E mafai faapefea ona ou maua faaaliga faaletagata lava ia?

E tofu aia i tatou i faaaliga patino e taialaina ai o tatou olaga. Ina ia maua faaaliga patino, e tatau ona tatou saunia e ala i le ola agavaa ma suesue ma mafaufau loloto i tusitusiga paia. Afai tatou te saili ma ole atu, o le a faaali mai e le Atua Lona finagalo e ala i le Agaga Paia.

Saunia oe lava ia faaleagaga

E faapefea ona e iloa ua e mauaina se faaaliga patino? Ua faamanuiaina faapefea lou olaga ina ua e aoao e iloa faaaliga patino?

Aisea e taua ai mo alii talavou le malamalama i le auala e maua ai se faaaliga patino? E mafai faapefea ona fesoasoani se faaaliga patino i le au Perisitua Arona i le faataunuuina o o latou tiute faaleperisitua? E faapefea ona e fesoasoani ia i latou ia iloa faaaliga patino?

Ao e sauniuni, ia suesue ma le agaga tatalo ia mau ma punaoa nei. O le a se mea ua uunaia ai oe e faasoa atu i alii talavou?

1 Tupu 19:9–12; Helamana 5:30; MF&F 6:14–16, 23; 8:2–3; 11:12–14 (O auala e talanoa mai ai le Agaga ia i tatou)

Ioane 14:26–27 (E mafai ona fesoasoani le Agaga Paia ia i tatou e manatuaina mea ma lagona le filemu)

Eteru 2–3; MF&F 9:7–9 (E tatau lava ona vaavaalua faaaliga patino ma o tatou mafaufauga ma suesuega)

Ronald A. Rasband, “Tuu Atu i le Agaga Paia e Taitai,” Ensign po o le Liahona, Me 2017, 93-96

Thomas S. Monson, “Mataupu Faavae ma Folafolaga,” Ensign po o le Liahona, Nov. 2016, 78–79

Henry B. Eyring, “Faaaliga Faifai Pea,” Ensign po o le Liahona, Nov. 2014, 70-73

Richard G. Scott, “Faapefea ona Maua Faaaliga ma Musumusua mo Lou Lava Olaga Patino,” Ensign po o le Liahona, Me 2012, 45–47

“Aoao ia Iloa Musumusuga a le Agaga,” Talai La’u Talalelei (1999), 101–02

“Faaaliga,” Faamaoni i le Faatuatua (2004), 32–37

Vitio: “Patterns of Light: Spirit of Revelation,” “Hearing His Voice”

3:6

3:56

Aoao atu i le ala a le Faaola

Na valaaulia e le Faaola i latou sa mulimuli ia te Ia e faatino le faatuatua ma ola i upumoni na Ia aoaoina. Na Ia taulai atu e fesoasoani i e na mulimuli ia te Ia e ola i le talalelei ma o latou loto atoa e ala i le tuuina atu ia i latou o ni aafiaga faaleaoaoga mamana. E mafai faapefea ona e aoao atu ia alii talavou e galue i le faatuatua ma ola ai i upumoni sa latou aoaoina?

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Na faapefea ona faaaafia e le lesona o le vaiaso ua tea ia olaga o alii talavou? O le a se mea ua ese ona latou faia ona o mea sa latou aoaoina? O a ni faamanuiaga na oo mai ona o mea na latou faatinoina?
Tusi i luga o le laupapa “Ou te iloa ua ou mauaina se faaaliga patino pe a __________.”Fai i alii talavou pe faapefea ona latou faaumaina le fuaiupu lenei. Valaaulia i latou e mafaufau loloto pea i lenei faamatalaga i le taimi o le lesona ma vaavaai mo ni tali faaopoopo.

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama i le auala e maua ai faaaliga faaletagata lava ia. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Faitau faatasi ia parakalafa muamua e tolu o le saunoaga a Peresitene Henry B. Eyring “Faaaliga Faifai Pea.” Fai atu i alii talavou e lisi mai ni nai tulaga lea e manaomia ai e i latou po o se tasi latou te iloa se faaaliga patino. Fai atu i alii talavou e faitau pe matamata ni vaega o le saunoaga a Peresitene Eyring ma faasoa mai mea sa latou aoaoina. Valaaulia i latou e mafaufau loloto i mea o le a latou faia e sailia ai se faaaliga patino.
Fai ni koluma se fa i luga o le laupapa i manatu e fa o le lauga a Elder Ronald A. Rasband “Tuu Atu i le Agaga Paia e Taitai” e fai ma ulutala. Iloilo faatasi ia vaega taitasi, valaaulia alii talavou e tusi i totonu o koluma mea ua fautua mai Elder Rasband e mafai ona latou faia e maua ai faaaliga faaletagata lava ia. E i ai se tagata i le tou uarota o se tagata e muai tali atu, e pei o se fuimu po o se leoleo? Afai e i ai, valaaulia o ia e talanoa atu i le korama e faatatau i le uiga o le avea ma se tagata e muai tali atu i se faalavelave faafomai po o se faalavelave faalenatura. E faapefea ona saunia o ia e tali atu i nei tulaga? Fai atu i uso o le korama e talanoaina mea ua latou aoaoina mai lenei talanoaga e uiga i le auala e avea ai ma tagata faaleagaga e muai tali atu.
Tusi i luga o le laupapa ia mau ua fautuaina atu i le otootoga lenei. Tuu atu i alii talavou taitoatasi se mau se tasi, ma fai atu ia te ia e faailoa mai po o le a se mea na aoaoina mai e uiga i le auala e fesootai mai ai le Agaga Paia ia i tatou. Fai atu i alii talavou e tusi i luga o le laupapa se mea sa latou mauaina i autafa o mau faasino taitasi. Valaaulia ia alii talavou e faasoa mai soo se aafiaga sa latou mauaina lea na talanoa mai ai le Agaga Paia ia i latou i se tasi o auala nei. Pe na latou sailia pe mauaina se faaaliga patino e taialaina ai i latou i le faataunuuina o o latou tiute faaleperisitua? E mafai foi ona e faasoa mai se aafiaga sa e mauaina.
Fai se kopi o le siata o loo i le itulau 101-102 o le Tala’i La’u Talalelei mo alii talavou taitasi. Valaaulia ia alii talavou e toe iloilo le kata ma ona faamatalaga i le auala na fesootai mai ai le Agaga Paia ia i tatou. Fai atu ia i latou e tusi e uiga i se taimi na latou maua ai soo se lagona, manatu, po o ni uunaiga na faamatalaina i le kata. Valaaulia ni nai alii talavou e faasoa mai se mea sa latou tusia, i le vaega atoa o le korama. E mafai foi ona e valaauliaina alii talavou e filifili se tasi o gaoioiga mo suesuega o loo i le itulau 100–102 o le Tala’i La’u Talalelei ia galulue ai taitoalua, i ni vaega toalaiti, pe taitoatasi.
Faaali le vitio ”Hearing His Voice,“ ma fai i alii talavou e vaavaai mo mea na faia e talavou i le vitio lea, e saunia ai i latou lava ia maua faaaliga patino. O a nisi auala e mafai ai ona tatou saunia i tatou lava? (tagai 3 Nifae 17:2–3; MF&F 9:7–8). Fautuaina tagata o le korama e talia le lui na taliaina e talavou i le vitio lea, ma valaaulia i latou e faasoa mai o latou aafiaga i se fonotaga a le korama i le lumanai.

3:56

Fai atu i alii talavou e faasoa mai mea na latou aoaoina i le aso. Pe ua sili atu so latou malamalama i le ala e maua ai faaaliga patino? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ni aafiaga sa ia maua i le sailia ma le mauaina o se faaaliga faaletagata lava ia.
Fai atu i tagata o le korama e vaavaai mo ni auala e mafai ai ona faaleleia a latou auaunaga faaleperisitua e ala i le sailia o se faaaliga faaletagata lava ia.