Tiute i le Atua

Aisea e taua ai le maua o se aoaoga ma atiina ae tomai?

O le aoaoga o se vaega taua o le fuafuaga a lo tatou Tama Faalelagi e fesoasoani ia i tatou ia sili atu le avea faapei o Ia. O le mauaina o se aoaoga e saunia ai le malamalama ma tomai o le a fesoasoani ia i tatou ia atiina ae le ola tutoatasi, tausia o tatou aiga i le lumanai, ma sili atu ai le auaunaga i le Ekalesia ma le lalolagi.

Saunia oe lava ia faaleagaga

Ua faapefea ona saunia oe e lau aoaoga mo aafiaga o lou olaga? O le a le malamalama, aoaoga, ma tomai na sili ona aoga mo oe ma lou aiga? O le a se mea o loo e manao e aoao pea?

O a uiga faaalia o alii talavou i le aoaoga ma le aoaoina? O le a faapefea e se aoaoga ona faamanuiaina i latou nei ma o latou tiutetauave i le lumanai?

Ia suesue ma le agaga tatalo ia mau ma punaoa nei. O le a se mea o le a fesoasoani i alii talavou e malamalama ai i le taua o le aoaoga?

2 Nifae 9:29 (E lelei le aoaoina pe afai latou te faalogologo i fautuaga a le Atua.)

MF&F 88:76–80 (E tatau ona tatou aoao e aoao atu mea faaleagaga ma faaletino)

MF&F 88:118 (Aoao i le suesue ma le faatuatua)

MF&F 90:15 (E tatau ona tatou faamasani i tusi lelei, gagana, tautala, ma tagata)

MF&F 130:18–19 (Soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu.)

D. Todd Christofferson, “Uso e, O Loo I Ai se Tatou Galuega e Fai,” Ensign po o le Liahona, Nov. 2012, 47–50

“Aoaoga,” Faataunuuina o Lou Tiute i le Atua (2010), 55–59

“Aoga,” Mo Le Malosi o le Autalavou (2011), 22–24

Aoao atu i le ala a le Faaola

Na silafia e le Faaola i latou na Ia aoaoina. Na Ia faaaogaina auala tulagaese e fesoasoani ai ia i latou e aoao ma faatupulaia. O a ni auala tulagaese e mafai ona e maua e fesoasoani ai i alii talavou taitasi ia malamalama i le taua o le aoaoga?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valaaulia alii talavou e faasoa mai ni aafiaga na latou maua i le faaaogaina o mea na latou aoaoina i lesona talu ai (mo se faataitaiga, e mafai ona latou faasoa mai mea o loo latou faia e faataunuu ai se fuafuaga na latou faia i a latou tusi Tiute i le Atua).
Valaaulia alii talavou e vaai faalemafaufau faapea ua tau atu e se uo ia i latou o le a le toe aoga o ia. O le a mafai faapefea e alii talavou ona fautuaina lea uo e faaauau le finau i le aoga? Fai ia i latou e tusi a latou tali i se fasi pepa. Ao mai pepa, ma faitau ma talanoaina tali ma le vasega. I le faaaiuga o le vasega, tuu atu i alii talavou se avanoa e faaopoopo ai a latou tali e faatatau i mea ua latou aoaoina i le taimi o le lesona.

Aoao faatasi

O le faamoemoega o lenei lesona o le fesoasoani lea i alii talavou e fai fuafuaga ina ia maua se aoaoga pe atiina ae ni tomai e saunia ai e tausia o latou aiga i le lumanai. I le avea ai ma se vaega o lenei lesona, e tatau i uso o le korama ona amata ona fuafua se galuega faatino i le vaega “Aoaoga” i a latou tusi Tiute i le Atua. A o lei amataina le fonotaga faalekorama, valaaulia alii talavou e aumai a latou tusi Tiute i le Atua ma i latou i le lotu. I fonotaga faalekorama i le lumanai, valaaulia i latou e faasoa mai aafiaga latou te maua a o latou faataunuuina a latou galuega faatino.

Valaaulia alii talavou e suesue le Mataupu Faavae ma Feagaiga 88:77–80, 118, ma “Aoaoga” i le Mo LeMalosi o le Autalavou. Tuu atu ia i latou e faailoa mai (a) po o a mea e finagalo le Alii ia latou aoao, (e) pe aisea e finagalo ai o Ia ia latou aoao, ma (i) pe faapefea ona Ia finagalo ia i latou e faatino le aoaoina (tagai Tiute i le Atua, 55). Valaaulia alii talavou e sue i itulau 55–57 i Tiute i le Atua ma fatu se galuega faatino o le a fesoasoani ia i latou e faaaoga ai mea na latou aoaoina e uiga i le mauaina o se aoaoga. Fuafua faatasi o se korama, ni gaoioiga a le Mutuale o le a mafai ona fesoasoani i alii talavou e malamalama ai i le taua o le mauaina o se aoaoga.
Tofi uso taitoatasi o le korama e faitau se tasi o mau ua saunia i lenei otootoga ma vaai mo mea ua aoao mai e mau e uiga i le malamalama ma le aoaoga. Valaaulia alii talavou taitasi e faasoa atu mea na ia aoaoina i se tasi uso o le korama. Fai atu i alii talavou taitasi e tusi i le laupapa ni matata atonu o loo latou mafaufauina e galueaiina. O a mea na latou aoaoina mai nei mau e mafai ona fesoasoani ia i latou a o latou saunia mo nei matata?
Faitau faatasi, o se korama “O Le Aiga: O Se Folafolaga i le Lalolagi,” vaai mo upu po o fuaitau o loo faamatala mai ai matafaioi a tane ma tama (o le folafolaga e mafai ona maua i le itulau 108 o le Tiute i le Atua). Fai ia i latou e tusi i le laupapa a latou tali i fesili nei: (a) O le a le faia i le va o le mauaina o se aoaoga ma le mafaia ona faataunuu lau matafaioi o se tane ma se tama? (e) E faapefea ona aafia lau fuafuaga mo se galuega i lou malamalama i nei matafaioi? (i) O a mea e mafai ona e faia i le taimi nei e saunia ai mo se galuega? Valaaulia alii talavou e sue i Tiute i le Atua, itulau 56–58, ma fatu se galuega faatino o le a fesoasoani ia i latou e amata ona sailiili mo avanoa mo galuega i le lumanai. Fuafua faatasi, o se korama ni gaoioiga a le Mutuale o le a fesoasoani i alii talavou e sailiili ai avanoa mo galuega.
Faatasi ai ma le faatagaga mai le epikopo, valaaulia ni tama o uso o le korama e faasoa mai pe na faapefea ona latou maua se aoaoga po o se tomai e tausia ai o latou aiga. O a ni osigataulaga na latou faia? O a mea na latou faia ina ia faamanuiaina ai o latou aafiaga? O le a se mea o latou moomoo maimau pe ana ese se auala na latou faia ai?
Valaaulia alii talavou taitasi e faitau se vaega e fiafia i ai mai le tusiga a Peresitene Gordon B. Hinckley “Saili le Aoaoina” pe faitau palakalafa 6–8 o le lauga a Elder D. Todd Christofferson “Uso e, O Loo I Ai Se Tatou Galuega e Fai.” Fai i alii talavou e faasoa mai i le korama mea ua latou aoaoina e uiga i le taua o le aoaoga. O le a faapefea e filifiliga latou te faia nei e uiga i le aoaoga ona aafia ai o latou avanoa i le lumanai?

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga? Pe ua latou malamalama pe aisea e taua ai aoaoga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia alii talavou e fai se lisi o mea e mafai ona latou faia ina ia sili atu le faamanuiaina i le aoga ma amata ona faia na mea i le gasologa o le vaiaso.
Luitauina alii talavou e amata ona teu se tupe mo a latou misiona ma aoga i le lumanai.
Valaaulia alii talavou e suesue mau e uiga i aoaoga o loo lisiina i lenei otootoga i a latou suesuega faaletagata lava ia o tusitusiga paia ma faasoa mai mea ua latou aoaoina i se fonotaga faalekorama i le lumanai.