O le a se mea na aoaoina ai e Peresitene Monson i latou e umia le Perisitua Arona?

O le vaega o la tatou tautoga ma feagaiga i le avea ai ma e umia le perisitua o le taliaina lea o auauna a le Alii, e aofia ai le perofeta soifua, ma ola e tusa ai ma upu na sau mai le fofoga o le Atua (tagai MF&F 84:36, 44). Na aoaoina e Peresitene Thomas S. Monson i latou e umia le Perisitua Arona ina ia naunautai ma agavaa i le faataunuuina o o latou tiute. Ua ia fautuaina i tatou e tutu atu mo mataupu faavae amiotonu, e tusa lava pe tatou te tutu na o i tatou. E finagalo o Ia ina ia tatou malamalama i le auala e faaaoga ai le perisitua ina ia faamanuiaina ai ma auauna atu ia i latou o loo siomia ai i tatou.

Saunia oe lava ia faaleagaga

O le a se mea na e aoaoina mai ia Peresitene Monson e uiga i le auaunaga faaleperisitua? Na faapefea ona e faaaogaina ana aoaoga ma faataitaiga?

Pe o iloa e alii talavou i lau korama ia mea sa saunoa atu ai Peresitene Monson ia i latou o e umia le perisitua i konafesi talu ai nei? E mafai faapefea ona e fesoasoani i alii talavou ina ia iloa le auala o loo faatatau ai ia savali a Peresitene Monson i o latou olaga?

Ia suesue ma le agaga tatalo ia saunoaga lata mai a Peresitene Monson i e umia le perisitua:

“Agalelei, Alofa Mama, ma le Alofa,” Ensign po o le Liahona, Me 2017, 66–67

“Mataupu Faavae ma Folafolaga,” Ensign po o le Liahona, Nov. 2016, 78–79

“O Se Tiutetauave Paia,” Ensign po o le Liahona, Me 2016, 85

“O Le Perisitua—o se Meaalofa Paia,” Ensign po o leLiahona, Me 2015, 88-90.

“Tausi i Poloaiga,” Ensign po o le Liahona, Nov. 2015, 83–85

Vitio: “Missionary Work: A Priesthood Duty,” “Lototele e Tu Na o Oe”

2:6

4:20

Aoao atu i le ala a le Faaola

I soo se tulaga lava, o le Faaola o loo avea ma se faataitaiga ma se faiaoga. Sa Ia aoaoina Ona soo i le tatalo e ala i le tatalo faatasi ma i latou. Sa Ia aoaoina i latou e alolofa atu ma auauna atu e ala i le auala sa Ia alofa atu ai ma auauna atu ai ia te i latou. Sa Ia aoaoina i latou i le ala e aoao atu ai Lana talalelei e ala i le auala sa Ia aoao atu ai. E mafai faapefea e oe, i le avea ai ma se umia le perisitua, ona avea ma se faataitaiga ma se faiaoga i alii talavou i lau korama?

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Vaevae ia alii talavou ia tofu paga. Fai i ai e fefaasoaai le tasi ma le isi i se mea sa latou manatuaina mai le lesona o le vaiaso ua te’a.
Iloilo faatasi o se korama le vaega o le “Tiute o le Perisitua” i le tusi Tiute i le Atua, ma tusi ia tiute i luga o le laupapa (tagai itulau 22 –23, 46–47, po o le 70–71). O le a se mea na aoao mai e Peresitene Monson e uiga i nei tiute? I le taimi o le lesona, tuu atu i alii talavou e faaopoopo i luga o le laupapa soo se mea na latou mauaina lea na aoao mai e Peresitene Monson e uiga i o latou tiute o le perisitua.

Aoao faatasi

O le a fesoasoani gaoioiga taitasi nei i tagata o le korama e suesue ai i savali talu ai nei a Peresitene Thomas S. Monson i e umia le perisitua. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

Tuu atu i alii talavou taitasi se kopi o se tasi o saunoaga lata mai a Peresitene Monson i e umia le perisitua (tagai i lauga o loo lisiina atu i lenei otootoga). Valaaulia ia alii talavou e saili se tala i le lauga, toe faamatala atu i le korama i a latou lava upu, ma faasoa atu se mea sa aoaoina mai e uiga i le auaunaga faaleperisitua.
Valaaulia ia alii talavou e faitau se tasi o lauga lata mai a Peresitene Monson ma saili se faamatalaga latou te mananao e manatuaina. Ia tofu alii talavou ma se tamai kata, ma fai atu i ai e tusi se faamatalaga i luga o le kata. Fai atu i uso o le korama e faasoa mai a latou faamatalaga ma faamatala mai pe aisea na latou filifilia ai na faamatalaga.
Faaali se vitio se tasi po o le lua foi o loo fautuaina mai i lenei otootoga, ma tuu atu i alii talavou se taimi e tusi ai se aotelega puupuu o ona manatu ma uunaiga. Valaaulia ia alii talavou e faasoa mai i le korama se mea sa latou tusiaina. E mafai faapefea i le mulimuli i le fautuaga a Peresitene Monson i nei vitio ona fesoasoani ia i tatou ia avea ma auauna perisitua sili atu ona lelei?
Fai i alii talavou e saili mau na faaaogaina e Peresitene Monson e aoao mai ai e uiga i le auaunaga faaleperisitua. Valaaulia i latou e fefaasoaai ma isi mea sa latou aoaoina mai nei mau. Uunai i latou e faaaoga ia vaefaamatalaga e saili ai nisi mau o loo aoao mai e uiga i le perisitua. E faapefea ona latou faaaogaina mea sa latou mauaina ao faataunuuina o latou tiute faaleperisitua?
Valaaulia le afa o le korama e saili se tasi o lauga a Peresitene Monson ma tagai mo ni mea na ia talosagaina le au perisitua e fai. Fai atu i le isi afa e saili i le lauga lava lea e tasi ma vaai po o a ni faamanuiaga na ia folafola mai. Fai atu i uso o le korama e faasoa mai ni mea sa latou mauaina. E faapefea ona latou faaaogaina lana fautuaga i la latou auaunaga faaleperisitua?

Fai atu i alii talavou e faasoa mai ni mea sa latou aoaoina i le aso. Pe o latou malamalama ea i le savali a Peresitene Monson ia i latou? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Aloese mai le taumafai e aoao atu mea uma lava e mafai ona tautalagia i se mataupu e tasi. O i latou o loo e aoaoina atonu ua i ai so latou malamalama i le mataupu. Ia manatua o lau lesona e le na o le pau lea o le taimi o le a latou aoao ai e uiga i le mataupu” (O Le Aoao Atu, E Leai Se Isi Valaauga E Sili Ai [1999], 106).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ona lagona e uiga ia Peresitene Monson.
Valaaulia isi sui o le korama e faasoa mai ni mea na uunaia ai i latou e uiga i mea sa latou aoaoina.
Valaaulia ia uso o le korama e faia pe faaleleia a latou fuafuaga i le vaega o le “Tiute o le Perisitua” i le tusi o le Tiute i le Atua e tusa ai ma mea sa latou aoaoina i le aso.