Ko e hā ʻa e toetuʻu?

ʻE toetuʻu e kakai kotoa pē koeʻuhí ko e Fakalelei ʻa Sīsū Kalaisí. ʻE toe fakataha hotau ngaahi sinó mo e laumālié ʻi ha tuʻunga haohaoa mo taʻe-faʻa-mate. ʻOku hanga ʻe he mahino mo e fakamoʻoni ʻo e toetuʻú ʻo ʻomi ha fakakaukau mo ha ʻamanaki lelei ʻi heʻetau fekuki mo e ngaahi faingataʻa mo e lavameʻa ʻo e moʻuí.

Teuteuʻi fakalaumālie koe

Ko e hā hoʻo ʻilo kau ki he toetuʻú? Ko e hā ha ngaahi fakakaukau ʻoku tau ʻilo kau ki he toetuʻú mei he folofola ʻo onopōní?

Ko e hā e mahino ʻa e kau finemuí kau ki he toetuʻú? ʻE anga fēfē hano tākiekina ʻe ha mahino lahi ange kiate kinautolu ʻe toetuʻú ʻa ʻenau ongo kau ki honau sino fakamatelié?

Ko e hā ha ngaahi potu folofola pe maʻuʻanga tokoni kehe te ke lava ʻo fakaʻaongaʻi ʻe tokoni ki hoʻo akoʻi ki he kau finemuí e toetuʻú? Ko e hā e meʻa ʻokú ke ongoʻi ke vahevahé?

Luke 24 (Ko e Toetuʻu ʻa Sīsū Kalaisí)

1 Kolinitō 15 (Te tau toetuʻu kotoa pē, koeʻuhí he kuo ikunaʻi ʻe he Fakamoʻuí e maté)

ʻAlamā 11:41–45 (ʻOku toe fakataha hotau laumālié mo e sinó ʻi heʻetau toetuʻú pea toki fakamaauʻi kitautolu)

ʻAlamā 40–41 (ʻOku fakamatalaʻi ʻe ʻAlamā e toetuʻú ki hono foha ko Kolianitoní)

Paul V. Johnson, “Pea Heʻikai Kei ʻi ai Ha Mate,” Ensign pe Liahona, Mē 2016, 121–23

Thomas S. Monson, “Kuó Ne Toe Tuʻu!” Ensign pe Liahona, Mē 2010, 87–90

D. Todd Christofferson, “Ko e Toetuʻu ʻa Sīsū Kalaisí,” Ensign pe Liahona, Mē 2014

Vitiō: “Kuó Ne Toe Tuʻu”

22:25

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Fakaʻaliʻali ha fakatātā ʻo e Fakamoʻui kuo toetuʻú (hangē ko ʻení, Tohi Fakatātā ʻo e Ongoongoleleí, 59–60). ʻEke ki he kau finemuí e founga te nau fakamatalaʻi ai e toetuʻú ki ha taha ʻoku ʻikai ke ne ʻilo ki he toetuʻú.
ʻEke ki he kau finemuí pe ko e hā e meʻa ʻoku nau kātoangaʻi ʻi he Pekiá? Ko e hā ha niʻihi ʻo e ngaahi fakaʻilonga ʻo e Pekiá? Ko e hā e meʻa ʻoku akoʻi ʻe he ngaahi fakaʻilongá ni kau ki he toetuʻú?

Ako fakataha

ʻE lava ke tokoni e ngaahi ʻekitivitī takitaha ʻi laló ke mahino ki he kau finemuí e toetuʻú. Muimui ki he tataki ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.

Fili ha niʻihi ʻo e ngaahi kupuʻi folofola mei he 1 Kolinitō 15 kau ki he toetuʻú. Fakaafeʻi e kau finemuí ke nau lau fakakulupu iiki pe fakafoʻituitui e ngaahi kupuʻi folofolá, pea faʻu ha fakamatala fakanounou ki he meʻa ʻoku nau ako kau ki he toetuʻú (hangē ko ʻení, veesi 1–8 ʻe lava ʻo fakamatalaʻi fakanounou ia ʻo peheni “ʻOku ʻi ai ha kau fakamoʻoni ki he toetuʻú”). Ko e hā e ʻuhinga ʻoku ongoʻi ai ʻe he kau finemuí ʻoku mahuʻinga ke nau ʻilo e ngaahi moʻoni ko ʻeni kau ki he toetuʻú?
Kole ki he kau finemuí ke nau fakakaukau ki hanau kaungāmeʻa ʻoku ʻikai ko ha mēmipa ʻo e Siasí ne mole ha taha ne ʻofa ai. Vahe ua e kalasí pea fakaafeʻi e konga ʻe taha ʻo e kau finemuí ke nau lau e ʻAlamā 40 pea lau ʻe he konga ʻe tahá e ʻAlamā 41. Kole ange ke nau hiki ha lisi ʻo e ngaahi akonaki kau ki he toetuʻú mei he ngaahi vahe ko ʻení te nau lava ʻo vahevahe ki honau kaungāmeʻá. Tuku ke nau vahevahe ʻenau lisí mo e toenga ʻo e kalasí.
Mo e kalasí, hiki ha lisi ʻo e kakaí ʻi he folofolá ʻa ia ko e kau fakamoʻoni ʻo e Toetuʻu ʻa e Fakamoʻuí. Fakaafeʻi e kau finemuí ke nau fekumi ʻi he lea ʻa ʻEletā D. Toti Kulisitofasoni Ko e Toetuʻu ʻa Sīsū Kalaisí ke maʻu ha ngaahi sīpinga kehe. Poupouʻi kinautolu ke nau kumi ʻa e ngaahi fakamoʻoni ʻa e kau fakamoʻoni ko ʻení ʻi he folofolá (ha ngaahi potufolofola ʻoku ʻoatu ʻi he lea ʻa ʻEletā Kulisitofasoní). Ko e hā ʻoku tau ako mei he kau fakamoʻoni ko ʻení ʻo kau ki he Fakamoʻuí mo ʻEne Toetuʻú? Vahevahe hoʻo fakamoʻoni ki he Toetuʻu ʻa e Fakamoʻuí, pea fakaafeʻi ha niʻihi ʻo e kau finemuí ke nau vahevahe ʻenau ngaahi fakamoʻoní.
Fakaafeʻi e kau finemuí ke nau lau e fanga kiʻi talanoa ʻi he lea ʻa Palesiteni Tōmasi S. Monisoní “Kuo Toe Tuʻu!” pea mo e lea ʻa ʻEletā Paula V. Sionisoní “Pea Heʻikai Kei ʻi ai Ha Mate.” Kole ange ke nau fakamatalaʻi fakanounou e fanga kiʻi talanoá ni ʻi haʻanau fakalea pē ʻanautolu pea vahevahe ʻa e meʻa ʻoku akoʻi ange ʻe he fanga kiʻi talanoá ʻo fekauʻaki mo e toetuʻú. Ko e hā ha toe meʻa ʻoku nau mālieʻia ai he fanga kiʻi talanoá ni?
Tufa atu e ngaahi tohi ko e Ngaahi Akonaki ʻa e Kau Palesiteni ʻo e Siasí (pe ʻai ha ngaahi tatau ʻo e ngaahi vahe ne filí), pea fakaafeʻi e kau finemuí ke nau kumi ha ngaahi akonaki mei he kau palōfita kimui ní kau ki he toetuʻú. Kole ke nau vahevahe e meʻa ʻoku nau maʻú ki he kalasí.
Fakaafeʻi e kau finemuí ke nau kumi ha ngaahi himi kau ki he toetuʻú. Hivaʻi mo e kalasí ha niʻihi ʻo e ngaahi himi ko iá. Poupouʻi e kau finemuí ke nau lau e ngaahi potufolofola ʻoku ʻasi he konga ki lalo ʻo e himí, pea aleaʻi e meʻa ne nau ako mei he himí mo e potufolofolá. Fakaafeʻi kinautolu ke nau vahevahe ʻenau fakamoʻoni mo e ongo kau ki he toetuʻú.

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino lelei ange nai kiate kinautolu e toetuʻú? Ko e hā ha ngaahi ongo pe fakakaukau ʻoku nau maʻú? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki e meʻa kuo nau ako he ʻaho ní. Hangē ko ʻení, ʻe lava ke nau:

Vahevahe ʻenau fakamoʻoni ki he toetuʻú. Ko hai te nau lava ʻo vahevahe ki ai ʻenau fakamoʻoní he ngaahi ʻaho pe uike ka hoko maí? ʻE anga fēfē haʻanau vahevahe e meʻa kuo nau akó ki ha taha kehe?
Kumi ha tali ki haʻanau faʻahinga fehuʻi pē kau ki he toetuʻú.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.