Ko e hā naʻe fie maʻu ai ke toe fakafoki mai e ongoongoleleí?

Naʻe fokotuʻu ‘e Sīsū Kalaisi ‘a Hono Siasí ʻaki e mafai ‘o e lakanga fakataulaʻeikí, lolotonga ‘Ene ngāue ‘i he moʻui fakamatelié. Naʻe tataki ia ‘e he kau palōfita mo e kau ‘aposetolo ‘a ia naʻa nau akoʻi e tokāteline moʻoní mo maʻu e fakahā ‘a ia naʻe hiki ko e folofolá. Naʻe ‘ave ‘a e mafai ‘o e lakanga fakaulaʻeikí mei he māmaní, ngata e maʻu fakahaá, pea mole pe liliu ‘a e ngaahi tokāteline mahuʻingá, hili e pekia ‘a e kau ‘aposetoló. Naʻe toe fakafoki mai e Siasi naʻe fokotuʻu ‘e Sīsū Kalaisí ‘i he Palōfita ko Siosefa Sāmitá.

Teuteuʻi fakalaumālie koe

Ko e hā ha ngaahi nunuʻa ‘o e Hē mei he Moʻoní ‘okú ke mamata ki ai ‘i he māmaní? Kuo tāpuekina fefē ho fāmilí ʻi hono Toe Fakafoki Mai ‘o e ongoongoleleí?

Ko e hā ha meʻa ‘oku fie maʻu ke ‘ilo ‘e he kau finemuí ‘o kau ki he Hē mei he Moʻoní mo Hono Toe Fakafoki Mai ‘o e Ongoongoleleí? ‘E tokoniʻi fēfē kinautolu heʻenau maʻu ha mahino ki he Hē mei he Moʻoní mo hono Toe Fakafoki Mai ‘o e Ongoongoleleí?

Ako ‘i he faʻa lotu e ngaahi potufolofola mo e ngaahi maʻuʻanga tokoni ko ‘ení ʻi hoʻo teuteú.

ʻĀmosi 8:11–12; 2 Tesalonika 2:3; 1 Nīfai 13:24–29; Siosefa Sāmita—Hisitōliá 1:5–6 (Naʻe mole e Siasí ‘i he hē mei he moʻoní)

ʻĪsaia 29:13–14; Ngāue 3:20–21 (Naʻe tomuʻa fakahā pē ‘i he kuonga muʻá ʻa e Hē mei he Moʻoní mo hono Toe Fakafoki Mai ‘o e Ongoongoleleí)

T&F 1:17–23, 30 (Naʻe toe fakafoki mai ‘e Sīsū Kalaisi Hono Siasí ‘i he Palōfita ko Siosefa Sāmitá)

“Hē mei he Moʻoní,” “Fakafoki mai ‘o e Ongoongoleleí,” Tuʻu Maʻu ‘i he Tuí (2004), 17–20, 76

D. Todd Christofferson, “ʻUhinga ʻo e Siasí,” Ensign pe Liahona, Nōvema. 2015, 108–11

Robert D. Hales, “Ko e Ngaahi Teuteu ki [Hono] Toe Fakafoki Mai ‘o e Ongoongoleleí mo e Hāʻele ‘Anga Uá: ‘ʻE Maluʻi ‘a Kimoutolu ‘e Hoku Nimá,’” Ensign pe Liahona, Nōvema 2005, 88–92

Vitiō:“Ko ha Fekumi ki he Moʻoní,” “Ko e Pōpoaki ʻo e Ongoongolelei Kuo Toe Fakafoki Maí”

15:53

2:23

Faiako ‘i he founga ‘a e Fakamo‘uí

Naʻe fai ‘e he Fakamoʻuí ‘a e ngaahi fehuʻi naʻá ne ueʻi Hono kau muimuí ke nau fakakaukau mo ongoʻi moʻoni. Naʻa nau ‘iloʻi naʻá Ne ‘ofa ‘iate kinautolu, pea naʻa nau ongoʻi fiemālie ke vahevahe ‘enau ngaahi fakakaukaú mo ‘enau ngaahi ongo fakatāutahá. ʻI hoʻo fakafanongo fakamātoato mo fakahā hoʻo mahuʻingaʻia ‘i he ngaahi tali mo e ngaahi ‘ilo ‘a e kau finemuí, te ke tokoniʻi ai kinautolu ke nau ongoʻi e ‘ofa ‘a e Fakamoʻuí.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e meʻa ne nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Filifili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloakiʻaki ‘a e lēsoni ‘o e uike ní:

Hiki ‘i he palakipoé ‘a e ngaahi fakaʻuhinga ko ‘ení: “Tafoki mei he ngaahi tefitoʻi moʻoni totonu ‘o e ongoongoleleí” mo e “Fakafoki ha meʻa ki hono ‘uluaki tuʻunga pe tuʻunga ‘i muʻá.” Teuteu ha laʻipepa ‘e fā ‘oku hiki ai e ngaahi foʻi lea pe ongo potufolofola ko ‘ení: Hēmei he Moʻoní, Toe Fakafoki Mai ‘o e Ongoongoleleí, ‘Īsaia 29:13, mo e ʻĪsaia 29:14. Tufa ki he finemui taki taha ha laʻipepa, pea kole ange ke ne fakahoa ia ki he ngaahi fakaʻuhinga ‘i he palakipoé.
Kole ki he finemui taki taha ke ne hiki haʻane tali ki he fehuʻi “Ko e hā e ‘uhinga naʻe fie maʻu ai ke toe fakafoki mai e ongoongoleleí?” Tānaki ‘enau ngaahi talí pea aleaʻi ia ‘i he kalasí.

Ako fakataha

‘E lava ke tokoni e ngaahi ʻekitivitī taki taha ʻi laló ke mahino ki he kau finemuí ʻa e ʻuhinga naʻe fie maʻu ai ke Toe Fakafoki Mai e ongoongoleleí. Muimui ki he fakahinohino ‘a e Laumālié, fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

Fakaafeʻi e kau finemuí ke nau fekumi ki he lea ʻa ʻEletā D. Todd Christofferson “ʻUhinga ʻo e Siasí,” ʻo kumi ha ngaahi fakamatala kau ki hono Toe Fakafoki Mai ʻo e Ongoongoleleí pea moe fatongia ʻo e Siasí ʻi he ngaahi ʻaho kimui ní. Te ke lava pē ʻo fakaafeʻi kei taimi ha niʻihi ʻo e kau finemuí ke haʻu mateuteu ke vahevahe ʻa e ʻuhinga ʻoku nau houngaʻia ai ʻi hono toe fakafoki mai ʻo e Siasí. Kapau ʻe maʻu ha ngofua mei he pīsopé pea fakaafeʻi ki hoʻo kalasí ha taha naʻe toki ului foʻou mai, ke vahevahe ʻene fakamoʻoni ki he Siasí mo e ongoongolelei naʻe toe fakafoki maí.
Hiki ʻi he palakipoé ‘a e Hē mei he Moʻoní mo e Fakafoki mai ‘o e Ongoongoleleí. Fehuʻi ki he kau finemuí pe ko e hā hono ‘uhinga ‘o e ngaahi foʻi lea ko ʻení (vakai, Tuʻu Maʻu ‘i he Tuí,76–77, 17–21). Hiki ʻi he palakipoé ‘a e ngaahi potufolofola ‘oku ‘oatu ‘i he fokotuʻutuʻu ko ‘ení pe ko ha ngaahi potufolofola kehe te ke maʻu. Fakaafeʻi e kau finemuí ke nau lau ‘a e potufolofola taki taha pea nau fakakaukauʻi pe ‘oku kau ia ki he Hē mei he Moʻoní pe ko e Fakafoki mai ‘o e Ongoongoleleí. ʻEke ki he kau finemuí pe naʻe mei kehe fēfē ‘enau moʻuí kapau naʻe ‘ikai ke toe fakafoki mai e ongoongoleleí.
Vaeua ‘a e kalasí pea kole ki he kulupu ‘e taha ke nau akoʻi ‘a e Hē mei he Moʻoní, pea akoʻi ‘e he kulupu ‘e tahá ‘a e Fakafoki Mai ‘o e Ongoongoleleí. Tuku ange ha taimi ke nau teuteu ai ‘o fakaʻaongaʻi ‘a e Tuʻu Maʻu ‘i he Tuí mo e ngaahi potufolofola ‘oku fokotuʻu atu ‘i he fokotuʻutuʻu ko ‘ení. Mahalo te ke fie vahe ‘a e ngaahi ngāue ko ‘ení ‘i ha ngaahi ‘aho siʻi kimuʻa pea fai e kalasí.
Fakaʻaliʻali ha ngaahi fakatātā ‘o ha ngaahi meʻa naʻe hoko ‘i he Toe Fakafoki Mai ‘o e Ongoongoleleí (vakai ki he Tohi Fakatātā ‘o e Ongoongoleleí, 90–95 ke maʻu mei ai ha ngaahi sīpinga). Kole ki he kau finemuí ke nau lau e “Fakafoki mai ‘o e Ongoongoleleí: Hohoko ʻo e Fakafoki mai ʻo e Ongoongoleleí,” ‘a ia ‘oku maʻu ‘i he Tuʻu Maʻu ‘i he Tuí (peesi 17-21), pea fakatauhoa e ngaahi fakatātaá ki he ngaahi meʻa naʻe hokó. Fakaafeʻi ‘a kinautolu taki taha ke nau fakamatala ki ha meʻa naʻe hoko mo e meʻa naʻe toe fakafoki maí. ‘Oku anga fēfē hano tāpuekina kitautolu koeʻuhí ko hono toe fakafoki mai ‘o e ngaahi meʻá ni?
Vahe ki he kau finemui taki taha ha hingoa ‘o ha taha naʻe hā ʻi he lea ‘a ‘Eletā Lōpeti D. Heili “Ko e Ngaahi Teuteu ki [Hono] Toe Fakafoki Mai ‘o e Ongoongoleleí mo e Hāʻele ‘Anga Uá: ʻʻE Maluʻi ‘a Kimoutolu ‘e Hoku Nimá’” (hangē ko Uiliami Tinitale, Siohānesi Kutenipeeki, Mātini Lūtelo). Kole ki he kau finemuí ke nau lau pe sio ‘i he malangá pea feinga ke nau ‘iloʻi ‘a e meʻa naʻe fai ‘e he tokotaha ko iá ke teuteuʻi ‘a e māmaní ki hono Fakafoki Mai ‘o e Ongoongoleleí. Fakaafeʻi ke nau fakamatala ki he meʻa naʻa nau ‘iló. Kuo tokoniʻi fēfē ʻe he ngaahi feilaulau ʻa e kakai ko ʻení e moʻui ʻa e kau finemuí he ʻaho ní?
Lau fakataha ‘e he kalasí ‘a e Siosefa Sāmita—Hisitōliá 1:5–6. Kole ki he kau finemuí ke nau fakahā atu ha ngaahi tokāteline hala pe ‘ikai kakato ‘oku tui ki ai e kakai ‘o e ‘aho ní (hangē ko ‘ení, fekauʻaki mo e ‘ikai maʻu ‘e he ‘Otuá ha sino, ‘oku totonu ke papitaiso e fānau valevalé, ‘oku ‘ikai ke tau fie maʻu ha kau palōfita ‘i he ‘ahó ni, mo e ngaahi meʻa peheé). Kole ange ke nau fakamatala ki ha founga ‘oku lava ai ‘e he ngaahi moʻoni ‘o e Toe Fakafoki Mai ‘o e Ongoongoleleí ‘o tokoni ke nau ikunaʻi ‘a e veiveiuá?

Kole ki he kau finemuí ke nau fakamatala ki he meʻa naʻa nau ako ‘i he ‘aho ní. ‘Oku mahino nai kiate kinautolu ‘a e fie maʻu ke Toe Fakafoki Mai e ongoongoleleí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ki he tokāteline ko ‘ení?

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ‘ení, te nau lava ‘o:

Hiki ha lisi ‘o e ngaahi tāpuaki kuo nau maʻu koeʻuhí ko hono toe fakafoki mai ‘o e ongoongoleleí pea vahevahe ‘enau lisí ki honau fāmilí.
Hiki ʻi heʻenau tohinoá ha meʻa te nau fai ke tokoni ki honau ngaahi fāmilí, he taimí ni pea ‘i he kahaʻú, ke nau maʻu ai e ngaahi tāpuaki ‘o e ongoongolelei kuo toe fakafoki maí.

Vahevahe ki he kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.