E faapefea ona ou iloa pe ua amata ona ou liua?

O le liua o se faagasologa o le olaga atoa o le avea atili faapei o Keriso e ala i le Togiola a Iesu Keriso. E aofia ai se suiga e le gata i a tatou amio ae i a tatou manaoga, o tatou uiga, ma o tatou natura uma.O se suiga maoae lea na faatatau i ai le Alii o se toe fanauina ma se liuga tele o le loto (tagai Mosaea 27:25; Alema 5:14). E mafai ona tatou iloa pe ua amata ona tatou liua i le Alii pe a leai ni o tatou tuinanau mo le agasala, ua faatumulia i tatou i le alofa, ma ua tatou saili e faasoa atu le talalelei i isi.

Saunia oe lava ia faaleagaga

O a ni aafiaga na faateleina ai lou liua? O a suiga na e matauina i lou olaga ao e galue ma le filiga ina ia ola ai i le talalelei?

O le a se faamaoniga o e vaaia ua amata ona liuaina ia alii talavou? O le a se mea e tatau ona latou malamalama i ai e uiga i le liua?

O a mau ma nisi punaoa o le a fesoasoani i uso o le korama ia iloa ai lo latou liua i le Alii?

Enosa 1:1–19, 26–27; Mosaea 5:1–5; 27:23–37; Alema 23:6–7; Helamana 3:35; 4 Nifae 1:1–4, 15 (Faataitaiga o le liua)

Linda K. Burton, “O Fafine Mausali,” Ensign po o le Liahona, Me 2017, 12–15

Bonnie L. Oscarson, “O Ou Talitonu Ea?” Ensign po o le Liahona, Me 2016, 87–89

David A. Bednar, “Faaliliuina i le Alii,” Ensign po o leLiahona, Nov. 2012, 106–9

Donald L. Hallstron, ”O A Ituaiga o Tagata?“ Ensign po o le Liahona, Me 2014, 53-55

“Liua,” Faamaoni i le Faatuatua (2004), 94–97

Vitio: “Faatalitali i lo Tatou Ala i Tamaseko”

3:46

Aoao atu i le ala a le Faaola

Na tuuina atu e le Faaola i Ona soo ni tiutetauave taua e aoao atu ai, faamanuia, ma auauna atu ai i isi. O Lona faamoemoega ina ia fesoasoani ia i latou ia liua e ala i a latou auaunaga i isi. O a ni avanoa mo le auauna atu ma le tuputupu ae e mafai ona e tuuina atu ia i latou o umiaina le Perisitua Arona o e aoaoina?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou e faasoa mai se mea latou te manatua mai le talanoaga i le vaiaso ua te’a. Aisea latou te manatuaina ai pea lenei mea?
Valaaulia ia alii talavou e faia se lisi o mea na i ai se suiga i le aluga o taimi (e pei o le fatu na suia i se laau po o se tadpole na suia i se lage). E faapefea ona latou faaaogaina nei mea e aoao atu ai isi e uiga i le liua?

Aoao faatasi

O gaoioiga taitasi nei o le a fesoasoani i tagata o le korama ia aoao e uiga i le liua ma le iloaina o faamaoniga o le liua o i latou lava. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e saili i le lauga a Sister Linda K. Burton “O Fafine Mausali” e iloa ai le auala na ia faamatalaina ai “fafine mausali,” ma tusi mea na latou maua i luga o le laupapa. O a nisi mea e mafai ona tatou aoao e uiga i le auala e avea atili ai ma se soo o le Faaola mai i faataitaiga a fafine i le lauga a Sister Burton? Fai atu i alii talavou e faamaea le “Gaoioiga o Uiga” i le Talai Lau Talalelei, itulau 135, ma iloilo poo o le a le lelei o loo latou atiaeina ai uiga faaKeriso. O a mea e mafai ona latou faia e avea ai ma “alii mausali” o e o ni soo tuuto o Iesu Keriso?
I ni nai aso i luma mai, valaaulia se sui o le korama e sau saunia i le sauniga a le korama e faasoa le aafiaga na maua e Michele Carnesecca ina ua mai tigaina lona atalii o Ethan, o loo maua i le saunoaga a Sister Bonnie L. Oscarson “O Ou Talitonu Ea?” Atonu e te tusia le fesili “O ou talitonu ea pe leai?” i luga o le laupapa. Valaaulia alii talavou e mafaufau loloto i lenei fesili a o faitau e le korama faamatalaga a Sister Oscarson o mea tatou te talitonu i ai. I le faaiuga o le sauniga o le korama, tuu atu i alii talavou le avanoa e faasoa mai ai molimau o aoaoga a le talalelei o loo maua i lenei saunoaga ua latou talitonu i ai. Na faapefea ona latou talitonu i nei mea mo i latou lava?
Tusi le upu liua i le laupapa, ma valaaulia alii talavou e saili mo upu ma fuaitau i le Mosaea 27:25–26 o le a fesoasoani ia i latou ia malamalama po o le a le liua. Valaaulia i latou e talanoaina po o a mea sa latou aoaoina e uiga i le liua mai nei upu ma fuaitau.
Valaaulia ia alii talavou e filifili se tasi o lauga ua tuuina atu i le otootoga lenei, faitau se vaega o le lauga, ma faaaoga le faamatalaga mai le lauga e fatu ai ni pepa lautele o i ai se savali o le a taliina le fesili “E faapefea ona ou iloa pe ua amata ona ou liua?” Fai atu i alii talavou e faaaoga a latou pepa lautele o i ai se savali ma lauga sa latou suesue i ai e aoao atu ai e le tasi le isi e uiga i le liua.
Valaaulia alii talavou e suesue le “Liua” i le Faamaoni i le Faatuatua po o mau i le otootoga lenei ma tusi se lisi o fesili e mafai ona latou fesiligia ai i latou lava e iloilo ai lo latou alualu i luma agai i le liua. Tuu atu se taimi mo uso o le korama e faasoa mai ai mea o le a latou faaaofiaina ia latou lisi ma le mafuaaga. Uunaia i latou e mafaufau loloto pe faapefea ona latou taliina nei fesili.
Faaali se tasi o vitio o lenei otootoga, ma valaaulia alii talavou e faasoa mai mea sa latou aoaoina e uiga i le liua mai le vitio. Faamatala atu i uso o le korama ni aafiaga na fesoasoani ia te oe ina ia liua atili, ma valaaulia i latou e faasoa mai ni a latou foi aafiaga.

Fai atu i le autalavou e faasoa mai mea ua latou aoaoina i le aso. O a ni o latou lagona po o ni uunaiga? O latou malamalama i le auala e iloa ai le liua i o latou olaga? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa atu ona lagona e uiga i le taua o le liua atili.
Valaaulia uso o le korama e filifili se mea faapitoa o le a latou faia ina ia matua liua ai i latou.