Ola Tutoatasi Faaleagaga ma Faaletino

“Aua ua i totonu ia te i latou le mana, lea ua latou pule ai ia te i latou lava” (Mataupu Faavae ma Feagaiga 58:28).

O otootoga i lenei iunite o le a fesoasoani i e umia le Perisitua Arona ina ia malamalama i le taua o le ola tutoatasi faaleagaga ma faaletino. E ui o loo latou i ai i lo latou talavou, ua faamanuiaina nei alii talavou i le meaalofa o le faitalia, ma o loo latou aoao pe faapefea ona faatulaga a latou lava ala ma maua ai tali i a latou lava faafitauli i le talalelei a Iesu Keriso. O le tele o le latou ola tutoatasi, o le tele foi lena o le saolotoga o le a latou olioli ai. O le a sili atu ona latou saunia e faalautele o latou valaauga i le perisitua, faamalosia o latou aiga, ma faataunuu o latou matafaioi o le lumanai o ni tane ma ni tama.

Otootoga e Filifili mai ai i le Masina Lenei:

• Aisea e taua ai le maua o se aoaoga ma atiina ae tomai?

• O le a le uiga o le ola tutoatasi?

• E faapefea ona ou iloa pe ua amata ona ou liua?

• Aisea e avea ai le galue ma se mataupu faavae taua o le talalelei?

• Aisea e finagalo ai le Alii ina ia ou malosi ma maloloina?

• O le a le ala a le Alii mo le tausiaina o e matitiva ma e le tagolima?

• E mafai faapefea ona ou maua ni fofo i au luitau ma faafitauli?

Mutuale

Mafaufau pe mafai faapefea ona e fuafuaina gaoioiga lea e fesootai ma mea o loo aoaoina e le autalavou. O loo avanoa le saite o Gaoioiga a le Autalavou a le Ekalesia e fesoasoani ia te oe. O le tele o gaoioiga e aoao ai i nei otootoga e mafai foi ona avea o ni gaoioiga anoa o le Mutuale. Galulue ma au peresitene o korama e filifili ma fuafua gaoioiga talafeagai lea e faamalosia ai mea na aoaoina e alii talavou i le aso Sa.

Tiute i le Atua

O vaega nei mai le tusi o le Tiute i le Atua e fesootai i lesona i le iunite lenei:

“Malamalama i le Aoaoga Faavae,” itulau 18–20, 42–44, 66–68

“Aoaoga,” itulau 55–59