O le a le uiga o le lagolagoina o ou taitai o le Ekalesia?

I le avea ai ma tagata o le Ekalesia ua ia i tatou le avanoa e lagolago ai i latou ua valaauina e le Alii e auauna atu. Tatou te siiina o tatou lima e faailoa atu ai lo tatou lagolagoina o le Au Pulega Aoao ma taitai o le Ekalesia faapea ma taitai taitasi i o tatou uarota ma siteki—e aofia ai au peresitene o korama a le au Perisitua. O le lagolagoina o taitai e aofia ai le sili atu nai lo le na o le siiina o le lima—o lona uiga o lo tatou tutu lea e lagolago i latou, tatalo mo i latou, talia galuega ma tofiga mai ia i latou, usitai ia latou fautuaga, ma aloese mai le faitioina o i latou.

Saunia oe lava ia faaleagaga

O le a se mea e te faia e lagolago ai taitai o le Ekalesia? Na faapefea ona faamanuiaina oe i le faia o lea mea?

O anafea na e vaaia ai le lagolagoina e tagata o umia le Perisitua Arona ia taitai o le Ekalesia—e aofia ai le epikopo po o uso o le latou au peresitene o le korama? O a ni aafiaga e mafai ona latou faasoa atu i le tasi ma le isi?

Ia suesue ma le agaga tatalo ia mau ma punaoa nei. O le a se mea o le a musuia uso o le korama e lagolago o latou taitai o le Ekalesia?

Esoto 17:8–12 (O Arona ma Huro o loo sii i luga lima o Mose)

MF&F 21:1–6; 124:45–46 (O i latou o le a faalogo i le siufofoga o auauna a le Alii o le a faamanuiaina)

1 Nifae 18:9-14; MF&F 84:23–25 (Faataitaiga o tagata o e na teena o latou taitai)

1 Tupu 17:8–16; 2 Tupu 5:8–14; (Faataitaiga o tagata o e na lagolagoina o latou taitai)

Henry B. Eyring, “Valaauina e le Atua ae Lagolagoina e Tagata,” Ensign po o le Liahona, Iuni 2012, 4–5

James E. Faust, “Valaaulia ma Filiilia,” Ensign po o le Liahona, Nov. 2005, 53–55

Russell M. Nelson, “ Lagolagoina o Perofeta, ” Ensign po o le Liahona, Nov. 2014, 74-77

Aoao atu i le ala a le Faaola

Na faatuatuaina e le Faaola Ona soo, saunia i latou, ma tuu atu ia i latou tiutetauave taua e aoao atu ma auauna atu i isi. O lenei auala na Ia fesoasoani ai ia i latou ina ia liua loloto atili i Lana talalelei. E mafai faapefea ona e mulimuli i le faataitaiga a le Faaola i le avea ai ma se faufautua i e umia le Perisitua Arona?

Tuu atu i alii talavou e taitai

Tagai i se faataitaiga o le lisi o mataupu talanoaina o le fonotaga a le korama.

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Tagai i isi manatu e aoao mai ai ma aoao atu.

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

• Fesili atu i alii talavou po o le a se mea sa latou faia e faaaoga ai mea sa latou aoaoina i le vaiaso ua tea. Faamata e i ai ni a latou fesili po o ni malamalamaaga faaopoopo e uiga i mea sa latou aoaoina?

• Tusi le autu o le lesona lenei i luga o le laupapa, ma fai atu i uso o le korama e mafaufau i nisi upu e tutusa uiga ma le upu lagolago. Ona fai atu lea ia i latou e lisi i luga o le laupapa ia suafa o taitai i le uarota, e aofia ai au peresitene o a latou korama. O le a se mea o faia e alii talavou e lagolago ai nei tagata?

Aoao faatasi

Tagai i isi manatu e aoao mai ai ma aoao atu.

O le a fesoasoani gaoioiga taitasi nei i tagata o le korama ia malamalama i le uiga o le lagolagoina o taitai o le Ekalesia. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

• Ao lei faia le fonotaga a le korama, valaaulia ia alii talavou e faitau i le lauga a Peresitene Russell M. Nelson “Lagolagoina o Perofeta” ma o mai saunia e faasoa mai se mea mai le lauga na musuia ai i latou e lagolagoina ia Peresitene Thomas S. Monson.

• Vaevae le korama i ni vaega, ma tuu atu i vaega taitasi se vaega o le lauga a Peresitene James E. Faust “Valaauina ma Filifilia” po o le Mataupu Faavae ma Feagaiga 124:45–46. Fai atu ia i latou e vaavaai mo faamanuiaga na folafola mai ia i latou o e o lagolagoina o latou taitai ma lapataiia i latou e le o faia. Valaaulia i latou e faasoa mai mea na latou maua ma faasoa mai tala mai le lauga e faaalia ai nei faamanuiaga ma lapataiga.

• Fai atu i alii talavou e faitau le Esoto 17:8–12 taitoatasi, ma valaaulia se tasi o i latou e otooto mai le tala i ana lava upu. E faapefea ona faatatau le tala lenei ia i tatou ao tatou lagolagoina o tatou taitai o le Ekalesia? E faapefea ona tatou faapei o Arona ma Huro pe a tatou lagolagoina o tatou peresitene o le korama ma isi taitai?

• Valaaulia nisi o alii talavou e sue se faataitaiga o tagata i mau o e na teena o latou taitai, e pei o Lamana ma Lemuelu (tagai 1 Nifae 18:9–14) po o le aiga o Isaraelu (tagai MF&F 84:23–25). Fai atu i le isi vaega o alii talavou e sue faataitaiga o tagata o e na mulimuli i o latou taitai, e pei o le fafine Sarefata ua oti lana tane (tagai 1 Tupu 17:8–16) poo Naamanu (2 Tupu 5:8–14). Fai atu ia i latou e faasoa mai a latou tala ma faamatala mai po o a mea o latou aoao mai e uiga i taunuuga o le teenaina po o le faamamaluina o taitai o le Ekalesia.

• Valaaulia alii talavou e faitau le tusiga a Peresitene Henry B. Eyring“Valaauina e le Atua ae Lagolagoina e Tagata,” ma vaavaai mo faataitaiga o auala o tatou lagolagoina ai o tatou taitai o le Ekalesia. Aumai ni kopi o mekasini a le Ekalesia, ma fai atu i alii talavou e sue ma faasoa mai ni ata i mekasini o suitulaga i auala e lagolagoina ai taitai o le Ekalesia. O a mea e fai e alii talavou e lagolago ai o latou taitai, e aofia ai lo latou au peresitene o le korama? O le a se mea latou te ono fai atu pe a latou faalogo o faitioina e se tasi o latou taitai?

Fai atu i alii talavou e faasoa mai mea na latou aoaoina i le aso. Pe o latou malamalama i le uiga o le lagolagoina o taitai o le Ekalesia? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

”Ina ia fesoasoani i tagata o loo aoaoina e tali i fesili, atonu e te manao e ta’u atu muamua ia i latou se mea a’o le’i faitauina pe aoaoina atu, o le a e talosagaina ai ni a latou tali. ... Mo se faataitaiga, e mafai ona e faapea atu, “Faalogo a’o o’u faitauina atu le fuaitau lenei ina ia mafai ona outou fetufaai mai ai ni mea e sili ona outou fiafia i ai” po o le “Ao faitauina lenei mau, vaai pe mafai ona outou malamalama i le mea o loo ta’uina mai e le Alii e uiga i le faatuatua(O Le Aoao Atu, E Leai Se Isi Valaauga E sili Ai [1999], 72).

Valaaulia e faatino

Tagai i isi manatu e aoao mai ai ma aoao atu.

O le alii talavou o loo taitai e faaiuina le fonotaga. E mafai ona ia:

• Faasoa atu ona lagona e uiga i taitai ua valaauina e pulefaamalumalu i lenei taimi.

• Taitai se talanoaga puupuu e uiga i mea e mafai e uso o le korama ona fai ina ia sili atu ona atoatoa le lagolagoina o o latou taitai o le Ekalesia.