E mafai faapefea ona ou faia ia anoa atili a’u tatalo?

E alofa le Tama Faalelagi ia i tatou ma e finagalo tatou te fesootai atu ia te ia e ala i le tatalo. A tatou tatalo, e tatau ona tatou ta’u atu i le Tama Faalelagi lagona o o tatou loto. E le tatau ona tautu i upu ma fuaitau e leai se uiga. O le tatalo faamaoni, mai le loto, e mafai ai ona tatou latalata atu i lo tatou Tama Faalelagi.

Saunia oe lava ia faaleagaga

O a ni ou aafiaga anoa i le tatalo? O a ni mea na aoaoina ai oe i nei aafiaga e uiga i le fesootai atu i le Tama Faalelagi? O le a se mea sa e faia ina ia anoa atili ai au tatalo?

O anafea na e faalogo ai o tatalo ia alii talavou o lau korama? E mafai faapefea ona e fesoasoani ia i latou ina ia atili anoa a latou tatalo? E mafai faapefea ona avea le malamalama i le auala e fesootai ai ma le Tama Faalelagi e fesoasoani ai ia i latou i le taimi nei ma le lumanai?

Ao e sauniuni, ia suesue ma le agaga tatalo ia mau ma punaoa nei. O le a se mea e te manao ia iloa e alii talavou e uiga i le tatalo?

Luka 22:41–42; Helamana 10:5; MF&F 46:30–31 (E ao ona tatou sailia le finagalo o le Atua pe a tatou tatalo)

3 Nifae 14:7; MF&F 9:7–8 (E tatau ona o faatasi le tatalo ma le taumafaiga faamaoni)

3 Nifae 17–19 (Na tatalo faatasi Iesu Keriso ma sa Nifae ma aoao atu le tatalo)

Moronae 10:3–5 (Tatalo atu ma le faatuatua, se loto faamaoni, ma le manatu moni i ai)

Taiala i Tusitusiga Paia, “Tatalo,” 177–78

Carol F. McConkie, “O Le Manaoga Faamaoni o le Loto,” Ensign po o le Liahona, Nov. 2016, 25–26

Juan A. Uceda, “Ua Aoao Mai i Tatou e le Alii o Iesu Keriso ina ia Tatalo,” Ensign po o le Liahona, Nov. 2016, 30–32

Henry B. Eyring, “Perisitua ma le Tatalo Patino,” Ensign po o le Liahona, Me 2015, 84–87

Faataunuuina o Lo’u Tiute i le Atua (2010), 38

“Tatalo,” Faamaoni i le Faatuatua (2004), 167–72

Vitio: “Meaai o le Aso: Aafiaga”

2:60

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Faasoa atu le tala mai le saunoaga a Elder Juan A. Uceda “Ua Aoao Mai i Tatou e le Alii o Iesu Keriso ina ia Tatalo.” O a mea o loo iloaina e alii talavou e uiga i lenei tala e faamomoiloto? O a ni aafiaga o le tatalo e mafai e oe po o alii talavou ona faasoa atu?
Fai atu i alii talavou e tusi se ata e suitulaga i se mea sa latou aoaoina i le lesona o le vaiaso ua tea, ma fai atu ia i latou e faasoa mai a latou ata. O le a se mea ua latou faia e faaaoga ai mea sa latou aoaoina? Faamata e i ai ni a latou fesili po o ni malamalamaaga faaopoopo e uiga i mea sa latou aoaoina?

Aoao faatasi

O le a fesoasoani gaoioiga taitasi nei i tagata o le korama e malamalama ai i le auala o le a atili anoa ai a latou tatalo. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

Tusi ia igoa o sui o le Aiga Atua i luga o le laupapa. Valaaulia alii talavou e faaaoga le saunoaga a Sister Carol F. McConkie “O Le Manaoga Faamaoni o le Loto” e lisi ai pe faapefea ona faaaofia sui taitasi o le Aiga Atua pe a tatou tatalo. Fai atu i alii talavou e vaavaai i totonu o le saunoaga a Sister McConkie mo tali i fesili nei: “Aisea tatou te tatalo ai i le Tama Faalelagi? O le a le uiga o le tatalo i le suafa o Iesu Keriso? E mafai faapefea e le Agaga Paia ona uunaia a tatou tatalo?” Valaaulia i latou e fai se lisi o ni mea e mafai ona latou faia e faia ai a latou tatalo ia anoa atili. Atonu latou te faaali atu lisi nei i o latou aiga ma filifili se mea se tasi e taulai i ai i vaiaso taitasi.
Filifili ni tala ma ni upusii pupuu mai le saunoaga a Peresitene Henry B. Eyring “Perisitua ma le Tatalo Patino” e te lagona o le a sili ona aoga mo alii talavou i le korama. Tusi ia tala po o upusii nei i luga o ni fasipepa. Valaaulia ia alii talavou e filifili se tasi o fasipepa, faitau atu i le korama, ma taitai se talanoaga e uiga i mea o loo aoao atu. E faapefea ona fesoasoani le tatalo ia i latou i la latou auaunga faaleperisitua? Mafaufau e faasoa atu se aafiaga o le taimi na faamanuia ai la outou auaunaga faaleperisitua e le tatalo, pe valaaulia ia alii talavou e faasoa mai ni aafiaga talitutusa.
Valaaulia alii talavou e sueina i tusitusiga paia se faataitaiga o le tatalo lea latou te iloa e maua ai le uunaiga (pe ā talafeagai, fautuaina ia latou faitauina mau o loo lisiina i totonu o le aotelega lea), pe faaali le vitio “Meaai o le Aso: Aafiaga.” Fai i ai e faasoa mai mea latou te maua ma mea ua latou aoaoina e uiga i le tatalo mai le faataitaiga.

2:60
Valaaulia ia alii talavou e faitau se mau e uiga i le tatalo (e pei o mau o loo fautuaina atu i le otootoga lenei). Fai atu ia i latou e tusi i lalo se mataupu faavae e uiga i le tatalo sa latou aoaoina mai le mau ma se faataitaiga o lena mataupu faavae mai o latou olaga po o olaga o isi. Fai atu i ai e faasoa mai se mea sa latou tusia i se isi uso o le korama. O le a se mea na aoaoina e alii talavou mai isi lea e mafai ona fesoasoani ia i latou ina ia atili anoa ai a latou tatalo?
Fai atu i alii talavou taitasi e suesue se mataupu faavae se tasi e uiga i le tatalo o loo talanoaina i le Faamaoni i le Faatuatua,itulau e 167–72, po o le faamatalaga e uiga i le tatalo i le Taiala i Tusitusiga Paia. Valaaulia o ia e aoao atu i le korama mea sa ia aoaoina. Uunaia ia alii talavou e faasoa atu ni faataitaiga faaletagata lava ia pe a latou aoao atu.
Galulue faatasi o se korama i le gaoioiga muamua faafaiaoga o loo i le itulau e 38 o le tusi Tiute i le Atua. Tuu atu i alii talavou se taimi i le taimi o le fonotaga a le korama po o le toe suia o a latou fuafuaga e faatulaga se mausa o le tatalo masani (tagai itulau 15, 39, po o le 63).

Fai atu i alii talavou e faasoa mai ni mea sa latou aoaoina i le aso. Faamata o latou malamalama i le auala e faaanoa atili ai a latou tatalo? O a ni o latou lagona po o manatu o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“A maea ona tuuina mai e le tasi tagata le tali i se fesili pe tuuina mai sona malamalamaaga, ona valaaulia lea o isi e faaopoopo atu i ai i le manatu faaalia pe faailoa mai foi se isi manatu e ese mai ai. Afai e tuuina atu e se tasi se fesili, ia toe tuusao atu i isi nai lo le taliina e oe lava. Mo se faataitaiga, e mafai ona e fesili atu, ‘Pe i ai se tasi e manao na te taliina lena fesili?’” (O Le Aoao Atu, E Leai Se Isi Valaauga e Sili Ai [1999], 70).

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa mai lana fuafuaga e faavae se mausa o le tatalo soo.
Faasoa mai ni aafiaga patino lea na aoaoina ai o ia i le mana o le tatalo.