Aisea e tatau ai ona ou auauna atu i se misiona?

Na saunoa mai Peresitene Thomas S. Monson: “o alii talavou agavaa uma lava, ma gafatia e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou ua tele naua mea ua tuuina mai i ai. Alii talavou, ou te apoapoai atu ia te outou, ia saunia mo le galuega faafaifeautalai”(“A o Tatou Toe Potopoto Faatasi Ai,” Ensign po o le Liahona, Nov. 2010, 5–6).

Saunia oe lava ia faaleagaga

Mafaufau i le olioli na e maua po o se isi e te masani ai i le auauna atu i se misiona talai. O a faamanuiaga ua oo mai i lou olaga ona o le galuega faafaifeautalai?

O a aafiaga ua maua e alii talavou i le faasoaina atu o le talalelei i isi? O le a se mea e mafai ona e fai e fesoasoani ai i e o umia le Perisitua Arona e faateleina lo latou manao e auauna atu i se misiona?

Suesue ma le agaga tatalo mau ma punaoa nei. O le a sou lagona i le mea o le a musuia ai alii talavou ia saunia mo le auaunaga faafaifeautalai?

Mataio 28:19–20; MF&F 50:13–14; 88:81 (O loo i ai so tatou tiute e faasoa atu le talalelei)

MF&F 4 (Uiga tatou te agavaa ai e auauna atu i le Alii)

MF&F 18:9–16 (Ua tele lava le taua o agaga i le silafaga a le Atua)

Neil L. Andersen, “Sauniaina o le Lalolagi mo le Afio Mai Faalua,” Ensign po o le Liahona, Me 2011, 49–52; tagai foi i le vitio “O Lou Aso mo se Misiona”

3:32

W. Christopher Waddell, “O Le Avanoa i le Olaga” Ensign po o le Liahona, Nov. 2011, 50–52

Vitio: “Galuega Faafaifeautalai: O se Tiute Faaleperisitua”

2:6

Aoao atu i le ala a le Faaola

Na valaaulia e le Faaola Ona soo ina ia faatino le faatuatua ma ola i mea moni na Ia aoaoina atu. Na ia maua avanoa mo i latou e aoao ai e ala i aafiaga (tagai Luka 5:1–11). O a mea e mafai e alii talavou ona fai nei o le a musuia ai i latou i se manao e auauna atu i se misiona talai?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou taitasi e faaalu se minute e tusi ai i lalo le tele o mea e mafai ona ia manatua mai le lesona o le vaiaso ua tea. Valaaulia alii talavou e faasoa mai a latou lisi.
Vaevae alii talavou i ni vaega, ma valaaulia i latou e talanoaina ni tali talafeagai i le fesili “Pe aisea e tatau ai ona ou auauna atu faamisiona talai?” Valaaulia se tasi o alii talavou mai vaega taitasi e tusi ni nai a latou tali i le laupapa.

Aoao faatasi

O gaoioiga taitasi nei o le a fesoasoani i uso o le korama e malamalama ai pe aisea e tatau ai ona latou auauna atu i se misiona. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e faitau le Mataupu Faavae ma Feagaiga 18:9–16 taitoatasi ma vaavaai mo tali i le fesili “Aisea ua tuuina ai e le Alii i e umia le perisitua le tiute e faasoa atu le talalelei? Valaaulia nisi o i latou e faasoa mai a latou tali i le korama. Aisea e taua tele ai le agaga i le silafaga a le Atua? O a aafiaga na maua e alii talavou i le faasoaina atu o le talalelei e mafai ona latou faasoa atu i le korama?
Faaali le vitio “Galuega Faafaifeautalai: O se Tiute Faaleperisitua.”Valaaulia ni nai alii talavou e faasoa mai o latou lagona e uiga i upu a Peresitene Monson. Fautuaina alii talavou e tusi i lalo pe aisea latou te mananao ai e auauna atu faamisiona talai, ma valaaulia i latou e faaali i luga mea na latou tusia i se nofoaga e mafai ai ona faamanatu mai ia i latou lo latou manao e auauna atu.

2:6
Faitau faatasi se tasi po o le sili atu o mau ua fautuaina mai i lenei otootoga, ona fai atu lea i alii talavou pe o le a so latou manatu pe o le a faapefea ona ese le lalolagi pe ana faapea e iloa uma e tagata le talalelei ma ola ai. O a faigata po o luitau i le lalolagi i le taimi nei e foia pe afai tatou te ola i le talalelei? Ua faapefea ona ese lou olaga ona o le talalelei?
Faaali le vitio “O Lou Aso mo se Misiona” (pe faitau faatasi o se korama le aafiaga o Sid Going i le lauga a Elder Neil L. Andersen Sauniaina o le Lalolagi mo le Afio Mai Faalua”). Fai atu i uso o le korama e lisi nisi o mea e ono taofia ai alii talavou mai le o i se misiona. Fesoasoani ia i latou e faatusatusa lenei lisi i faamanuiaga maoae e maua mai le auaunaga faafaifeautalai.

3:32
Tusi le fesili mai le autu o lenei otootoga i le laupapa. Valaaulia uso o le korama e vaavaai mo tali i lenei fesili a o latou faitauina le Mataupu Faavae ma Feagaiga 4:2–4 po o le saunoaga lenei mai ia Peresitene Russell M. Nelson: “O le faaiuga e auauna atu i se misiona o le a faafuaitino ai le taunuuga faaleagaga o le faifeautalai, o lona toalua, ma a laua fanau mo tupulaga a sau. O se manao e auauna atu o se fua faalenatura lea o le liua, agavaa, ma le sauniuniga a se tagata” (“Fesili i Faifeautalai!E Mafai ona Latou Fesoasoani Atu ia te Oe!” Ensign po o le Liahona, Nov. 2012, 18). Pe a faatagaina e le epikopo, valaaulia se faifeautalai ua maea le misiona e faasoa mai i le korama pe na faapefea e lana auaunaga faamisiona ona faamanuiaina lona olaga.

Fai atu i alii talavou e faasoa mai mea na latou aoaoina i le aso. Pe ua latou malamalama pe aisea e tatau ai ona latou auauna atu faamisiona talai. O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“O se faiaoga tomai e le mafaufau faapea, ‘o le a se mea e tatau ona ou faia i le vasega i le aso?’ ae fesili, ‘O le a se mea o le a fai e tamaiti o la’u vasega i le aso?’; e le o le, ‘O le a le mea o le a ou aoao atu i le aso?’ ae, ‘O le a faapefea ona ou fesoasoani i tamaiti o lau vasega ia iloa le mea e moomia ona latou iloa?’” (Virginia H. Pearce, i O Le Aoao Atu E Leai Se Isi Valaauga E Sili Ai [1999], 64).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa mai mea o loo ia faia nei e saunia ai e auauna atu faamisiona talai.
Valaaulia le korama e fai se sini e tauloto le Mataupu Faavae ma Feagaiga vaega 4 i isi masina o lumanai.
Valaaulia uso o le korama e faataunuu se tasi o gaoioiga mo le saunia e auauna atu faamisiona talai i le tusi Tiute i le Atua itulau (87–88).