O a o’u tiute i le avea ai ma se tasi e umia le Perisitua Arona?

Na fetalai mai le Alii o alii uma lava ua faauuina i le perisitua e tatau ona “aoao lona tiute” ma “galue … i le filiga atoa”(MF&F 107:99). I le avea ai ma e umia le Perisitua Arona, tatou te faia sauniga o le perisitua, auauna atu i isi, ma valaaulia tagata uma ia o mai ia Keriso.

Saunia oe lava ia faaleagaga

Mafaufau i ou lagona i le taimi muamua na e maua ai le Perisitua Arona. O le a le uiga ia te oe o le mauaina o lenei pule? Na faapefea e le mauaina o le perisitua ona aafia ou manatu ma amioga?

O le tele lava o e umia le Perisitua Arona ua iloa lo latou tiute o le faatinoina o le faamanatuga ae atonu e le o iloa lo latou tiute o le auauna atu i isi ma valaaulia isi e o mai ia Keriso. O le a se mea e mafai ona e faia e fesoasoani ai i alii talavou ia latou iloa ma faataunuu o latou tiute faaleperisitua?

Suesue ma le agaga tatalo mau ma punaoa nei. O le a se mea e mafai ona e faasoa atu i alii talavou e fesoasoani ai ia latou malamalama i o latou tiute?

MF&F 20:46–59; 84:111 (O tagata e umia le Perisitua Arona e faatinoina sauniga ma valaaulia tagata uma ia o mai ia Keriso)

MF&F 84:33–34; 107:99 (O tagata e umia le Perisitua Arona e tatau ona aoao o latou tiute ma ia faamaoni i lo latou faataunuuina.

MF&F 107:68 (O tagata e umia le Perisitua Arona e auauna atu i isi ao latou fesoasoani i le epikopo i le vaaia o mea faaletino)

Gérald Caussé, “Saunia le Ala,” Ensign po o le Liahona, Me 2017, 75–77

Henry B. Eyring, “O Aiga e Faavavau,” Ensign po o le Liahona, Me 2016, 81–84

Henry B. Eyring, “E Le o Tuua Na o Outou i le Galuega,” Ensign po o le Liahona, Nov. 2015, 80–83

Henry B. Eyring, “O Le Alii Perisitua,” Ensign po o le Liahona, Me 2014

Faataunuuina o Lo’u Tiute i le Atua (2010), 22, 46–47, 70–71

Vitio: “Faataunuuina o Lou Tiute i le Atua,” “Faatuatua i le Perisitua”

4:56

1:58

Aoao atu i le ala a le Faaola

I nofoaga uma lava, na avea le Faaola ma se faataitaiga ma se aoao i Ona soo. Na Ia aoaoina i latou ia tatalo i le tatalo faatasi ma i latou. Na Ia aoaoina i latou ia alolofa ma auauna atu i le ala na Ia alofa ma auauna atu ai. Na ia aoaoina i latou pe faapefea ona aoao atu Lana talalelei i le ala na Ia aoao atu ai. Fesoasoani i alii talavou e faataunuu o latou tiute e ala i le aoao atu o le talalelei e pei ona aoao atu e le Faaola.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e faasoa mai se mea o latou manatua mai le lesona o le vaiaso ua tea. O a ni a latou fesili o loo i ai pea? Na faapefea ona latou ola i mea na latou aoaoina i le vaiaso ua tea?
Tusi i le laupapa vaega e tolu o tiute o le perisitua o loo fautuaina mai i Tiute i le Atua: “Faatautaia o Sauniga o le Perisitua,” “Auauna atu i isi,” ma le “Valaau Atu I Tagata Uma Ia O Mai Ia Keriso.” Fai atu i alii talavou e tusi i le laupapa le tele o o latou tiute faaleperisitua latou te maua i vaega taitasi. Ia toe tagai i tua i lenei lisi i le lesona atoa, ma faaopoopo i ai a o maua e alii talavou isi tiute.

Aoao faatasi

O gaoioiga taitasi nei o le a fesoasoani i uso o le korama e malamalama ai i o latou tiute i le avea ai ma e umia le Perisitua Arona. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia se uso o le korama ia sau saunia e faamatala le tala i le amataga o le lauga a Bishop Gérald Caussé “Saunia le Ala.” Na faapefea e aafiaga o Bishop Caussé i le Ekalesia ona saunia o ia mo le galuega na ia mauaina? Tusi Ioane le Papatiso ma le Perisitua Arona i luga o le laupapa. Valaaulia alii talavou ia suesue i le lauga a Bishop Caussé mo mea latou te aoaoina e uiga i le auala e “saunia ai le ala” e Ioane le Papatiso ma ē umia le Perisitua Arona. O le a se mea e mafai ona latou faia e saili ai ni avanoa e fesoasoani ai i ē umiaina le Perisitua Mekisateko? O a ni aafiaga ua uma ona latou mauaina i le auauna atu ai i ē umiaina le Perisitua Mekisateko?
Valaaulia ia alii talavou e tusi i luga o se fasipepa se aafiaga i le taimi na latou mauaina ai le fesoasoani a le Tama Faalelagi. Tuu pepa i totonu o se koneteina ma fai atu i alii talavou e filifili se pepa ma faitau atu i le vasega. E mafai foi ona e tuuina i totonu o le koneteina ni tala mai le saunoaga a Peresitene Henry B. Eyring “E Le o Tuua Na o Outou i le Galuega” . O a ni mea o aoao mai e nei tala ma aafiaga i alii talavou e uiga i le auala o le a fesoasoani mai ai le Alii ia i latou i la latou auaunaga faaleperisitua?
Valaaulia alii talavou e faitau e uiga i o latou tiute faaleperisitua i le MF&F 20:46–59 ma le Tiute i le Atua (itulau 23, 46–47, po o le 70–71). Fai i ai e faailoa mai tiute o le perisitua ma lisi i luga o le laupapa. Fesili atu i alii talavou pe o a tiute na latou aoaoina latou te lei iloaina o loo ia i latou. O le a le mea e mafai ona latou faia e faataunuu ai nei tiute?
Valaaulia alii talavou e suesue i mau ma faailoa mai faataitaiga o tagata taitoatasi na faataunuuina o latou tiute faaleperisitua (mo se faataitaiga, Mataio 3:1–6, 13–17; Iakopo 1:18–19; Alema 15:16–18; 3 Nifae 18:1–5). Fai atu ia i latou e faasoa mai a latou faataitaiga ma faailoa mai po o a vaega mai le Tiute i le Atua e i ai faataitaiga taitasi (“Faatinoina o Sauniga o le Perisitua,” “Auauna Atu i Isi,” po o le “Valaau Atu i Tagata Uma Ia O Mai Ia Keriso”). Na faapefea ona faamanuiaina tagata i nei mau e ala i le auaunaga faaleperisitua?
Fai atu i alii talavou e faitau mai ni vaega o le lauga a Peresitene Henry B. Eyring “O Aiga e Faavavau” po o le “O Le Alii Perisitua” (pe matamata i le vitio “Faatuatua i le Perisitua”) ma faasoa atu ni mea na uunaia ai i latou e faataunuu o latou tiute faaleperisitua, i o latou aiga po o soo se mea lava. Valaaulia alii talavou e tusi se aafiaga na latou maua ina ua latou faaaogaina lo latou perisitua po o se mea na latou aoao mai se faataitaiga a se tasi e umia le perisitua. E faapefea ona avea le umiaina o le perisitua o se faamanuiaga i alii talavou ma o latou aiga?

1:58

Fai atu i alii talavou e faasoa mai mea na latou aoaoina i le aso. Pe ua sili atu ea lo latou malamalama i o latou tiute faaleperisitua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Valaaulia alii talavou e fai ni fuafuaga i se tasi o vaega o “Tiute o le Perisitua” o la latou tusi Tiute i le Atua ma faasoa e le tasi i le isi mea ua latou fuafua e fai.
Lu’i uso o le korama e faasoa i se tasi o le aiga se mea na ia aoaoina e uiga i o latou tiute o le perisitua.