E mafai faapefea ona ou faamalosia la’u molimau?

O se molimau o se molimau faaleagaga o le upumoni e tuuina mai e le Agaga Paia. I le avea ai o tagata o le Ekalesia, ua ia i tatou le tiute paia ma le avanoa e maua ai a tatou lava molimau. Afai tatou te sailia se molimau e ala i le suesue, tatalo, ma le ola ai i le talalelei, o le a fesoasoani le Agaga Paia tatou te iloa ai mo i tatou lava e moni le talalelei.

Saunia oe lava ia faaleagaga

Na faapefea ona e mauaina lau lava molimau? Na faapefea ona uunaia e lau molimau lou olaga i le avea ai ma se tane, tama, perisitua, ma se soo o Keriso?

O le a sou iloa e uiga i molimau a alii talavou i lau korama? E faapefea ona uunaia o latou olaga i le taimi nei ma le lumanai i le mauaina o se molimau malosi? O le a sau mea e fai e faamalosiau atu ai i tagata o le korama ina ia malolosi a latou molimau?

Ia suesue ma le agaga tatalo ia mau ma punaoa nei. O le a se mea na e iloaina o le a musuia ai ia alii talavou e maua se molimau?

Ioane 7:16–17 (Afai tatou te faia le finagalo o le Alii, o le a tatou maua se molimau)

1 Korinito 2:9–13; Alema 5:45–46; MF&F 8:2–3 (E molimau mai le Agaga Paia i le mea moni)

Iakopo 1:5; 1 Nifae 10:17–19; 15:11; 3 Nifae 18:20; Moronae 10:3–5 (Ina ia maua se molimau, e tatau ona tatou ole atu ma saili ia maua)

Mosaea 26:3; Alema 12:11 (O mea faalavefau i le mauaina o se molimau)

MF&F 9:7–9 (E tatau ona tatou suesue mo i tatou lava ae tatou te lei ole atu)

Ronald A. Rasband, “Nei Galo ia te Oe,” Ensign po o le Liahona, Nov. 2016, 113–15

Dieter F. Uchtdorf, “Mauaina o se Molimau o le Malamalama ma le Upumoni,” Ensign po o le Liahona, Nov. 2014, 20-23

Jeffrey R. Holland, “Le Alii e, Ua Ou Faatuatua,” Ensign po o leLiahona, Me 2013, 93-95

Quentin L. Cook, “ E Mafai Ea Ona Outou Lagonaina Nei?” Ensign po o le Liahona, Nov. 2012, 6-9

“Molimau,” Faamaoni i le Faatuatua (2004), 113–16

Video: “Waiting on Our Road to Damascus”

3:46

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu, pe mafaufau i ni ou lava manatu, e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai atu i alii talavou e mafaufau i taunuuga o ni faataitaiga faigofie. Mo se faataitaiga, e mafai ona e fesili atu, “A ou faapauina i lalo le mea faitino lenei, o le a le mea e tupu?” po o le “A ou kiina le ki o le moli lenei, o le a le mea e tupu?” Fesili atu ia i latou pe faapefea ona latou iloa le mea o le a tupu i le taimi o nei faataitaiga ae e te lei faia. Faamatala atu o le faamalosia o se molimau e manaomia ai ona tatou faataitaia le upu (tagai Alema 32:27), ma a o tatou faia i le aluga o le taimi, e mafai ona tatou aoao e faalagolago i taunuuga o a tatou faataitaiga.
Valaaulia ia alii talavou e faasoa mai soo se aafiaga na latou mauaina i le faaaogaina o se mataupu faavae mai le lesona o le vaiaso ua tea. Atonu e te manao e faasoa mai sou lava aafiaga se tasi e fesoasoani e amatalia ai le talanoaga.

Aoao faatasi

O le a fesoasoani gaoioiga taitasi nei i tagata o le korama e iloa ai le ala e maua ai ni a latou lava molimau. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia se tasi o le korama e aoao atu se vaega o lenei lesona. E mafai ona ia faia o se vaega o lana fuafuaga o le Tiute i le Atua e aoao mai ma aoao atu e uiga i le tatalo ma le faaaliga patino (tagai “Malamalama i le Aoaoga Faavae,” itulau 18, 42, po o le 66).
Fai atu i nisi o alii talavou e faitau le 1 Nifae 10:17–19, ma fai atu i isi e faitau le Alema 5:45–47. O le a se mea na faia e Nifae ma Alema e maua ai ni a laua lava molimau? O a nisi mea e mafai ona aoaoina e alii talavou mai nei faataitaiga? O a nisi faataitaiga e mafai ona latou mauaina i tusitusiga paia? Valaaulia i latou e faasoa mai ni aafiaga sa latou mauaina lea na faamalolosia ai a latou molimau. O le a se mea e mafai ona latou faia e saili atili ai ni aafiaga faapenei?
Totofi alii talavou taitasi e suesue i se tasi o vaega autu o le saunoaga a Peresitene Dieter F. Uchtdorf “Mauaina o se Molimau o le Malamalama ma le Upumoni.” Valaaulia ia alii talavou e vaavaai po o le a se mea na aoao mai e Peresitene Uchtdorf e uiga i le mauaina o se molimau, ma fai i ai e faasoa mai ni mea sa latou mauaina. Tusi i luga o le laupapa, “O le mauaina o se molimau e pei__________.” Valaaulia ni nai alii talavou e o mai i le laupapa ma faasoa mai pe faapefea ona latou faatumuina le faamatalaga lenei.
Fai atu i alii talavou taitasi e faitau mai se tasi o mau o loo i lenei otootoga ma saili ni auala e maua ai ma faamalosia ai se molimau po o ni mea o le a taofiaina i tatou mai le mauaina o se molimau. A uma ona latou faasoa maia ni manatu, fai atu i ai e mafaufau i ni auala e mafai ai ona latou fesoasoani atu i nisi uso o le korama i le faamalolosia o a latou molimau. E mafai faapefea ona latou fesoasoani i tagata o le aiga? i uo i le aoga?
Valaaulia alii talavou taitasi e fai se lisi o mea e ono faavaivaia se molimau ma ni auala e tumau ai le malosi a o faitau e alii talavou le saunoaga a Elder Ronald A. Rasband “Nei Galo ia te Oe” po o le parakalafa lona 9 ma le 10 o le saunoaga a Elder Quentin L. Cook “E Mafai Ea Ona Outou Lagonaina Nei?” Fai i alii talavou e faasoa mai faataitaiga ua latou vaai i ai ua faapupula mai ai se mea mai a latou lisi.

Fai atu i alii talavou e faasoa mai mea na latou aoaoina i le aso. Pe ua latou malamalama i le auala na maua ai a latou lava molimau? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“E masani lava ona tele atu ia mea e faaaogaina i le lesona nai lo le taimi ua tuuina atu ia te oe. I tulaga faapea, e tatau ona e filifilia na o mea e sili atu ona fesoasoani i tagata o loo e aoaoina” (O Le Aoao Atu, E Leai Se Isi Valaauga E Sili Ai [1999], 106).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu lana molimau i le taua o le mauaina e tagata taitasi o sana lava molimau e uiga i le talalelei.
Valaaulia isi sui o le korama e faasoa mai a latou molimau.
Valaaulia sui o le korama e mafaufau i mea e mafai ona latou faia e faamalolosia ai a latou molimau.