Aisea na tatau ai ona i ai se toefuataiga?

I le taimi o Lana galuega i le lalolagi, na faatu ai e Iesu Keriso Lana Ekalesia i le pule o le perisitua. Na taitaia e perofeta ma aposetolo o e na aoaoina atu aoaoga faavae moni ma maua faaaliga ia na faamaumauina o ni tusitusiga paia. I le maliliu ai o aposetolo, na aveesea le pule o le perisitua mai le lalolagi, na muta faaaliga, ma leiloloa ma faafenumiai aoaoga faavae taua. Na ala mai le Perofeta o Iosefa Samita, le toefuataiina mai o le Ekalesia na faatuina e Iesu Keriso.

Saunia oe lava ia faaleagaga

O a aafiaga o le Liliuese ua e vaaia i le lalolagi? Ua faapefea ona faamanuiaina lou aiga e le Toefuataiga o le talalelei?

O a mea e tatau ona iloa e tamaitai talavou e uiga i le Liliuese ma le Toefuataiga? E faapefea e le malamalama o le Liliuese ma le Toefuataiga ona fesoasoani ia i latou?

A o e saunia, suesue ma le agaga tatalo mau ma punaoa nei.

Amosa 8:11–12; 2 Tesalonia 2:3; 1 Nifae 13:24–29; Iosefa Samita—Talafaasolopito 1:5–6 (Na le iloa le Ekalesia ona o le liliuese)

Isaia 29:13–14; Galuega 3:20–21 (Na valoia anamua le Liliuese ma le Toefuataiga)

MF&F 1:17–23, 30 (Na toefuatai mai e Iesu Keriso Lana Ekalesia e ala mai le Perofeta o Iosefa Samita)

D. Todd Christofferson, “E Manaomia i Se A le Ekalesia,” Ensign po o le Liahona, Nov. 2015, 108–11

“Liliuese,” “Toefuataiga o le Talalelei,” Faamaoni i le Faatuatua (2004), 13–14, 135–39

Robert D. Hales, “ Sauniuniga mo le Toefuataiga ma le Afio Mai Faalua: ‘E i Ou Luga ai Pea Lo’u Lima,’” Ensign po o Liahona, Nov. 2005, 88–92

Vitio: “O se Sailiga mo le Upumoni,” “O le Savali o le Toefuataiga”

15:57

2:23

Aoao atu i le ala a le Faaola

Na fai atu e le Faaola fesili na uunaia ai ona soo e mafaufau ma faalogo lelei. Na latou iloa e alofa o Ia ia te i latou, ma na latou lagonaina le saogalemu e faasoa atu o latou manatu ma lagona patino. A o e faalogo ma le alofa ma faaali atu le naunau i tali ma manatu o tamaitai talavou, o le a e fesoasoani ia i latou e lagonaina le alofa o le Faaola.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Tusi faamatalaga nei i le laupapa: “Liliuese mai mataupu faavae moni o le talalelei” ma “Toe faafoi se mea i lona tulaga na i ai pe na masani ai.” Saunia ni fasi pepa se fa o i ai upu nei po o mau fesootai: Liliuese, Toefuataiga, Isaia 29:13, ma le Isaia 29:14. Tuu atu i tamaitai talavou taitasi se fasi pepa, ma fai atu ia te ia e faatusatusa i se tasi o faamatalaga i le laupapa.
Fai atu i tamaitai talavou taitasi e tusi se tali i le fesili “Aisea na tatau ai ona i ai se toefuataiga?” Ao mai a latou tali, ma talanoaina faatasi i le vasega.

Aoao faatasi

O gaoioiga taitasi nei e mafai ona fesoasoani i tamaitai talavou e malamalama ai pe aisea na tatau ai ona i ai se Toefuataiga o le talalelei. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Valaaulia ia tamaitai talavou e saili i le saunoaga a Elder D. Todd Christofferson “E Manaomia i Se A le Ekalesia,” vaavaai mo ni malamalamaaga e uiga i le Toefuataiga ma le matafaioi a le Ekalesia i aso e gata ai. E mafai ona e valaaulia mamao atu ni nai tamaitai talavou e o mai saunia e faasoa mai pe aisea latou te faafetai ai mo le Ekalesia toefuataiina. Faatasi ai ma se faatagaga mai le epikopo, e mafai foi ona e valaauliaina se tagata faatoa papatiso i totonu o lau vasega e faasoa mai sana molimau i le Ekalesia ma le talalelei toefuataiina.
Tusi upu Liliuese ma Toefuataiga i le laupapa. Fesili i tamaitai talavou po o a uiga o upu nei (tagai Faamaoni i le Faatuatua,92–94, 175–79). Tusi mau o loo lisi i lenei otootoga, po o nisi e mafai ona e mauaina, i le laupapa. Valaaulia tamaitai talavou e faitau mau taitasi ma filifili pe fetaui ma le Liliuese po o le Toefuataiga. Fesili i tamaitai talavou pe o le a se eseesega o o latou olaga pe ana faapea e lei toefuataia mai le talalelei.
Vaelua le vasega ma fai atu i le tasi vaega e aoao atu e uiga i le Liliuese ma le isi vaega e aoao atu e uiga i le Toefuataiga. Tuu atu i ai se taimi e saunia ai i le faaaogaina o le Faamaoni i le Faatuatua ma mau o loo fautuaina atu i lenei otootoga. Atonu e te manao e fai nei tofiga i ni nai aso ao lei faia le vasega.
Faaali atu ata o mea na tutupu mai le Toefuataiga (mo se faataitaiga, tagai Tusi Ata o le Talalelei, 90–95). Fai atu i tamaitai talavou e faitau le “Toefuataiga o le Talalelei: O Mea na Tutupu i le Toefuataiga,” e maua i le Faamaoni i le Faatuatua (itulau 176–77), ma faafetaui le ata ma mea na tutupu. Valaaulia i latou taitoatasi e faasoa mai se mea na tupu ma po o le a le mea na toefuatai mai. O faapefea ona faamanuiaina i tatou ona o le toefuataiga o nei mea?
Tuu atu i tamaitai talavou le igoa o se tagata o loo ta’ua i le saunoaga a Elder Robert D. Hales “Sauniuniga mo le Toefuataiga ma le Afio Mai Faalua: ‘E i Ou Luga ai Pea Lou Lima’” (e pei o William Tyndale, Johannes Gutenberg, ma Martin Luther). Fai atu i tamaitai talavou e faitau pe matamata i le saunoaga ma sue po o le a le mea na fai e le tagata e saunia ai le lalolagi mo le Toefuataiga. Valaaulia i latou e faasoa mai mea na latou maua. Ua aafia faapefea olaga o tamaitai talavou i le taimi nei ona o osigataulaga na faia e nei tagata?
Faitau faatasi e le vasega le Iosefa Samita—Talafaasolopito 1:5–6. Fai atu i tamaitai talavou e ta’u mai ni aoaoga faavae sese pe le atoatoa o loo talitonu i ai tagata i aso nei (mo se faataitaiga, e uiga i le Atua e leai se tino, faapea e tatau ona papatiso tamaiti pepe, faapea tatou te le manaomia ni perofeta i aso nei, ma isi. Fai i ai e faasoa mai pe faapefea e upumoni o le Toefuataiga ona fesoasoani ia i latou e foia ai le fenumiai.

Fai atu i tamaitai talavou e faasoa mai mea na latou aoaoina i le aso. Pe ua latou malamalama i le manaomia o le Toefuataiga o le talalelei? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia tamaitai talavou e mafaufau pe o le a faapefea ona latou ola i mea ua latou aoaoina i le aso. Mo se faataitaiga, e mafai ona latou:

Faia se lisi o faamanuiaga na latou maua ona o le toefuataiina mai o le talalelei ma faasoa atu a latou lisi i o latou aiga.
Tusi ia latou api talaaga mea o le a latou fai e fesoasoani ai i o latou aiga, i le taimi nei ma le lumanai, ia maua faamanuiaga o le talalelei toefuataiina.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.