O le a le ala a le Alii mo le tausiaina o e matitiva ma e le tagolima?

Ina ua afio mai Iesu Keriso i le lalolagi, na Ia faaaluina le tele o Lana galuega i le tausia o e matitiva ma e le tagolima. E ala atu i Lana Ekalesia, ua saunia e le Alii se ala mo i tatou e tausia ai e le tagolima. Ua Ia finagalo ia tatou foai atu ma le agaalofa e tusa ai ma mea ua tatou maua mai ia te Ia. “O le ala a le Alii e tausia ai ē le tagolima e ese lava mai le ala a le lalolagi. Ua fetalai le Alii ‘[O le tausia o e matitiva] e tatau ona faia i la’u lava ala.’ [Mataupu Faavae ma Feagaiga 104:16 ; tagai foi i le fuaiupu e 15.] E le gata ina gauai mai o Ia i o tatou manaoga vave; ae o loo Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva.” (Dieter F. Uchtdorf, “O Le Faia i le Ala a le Alii,” Ensign po o leLiahona, Nov. 2011, 54).

Saunia oe lava ia faaleagaga

Na faapefea ona e saili ia mulimuli i le faataitaiga a le Faaola i le saunia mo isi? O a ni aafiaga e mafai ona e faasoa atu i alii talavou?

O a mataupu faavae o le saunia i le ala o le Alii e tatau ona malamalama i ai alii talavou? E faapefea i le malamalama i nei mataupu faavae ona aafia ai le auaunaga o loo latou tuuina atu o ni tagata o umia le perisitua?

O a mau ma isi punaoa o le a fesoasoani i alii talavou ia malamalama ai pe faapefea ona tausia e le Alii e matitiva ma e le tagolima?

Isaia 58:6–11; Malaki 3:8–10; Mataio 25:35–40; MF&F 82:18–19 (Auala e tausia ai e matitiva)

Iakopo 1:27; Mosaea 18:27–28; MF&F 42:29–30 (O le taua o le tausia o e matitiva ma e le tagolima)

Alema 34:27–28; Mamona 8:35–37: MF&F 56:16–18; 70:14 (O le lapataiga a le Alii ia i latou e le tausia e matitiva)

MF&F 104:15–18 (Tausia o e matitiva i le ala a le Alii)

Patrick Kearon, “Sulufaiga mai le Afa,” Ensign po o le Liahona, Me 2016, 111–14

Linda K. Burton, “Sa Fai Au ma Tagata Ese,” Ensign po o le Liahona, Me 2016, 13–15

Jeffrey R. Holland, “Pe Le o i Tatou Uma Ea O Ni Tagata Aisi?” Ensign po o leLiahona, Nov. 2014, 40–42

“Taumafaiga a Tagata o le Ekalesia e Tausia e Matitiva ma e Le Tagolima ma Tuuina atu le Auaunaga,” Tusitaulima 2: Taitaiina o le Ekalesia (2010), 6.1.2

“Auauna Atu,” Mo Le Malosi o le Autalavou (2011), 32–33

Vitio: “Faasoa Atu o le Malamalama o Keriso,” “Sa Fai A’u ma Tagata Ese: Ia Outou Fealofani,” “When We Were Strangers,”

5:20

3:25

3:3

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou e faasoa mai aafiaga na latou maua talu ai nei na faamanatu ia i latou se mea na latou aoaoina i le lesona o le vaiaso ua tea.
Valaaulia le epikopo e susu mai i fonotaga a le korama ma faamatala atu i alii talavou le ala e faaaoga ai tupe paia a le Ekalesia, e aofia ai taulaga anapogi, saofaga mo galuega alofa, foai mo Tupe Faaagaga mo Aoga (tagai Tusitaulima 1: Peresitene o Siteki ma Epikopo [2010], 14.4). Fai atu ia te ia e faamatala mai pe faapefea ona ia fesoasoani ia i latou e le tagolima ina ia sili atu le ola tutoatasi.

Aoao faatasi

O gaoioiga taitasi nei o le a fesoasoani i alii talavou ia aoao ai e uiga i le ala a le Alii i le tausiaina o e matitiva ma e le tagolima. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau vasega:

I lana saunoaga “Sulufaiga mai le Afa,” Na saunoa mai Elder Patrick Kearon, “O loo i ai se aofaiga e 60 miliona o tagata sulufai i le lalolagi i le aso. … E faataia le mafaufau ai i fuainumera ua aofia ai ma le mafaufau pe o le a le uiga o lenei mea i olaga o tagata taitoatasi.” Ina ia fesoasoani i alii talavou ia nofouta i le mala o tagata sulufai ma le auala e mafai ai ona latou fesoasoani, faaali atu ia i latou se tasi o vitio pe sili atu o i lenei otootoga. O a ni o latou lagona e uiga i tofotofoga o loo feagai ma tagata sulufai? Atonu e te valaaulia tagata o le korama i ni vaega toalaiti e iloilo le lauga a Elder Kearon po o le lauga a Sister Burton “Sa Fai Au ma Tagata Ese,” ma vaavaai mo mea e mafai ona latou faia e fesoasoani ai i tagata sulufai. Fesoasoani i alii talavou e faia ni fuafuaga e faatino nei fautuaga.
Valaaulia tagata o le korama e faitau faatasi le vaega “Auauna Atu” i le Mo Le Malosi o le Autalavou ma talanoa pe aisea e finagalo ai le Alii ia tatou auauna atu. E mafai foi ona e fai atu i se sui o le korama e suesue le vaega o le “Auauna Atu i Isi” i le tusi Tiute i le Atua (itulau 26–27, 50–51, po o le 74–75) ma sau saunia e taitai se talanoaga e faatatau i gaoioiga e aoao ai o i lenei vaega. Tuu atu i alii talavou se taimi i le fonotaga a le korama e fai ai se fuafuaga patino ma se fuafuaga a le korama e auauna atu i se tasi o manaomia le fesoasoani. I se fonotaga a le korama i le lumanai, fai atu ia i latou e faasoa mai ni aafiaga o loo latou mauaina i le faataunuuina o a latou fuafuaga.
Vaevae ia alii talavou ia tofu paga. Tofi se tasi o tagata o paga taitasi e faitau mau e uiga i le taua o le tausia o e matitiva ma e le tagolima, ma tofi le isi e faitau mau lea e tuuina atu ni lapataiga ia i latou o e le tausia e matitiva ma e le tagolima (mo ni manatu, tagai i mau o loo fautuaina atu i lenei otootoga). Fai atu i alii talavou e suesue i a latou mau fuaitau ona faasoa lea ma a latou paga mea sa latou aoaoina. Fesili atu ia i latou pe aisea e matua taua ai i le Tama Faalelagi le tausia o e matitiva ma e le tagolima. Fai atu i alii talavou e talanoaina ni auala e mafai ona latou fesoasoani atu ai ia i latou o loo i ai manaoga i o latou aiga, uarota, ma le nuu.
Tuu atu i uso o le korama ni kopi o le lauga a Elder Jeffrey R. Holland “Pe Le o i Tatou Uma Ea o Ni Tagata Aisi?” Fai atu i alii talavou taitoatasi e filifili se tasi o mau fuaitau na sii mai e Elder Holland e uiga i le fesoasoani atu i e matitiva ma e le tagolima. Fai atu i alii talavou taitoatasi e faasoa mai se mau fuaitau sa ia filifilia ma po o le a uiga ia te ia. I le avea ma se korama, toe iloilo le fautuaga a Elder Holland: “Ou te le iloa tonu pe o le a se tulaga e tatau ona outou faataunuu ai a outou matafaioi ia i latou o e e le fesoasoani pe ua le mafai ona fesoasoani ia i latou lava. Ae ou te iloa o loo silafia e le Atua, ma o le a Ia fesoasoani ma taiala outou i ni galuega agaalofa faalesoo.” Tuu atu i uso o le korama sina taimi e mafaufau ai i ni auala latou te lagona e finagalo ai le Atua ina ia latou tausia ai e matitiva ma e le tagolima. Fai atu ia i latou e faasoa mai i le korama o latou lagona ma le korama.
Faaali le vitio “Fefaasoaaiga o le Malamalama o Keriso” ma fai atu i alii talavou e faasoa mai ni mea na faagaeetia ai i latou e uiga i nei faataitaiga. Fai atu ia i latou e faasoa mai ni aafiaga sa latou mauaina sa fesoasoani atu ai i isi ma mea e mafai ona latou faia e fesoasoani atu ai ia i latou o e le tagolima.

5:20
Fai atu i uso o le korama e lisi mai nisi o manaoga faaletino ma faaleagaga o i ai a se tagata. Tusi i luga o le laupapa, “O le a le ala a le Alii mo le tausiaina o e matitiva ma e le tagolima?” Faasoa atu i alii talavou le faamatalaga lea mai ia Peresitene Dieter F. Uchtdorf i le amataga o lenei otootoga, ma fai atu i alii talavou e faalogo mo tali i le fesili o loo i luga o le laupapa. Valaaulia i latou e faasoa mai mea na latou maua. E mafai faapefea ona tatou fesoasoani atu i e matitiva ma le tagolima ina ia amata ona latou faalagolago atili ia i latou lava?

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga? Pe o latou malamalama i le uiga o le tausia o e le tagolima i le ala a le Alii? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Afai e tuuina mai e se tasi se fesili, mafaufau e valaaulia isi e taliina nai lo lou taliina e oe lava ia. Mo se faataitaiga, e mafai ona e faapea atu, 'O se fesili manaia tele lena. O le a se manatu o le toatele o outou? po o le 'E mafai e se tasi ona fesoasoani mai i le fesili lenei?” (O Le Aoao Atu, E Leai Se Isi Valaauga E Sili Ai [1999], 67).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Fai atu lana molimau i lona tiute faaleperisitua e auauna ma faagaeetia fanau a le Atua.
Valaaulia uso o le korama e talia lenei valaaulia mai ia Peresitene Thomas S. Monson: “Ia tatou tatalo mo musumusuga ia iloa manaoga o i latou o loo siomia ai i tatou, ona tatou o atu lea ma tuuina atu le fesoasoani” (“Ia Mafuta le Atua ma Outou Seia Tatou Toe Feiloai, ” Ensign po o le Liahona, Nov. 2012, 110).