Aisea e finagalo ai le Alii ina ia ou malosi ma maloloina?

O le soifua maloloina lelei o se vaega taua o le ola tutoatasi. O le puipuia o lo tatou ola maloloina o le a faatagaina i tatou e faataunuu lo tatou taunuuga paia ma ia sili atu le lelei ona auauna atu i isi. O le ala tatou te tausia ai o tatou tino e aafia ai lo tatou ola maloloina faaleagaga ma lo tatou mafaia ona maua le taitaiga mai le Agaga Paia. Ina ia faasaoina lo tatou ola maloloina, e tatau ona tatou usiusitai i le Upu o le Poto, taumafa meaai lelei, fai soo faamalosi tino, ma ia lava le moe.

Saunia oe lava ia faaleagaga

O le a le faia i le va o le soifua maloloina faaletino ma le faalelagona ma lou soifua maloloina faaleagaga? Na faapefea e le faatumauina o lou soifua maloloina ona faatagaina oe ia sili atu le auaunaga i le Alii? O a nisi faamanuiaga ua e maua a o e tauivi e ola i se olaga soifua maloloina?

O a tofotofoga o loo feagai ma alii talavou e mafai ona faatamaia ai lo latou soifua maloloina faaletino ma le faalelagona? E faapefea ona e fesoasoani ia i latou ia iloa faamanuiaga o le ola i tulafono a le Alii o le soifua maloloina? O le a faapefea e le ola i nei tulafono ona aafia la latou auaunaga faaleperisitua?

A o e suesueina mau ma isi punaoa e uiga i le Upu o le Poto, vaai mo mea o le a fesoasoani i alii talavou e lagona ai le taua o le tausia lelei o o latou mafaufau ma tino ma le mafuaaga e finagalo ai le Alii ia latou faia faapea.

Tanielu 1:3–20 (Ua faamanuiaina Tanielu ma ana uo i le usiusitai i tulafono a Eperu e faatatau i meaai faapitoa)

MF&F 88:124 (Ua fautuaina i tatou e le Alii i uiga masani o le galue ma le moe)

MF&F 89 (Ua faaali mai e le Alii le Upu o le Poto ma faamanuiaga mo le usiusitai i ai)

Thomas S. Monson, “O Mataupu Faavae ma Folafolaga,” Ensign po o le Liahona, Nov. 2016, 78–79

Boyd K. Packer, “O Le Upu o le Poto: O Mataupu Faavae ma Folafolaga,” Ensign, Iulai 1996, 19–21

M. Russell Ballard, “E! O Le Togafiti Poto a Le ua Leaga,” Ensign po o le Liahona, Nov. 2010, 108–10; tagai foi i le vitio “ O Le A Faasaolotoina Ai Oe”.

2:53

“Soifua Maloloina Faaletino ma Faalelagona,” Mo Le Malosi o le Autalavou (2011), 25–27

“Upu o le Poto,” Faamaoni i le Faatuatua (2004), 86–88

Vitio: “ Na Tuu Atu e le Atua ia te i Latou Le Poto”

13:58

Aoao atu i le ala a le Faaola

I Lana galuega talai i le lalolagi, na valaaulia e Iesu Keriso Ona soo e faatino le faatuatua ma ola i upumoni na Ia aoao atu. O Ana aoaoga uma sa Ia taulai atu ai i le fesoasoani i e mulimuli ia te Ia e ola i le talalelei ma o latou loto atoa. Ina ia faataunuuina lenei mea, na Ia saunia avanoa mo i latou e aoao ai e ala atu i aafiaga maoae. A o e aoaoina alii talavou, valaaulia i latou e faasoa mai ni aafiaga na latou maua i le ola ai i le Upu o le Poto.

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Tusi i le laupapa le autu o le lesona o le vaiaso ua tea, ma valaaulia alii talavou e faasoa mai se mea o loo latou manatua.
Tusi i le laupapa, “Aisea e finagalo ai le Alii ia tatou soifua maloloina?” Valaaulia alii talavou e faasoa mai ni tali talafeagai ma vaai mo ni tali faaopoopo a o faia le lesona.

Aoao faatasi

O gaoioiga taitasi nei o le a fesoasoani i uso o le korama e malamalama ai i le tulafono a le Alii o le soifua maloloina. I le mulimuli ai i le uunaiga a le Agaga, filifili se tasi po o le sili atu o le a sili ona aoga mo lau korama:

Valaaulia alii talavou e susue i itulau 31–32 i a latou tusi Tiute i le Atua ma faatumu faatasi o se korama laasaga 1 ma le 2 . Fautuaina le korama e fuafua se galuega faatino a le korama, i le faaopoopo atu i a latou galuega faatino taitoatasi, o le a fesoasoani ia i latou e faatumauina lo latou soifua maloloina faaletino. Valaaulia soo se alii talavou ua maea ona faataunuu a latou galuega faatino e faasoa mai pe na faapefea i le ola ai i a latou fuafuaga ona aafia i latou. Tau atu i alii talavou faapea mo nai isi vaiaso o le a sosoo ai, o le a e fai atu ia i latou e faasoa mai ni aafiaga na latou maua ao faataunuuina fuafuaga na latou faia.
Afai e mafai, aumai se maunu ia po o lago i le fonotaga faalekorama, faaali atu se ata o se tasi o na mea, pe faaali le vitio “ O Le A Faasaolotoina Ai Oe.” Tuu atu i alii talavou e faamatala mai pe faapefea ona faaaoga maunu ia ma lago e faasese ai i’a. O a nisi o auala e faasese ai pe faasee ai e Satani alii talavou ina ia soli le Upu o le Poto? Vaevae le korama i ni vaega se lua. Tuu atu i le tasi vaega e faitau Mataupu Faavae ma Feagaiga 89:5–15 ma faailoa mai mea ua faasa mai e le Alii pe finagalo ia tatou faaaogaina ma le faautauta. Tuu atu i le isi vaega e faitau ia fuaiupu 10–20 ma faailoa mai mea ua faauuina e le Alii mo le faaaogaina e tagata. Faamatala pe faamanino soo se upu po o fuaitau (tagai “Upu o le Poto” i le Faamaoni i le Faatuatua, 199–01). Tuu atu i alii talavou e faasoa mai le mea e mafai ona latou faia e aloese ai mai tulaga e faaseseina ai pe faaosoosoina ai i latou.

2:53
Tusi autu e lua i le laupapa: “Faamanuiaga Faaleagaga” ma “Faamanuiaga Faaletino.” Valaaulia alii talavou e faitau MF&F 89:18–21, vaai mo faamanuiaga ona lisi lea i lalo o le autu talafeagai i le laupapa. O le a le malamalama o alii talavou e uiga i nei faamanuiaga i o latou olaga? O fea o faamanuiaga o loo lisiina ua uma ona maua e alii talavou? (Afai latou te manaomia le fesoasoani e malamalama ai i nei folafolaga, fautua atu latou te vaai i le faamatalaga a Peresitene Boyd K. Packer i lana lauga “O Le Upu o le Poto: O Mataupu Faavae ma Folafolaga”).
Faaali le vitio “ Na Foai atu e le Atua ia i Latou le Poto,” ma fai i alii talavou e faitau taitoatasi po o i se vaega le Tanielu 1:3-20. Valaaulia alii talavou e vaai mo auala na faamanuiaina ai Tanielu ma ana uo ona o le usiusitai i la latou tulafono o le soifua maloloina. (E mafai ona e filifili e taofi le vitio ma talanoaina nei mea pe a maua e alii talavou.) Fai atu fesili faapenei: E faapefea ona faamanuiaina oe ona o le usiusitai i le Upu o le Poto? O le a faapefea ona fesoasoani ia te oe le usiusitai i le Upu o le Poto i le faataunuuina o ou tiute faaleperisitua? O a nisi o luitau o loo feagai ma le autalavou i nei aso a o latou tauivi e ola i le Upu o le Poto? O le a se mea e mafai ona latou faia e faatoilalo ai na luitau? Faasoa atu lau molimau i le taua o le usiusitai i le Upu o le Poto ina ia faatumauina ai le Agaga i lou olaga.

13:58
Valaaulia alii talavou e faitau le “Soifua Maloloina Faaletino ma Faalelagona ” i le Mo Le Malosi o le Autalavou. Fai i ni alii talavou e lisi i le laupapa ni nai aitema o fautuaga latou te maua, ae fai i isi e lisi faamanuiaga ua folafolaina ia i latou e mulimuli i lenei fautuaga. Fai ia i latou e talanoaina pe faapefea e le ala latou te tausia ai o latou tino ona aafia ai o latou agaga. E mafai faapefea ona latou faaaoga le lisi i le laupapa e faamatala ai o latou tulaga faatonuina i a latou uo o isi lotu?

Fai atu i alii talavou e faasoa mai mea na latou aoaoina i le aso. O a ni o latou lagona po o ni uunaiga? Pe ua latou malamalama pe aisea e finagalo ai le Alii ia latou soifua maloloina? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Valaaulia e faatino

O le alii talavou o loo taitai e faaiuina le fonotaga. E mafai ona ia:

Valaaulia alii talavou e fai se lisi o ni faamanuiaga latou te vaaia i lenei vaiaso a o latou ola i le Upu o le Poto.
Ia luitauina alii talavou e fatu se galuega faatino i a latou tusi Tiute i le Atua e fesoasoani ia i latou ia soifua maloloina (tagai i itulau 31–34) ma faasoa mai o latou aafiaga i le faatinoina o a latou galuega faatino.