Ongoongo Fakamuimui Tahá—Ko e Hā e Meʻa Foʻou ki he 2017?

Ko e Liliu Fakamuimuitaha ki he Kanotohí he 2017

Kuo fehuʻi ʻe ha tokolahi ‘o e kau faiakó mo e kau takí, “Ko e hā ha meʻa foʻou?” Kuo fakahū e fakamatala fakamuimuitahá ki he Ha‘u, ʻo Muimui ‘Iate Aú ki he 2017, ʻi he ngaahi lea konifelenisi lahi fakamuimuitahá, ngaahi vitiō mo e hiva mei he Siasí. ‘E lava ke maʻu ʻe he kau faiakó moe toʻu tupú e fakamatala fakamuimuitahá mei he polokalama Laipeli ʻo e Ongoongoleleí pea mo e uepisaiti Ha‘u, ʻo Muimui ‘Iate Aú.ʻOku maʻu ʻi he ngaahi ʻiuniti fakamāhiná ha ngaahi lēsoni ʻoku lahi ange ia he meʻa ʻe malava ke akoʻi ʻi ha māhina ʻe taha, pea ko e lēsoni ʻe 146 ʻo kinautolu ʻoku ʻosi ʻasi ai e ngaahi maʻuʻanga tokoni foʻou mo fakamuimuitahá, kae pehē ki he ngaahi ʻekitivitī akó. ‘I he fakalaulauloto e kau faiakó ki he ngaahi fie maʻu ‘a ʻenau to‘u tupú, te nau ʻilo ai ʻoku lelei tatau pē hono akoʻi e ngaahi ʻekitivitī motuʻa ka ʻi ha founga foʻou ki ha tokotaha ako foʻoú, mo hono akoʻi ʻo e ʻekitivitī foʻou mo fakamuimuitahá.

Hokohoko atu ʻo e Fakalakalaka Fakafaiakó

ʻOku poupouʻi atu e ngaahi ʻiuniti fakalotofonuá ke fai ha ngaahi ako maʻá e kau faiako ʻo e Haʻu ʻo Muimui ʻIate Aú, ke toe vakaiʻi mo fakamālohia e ngaahi tefitoʻi moʻoni ʻo e faiako ʻi he founga ʻa e Fakamoʻuí. ʻE hoko ko ha maʻuʻanga tokoni mahuʻinga ʻa e fakataha alelea fakamahina ʻa e kau faiako ʻo e uōtí mo e koló, Faiako ʻi he Founga ‘a e Fakamoʻuí, pea mo e konga ko e “Ko Hono Kamatá” ʻi he Ha‘u, ʻo Muimui ‘Iate Aú.ʻE lava foki ke tokoni ki he kau faiako he toʻu tupú ne toki ui foʻoú, ʻa e kau faiako mo e kau taki ko ia ‘oku nau maheni mo e Haʻu, ‘o Muimui ʻIate Aú.

Ngaahi Fakamatala Fakamāhina ʻi he Makasini ʻo e Siasí

‘I he mahina takitaha, te ke lava ʻo maʻu ‘a e ngaahi fakamatala ʻi he New Era mo e Liahoná, ke poupou ki he kaveinga fakamahina ‘i he Ha’u, ‘o Muimui ʻIate Aú.

ʻOua naʻa Ngalo!

ʻOku lava ke maʻu ha konga lahi ʻo e ngaahi maʻuʻanga tokoni hokohoko ko ʻení ke fakaʻaongaʻi ʻe he kau faiakó mo e kau takí ʻi heʻenau teuteu ke akoʻi honau toʻu tupú. ʻOku ʻoatu ʻe he Teaching videos ha ngaahi founga kehekehe ke fakakau mai e toʻu tupú ki he akó. ʻOku maʻu ʻa e fehokotakiʻanga ki he ngaahi vitiō ko ʻení ʻi he tafaʻaki toʻomataʻu ʻo e ngaahi fokotuʻutuʻu ki he lēsoní pea ʻi he konga ʻo e uepisaití ko e “Akó mo e Ngaahi Fakakaukau Fakafaiakó.”ʻOku kau he ngaahi lēsoni lahi ʻo e Haʻu, ʻo Muimui ʻIate Aú, ha ngaahi fehokotakiʻanga ki he uepisaiti foʻou ko e Ngaahi ʻEkitivitī maʻá e Toʻu Tupú pea ʻoku maʻu ai ha ngaahi fakakaukau ʻe 160 tupu fekauʻaki mo ha ngaahi ʻekitivitī mo ha ngaahi tokoni ki hono palani ʻo ha ngaahi ʻekitivitī ʻe leleí ʻo fakatatau mo e ngaahi fie maʻu ʻa e toʻu tupú. ʻIkai ngata aí, ʻoku ʻi ai ha ngaahi DVD ʻo e Haʻu ʻo Muimui ʻIate Aú, ke fakaʻaongaʻi ʻe he kalasí pea mo e ako fakafaiakó, ʻe lava ke maʻu mei he ngaahi senitā tufakiʻanga nāunaú (kuo teʻeki ai ke tānaki atu ha ngaahi vitiō foʻou ki he DVD). ʻE lava foki ke download ʻa e ngaahi vitiō ko ʻení.