Kau Palōfitá mo e Fakahaá
“ʻOku mau tui ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuá” (Ngaahi Tefito ʻo e Tuí 1:9).
ʻE tokoni e ngaahi fokotuʻutuʻu ʻi he ʻiuniti ko ʻení ki he talavou takitaha ke ne ako ke fakatokangaʻi e leʻo ʻo e ʻEikí ʻi Heʻene folofola kiate ia ʻo fakafou mai he folofolá, kau palōfita mo e kau ʻaposetolo moʻuí, mo e fakahā fakatāutaha mei he Laumālie Māʻoniʻoní ki hono lotó mo e ʻatamaí. ʻOku kau he folofolá e fekau ki he kau maʻu lakanga fakataulaʻeikí “ke mou tokanga faivelenga ki he ngaahi folofola ʻo e moʻui taʻengatá” pea “moʻui ʻo fakatatau ki he folofola kotoa pē ʻoku ʻalu atu mei he fofonga ʻo e ʻOtuá” (Tokāteline mo e Ngaahi Fuakava 84:43-44). ʻI he ʻiuniti ko ʻení, te ke lava ʻo tokoniʻi ai e kau mēmipa ʻi hoʻo kōlomú ke nau talangofua ki he faleʻi ko ʻení ʻaki hano fakatoka ʻi honau lotó ha ‘ofa ʻi he folofola ʻa e ʻOtuá.
Koeʻuhí ke hoko e Fatongia ki he ʻOtuá ko ha konga ʻo e fakataha fakakōlomu he ʻaho Sāpaté, mahalo te ke fakakaukauʻi hano akoʻi e fokotuʻutuʻu ki he Fatongia ki he ʻOtuá ʻoku ʻoatu ʻi laló lolotonga e ʻiuniti ko ʻení.
Ngaahi Fokotuʻutuʻu ke Fili mei ai ʻi he Māhiná Ni
Mutualé
Fakakaukau ki he founga te ke lava ʻo palani ai ha ngaahi ʻekitivitī ʻoku fakafehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. Ko e lahi taha ʻa e ngaahi ʻekitivitī ako ʻi he ngaahi fokotuʻutuʻu ko ʻení ʻe lava ke fakaʻaongaʻi ia ʻi he ngaahi ʻekitivitī ʻa e Mutualé. Ngāue fakataha mo e kau palesitenisī fakakōlomú ke fili mo palani ha ngaahi ʻekitivitī lelei ke fakamamafaʻi e meʻa ʻoku ako ʻe he kau talavoú ʻi he ʻaho Sāpaté.
Fatongia ki he ʻOtuá
ʻOku fekauʻaki ʻa e ngaahi konga ko ʻeni mei he tohi Fatongia ki he ʻOtuá mo e ngaahi lēsoni ʻi he ʻiuniti ko ʻení: