ʻE tokoniʻi fēfē au ʻe ha tāpuaki fakapēteliake?

Ko e tāpuaki fakapēteliaké ko ha fakahā fakatāutaha maʻa ʻetau moʻuí. ʻOku tokoni ia ke mahino kiate kitautolu e meʻa te tau malavá mo e ngaahi tāpuaki te tau maʻú kapau te tau faivelenga. ʻE lava ke kau ai ha ngaahi palōmesi, faleʻi, pe fakatokanga ke ne tataki ʻetau moʻuí. ʻOku toe tokoni foki ia ke tau ʻiloʻi ʻoku ʻafioʻi mo tokanga fakatāutaha mai e Tamai Hēvaní kiate kitautolu.

Teuteuʻi fakalaumālie koe

Kapau kuó ke ʻosi maʻu ho tāpuaki fakapēteliaké, kuo founga fēfē haʻane tataki hoʻo moʻuí? Kuo founga fēfē haʻane tokoniʻi koe ʻi he ngaahi taimi ʻo e faingataʻá? Ko e hā ha founga kuó ne ueʻi fakalaumālie ai koe?

Ko e hā ha ngaahi founga ʻe lava ke hoko ai e tāpuaki fakapēteliaké ko ha tataki ʻi he moʻui ʻa e kau talavou ʻokú ke akoʻí? Ko e hā ʻoku mahuʻinga ai ke nau ʻilo honau hako ʻi he fale ʻo ʻIsilelí? ʻE founga fēfē haʻo tokoniʻi kinautolu ke nau teuteu ke maʻu ha tāpuaki fakapēteliake?

ʻI hoʻo teuteú, ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa ʻokú ke ʻilo ʻe tokoni lelei taha ki he kau talavou ʻokú ke akoʻí?

{1}ʻAlamā 16:16–17;3 Nīfai 17:2–3 (ʻOku totonu ke teuteuʻi hotau lotó ke maʻu e fakahinohino mei he ʻEikí)

3 Nīfai 20:25–27 (ʻOku tāpuekina ʻe he fale ʻo ʻIsilelí ʻa e ngaahi fāmili ʻo e māmaní)

T&F 82:10; 130:20–21 (ʻOku makatuʻunga ʻa e ngaahi tāpuakí ʻi he talangofuá)

Henry B. Eyring, “Tokoni ke Nau Fokotuʻu ha Taumuʻa Lelei,” Ensign pe Liahona, Nōvema 2012, 60–67

Boyd K. Packer, “Faleʻi ki he Toʻu Tupú,” Ensign pe Liahona, Nōvema 2011, 16–19

Carlos A. Godoy, “ ʻOku ʻi ai ha Palani e ʻEikí Maʻatautolu!” Ensign pe Liahona, Nōvema 2014, 96-98

“Fekauʻaki mo e Ngaahi Tāpuaki Fakapēteliaké,” New Era, Mar. 2004, 32–35; pe Liahona, Māʻasi 2004, 18–21

“Ngaahi Tāpuaki Fakapēteliaké,” Tuʻu Maʻu ʻi he Tuí (2004), 137–139

Ko e faiako ‘i he founga ‘a e Fakamo‘uí

ʻOku ʻafioʻi ʻe he Fakamoʻuí e kau talavou ʻi hoʻo kōlomú, pea ʻokú Ne ʻafioʻi e tuʻunga te nau lava ʻo aʻusiá. ʻOku ʻi ai Haʻane ngāue maʻá e tokotaha kotoa pē ke ne fai, pea ʻokú Ne finangalo ke tokoniʻi kinautolu ke fakahoko e ngāue ko iá. Te ke akoʻi fēfē ki he kau talavoú e ʻofa ʻa e Fakamoʻuí ʻiate kinautolú ʻi hoʻo talanoa kau ki he tāpuaki fakapēteliaké?

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú. Te ne tataki e kau talavoú ʻi he fealēleaʻaki fakataha ʻo kau ki he pisinisi ʻa e kōlomú, akoʻi kinautolu ki honau ngaahi fatongia ʻo e lakanga fakataulaʻeikí (mei he folofolá pea mo e tohi Fatongia ki he ʻOtuá), pea mo fakaafeʻi ha ʻetivaisa pe mēmipa kehe ʻo e kōlomú ke ne akoʻi ha lēsoni ʻo e ongoongoleleí. ʻE lava ke ne teuteu ʻaki haʻane fakafonu ha ʻasenita ʻo e fakataha ʻa e kōlomú he lolotonga e fakataha fakapalesitenisií.

Kamata ʻa e akó

Filifili mei he ngaahi fakakaukau ko ʻení, pe ko haʻo fakakaukau pē ʻaʻau, ke fakamanatu e lēsoni he uike kuo ʻosí mo fakafeʻiloaki ʻaki e lēsoni ʻo e uike ní:

Fakaʻaliʻali ha meʻa pe fakatātā ke ne fakamanatu ki he kau talavoú e lēsoni he uike kuo ʻosí. Ko e hā ha ngaahi meʻa ne nau aʻusia ʻi hono fakaʻaongaʻi e meʻa ne nau akó? ʻEke ange pe ʻoku toe ʻi ai haʻanau fehuʻi pe fakamatala kau ki he kaveinga ʻo e lēsoni ko iá.
Hiki ʻi he palakipoé, “ʻE founga fēfē hano tokoniʻi au ʻe he tāpuaki fakapēteliaké?” Kole ki he kau talavoú ke nau fokotuʻu mai ha ngaahi tali ki he fehuʻí ni. Toutou fakamanatu ʻa e fehuʻi ko ʻení ʻi he lolotonga ʻo e lēsoní kotoa. Fakakaukau ke kau ʻi hoʻomou fealeaʻakí hano vahevahe ʻa e talanoa ne fai ʻe ʻEletā Carlos A. Godoy’s ki hono tokoniʻi ia ʻe hono tāpuaki fakapēteliaké ke ne fai e ngaahi fili mahuʻingá heʻene moʻuí (vakai, “ʻOku ʻI ai ha Palani ʻa e ʻEikí Maʻatautolu!” Ensign pe Liahona, Nōvema 2014, 96-98

Ako fakataha

ʻE tokoni e ngaahi ʻekitivitī takitaha ʻi laló ki he kau mēmipa ʻo e kōlomú ke nau ako fekauʻaki mo e tāpuaki fakapēteliaké. Muimui he ueʻi ʻa e Laumālié, fili ha ʻekitivitī ʻe taha pe lahi ange ʻe ʻaonga taha ki hoʻo kōlomú:

Fakaafeʻi ha talavou ʻe toko taha pe toko lahi ange ke vahevahe e ngaahi meʻa ne nau aʻusiá ʻi hono maʻu ha tāpuaki fakapēteliaké (pe vahevahe hoʻo aʻusia ʻaʻaú). Naʻe tokoniʻi fēfē kinautolu ʻe honau ngaahi tāpuaki fakapēteliaké? (Fakamanatu ki he kōlomú ʻoku ʻi ai e ngaahi konga ʻo e tāpuaki fakapēteliaké ʻoku toputapu pea ʻoku ʻikai totonu ke vahevahe ia.) Kosiʻi fakakongokonga mai ha tatau ʻo e fakamatala “Fekauʻaki mo e Tāpuaki Fakapēteliaké” ʻo konga ʻe taha ki he fehuʻi mo e tali takitaha. Fakaafeʻi ha mēmipa ʻo e kōlomú ke ne fili ha konga ʻe taha ʻo e fakamatalá pea vahevahe e fehuʻí mo e talí ki he kōlomú. ʻOku toe ʻi ai nai ha ngaahi fehuʻi kehe ʻa e kau talavoú?
ʻI hono fakangofua ʻe he pīsopé, fakaafeʻi e pēteliake fakasiteikí ke lea ki he kōlomú fekauʻaki mo e tāpuaki fakapēteliaké. Poupouʻi e kau talavoú ke nau fai ha faʻahinga fehuʻi pē.
Kole ki he kau talavoú ke nau hiki haʻanau faʻahinga fehuʻi fekauʻaki mo e tāpuaki fakapēteliaké. Kumi fakakōlomu e ngaahi talí ʻi he Tuʻu Maʻu ʻi he Tuí,peesi 137–39.
Lau fakakōlomu e fakamatala ʻa Palesiteni Poiti K. Peeka kau ki hono tāpuaki fakapēteliaké ʻi he “Faleʻi ki he Toʻu Tupú” pe talanoa ʻa Palesiteni Henelī B. ʻAealingi kau ki he maʻu hono tāpuakí ʻi he “Tokoni ke Fokotuʻu ha Taumuʻa Leleí.” Kole ki he kau talavoú ke nau feinga ke ʻiloʻi e ngaahi founga ʻoku tokoniʻi ai kinautolu ʻe he tāpuaki fakapēteliaké pea vahevahe e meʻa ʻoku nau ʻiló.
Fakaafeʻi e kau talavoú ke nau lau e ngaahi potufolofola ʻoku fakahā atu ʻi he fokotuʻutuʻu ko ʻení pea vahevahe ʻenau ongo ki he meʻa ʻoku akoʻi kiate kinautolu ʻe he ngaahi potufolofola takitaha fekauʻaki mo e tāpuaki fakapēteliaké.

Kole ki he kau talavoú ke nau vahevahe e meʻa ne nau ako he ʻaho ní. ʻOku mahino lelei ange nai kiate kinautolu e tāpuaki fakapēteliaké? Ko e hā haʻanau ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?

Tokoni fakafaiako

“ʻI he taimi ʻoku fai ai ʻe ha taha ha fehuʻi, fakakaukau ke ke fakaafeʻi ha taha ke ne tali ia kae ʻikai ko koe pē. Hangē ko ʻení, te ke lava ʻo pehē ange, ‘Ko ha fehuʻi mahuʻinga ia. Ko e hā hoʻomou fakakaukau ki aí?’ pe ‘ʻE lava nai ʻe ha taha ʻo tokoni he fehuʻi ko ʻení?’” ʻOku ʻIkai Ha Ui ʻe Mahuʻinga Ange ʻi he Faiakó (2000), 71.

Fakaafeʻi ke ngāue

ʻE fakaʻosi ʻa e fakatahá ʻe he mēmipa ʻo e kau palesitenisī fakakōlomu ʻokú ne tataki e fakatahá. ʻE lava ke ne:

Fakaafeʻi ha kau mēmipa ʻo e kōlomú ʻoku teʻeki maʻu honau tāpuaki fakapēteliaké ke nau fai ha meʻa pau ke nau mateuteu ai.
Fakaafeʻi e kau mēmipa ʻo e kōlomú kuo maʻu honau tāpuaki fakapēteliaké ke nau toutou ako ia.