E tokoniʻi fēfē au ʻe he Fakamoʻuí lolotonga hoku ngaahi faingataʻaʻiá?
Naʻe toʻo ʻe he Fakamoʻuí kiate Ia ʻetau mamahí mo e mahamahakí, ko ha konga ia ʻo ʻEne feilaulau fakaleleí. ʻOkú Ne ʻafioʻi e founga ke tokoniʻi ai kitautolú, koeʻuhí he naʻá Ne foua hotau ngaahi faingataʻaʻiá. ʻI heʻetau fakaʻaongaʻi ʻetau tui kia Sīsū Kalaisí, te Ne ʻomi kiate kitautolu ha mālohi ke fakamaʻamaʻa ʻaki ʻetau ngaahi kavengá.
Teuteuʻi fakalaumālie koe
Fakakaukau ki he ngaahi faingataʻa kuó ke fehangahangai mo iá. Kuó ke maʻu fēfē e mālohí tuʻunga ʻi he Fakaleleí?
Fakakaukau ki he kau finemui ʻi hoʻo kalasí. Ko e hā e ngaahi faingataʻa ʻoku nau fehangahangai mo iá? Ko e hā ha ngaahi aʻusia fakataautaha, potufolofola, mo ha lea ʻokú ke loto ke vahevahe mo kinautolu? ʻOku ʻi ai nai ha ngaahi aʻusia fakataautaha ʻoku lava ke fevahevaheʻaki ʻe he kau finemuí?
ʻI hoʻo teuteú, ako ʻi he faʻa lotu e ngaahi maʻuʻanga tokoni ko ʻení mo ha ngaahi maʻuʻanga tokoni kehe kuo nau tokoniʻi koe ke ke tafoki ai ki he Fakamoʻuí he ngaahi taimi ʻo e faingataʻá.
Mātiu 11:28–30; Filipai 4:13; 1 Nīfai 17:3; Hilamani 5:12; T&F 19:23; 68:6 (ʻOku lava ke ʻomi ʻe Sīsū Kalaisi ha mālohi kiate kitautolu ke maʻamaʻa ai ʻetau ngaahi kavengá)
Mōsaia 23:21–22; 24:8–17 (ʻOku fakamālohia ʻe he ʻEikí e kakai ʻo ʻAlamaá ke tokoniʻi kinautolu ke maʻamaʻa ʻenau kavengá)
ʻIsaia 53:3–5;ʻAlamā 7:11–13 (ʻOku mahino kia Sīsū Kalaisi ʻetau faingataʻaʻiá koeʻuhí he naʻá Ne ʻosi fou ai)
Ulisses Soares, “Falala Taʻeveiveiua ki he ʻOtuá,” Ensign pe Liahona, Mē 2017, 33–35
Russell M. Nelson, “Fiefiá mo e Moʻui Fakalaumālié,” Ensign pe Liahona, Nōvema 2016, 81–84
W. Christopher Waddell, “Ko ha Sīpinga ʻo e Melinó,” Ensign pe Liahona, Mē 2016, 90–92
Dallin H. Oaks, “Fakamālohia ʻe he Fakalelei ʻa Sīsū Kalaisí,” Ensign pe Liahona, Nōvema 2015, 61–64
“ʻAhiʻahí,” Tuʻu Maʻu ʻi he Tuí (2004), 208–213
Vitiō: “ʻE Hiki Hake Kitautolu ʻe he ʻOtuá,” “Ngaahi Faingataʻa ke Ikunaʻí”
Ko e faiako ‘i he founga ‘a e Fakamo‘uí
Naʻe fakaʻaongaʻi ʻe he Fakamoʻuí ʻa e folofolá ke akoʻi mo fakamoʻoni ki Heʻene misioná. ʻOku maʻu ʻi he lēsoni ko ʻení ha ngaahi potufolofola mahuʻinga ʻoku nau akoʻi e founga ʻe fakamālohia ai kitautolu ʻe he Fakamoʻuí lolotonga ʻetau ngaahi faingataʻá. ʻE fakamoʻoniʻi ʻe he Laumālie Māʻoniʻoní ʻa hono moʻoni e ngaahi potufolofolá ni, ʻi he taimi ʻe ako mo aleaʻi ai ʻe he kau finemuí.
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:
-
Fili ha taha ʻo e ngaahi talanoa naʻe vahevahe ʻe Sisitā Sini A. Sitīvení ʻi heʻene lea “ʻOua ʻe Manavahē; ʻOku Ou ʻIate Koe,” pea vahevahe ia mo e kau finemuí. Ko e hā ʻoku nau ako mei he talanoá kau ki he founga ʻe lava ai e Fakamoʻuí ʻo tokoniʻi kinautolu ʻi he ngaahi taimi faingataʻá? Ko e hā ha ngaahi sīpinga faitatau ʻe lava ke vahevahe ʻe he kau finemuí?
-
ʻOange ki he finemui takitaha ha kiʻi laʻipepa pea kole ange ke ne tohi ha faingataʻa ʻokú ne lolotonga fehangahangai mo ia. Kole ki he kau finemuí ke nau fakalaulauloto ki he founga ʻe lava ai ʻe Sīsū Kalaisi ʻo foaki kiate kinautolu ha mālohi lolotonga e faingataʻa ko ʻení. Fakaafeʻi kinautolu ke vahevahe ʻenau ngaahi fakakaukaú mo ʻenau ongó kapau ʻoku nau ongoʻi fiemālie pē ki ai.
Ako fakataha
ʻE lava ke tokoni e ngaahi ʻekitivitī takitaha ʻi laló ke mahino ki he kau finemuí e founga ʻoku tokoni ai e Fakaleleí kiate kinautolu ʻi honau ngaahi faingataʻaʻiá. Muimui ki he tataki ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí,
-
Fakaafeʻi e kau finemuí ke nau lau pe sio ʻi hono fakamatalaʻi ʻe ʻEletā Ulisses Soares e talanoa ki ha faifekau ne mate hono tuofefiné, ʻoku ʻi he lea “Falala Taʻeveiveiua ki he ʻOtuá.” Naʻe tokoni fēfē ʻa e ʻilo ki he Fakalelei ʻa Sīsū Kalaisí pea mo e palani ʻo e fakamoʻuí, ki ha faifekau lolotonga ʻene faingataʻaʻiá? Ko e hā ha toe ngaahi ʻilo naʻe maʻu ʻe he kau finemuí mei he lea ʻa ʻEletā Soares? Kole ange ke nau fakakaukau ki ha faingataʻa ʻoku nau lolotonga fehangahangai mo ia. Te nau maʻu fēfē ha mālohi mei he Fakamoʻuí ke tokoni kiate kinautolu?
-
Fakaafeʻi e kau finemuí ke ako ha ngaahi konga mei he lea ʻa Palesiteni Russell M. Nelson “Fiefiá mo e Moʻui Fakalaumālié,” tautautefito ki he aʻusia ʻa Eliza R. Snow. Ko e hā ha ngaahi aʻusia ʻe fie vahevahe ʻe he kau finemuí ʻi he taimi ne nau maʻu ai ha fiefia ʻi ha ngaahi tūkunga faingataʻa? Vahevahe e kalasí ki ha kulupu ʻe ua ke tokoni ki heʻenau fakakaukauʻi ha meʻa ʻokú ne ʻomi ha fiefia kiate kinautolu. Fakangatangata e taimi te ke ʻoange ki he kulupu takitaha, pea fakatukupaaʻi kinautolu ke tohi ki he lahi taha te nau malavá ha ngaahi meʻa te ne lava ʻo ʻomi kiate kinautolu ha fiefiá. Fakaafeʻi kinautolu ʻi heʻenau ʻosí, ke nau fekumi ʻi he lea ʻa Palesiteni Nelson ki ha ngaahi meʻa ke tānaki atu ki heʻenau lisí. Ko e hā ha meʻa te nau lava ʻo fai ke nau manatuʻi ai ha ngaahi meʻa ne nau maʻu ai ha fiefia ʻi he ngaahi taimi faingataʻá?
-
Vahevahe fakakulupu e kau finemuí. Tuku ki he kulupu takitaha ke nau lau ha potufolofola ʻe taha pe lahi ange ʻi he fokotuʻutuʻu ko ʻení pea fakamatalaʻi fakanounou mai e meʻa ne nau laú. Fakaafeʻi e kau finemuí ke nau hiki e ngaahi meʻa ʻoku nau ako mei he ngaahi potufolofolá ni ʻa ia ʻe lava ke tokoniʻi kinautolu ke nau ikunaʻi honau ngaahi faingataʻá. Poupouʻi kinautolu ke vahevahe e meʻa ne nau hikí, kapau ʻoku nau ongoʻi fiemālie ke fai pehē. Fakakaukau ke vahevahe hoʻo ngaahi aʻusiá.
-
Lau mo e kalasí e Mōsaia 24:8–17. Fakaafeʻi e kau finemuí ke nau vahevahe e meʻa ʻoku nau ako mei he meʻa ne aʻusia ʻe ʻAlamā mo hono kakaí. ʻI hano fakangofua ʻe he pīsopé, fakaafeʻi ha ngaahi faʻē ke nau haʻu ki he kalasí ʻo vahevahe e anga hono fakamālohia kinautolu ʻe he Fakamoʻuí ʻi honau ngaahi faingataʻaʻiá.
-
Huluʻi e vitiō ko e “ʻE Hiki Hake Kitautolu ʻe he ʻOtuá.” ʻE anga fēfē hono tali ʻe he kau finemuí e fehuʻi ne fai mai ʻe ʻEletā Robert D. Hales ʻi he kamataʻanga ʻo e foʻi vitioó? Ko e hā e meʻa ʻoku fai ʻe Brittany ke maʻu ai ha mālohi ke ikunaʻi ʻaki hono faingataʻaʻiá? Fakaafeʻi e kau finemuí ke nau fakalaulauloto mo hiki e ngaahi founga te nau muimui ai he sīpinga ʻa Brittany ʻi heʻenau fehangahangai mo honau ngaahi faingataʻaʻiá.
4:58 -
Fakaafeʻi e kau finemuí ke lisi ha niʻihi ʻo e ngaahi fakatamaki mo e faingataʻa ʻoku fehangahangai mo e kakaí. Mou fakamanatu mo e kalasí e lea ʻa ʻEletā Dallin H. Oaks ko e “Fakamālohia ʻe he Fakalelei ʻa Sīsū Kalaisí” pe ko e lea ʻa Pīsope W. Christopher Waddell ko e “Ko ha Sīpinga ʻo e Melinó,” ʻo kumi ha ngaahi fakakaukau fekauʻaki mo e founga ʻe lava ke tokoniʻi ai kitautolu ʻe he Fakamoʻuí lolotonga e ngaahi taimi faingataʻá. ʻAi e kau finemuí ke nau fakafaivaʻi hano tokoniʻi ha kaungāmeʻa ʻokú ne aʻusia ha niʻihi ʻo e ngaahi faingataʻa ne nau lisi atú. Fakaafeʻi ke nau vahevahe atu ha ngaahi fakakaukau mei he leá ʻi heʻenau fakatulamaʻi iá. Te ke lava foki ʻo huluʻi e vitiō “Ngaahi Faingataʻa ke Ikunaʻí” pea fakaafeʻi ke nau vahevahe atu ʻenau fakakaukaú.
5:0
Kole ki he kau finemuí ke nau vahevahe e meʻa ne nau ako he ʻaho ní. ʻOku mahino nai kiate kinautolu e founga ʻe lava ke tokoniʻi ai kinautolu ʻe he Fakaleleí he lolotonga ʻenau faingataʻaʻiá? Ko e hā ha ngaahi ongo pe fakakaukau ʻoku nau maʻú? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteline ko ʻení?
Moʻui ʻaki e meʻa ʻoku tau akó
Tuku ha taimi ki he kau finemuí ke nau hiki e meʻa te nau fai ke fakaʻaongaʻi ai ha tui lahi ange kia Sīsū Kalaisi ke nau maʻu ha mālohi ki honau ngaahi faingataʻaʻiá. Fakaafeʻi kinautolu ke vahevahe ʻenau ngaahi aʻusiá ʻi he kalasi hokó.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.