Fatongia ki he ʻOtuá

Ko e hā ʻoku mahuʻinga ai ke ako e folofolá?

ʻOku maʻu ʻi he ngaahi tohi folofolá e folofola ʻa e ʻOtuá. ʻOku faleʻi kitautolu ʻe he kau palōfita ʻo e ngaahi ʻaho kimui ní ke tau ako fakafoʻituitui mo fakafāmili e folofolá he ʻaho kotoa pē. ʻE lava ke tokoniʻi kitautolu ʻe hono ako e folofolá ke tau ʻilo e Tamai Hēvaní mo Sīsū Kalaisi, mo tau maʻu ha mālohi ke matuʻuaki e fakatauelé, mo fakamālohia kitautolu ʻi hotau ngaahi faingataʻaʻiá.

Teuteuʻi fakalaumālie koe

Kuo hoko fēfē hono ako e folofolá ko ha tāpuaki ʻi hoʻo moʻuí? Ko e hā ha ngaahi meʻa kuó ke aʻusia te ke lava ʻo vahevahe ki he kau talavoú?

Ko e hā ha ngaahi veesi mei he folofolá ʻokú ke tui ʻe lava ke ʻuhingamālie ki he kau talavou ʻi he kōlomú? Ko e hā te ke lava ʻo fai ke tokoniʻi e kau talavoú ke ʻai ʻenau ako folofolá ke toe mahuʻingamālie mo ola lelei ange?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ongoʻi ʻe tokoni ke mahino ki he kau talavoú e mahuʻinga hono ako ʻo e folofolá?

Sōsiua 1:8; Saame 119:105; 2 Tīmote 3:16–17; 1 Nīfai 15:24; 2 Nīfai 32:3; ʻAlamā 17:2–3; Hilamani 3:29–30; T&F 18:33–36; 21:4–6; 84:85 (Ngaahi tāpuaki ʻo hono ako ʻo e folofolá)

Ko Hono Fakahoko Hoku Fatongia ki he ʻOtuá (2010), 14–15, 38–39, 62–63

Boyd K. Packer, “Ko e Kī ki he Maluʻi Fakalaumālié,” Ensign pe Liahona, Nōvema 2013

Richard G. Scott, “Ko e Mālohi ʻo e Folofolá,” Ensign pe Liahona, Nōvema 2011, 6–8

D. Todd Christofferson, “Ko e Tāpuaki ʻo e Folofolá,” Ensign pe Liahona, Mē 2010, 32–35

“Folofolá,” Tuʻu Maʻu ʻi he Tuí (2004), 66–71

Vitiō: “Ko Hono Fakahoko Ho Fatongia ki he ʻOtuá,” “ Ko e Tohi ʻa Molomoná: Ngaahi Pōpoaki mei he Langí,” “Daily Bread: Pattern”

Ko e faiako ‘i he founga ‘a e Fakamo‘uí

Naʻe ngāue ʻaki ʻe he Fakamoʻuí e folofolá ke faiako mo fakamoʻoniʻi ʻaki Hono misioná. Naʻá Ne akoʻi e kakaí ke nau fakakaukau ki he folofolá pea fakaʻaongaʻi ia ke maʻu ai e tali ki heʻenau ngaahi fehuʻi ʻanautolu peé. Te ke tokoniʻi fēfē e kau talavoú ke nau ngāue ʻaki e folofolá ke maʻu ai e tali ki heʻenau ngaahi fehuʻí?

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú. Te ne tataki e kau talavoú ʻi he fealēleaʻaki fakataha ʻo kau ki he pisinisi ʻa e kōlomú, akoʻi kinautolu ki honau ngaahi fatongia ʻo e lakanga fakataulaʻeikí (mei he folofolá pea mo e tohi Fatongia ki he ʻOtuá), pea mo fakaafeʻi ha ʻetivaisa pe mēmipa kehe ʻo e kōlomú ke ne akoʻi ha lēsoni ʻo e ongoongoleleí. ʻE lava ke ne teuteu ʻaki haʻane fakafonu ha ʻasenita ʻo e fakataha fakakōlomú he lolotonga e fakataha fakapalesitenisií.

Kamata e aʻusia fakaakó

Filifili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu ʻaki e lēsoni ʻo e uike kuo ʻosí mo fakafeʻiloaki e lēsoni ʻo e uike ní:

Fakaafeʻi e kau talavoú ke nau fakakaukau ki ha meʻa te ne lava ʻo fakafofongaʻi e meʻa ne nau ako mo vahevahe ʻi he fealeaʻaki ʻo e uike kuo ʻosí. Kole ke nau fakamatalaʻi e fekauʻaki ʻa e kaveinga ko iá mo e meʻa ne nau akó.
Fakaafeʻi e kau talavoú ke nau vahevahe fakahoa pe ki he kōlomú kotoa ha taha ʻo e ngaahi potufolofola ʻoku saiʻia taha aí. Poupouʻi kinautolu ke nau toe vahevahe ha meʻa ne nau aʻusia ne mahuʻingamālie ai e potufolofolá kiate kinautolu. Ko e hā e meʻa ʻoku ako ʻe he kau talavoú fekauʻaki mo e mahuʻinga ʻo e folofolá mei he ngaahi meʻa ne aʻusia ko ʻení?

Ako fakataha

Ko e taumuʻa ʻo e lēsoni ko ʻení ke tokoniʻi e talavou takitaha ke ne fokotuʻu ha palani pe fakamālohia ha ʻulungaanga ʻo hono ako maʻu pē ʻo e folofolá. ʻOange ha taimi ki he kau talavoú he lolotonga e fakataha fakakōlomú ke hiki ai ʻenau palaní ʻi he tohi Fatongia ki he ʻOtuá. Poupouʻi ke nau fevahevaheʻaki ʻenau palaní, pea ʻi he ngaahi fakataha fakakōlomu he kahaʻú, fakaafeʻi kinautolu ke nau vahevahe e ngaahi meʻa ne nau aʻusiá ʻi hono fakahoko ʻenau palaní.

Fakaafeʻi e kau talavoú ke fakaava ʻenau tohi Fatongia ki he ʻOtuá ki he peesi 14 pe 38. Vahe ha taha ʻo e ngaahi fakamoʻoni fakafolofola mei he ngaahi peesi ko ʻení ki he mēmipa takitaha ʻo e kōlomú (vakai foki ki he ngaahi potufolofola ʻoku lisi atu ʻi he fokotuʻutuʻu ko ʻení). Fakaafeʻi e kau mēmipa ʻo e kōlomú ke nau kumi mo vahevahe e ngaahi foʻi lea ʻoku nau fakamatalaʻi e founga ʻoku totonu ke tau fakahoko ai hono ako e folofolá mo e ngaahi tāpuaki ʻe maʻu ʻi heʻetau ako e folofolá. Fakaafeʻi ke nau faʻu ha palani ke kamata pe fakamālohia ha ʻulungaanga ʻo hono ako maʻu pē ʻo e folofolá (vakai, Fatongia ki he ʻOtuá,peesi 14, 38, pe 62).
Kole ki he talavou takitaha ke ne fakalaulauloto ki ha taha ʻo e ngaahi fehuʻi ko ʻení: ʻOku tokoniʻi fēfē ʻe he ako folofolá ʻeku malava ke tauhi e ngaahi fekaú? ʻOku tokoniʻi fēfē ʻe he ako folofolá hoku vā mo hoku fāmilí? ʻOku tokoniʻi fēfē ʻe he ako folofolá hoku vā mo e ʻOtuá? Kole ki he kau talavoú ke vahevahe ʻenau fakakaukaú mo e kōlomú. (Vakai, Fatongia ki he ʻOtuá,62.) Fakaafeʻi ke nau sio ki he peesi 15, 39, pe 63 ʻo ʻenau tohi Fatongia ki he ʻOtuá pea hiki ʻenau palani ki hono fakaleleiʻi ʻenau ako folofola fakatāutahá.
Fakaafeʻi e kau mēmipa ʻo e kōlomú ke nau lau e konga ʻe taha ʻo e ngaahi lea ʻoku fakahā atu ʻi he fokotuʻutuʻu ko ʻení. Kole ange ke nau vahevahe e meʻa ʻoku nau ako kau ki he folofolá mo e ngaahi tāpuaki ʻo hono ako ʻo e folofolá. Ko e fē ha taimi ne nau fakatokangaʻi ai e mālohi ʻo e ako folofolá ʻi heʻenau moʻuí?
Fakaafeʻi e kau talavoú ke nau mamataʻi ha taha ʻo e ngaahi vitiō ʻoku fokotuʻu mai ʻe he fokotuʻutuʻu ko ʻení pe lau ʻa e Mahuʻinga ʻo e Ako Folofola Fakaʻahó mei he Tuʻu Maʻu ʻi he Tuí (peesi 67–68). Kole ke nau kumi e tali ki he fehuʻi “Ko e hā ʻoku mahuʻinga ai ke u ako e folofolá?” Fakaafeʻi ke nau vahevahe e meʻa ʻoku nau maʻú. Kole ki ha kau talavou tokosiʻi ke nau vahevahe e founga ʻo ʻenau ako e folofolá. Ka fakangofua ʻe he pīsopé, fakakaukau ke fakaafeʻi ha tamai pe mēmipa kehe ʻo e uōtí ke ne vahevahe nounou e founga ʻene ako e folofolá.
Fakaafeʻi ʻa e kau talavoú ke fili ha taha ʻo e ngaahi ʻekitivitī ako ʻoku hā ʻi he peesi 146–147 ʻo e Malangaʻaki ʻEku Ongoongoleleí pea ngāue toko taha ai pe tauhoa.

Kole ki he kau talavoú ke nau vahevahe e meʻa ne nau ako he ʻaho ní. ʻOku mahino nai kiate kinautolu e ʻuhinga ʻoku mahuʻinga ai ke ako e folofolá? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. ʻE lava ke ne:

Vahevahe ki he kōlomú ʻene palani ki hono ako fakatāutaha e folofolá.
Fakamatalaʻi ange ko e fakataha fakakōlomu ko ia he ngaahi uike ka hokó, ʻe fakaafeʻi ai e kau mēmipa ʻo e kōlomú ke nau vahevahe ha potufolofola ne nau lau he lolotonga ʻo e uiké pea fakamatalaʻi ʻa e ʻuhingaʻoku mahuʻinga malie ai kiate kinautolú.