Ko e hā e meʻa ne akoʻi ʻe Palesiteni Monisoni ki he kau maʻu Lakanga Taulaʻeiki Faka-ʻĒloné?

Ko e konga ʻetau fakapapau mo e fuakava ʻi heʻetau hoko ko e kau maʻu lakanga fakataulaʻeikí ko hono tali e kau tamaioʻeiki ʻa e ʻEikí, kau ai e palōfita moʻuí, pea moʻui ʻo fakatatau ki he folofola kotoa pē ʻoku ʻalu atu mei he fofonga ʻo e ʻOtuá (vakai T&F 84:36, 44). Naʻe akoʻi ʻe Palesiteni Tōmasi S. Monisoni e kau maʻu Lakanga Taulaʻeiki Faka-ʻĒloné ke nau loto ʻaki mo moʻui taau ke fua honau fatongiá. ʻOkú ne poupouʻi ke tau taukapoʻi e ngaahi tefitoʻi moʻoni māʻoniʻoní, neongo ko ha meʻa ia kuo pau ai ke tau tuʻu toko taha pē. ʻOkú ne fie maʻu ke mahino kiate kitautolu e anga hono fakaʻaongaʻi ʻo e lakanga fakataulaʻeikí ki hono tāpuekina mo tokoniʻi kinautolu ʻoku tau feohí.

Teuteuʻi fakalaumālie koe

Ko e hā ha e meʻa kuó ke ako meia Palesiteni Monisoni fekauʻaki mo e ngāue ʻa e lakanga fakataulaʻeikí? Kuó ke fakaʻaongaʻi fēfē ʻene ngaahi akonakí mo e sīpingá?

ʻOku ʻilo nai ʻe he kau talavou ʻi hoʻo kōlomú e meʻa naʻe lea ʻaki ʻe Palesiteni Monisoni kiate kinautolu ko e kau maʻu lakanga fakataulaʻeikí ʻi he konifelenisi fakamuimuitahá? Te ke tokoniʻi fēfē e kau talavoú ke nau fakatokangaʻi e founga ʻo hono fakaʻaongaʻi e pōpoaki ʻa Palesiteni Monisoní ʻi heʻenau moʻuí?

Ako ʻi he faʻa lotu e ngaahi lea ko ʻeni kimuí ni ʻa Palesiteni Monisoni ki he kau maʻu lakanga fakataulaʻeikí:

“Angaʻofá, Manavaʻofá mo e ʻOfá,” Ensign pe Liahona, Mē 2017, 66–67

“Ngaahi Tefitoʻi Moʻoní mo e Ngaahi Talaʻofá,” Ensign pe Liahona, Nōvema 2016, 78–79

“Ko ha Falala Toputapu,” Ensign pe Liahona, Mē 2016, 85

“Ko e Lakanga Fakataulaʻeikí—Ko ha Meʻaʻofa Toputapu,” Ensign pe Liahona, Mē 2015, 88–90

“Tauhi ʻa e Ngaahi Fekaú,” Ensign pe Liahona, Nōvema 2015, 83–85

Ngaahi Vitioó: “Ngāue Fakafaifekaú: Ko ha Fatongia ʻo e Lakanga Fakataulaʻeikí,” “Pole ke Tuʻu Toko Taha”

Ko e faiako ‘i he founga ‘a e Fakamo‘uí

Naʻe hoko e Fakamoʻuí ko ha sīpinga mo e faiako, ʻi he tūkunga kotoa pē. Naʻá Ne akoʻi ʻEne kau ākongá ke nau lotu ʻaki Haʻane lotu fakataha mo kinautolu. Naʻá Ne akoʻi ke nau ʻofa mo ngāue ʻaki e founga ʻo ʻEne ʻofa mo tokoniʻi kinautolú. Naʻá Ne akoʻi kiate kinautolu e founga ki hono akoʻi ʻEne ongoongoleleí ʻaki e founga ʻo ʻEne akoʻi iá. Te ke lava fēfē ʻi hoʻo hoko ko e taha maʻu lakanga fakataulaʻeikí, ke hoko ko ha faʻifaʻitakiʻanga mo ha faiako ki he kau talavou ʻi hoʻomou kōlomú?

Ngaahi ʻEkitivitī Felāveʻi mo e Toʻu Tupú

ʻĪmisi

Palani ha ʻekitivitī ʻa e Mutualé ʻe tokoni ki he kau talavoú ke fakaʻaongaʻi e meʻa ne nau ako he lēsoni ko ʻení.

Tuku ke taki e kau talavoú

ʻE tataki e fakataha fakakōlomú ʻe ha mēmipa ʻo e kau palesitenisī fakakōlomú. Te ne tataki e kau talavoú ʻi he fealēleaʻaki fakataha ʻo kau ki he pisinisi ʻa e kōlomú, akoʻi kinautolu ki honau ngaahi fatongia ʻo e lakanga fakataulaʻeikí (mei he folofolá pea mo e tohi Fatongia ki he ʻOtuá), pea mo fakaafeʻi ha ʻetivaisa pe mēmipa kehe ʻo e kōlomú ke ne akoʻi ha lēsoni ʻo e ongoongoleleí. ʻE lava ke ne teuteu ʻaki haʻane fakafonu ha ʻasenita ʻo e fakataha ʻa e kōlomú he lolotonga e fakataha fakapalesitenisií.

Kamata e aʻusia fakaakó

Filifili mei he ngaahi fakakaukau ko ʻení pe ko haʻo fakakaukau pē ʻaʻau ke fakamanatu ʻaki e lēsoni ʻo e uike kuo ʻosí pea mo fakafeʻiloaki e lēsoni ʻo e uike ní:

Vahevahe e kau talavoú ke nau tautau toko ua. Kole ange ke nau fevahevaheʻaki ha meʻa ʻoku nau manatuʻi mei he lēsoni ʻo e uike kuo ʻosí.
Vakaiʻi mo e kōlomú e konga ko e “Ngaahi Fatongia ʻo e Lakanga Fakataulaʻeikí” ʻi he tohi Fatongia ki he ʻOtuá, pea hiki e ngaahi fatongiá he palakipoé (vakai, peesi 23, 46–47, pe 70–71). Ko e hā e meʻa ne akoʻi ʻe Palesiteni Monisoni ʻo fekauʻaki mo e ngaahi fatongia ko ʻení? Lolotonga e lēsoní, tuku ke tānaki atu ʻe he kau talavoú ki he palakipoé ha faʻahinga meʻa ne nau ʻilo ne akoʻi ʻe Palesiteni Monisoni fekauʻaki mo honau ngaahi fatongia ʻo e lakanga fakataulaʻeikí.

Ako fakataha

ʻE tokoni e ngaahi ʻekitivitī takitaha ʻi laló ke ako ʻe he kau mēmipa ʻo e kōlomú e ngaahi pōpoaki kimuí ni ʻa Palesiteni Tōmasi S. Monisoni ki he kau maʻu lakanga fakataulaʻeikí. Muimui he ueʻi ʻa e Laumālié, fili ha ʻekitivitī ʻe taha pe lahi ange ʻe ʻaonga taha ki hoʻo kōlomú:

ʻOange ki he talavou takitaha ha tatau ʻo e taha ʻo e ngaahi lea ʻa Palesiteni Monisoni kimui ní ki he kau maʻu lakanga fakataulaʻeikí (vakai ki he lisi ʻo e ngaahi leá ʻi he fokotuʻutuʻu ko ʻení). Fakaafeʻi e kau talavoú ke nau kumi ha talanoa ʻi he leá, toe fai ia ki he kōlomú he fakalea pē ʻanautolu, pea vahevahe e meʻa ʻokú ne akoʻi fekauʻaki mo e ngāue ʻi he lakanga fakataulaʻeikí.
Fakaafeʻi e kau talavoú ke nau lau ha taha ʻo e ngaahi lea kimuí ni ʻa Palesiteni Monisoní pea kumi ha kupuʻi lea te nau loto ke manatuʻí. ʻOange ki he talavou takitaha ha kiʻi kaati, pea ʻai ke ne hiki e leá ʻi he kātí. Kole ki he kau mēmipa ʻo e kōlomú ke vahevahe ʻenau leá mo fakamatalaʻi e ʻuhinga ne nau fili ai iá.
Huluʻi fakatouʻosi pe vitiō pē ʻe taha ʻoku fokotuʻu atu he fokotuʻutuʻu ko ʻení, pea tuku ha taimi ki he talavou takitaha ke ne hiki fakanounou ai ʻene fakakaukaú mo e meʻa ʻokú ne ongoʻí. Fakaafeʻi e kau talavoú ke nau vahevahe ki he kōlomú e meʻa ne nau tohí. ʻE lava fēfē nai ke tokoniʻi kitautolu ʻe he talangofua ki he faleʻi ʻa Palesiteni Monisoni ʻi he ngaahi vitiō ko ʻení ke tau hoko ko ha kau tamaioʻeiki lelei ange he lakanga fakataulaʻeikí?
Kole ki he kau talavoú ke nau kumi ha ngaahi potufolofola ʻoku ngāue ʻaki ʻe Palesiteni Monisoni ki hono akoʻi e ngāue ʻi he lakanga fakataulaʻeikí. Fakaafeʻi ke nau fevahevaheʻaki e meʻa ʻoku nau ako mei he ngaahi potufolofolá ni. Poupouʻi ke nau fakaʻaongaʻi e futinoutí ke maʻu ai ha ngaahi potufolofola kehe ʻoku akoʻi ai e lakanga fakataulaʻeikí. Te nau fakaʻaongaʻi fēfē e meʻa ne nau maʻú ʻi heʻenau fakahoko honau fatongia he lakanga fakataulaʻeikí?
Fakaafeʻi ha vaheua ʻe taha ʻo e kōlomú ke nau fekumi ʻi ha taha ʻo e ngaahi malanga ʻa Palesiteni Monisoní ʻo kumi e ngaahi meʻa ʻokú ne kole ki he kau maʻu lakanga fakataulaʻeikí ke nau faí. Kole ki he vaheua ʻe tahá ke nau fekumi ʻi he lea tatau pē ki he ngaahi tāpuaki ʻokú ne talaʻofa ʻakí. Kole ki he kau mēmipa ʻo e kōlomú ke nau vahevahe e meʻa ne nau maʻú. ʻE anga fēfē haʻanau fakaʻaongaʻi ʻene faleʻí ki heʻenau ngāue he lakanga fakataulaʻeikí?

Kole ki he kau talavoú ke nau vahevahe e meʻa ne nau ako he ʻaho ní. ʻOku mahino nai e pōpoaki ʻa Palesiteni Monisoni kiate kinautolú? Ko e hā haʻanau ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he kaveingá ni?

Tokoni fakafaiako

“Fakaʻehiʻehi mei he feinga ke akoʻi e meʻa kotoa pē ʻe lava ke fakamatalaʻi ʻi ha foʻi taumuʻa paú. Mahalo kuo ʻosi maʻu ʻe hoʻo kau akó ha mahino ki he taumuʻá. Manatuʻi ko hoʻo lēsoní ʻoku ʻikai ko e taimi pē ia te nau ako ai ʻo fekauʻaki mo e taumuʻá” (ʻOku ʻIkai ha Ui ʻe Mahuʻinga Ange ʻi he Faiakó [2000], 116).

Fakaafeʻi ke ngāue

ʻE fakaʻosi ʻa e fakatahá ʻe he talavou ʻokú ne tatakí. ʻE lava ke ne:

Vahevahe ʻene ngaahi ongo kau kia Palesiteni Monisoní.
Fakaafeʻi e kau mēmipa ʻo e kōlomú ke vahevahe ʻenau ngaahi fakakaukau ki he meʻa ne nau akó.
Fakaafeʻi e kau mēmipa ʻo e kōlomú ke nau fai pe fakaleleiʻi ʻenau palani ʻi he konga ʻo e “Ngaahi Fatongia ʻo e Lakanga Fakataulaʻeikí” ʻi he kiʻi tohi Fatongia ki he ʻOtuá ʻo fakatefito he meʻa ne nau ako he ʻaho ní.