O le a le ata o le faaolataga?

Ua saunia e le Tama Faalelagi se fuafuaga e mafai ai ona tatou avea faapei o Ia. O le ata o le faaolataga e aofia ai le Foafoaga, o le Pau, le Togiola a Iesu Keriso, ma tulafono uma, o sauniga, ma aoaoga faavae o le talalelei. O lenei fuafuaga e mafai ai ona faaatoatoaina i tatou e ala i le Togiola, maua se atoaga o le olioli, ma ola e faavavau i le afioaga o le Atua.

Saunia oe lava ia faaleagaga

E faapefea ona aafia au filifiliga ma lau vaaiga e uiga i le olaga ona o lou iloa o le fuafuaga a le Tama Faalelagi? O a ni itu o le ata o le faaolataga e te manao e aoao atili i ai?

E mafai faapefea ona fesoasoani le malamalama i le ata o le faaolataga i tagata o le korama ina ia lelei atili atu le faataunuuina o o latou tiute faaleperisitua?

Ia suesue ma le agaga tatalo ia mau ma punaoa nei. O le a se mea o le a fesoasoani i alii talavou ia malamalama ai i le ata o le faaolataga?

1 Korinitio 15:20–22 (O le a oti tagata uma)

Eperu 12:9 (O le Atua o le Tama o o tatou agaga)

Faaaliga 20:12–13; 2 Nifae 9:10–11; Alema 5:15–21 (O le a toetutu tagata uma ma tutu i luma o le Atua ina ia faamasinoina)

2 Nifae 2:22–25 (O Le Pau o Atamu na oo mai ai le ola faaletino)

Alema 34:32–33 (O le olaga lenei o le taimi lea e salamo ai)

Alema 40:11–14 (O le tulaga o tagata pe a maliliu)

MF&F 76:30–113 (Faamatalaga o malo o le mamalu)

Weatherford T. Clayton, “O Le Fuafuaga Mamalu a lo Tatou Tama,” Ensign po o le Liahona, Me 2017, 26–29

Thomas S. Monson, “O Le Ala Atoatoa i le Fiafia,” Ensign po o le Liahona, Nov. 2016, 80–81

“Ata o le Faaolataga,” Faamaoni i le Faatuatua (2004), 115–17

Vitio: “O Loto o Alii o le a Toilalo ai i Latou”

Vitio: “O Le Ata o le Faaolataga”; tagai foi i le DVD Punaoa Vaaia o le Mataupu Faavae ma Feagaiga

Aoao atu i le ala a le Faaola

Sa faia e le Faaola ni fesili sa faaosofia ai i latou sa Ia aoaoina ina ia mafaufau loloto i ai. Sa Ia fiailoa moni a latou tali. E mafai faapefea ona e faaaogaina fesili e fesoasoani atu ai i alii talavou ia mafaufau loloto e uiga i upumoni o le talalelei?

Tuu atu i alii talavou e taitai

Tagai i se faataitaiga o le lisi o mataupu talanoaina o le fonotaga a le korama.

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Tagai i isi manatu e aoao mai ai ma aoao atu.

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

• Ia valaaulia alii talavou e tusi i lalo se upu po o se fuaitau se tasi latou te manatua mai le lesona o le vaiaso ua tuanai ma faasoa atu la latou upu po o le fuaitau i le korama.

• Aumai ni ata po o ni mea faitino se tolu e faatusa i le Foafoaga, o le Pau, ma le Togiola (mo se faataitaiga, kelei mo le Foafoaga, ma se apu mo le Pau, ma se ipu o le faamanatuga mo le Togiola). Fai atu i alii talavou e faasoa atu mea latou te iloa e uiga i nei mea na tutupu ma le pogai ua taua ai.

Aoao faatasi

Tagai i isi manatu e aoao mai ai ma aoao atu.

O gaoioiga taitasi o loo i lalo o le a fesoasoani i tagata o le korama e aoao ai e uiga i le ata o le faaolataga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau korama:

• Fai atu i se tasi o alii talavou e sau saunia e faasoa mai se tala mai le saunoaga a Peresitene Thomas S. Monson “O Le Ala Atoatoa i le Fiafia.” O le a faapefea ona tali e uso o le korama ia fesili nei  e uiga i le ata o le faaolataga pe afai o latou talanoa atu i se uo e ese lana faatuatuaga: O fea na tatou o mai ai? Aisea ua tatou i ai iinei? O fea tatou te o i ai pe a uma lenei olaga? Valaaulia i latou e faaaoga le saunoaga a Elder Weatherford T. Clayton“O Le Fuafuaga Mamalu a lo Tatou Tama” faatasi ai ma mau e saunia ai se tali i se tasi o fesili. Aisea e taua ai le iloa o tali i nei fesili? 

• Ia valaaulia se tasi o le korama e aoao atu se vaega o lenei lesona. E mafai ona ia faia lenei mea o se vaega o lana fuafuaga o le Tiute i le Atua, e aoaoina ma aoao atu e uiga i le ata o le faaolataga (tagai i le “Malamalama i le Aoaoga Faavae,” itulau e 18, 42, po o le 66).

• O ni nai aso o muamua atu, ia fai atu i nisi o le korama e o mai saunia e aoao atu i le korama e uiga i se vaega o le ata o le faaolataga (e pei o le muai olaga, olaga i le tino, lalolagi o agaga, ma isi lava) e faaaoga ai le Talai La’u Talalelei po o le Faamaoni i le Faatuatua. Tusi se ata faafaatusa o le ata o le faaolataga i luga o le laupapa (mo se faataitaiga, tagai i le Talai La’u Talalelei,54), ma ia valaaulia ia alii talavou taitoatasi e aoao atu lana autu atofaina. Fai atu i alii talavou po o le a se eseesega ua faia i o latou olaga ina ia iloa ai e uiga i le ata o le faaolataga.

• Tofi atu i alii talavou taitoatasi se fuaitau se tasi pe sili atu o mau o loo i lenei otootoga. Fai atu i ai e faitau lana vaega e iloa ai po o le a le vaega o le ata o le faaolataga o loo aoao mai e le fuaitau. Ia valaaulia o ia e faasoa atu se mea ua ia aoaoina mai lana fuaitau. E faapefea ona aafia le ala tatou te vaai ai ia i tatou lava ona o lo tatou iloa e uiga i le ata o le faaolataga? isi? Le lalolagi o loo siomia ai i tatou?

• Faitau faatasi o se korama le Alema 12:30 ma le Alema 42:13–15. Ia valaaulia alii talavou e vaavaai mo ni fuaitau o loo faaaoga e faamatala ai le ata o le faaolataga. O le a se mea o aoao mai e nei fuaitau e uiga i le fuafuaga? Faaali le vitio “O Loto o Alii o le a Toilalo ai i Latou,”; ma fai atu i alii talavou e vaavaai pe na faapefea ona faamanuiaina Elder Russell M. Nelson ona o le malamalama i le ata o le faaolataga. Ia valaaulia alii talavou e faasoa atu ni auala ua faamanuiaina ai i latou i lenei malamalama.

• Ia mautinoa ua tofu tagata o le korama ma se kopi o le Faamaoni i le Faatuatua, ma ia atofa atu i alii talavou taitoatasi se numera mai le va o le 1 ma le 3. Ia fai atu ia i latou na tofia i le numera 1 ia aoao mea uma e mafai ona latou aoaoina mai le Faamaoni i le Faatuatua e uiga i le muai olaga (itulau e 115–16); fai atu ia i latou o le numera 2 e aoao e uiga i le olaga i le tino (itulau e 116); ma fai atu ia i latou o le numera 3 e aoao e uiga i le olaga pe a mavae le oti (itulau e 116–17). Tuu atu ia i latou e galulue i vaega o a latou numera e tapena se otootoga puupuu o mea latou te aoaoina, ma tuu atu e faailoa atu i le korama atoa. Ia valaaulia alii talavou e vaai faalemafaufau pe ono faapeī o latou olaga pe ana faapea latou te le maua lenei malamalama e uiga i le ata o le faaolataga.

Fai atu i alii talavou e faasoa atu mea ua latou aoaoina i le aso. Pe ua latou malamalama lelei i le ata o le faaolataga? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Motugaafa faafaiaoga

“O lau lava sauniuniga faaleagaga e tele sona sao i le atemosifia mo le aoaoina. Afai e te saunia faaleagaga, e te aumaia se agaga o le filemu, alofa, ma le faaaloalo. O i latou e te aoaoina o le a sili atu ona lagonaina le malupuipuia i le mafaufau loloto ma le talanoaina o mea e faavavau le aoga” (O Le Aoao Atu, E Leai Se isi Valaauga E Sili Ai [1999], 85).

Valaaulia e faatino

Tagai i isi manatu e aoao mai ai ma aoao atu.

E faaiuina e le uso o le au peresitene o le korama lea o loo taitai le fonotaga. E mafai ona ia:

• Taitai se talanoaga e uiga i le ala e musuia ai i tatou e le malamalama i le ata o le faaolataga ina ia avea ma ni tagata lelei atu ua umia le perisitua.

• Fai atu i tagata o le korama e faasoa mai lo latou agaga faafetai mo le ata o le faaolataga.