E mafai faapefea ona ou maua fofo i au luitau ma faafitauli?

O le faalagolago o le tagata ia te ia lava e aofia ai le mafaia ona maua fofo i o tatou lava faafitauli ma luitau. O le tele o nei fofo e maua i le talalelei toefuataiina a Iesu Keriso. E silafia e lo tatou Tama Faalelagi luitau ua feagai ma i tatou. E alofa o Ia ia i tatou ma e finagalo e fesoasoani ia i tatou. E tatau ona tatou tatalo mo le taitaiga a o tatou saili tali i o tatou luitau i tusitusiga paia ma upu a perofeta ma aposetolo.

Saunia oe lava ia faaleagaga

Na faapefea ona saunia e le talalelei ni fofo ma faamafanafanaga i ou taimi faigata?

O a ni faigata po o luitau o fetaiai ma alii talavou? O a luitau e ono fetaiai ma i latou i le lumanai? O a ni mataupu faavae o le talalelei o le a fesoasoani ia i latou ia taulimaina ma le lelei nei luitau?

O a mau ma isi punaoa o le a fesoasoani e faamalamalama i alii talavou le auala e mafai ai ona fesoasoani le talalelei i luitau o le olaga?

Faataoto 3:5–6; Mataio 11:28–30; Mareko 4:36–39; Alema 7:11–13; Alema 37:35–37; 38:5 (Saili le fesoasoani a le Alii i luitau ma faafitauli)

Richard G. Scott, “Ia Avea le Faaaogaina o le Faatuatua ma Mea E Te Faamuamuaina,” Ensign po o le Liahona, Nov. 2014, 92–95

Jeffrey R. Holland, “Peiseai o se Ipu ua Nutililii,” Ensign po o le Liahona, Nov. 2013, 40-42

“Soifua Maloloina Faaletino ma Faalelagona,” Mo Le Malosi o le Autalavou (2012), 25–27

Aoao atu i le ala a le Faaola

Sa aoao e le Faaola Ona Soo ia mafaufau i tusitusiga paia mo i latou lava ma faaaoga e sue ai tali i a latou lava fesili. E mafai faapefea ona e fesoasoani i alii talavou ia liliu atu i tusitusiga paia ma upu a perofeta ao latou saili i tali o a latou luitau?

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama.Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou e faasoa mai ni aafiaga na latou maua i le vaiaso a o latou taumafai e ola i mea na latou aoaoina i lenei masina e uiga i le ola tutoatasi.
Valaaulia alii talavou e tau mai nisi luitau po o faafitauli o loo feagai ma talavou o la latou tupulaga, ma tusi a latou tali i le laupapa. O a nisi o mea e le soifua maloloina pe leaga foi e fai i nisi taimi e alii talavou e foia ai nei faafitauli? I le faagasologa o le lesona, valaaulia alii talavou e vaai mo auala e mafai ai ona fesoasoani upumoni o le talalelei.

Aoao faatasi

O le a fesoasoani gaoioiga taitasi nei i tagata o le korama e iloa ai le ala e mafai ai ona maua ni fofo i a latou lava luitau. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau korama:

Fai atu i alii talavou e mafaufau i se luitau po o se faafitauli lea e ono feataiai ma tagata talavou i lenei vaitaimi. Fai atu ia i latou e saili i le faasino autu i le lomiga o le Ensign po o leLiahona, o le konafesi sili ona lata mai e vaavaai ai mo ni autu lea e mafai ona foiaina lena faafitauli. Fai atu i ai e saili se tasi o lauga e faatatau i na autu ma faasoa atu ma le korama se faamatalaga lea e mafai ona fesoasoani i se tasi e foiaina na luitau. Uunaia ia alii talavou e faaaoga le faasino autu e saili ai se fesoasoani i a latou lava luitau.
Fai atu i alii talavou e faitau parakalafa mulimuli e lua o le “Soifua Maloloina Faaletino ma Faalelagona” i le Mo le Malosi o le Autalavou ma tagai mo se fautuaga e mafai ona fesoasoani ia i latou po o tagata latou te iloa. O a nisi faataitaiga o ”vaifofo maloloina“ e tatau ona tatou sailia pe a i ai ni a tatou faafitauli? O a ni vaifofo o ofo mai e le talalelei a Iesu Keriso? Faasoa atu se aafiaga mai lou lava olaga lea na tuuina mai ai e le talalelei ni tali po o se fesoasoani mo se faafitauli patino po o se luitau. Fai atu i alii talavou e faasoa mai ni aafiaga talitutusa mai o latou lava olaga.
Faasoa atu le faamatalaga lenei mai ia Peresitene Thomas S. Monson: ”E maeu lava le faamanuiaina o i tatou, o’u uso e ma tuafafine, i lo tatou maua o le talalelei a Iesu Keriso i o tatou olaga ma i o tatou agaga. E maua ai tali i fesili aupito tetele o le olaga. E maua ai le uiga ma le faamoemoe o o tatou olaga. Ua tatou ola i taimi faigata. Ou te faamautinoa atu ia te outou, o loo silafia e lo tatou Tama Faalelagi luitau o loo tatou feagai. E alofa o Ia ia i tatou taitoatasi ma e finagalo ia faamanuiaina i tatou ma fesoasoani mai” (“A o Tatou Tapunia Lenei Konafesi,” Ensign po o le Liahona, Me 2012, 115). Fai atu i alii talavou taitasi e faitau mai se tasi o mau mai lenei otootoga ma faasoa atu pe faapefea ona fesoasoani i se tasi o loo feagai ma se luitau po o se faafitauli o loo taatele i talavou i lenei vaitaimi. O le a le uiga o le talitonu i le Alii po o le o mai ia Keriso pe a tatou manaomia se fesoasoani? O i ai nisi mau e mafai ona mafaufau i ai alii talavou lea e mafai ona fesoasoani i ni luitau po o ni faafitauli patino?
Fai atu i alii talavou e mafaufau i se tagata latou te iloa o loo tauivi ma ni luitau o le mafaufau pe faalelagona? Tuu atu ia tofu alii talavou ma se kopi o le lauga a Elder Jeffrey R. Holland “E Pei o se Ipu ua Nutililii.” Fai atu i ai e saili mo ni tali o lana fesili “O le a se auala sili e te tali mai atu au i ni luitau o le mafaufau po o le faalelagona o feagai ma oe po o i latou e te alofa i ai?” Fai atu i alii talavou e faasoa mai se mea sa latou aoaoina ma talanoa pe faapefea ona fesoasoani nei aoaoga i le tagata o loo latou mafaufau i ai.
Fai atu i uso o le korama e mafaufau i ni luitau po o ni faafitauli patino o loo feagai ma i latou. Lisi i luga o le laupapa ni meafaigaluega se fa na ta'ua e Elder Richard G. Scott i lana lauga “Ia Avea le Faaaogaina o le Faatuatua ma Mea E Te Faamuamuaina,” ma fai atu i uso o le korama e suesue i se tasi o meafaigaluega latou te lagona e mafai ona fesoasoani ia i latou ma a latou luitau. Valaaulia i latou e faasoa mai se mea sa latou aoaoina mai le fautuaga a Elder Scott.

Fai atu i alii talavou e faasoa mai mea na latou aoaoina i le aso. Pe o latou malamalama i le auala e saili ai vaifofo i luitau o le olaga i le talalelei a Iesu Keriso? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Faasoa mai pe na faapefea e le malamalama ma le ola ai i le talalelei ona fesoasoani ia te ia e faatoilalo tofotofoga.
Valaaulia uso o le korama e faaaoga mea na latou aoaoina i le aso e fesoasoani pe uunaia ai se tasi o loo tauivi ma luitau faalelagona.