latou faasoa atu ai a latou molimau e uiga i le ata o le faaolataga.
Fai atu i alii talavou e faitau le Mose 4:1–2 ma vaavaai mo mea latou te aoaoina e uiga i le Faaola ma Satani i le Fono i le Lagi. O a ni mea ua tatou iloa e uiga i taunuuga o gaoioiga a Satani mai le fuaiupu e 3–4? O faapefea ona faaauau lenei feteenaiga i le lalolagi i aso nei? O le a le tiute o le Faaola i lenei feteenaiga? O le a lo tatou tiute? Ia valaaulia alii talavou e faailoa atu o latou lagona e uiga i le Faaola ma Lona naunau e mulimuli i le fuafuaga a Lona Tama.

Fai atu i alii talavou e faasoa atu mea na latou aoaoina i le aso. Pe ua latou malamalama lelei i le muai olaga? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Motugaafa faafaiaoga

“Ia faaeteete ina ia aua ne’i tuuina atu ni fesili e faatupu ai ni finauga po o ni mataupu ma’aleale. Aua le tuuina atu fesili e faatupuina ai le masalosalo pe oo atu ai i ni talanoaga e le mafai ona faamalamalamaina. Ia mautinoa o au fesili e taitaiina atu ai tagata o loo aoaoina i se lotogatasi i le faatuatua ma le alofa” (O Le Aoao Atu, E Leai Se Isi Valaauga E Sili Ai [1999], 69).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Valaaulia tagata o le korama e faasoa atu ni manatu po o lagona sa latou maua i le taimi o le lesona. O a ni mea ua musuia i latou e fai o le a faamanuiaina ai o latou aiga po o le korama?
Faasoa atu lana molimau e uiga i mea sa aoaoina atu.