Ko e Hē mei he Moʻoní mo Hono Fakafoki mai ʻo e Ongoongoleleí

“Kuó u fekauʻi atu hono kakato ʻo ʻeku ongoongoleleí ʻi he nima ʻo ʻeku tamaioʻeiki ko Siosefá” (Tokāteline mo e Ngaahi Fuakava 35:17).

‘E tokoni ʻa e ngaahi fokotuʻutuʻu ‘i he ‘iuniti ko ‘ení ke mahino ki he kau finemuí ‘a e Hē Fakaʻaufuli mei he Moʻoní mo e founga hono fakafoki mai ‘e Sīsū Kalaisi ‘a Hono Siasí mo e kakato ‘o ‘Ene ongoongoleleí ʻo fakafou ‘i he Palōfita ko Siosefa Sāmitá. ʻE lava ʻe he kau finemuí ʻo ako ʻi he ʻiuniti ko ʻení ki he ngaahi meʻa mahuʻinga naʻe hoko ʻi hono Fakafoki Mai ʻo e Ongoongoleleí pea nau ʻiloʻi hono mahuʻinga ʻo e ngaahi meʻa naʻe hoko ko iá, ki heʻenau moʻuí.

ʻE tokoni ʻa e ako ki he Hē mei he Moʻoní mo hono Fakafoki Mai ʻo e Ongoongoleleí ke fakamahuʻingaʻi mo fakahoungaʻi ʻe he kau finemuí ʻa e ngaahi moʻoni mahuʻinga kuo fakafoki mai ʻe he ʻOtuá ʻi hotau kuongá. ʻE lava ʻe he ngaahi meʻa ʻoku nau aʻusia ʻi he ʻiuniti ko ʻení ʻo fakamālohia ʻenau fakamoʻoni ki he Tohi ʻa Molomoná, misiona ʻo e Palōfita ko Siosefa Sāmitá, mo e ʻofa ʻa e Tamai Hēvaní ki Heʻene fānaú.

Ngaahi Fokotuʻutuʻu ke Fili mei ai ʻi he Māhiná Ni

• Ko e hā naʻe fie maʻu ai ke Fakafoki mai e ongoongoleleí?

• Ko e hā ‘oku tau fie maʻu ai e Tohi ‘a Molomoná?

• Naʻe fakafoki fēfē mai e lakanga fakataulaʻeikí?

• Ko e hā e fatongia ‘o Siosefa Sāmita ‘i hono Fakafoki Mai ‘o e Ongoongoleleí?

• Ko e hā ‘oku mahuʻinga ai ‘a e ‘Uluaki Mata-Meʻa-Hā-Maí?

Mutualé

Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. ʻE lava ke fakaʻaongaʻi e lahi taha ʻo e ngaahi ʻekitivitī ako ʻi he ngaahi fokotuʻutuʻu ko ʻení ko ha ngaahi ʻekitivitī lelei ʻo e Mutualé. Ngāue fakataha mo e kau palesitenisī fakakalasí ke fili mo palani ha ngaahi ʻekitivitī feʻunga ʻoku nau fakamālohia e meʻa ʻoku ako ʻe he kau finemuí ʻi he Sāpaté.