Aisea e avea ai le galue ma se mataupu faavae taua o le talalelei?

Ua poloaiina i tatou e le Alii ia aua le paie. O le atiina ae o le manao ma le malosiaga e galue e fesoasoani ia i tatou e saofaga ai i le lalolagi o loo tatou nonofo ai. Na te aumaia se lagona o le faateleina o le taua o le tagata lava ia. Na te faamanuiaina i tatou ma o tatou aiga, i le taimi nei faapea ma le lumanai.

Saunia oe lava ia faaleagaga

O le a se mea na e galue ia maua? Na faapefea e le galue ona faamanuiaina oe ma lou aiga, i le faaletino faapea le faaleagaga?

O anafea na lagona ai e alii talavou le faamalieina i le galue malosi? E faapefea ona e fesoasoani ia i latou ia iloa le tele o faamanuiaga o le galue ma atiina ae ai se manao e galue?

Ia suesue ma le agaga tatalo ia mau nei ma isi punaoa. O le a le mea e uunaia oe ina ia galue?

Kenese 3:19 (E tatau ona tatou galulue ina ia tausia i tatou lava)

Mataio 25:14–30 (O le faataoto i taleni)

Kalatia 6:3–5; 1 Tesalonia 4:11; Mosaea 10:4–5 (Ua poloaiina i tatou e galulue)

Alema 38:12; MF&F 58:27; 60:13; 75:29; 107:99–100 (Aua le paie po o le le tumama)

Dieter F. Uchtdorf, “O Mataupu Faavae e Lua mo Soo se Tamaoaiga,” Ensign po o le Liahona, Nov. 2009, 55–58

H. David Burton, “O Le Faamanuiaga o le Galue,” Liahona, Tes. 2009, 36–40

“Galue ma le Faalagolago o le Tagata ia te Ia Lava,” Mo Le Malosi o le Autalavou (2011), 40–41

Vitio: “O Se Galuega o loo Faagasolo”

7:30

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tusi fesili e lua i le laupapa mai le lesona talu ai ma fai atu i alii talavou e fautuaina mai ni tali.
Fai atu i se alii talavou e talanoa i se mea na ia galue malosi ia maua pe faataunuuina. O a osigataulaga na manaomia ona ia faia? O le a sona lagona ina ua ia faataunuuina lana sini? O le a le mea na ia aoao mai i lona aafiaga?

Aoao faatasi

O gaoioiga taitasi nei o le a fesoasoani i uso o le korama e malamalama ai i le taua o le galue. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Tusi le fesili “O le a le mea na ou aoaoina?” “Aisea e taua ai?” “O le a se mea e mafai ona ou faia?” i le laupapa. Tufa atu se kopi o Mo Le Malosi o le Autalavou i alii talavou taitasi ma tofi i latou taitasi e faitau se tasi o palakalafa i le vaega “Galue ma le Faalagolago o le Tagata ia te Ia Lava ”. Valaaulia o ia e suesue lana palakalafa ma ia saunia e aumai ni tali i fesili e tolu i le laupapa. Faasoa atu se aafiaga mai lou lava olaga na aoaoina oe i le taua o le galue.
Tofi alii talavou taitoatasi e faitau se mau se tasi o loo fautuaina mai i lenei otootoga. Fai ia te ia e sau i luma o le potu ma faasoa mai (a) mea ua ia aoao mai lana mau, (e) aisea e taua ai, ma (i) faataitaiga na ia vaaia e faaalia ai mea ua aoao mai e le mau.
Faitau Mataio 25:14–30 faatasi o se korama. Fautuaina alii talavou e vase lalo o ni fuaitau e faatatau i le galue ma taunuuga o le galue ma lio soo se fuaitau e fesootai ma le paie ma taunuuga o le le galue. Valaaulia alii talavou e faasoa mai mea na latou maua ma ni aafiaga na latou maua a o galulue malosi i se mea. O a ni taunuuga o a latou taumafaiga?
Faitau le vaega “O Le Mataupu Faavae Muamua: Galue” mai le lauga a Dieter F. Uchtdorf “O Mataupu Faavae e Lua mo Soo se Tamaoaiga.” Fai i alii talavou e filifili se fuaitau mai le lauga o le a lelei e manatua pe faitau i aso uma e uunaia ai i latou i a latou taumafaiga e galulue. Faaali le vitio “O Se Galuega o loo Faagasolo” ma fai i alii talavou e sue ni faataitaiga o mea na aoao mai e Peresitene Uchtdorf. O a mea e mafai ona latou aoao e uiga i le galue mai le faataitaiga a Tyler? E mafai faapefea ona latou faaaogaina le mea na ia faia e faataunuu ai a latou lava sini?

7:30

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga? Pe ua latou malamalama pe aisea e taua ai le galue? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Motugaafa faafaiaoga

“Ia tuuina atu ni fesili e moomia ai ona sailia e tagata o loo aoaoina ia ni tali i totonu o tusitusiga paia ma aoaoga a perofeta o aso e gata ai” (O Le Aoao Atu, E Leai Se Isi Valaauga e Sili Ai [1999], 64).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu mea na ia lagona na uunaia ai o ia e faatatau i mea na ia aoaoina i le aso.
Faasoa i le korama ni manaoga i le uarota na faailoa mai e le epikopo ma fai ni fuafuaga mo se gaoioiga faalekorama e fesoasoani ai e foia na manaoga.