Aisea e taua ai le faalogo ma mulimuli i perofeta soifua?

Tatou te lagolagoina uso o le Au Peresitene Sili ma le Korama a Aposetolo a le Toasefululua o perofeta, tagatavaai ma talifaaaliga. O a latou aoaoga e atagia mai ai le finagalo o le Alii. Latou te tuuina mai faatonuga, lapataiga, ma fautuaga mai le Alii mo o tatou aso. Ua faamanuiaina i tatou i le saogalemu, filemu, ma le malosi faaleagaga pe a tatou faalogo ma usitai i a latou fautuaga.

Saunia oe lava ia faaleagaga

O a fautuaga ua tuuina mai e perofeta soifua ua e faaaogaina i lou olaga? Pe ua faamanuiaina faapefea oe i le mulimuli ai i lena fautuaga?

Aisea e taua ai i alii talavou i la outou korama le i ai o se molimau e uiga i perofeta soifua? E mafai faapefea ona e fesoasoani ia i latou ina ia iloa o se faamanuiaga le i ai o ni perofeta soifua e taialaina i latou i le taimi nei?

Ia suesue ma le agaga tatalo ia mau ma punaoa nei. O le a se lagona ua uunaia ai oe e faasoa atu i alii talavou?

Amosa 3:7; MF&F 1:4, 37–38; Mose 6:26–38 (O loo fetalai mai le Alii ia i tatou e ala mai i Ana perofeta)

MF&F 21:1, 4–7 (Ua folafola mai e le Alii ia faamanuiaga sili ia i latou o e mulimuli i le perofeta)

Ronald A. Rasband, “Tutu Faatasi ma Taitai o le Ekalesia,” Ensign po o le Liahona, Me 2016, 46–49

David A. Bednar, “Ua Filifilia e Molimau Atu i Lou Igoa,” Ensign po o le Liahona, Nov. 2015, 128–131

Tagai M. Russell Ballard, “Nofo i Totonu o le Vaa ma Pipiimau!” Ensign po o le Liahona, Nov. 2014, 89-92

Carol F. McConkie, “Ola e Tusa ma Upu a Perofeta,” Ensign po o le Liahona, Nov. 2014, 77–79

Vitio: “Tagatavaai i luga o le Olo”

4:11

Aoao atu i le ala a le Faaola

Na tuuina atu e le Faaola ni fesili ia i latou na Ia aoaoina ma tuuina atu foi ia i latou avanoa e fai atu ai foi a latou lava fesili. O a ni fesili e mafai ona e fesili atu ai o le a fesoasoani ai i alii talavou e mafaufau ma loloto ai o latou lagona e uiga i perofeta soifua? E mafai faapefea ona e faaalia e te fiafia i a latou tali?

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Filifili se upu autu mai le lesona o le vaiaso ua tea, ma valaaulia se uso o le korama e tusi se ata e faatatau i ai ao mate mai e isi tagata o le korama le upu. Fai atu i le korama e faamalamalama mai pe aisea na taua ai lena upu i le lesona o le vaiaso ua tea.
Faaali atu ata o le Au Peresitene Sili ma le Korama a Aposetolo e Toasefululua (e pei o ata ia o loo i le lomiga o le konafesi i le Ensign po o le Liahona). Molimau atu o nei tamalii uma o ni perofeta, tagatavaai, ma talifaaaliga. O a ni savali na manatuaina e alii talavou mai se sui o le Au Peresitene Sili po o le Korama a le Toasefululua?

Aoao faatasi

O le a fesoasoani gaoioiga taitasi nei i tagata o le korama e malamalama ai i le taua o le mulimuli i perofeta soifua. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Tuu atu i alii talavou taitasi se mau se tasi o loo fautuaina mai le otootoga lenei ma fai atu ia te ia e vaavaai mo ni mafuaaga tatou te manaomia ai se perofeta ma ni faamanuiaga e maua mai i le mulimuli i le perofeta. Valaaulia o ia e faasoa mai ona manatu.
Faitau le vaega o le lauga a Elder Ballard lea na te faatusatusa ai le perofeta soifua i se tagata taiala, ma fai se lisi o auala e talitutusa ai le tagata taiala i se perofeta. Valaaulia ia tagata o le korama e mafaufau ma faasoa atu ni talafaatusa e mafai ona latou faaaoga e aoao atu ai isi pe aisea e taua ai le mulimuli i perofeta ma aposetolo.
Faasoa atu i le vasega le faamatalaga lenei mai le lauga a Sister Carol F. McConkie “Ola e Tusa ma Upu a Perofeta”: “E tusa ai ma tulaga faatonuina o le lalolagi, o le mulimuli i le perofeta e ono inosiaina, le sa'o i manatu faaupufai, po o le le taliaina faaleagafesootai. Ae o le mulimuli i le perofeta e sa'o i taimi uma lava” (Ensign po o le Liahona, Nov. 2014, 78). O a nisi o mafuaaga e tuu mai e tagata mo le le mulimuli i le perofeta? Valaaulia tagata o le korama e suesue i le vaega o totoe o le lauga a Sister McConkie mo mea e mafai ona latou tau atu i se tagata o loo taumafai e faalotovaivai i latou mai le mulimuli i le perofeta. Fai i ai e faasoa mai mea ua latou maua.
Valaaulia uso o le korama e mafaufau faapea sa fesiligia i latou e se uo mai se isi tapuaiga, “Aisea e i ai ai sa outou perofeta?” ”E faapei la outou perofeta?“ po o le ”O le a le tala na fai mai ai le perofeta ia te oe?“ O le a se tali a alii talavou?
Faaali le ata vitio “Leoleo i Luga o le Olo” pe faatau faatasi vaega o le lauga a Elder David A. Bednar “Ua Filifilia e Molimau Atu i Lou Igoa” po o le lauga a Elder Ronald A. Rasband “Tutu Faatasi ma Taitai o le Ekalesia.” Fai i alii talavou e faasoa mai se mea sa latou aoaoina e uiga i le taua o le mulimuli i le perofeta. Toe faamanatu atu ia i latou ia autu o saunoaga a Peresitene Thomas S. Monson i le konafesi aoao lea na mavae atu nei ma talanoaina po o le a se mea o loo lapataia ai i tatou e uiga i lenei vaitaimi.

4:11

Fai atu i alii talavou e faasoa mai mea na latou aoaoina i le aso. Mata o latou malamalama i le mafuaaga e taua ai le faalogo ma mulimuli i perofeta soifua? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ona lagona e uiga i le avanoa e iloa ai ma mulimuli i perofeta soifua.
Fai atu i uso o le korama e faasoa mai se aafiaga na latou mulimuli ai i le perofeta ma le auala na uunaia ai o latou olaga.