E mafai faapefea ona fesoasoani se faamanuiaga faapeteriaka ia te au?

O se faamanuiaga faapeteriaka o se faaaliga patino mo o tatou olaga. E fesoasoani tatou te malamalama ai i o tatou agavaa ma faamanuiaga e mafai ona tatou maua pe afai tatou te faamaoni. E mafai ona i ai folafolaga, aoaiga, po o lapataiga e taiala ai o tatou olaga. E fesoasoani ai foi tatou te iloa ai e silafia i tatou e le Tama ma e amanaia i tatou taitoatasi.

Saunia oe lava ia faaleagaga

Afai ua maua lou faamanuiaga faapeteriaka, o faapefea ona taialaina ai lou olaga? O faapefea ona fesoasoani ai ia te oe i taimi o puapuaga? O faapefea ona musuia ai oe?

O a ni auala e mafai ai ona avea se faamanuiaga faapeteriaka ma se taiala i olaga o alii talavou o loo e aoaoina? Aisea e taua ai mo i latou le iloa o lo latou tupuaga i le aiga o Isaraelu? E mafai faapefea ona e fesoasoani ia i latou ia saunia mo le mauaina o se faamanuiaga faapeteriaka?

Ao e sauniuni, ia suesue ma le agaga tatalo ia mau ma punaoa nei. O le a se mea na e iloaina o le a sili ona aoga i alii talavou o loo e aoaoina?

Alema 16:16–17; 3 Nifae 17:2–3 (E tatau ona saunia o tatou loto e talia faatonuga mai le Alii)

3 Nifae 20:25–27 (O le aiga o Isaraelu e manuia ai aiga i le lalolagi)

MF&F 82:10; 130:20–21 (E faalagolago faamanuiaga i le usiusitai)

Henry B. Eyring, “Fesoasoani ia i Latou e Faatutu ni Sini Maualuluga,” Ensign po o le Liahona, Nov. 2012, 60-67

Boyd K. Packer, “Fautuaga i le Autalavou,” Ensign po o le Liahona, Nov. 2011, 16–19

Carlos A. Godoy, “O Loo I Ai se Fuafuaga a le Alii mo i Tatou!” Ensign po o le Liahona, Nov. 2014, 96-98

“E Uiga i Faamanuiaga Faapeteriaka,” New Era, Mar. 2004, 32–35; po o leLiahona, Mati 2004, 18–21

“Faamanuiaga Faapeteriaka,” Faamaoni i le Faatuatua (2004), 47–49

Aoao atu i le ala a le Faaola

E silafia e le Faaola ia alii talavou i la outou korama, ma e Na te silafia ituaiga tagata o le a avea ai i latou. E i ai Sana galuega mo i latou taitoatasi e fai, ma e Na te fia fesoasoani ia i latou i le faataunuuina o lena galuega. E faapefea ona e aoaoina ia alii talavou e uiga i le alofa o le Faaola mo i latou ao e talanoa e uiga i faamanuiaga faapeteriaka?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faaali atu se mea faitino po o se ata e faamanatu ai i alii talavou le lesona o le vaiaso ua tea. O a ni aafiaga sa latou mauaina i le faaaogaina o mea sa latou aoaoina? Fai atu ia i latou pe i ai nisi a latou fesili po o ni manatu faaalia e uiga i le autu o lena lesona.
Tusi i luga o le laupapa, “E mafai faapefea ona fesoasoani se faamanuiaga faapeteriaka ia te au?” Fai atu i alii talavou e fautua mai ni tali i lenei fesili. Toe tagai i le fesili lea i le gasologa o le lesona. E avea ma se vaega o la outou talanoaga, mafaufau e faasoa atu le tala a Elder Carlos A. Godoy i le auala na fesoasoani ai lana faamanuiaga faapeteriaka ia te ia e faia ni filifiliga taua i lona olaga (tagai “O Loo I Ai se Fuafuaga a le Alii mo i Tatou!” Ensign po o le Liahona, Nov. 2014, 96-98).

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia aoao e uiga i faamanuiaga faapeteriaka. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

Valaaulia se tasi po o le sili atu foi o alii talavou e faasoa mai ni o latou aafiaga i le mauaina o se faamanuiaga faapeteriaka (pe faasoa mai sou lava aafiaga). Na faapefea ona fesoasoani o latou faamanuiaga faapeteriaka ia i latou? (Faamanatu i le korama o anotusi faapitoa o faamanuiaga faapeteriaka e paia ma e le tatau ona faasoaina atu.) Otioti se kopi o le tusiga “E Uiga i Faamanuiaga Faapeteriaka”, e tofu ma le fesili ma le tali. Valaaulia se tagata o le korama e filifili se fasi pepa se tasi o le tusiga ma faasoa atu le fesili ma le tali i le korama. O a nisi fesili o i ai a alii talavou?
Pe afai e faatagaina e le epikopo, valaaulia le peteriaka o le siteki e saunoa atu i le korama e uiga i faamanuiaga faapeteriaka. Uunaia ia alii talavou e fai mai ni a latou fesili.
Fai atu i alii talavou e tusi i lalo ni a latou fesili e uiga i faamanuiaga faapeteriaka. I le avea ai ma korama, tagai mo ni tali i le Faamaoni i le Faatuatua,itulau 47–49.
Faitau faatasi o se korama ia manatu faaalia o Peresitene Boyd K. Packer e uiga i lona faamanuiaga faapeteriaka i le “Fautuaga mo Autalavou” po o le tala a Peresitene Henry B Eyring e uiga i le mauaina o lona faamanuiaga i le “Fesoasoani ia i Latou e Faatutu ni sini Maualuluga.” Fai atu i alii talavou e faailoa mai ni auala e mafai ai ona fesoasoani se faamanuiaga faapeteriaka ia i latou ma faasoa mai se mea na latou mauaina.
Valaaulia ia alii talavou e faitau ia mau o loo fautuaina atu i lenei otootoga ma faasoa mai ni mea o latou lagonaina o aoao mai e mau taitasi ia i latou e uiga i faamanuiaga faapeteriaka.

Fai atu i alii talavou e faasoa mai ni mea sa latou aoaoina i le aso. Pe ua sili atu so latou malamalama i faamanuiaga faapeteriaka? O a ni o latou lagona po o manatu o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Afai e tuuina mai e se tasi se fesili, mafaufau e valaaulia isi e taliina nai lo lou taliina e oe lava ia. Mo se faataitaiga, e mafai ona e faapea atu, “O se fesili manaia tele lena. O le a se manatu o le toatele o outou? Po o le “E mafai e se tasi ona fesoasoani mai i le fesili lenei?’” O Le Aoao Atu, E Leai Se Isi Valaauga E Sili Ai (1999), 4.

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Valaaulia ia tagata o le korama e lei mauaina o latou faamanuiaga faapeteriaka ina ia faia se mea patino e saunia ai.
Valaaulia ia tagata o le korama ua maua o latou faamanuiaga faapeteriaka e suesue i ai e le aunoa.