Ko e hā ʻoku fie maʻu ai ke u fakamolemoleʻi e niʻihi kehé?

ʻOku fie maʻu ke tau fakamolemoleʻi e niʻihi kehé, kae toki lava ke fakamolemoleʻi ʻetau ngaahi angahalá. ʻOku hanga heʻetau fakamolemoleʻi e niʻihi kehé ʻo toʻo atu meiate kitautolu e ʻitá, tāufehiʻá, pe loto-sauní. ʻOku lava ʻe he fakamolemolé ʻo fakamoʻui e ngaahi kafo fakalaumālié pea ʻomi ha melino mo ha ʻofa ʻa ia ko e ʻOtuá pē te ne lava ʻo foakí.

Teuteuʻi fakalaumālie koe

Ko e hā e meʻa kuó ke ako mei hono fakamolemoleʻi ʻo e niʻihi kehé? Te ke lava ʻo fakakaukau ki ha taimi ne tokoni ai hano fakamolemoleʻi ha taha ke ke ongoʻi ai e nongá mo e ʻofá?

Ko e hā ha ngaahi aʻusia ʻoku foua ʻe he kau finemuí ʻe fie maʻu ai ke nau fakamolemoleʻi e niʻihi kehé? Ko e hā e meʻa ʻoku fie maʻu ke nau ako kau ki hono fakamolemoleʻi pē kitá? Te ke tokoniʻi fēfē e kau finemuí ke nau ako ke faʻa fakamolemole koeʻuhí ke nau maʻu e nongá?

Fakatokangaʻi ange: Kapau ʻoku ʻi ai ha ngaahi fehuʻi ʻa e kau finemuí fekauʻaki mo e fakamolemolé ʻi he ngaahi tūkunga ʻo e ngaohikoviá, fokotuʻu ange ke nau kumi faleʻi mei he pīsopé pe palesiteni fakakoló.

Ko e ngaahi potufolofola fē ʻe tokoni ki he kau finemuí ke nau ʻiloʻi e ngaahi tāpuaki ʻe maʻu ʻi heʻenau moʻuí ʻi heʻenau fakamolemoleʻi e niʻihi kehé?

Mātiu 5:44; T&F 64:9–10 (ʻOku fekauʻi kitautolu ke fakamolemoleʻi e taha kotoa pē)

Mātiu 6:14–15; 18:21–35 pe vitiō “Fakamolemoleʻi Tuʻo Fitungofulu Lau ʻe Fitu” (Ke maʻu e fakamolemolé, kuo pau ke tau fakamolemoleʻi e niʻihi kehé)

Luke 23:34 (Ne fakamolemoleʻi ʻe Sīsū Kalaisi ʻa kinautolu ne nau tutuki Iá)

Kevin R. Duncan, “Ko e Faitoʻo Faifakamoʻui ʻo e Fakamolemolé,” Ensign pe Liahona, Mē 2016, 33–35

Gordon B. Hinckley, “Forgiveness, ” Ensign pe Liahona, Nov. 2005, 81–84

Dieter F. Uchtdorf, “ʻOku Maʻu ʻa e ʻAloʻofá ʻe he Kau Manavaʻofá,” Ensign pe Liahona, Mē 2012, 70–77

Vitiō: “Faʻa Fakamolemolé: Naʻe Fakamaʻamaʻa ʻEku Kavengá”

Ko e faiako ‘i he founga ‘a e Fakamo‘uí

Ne hoko e Fakamoʻuí ko ha faʻifaʻitakiʻanga mo ha faiako ki Heʻene kau ākongá ʻi he tūkunga kotoa pē. Naʻá Ne akoʻi ke nau lotu ʻaki ʻEne lotu fakataha mo kinautolu. Naʻá Ne akoʻi ke nau ʻofa mo tokoni ʻaki ʻEne ʻofeina mo tokoniʻi kinautolú. Naʻá Ne akoʻi ke nau fakamolemoleʻi e niʻihi kehé ʻaki ʻEne fakamolemoleʻi kinautolú. Te ke lava fēfē ʻo hoko ko ha faʻifaʻitakiʻanga ʻo e ngaahi tefitoʻi moʻoni ʻokú ke akoʻí?

Vitiō: “Tau Feʻinasiʻaki”

Mamata lahi ange

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki heʻenau ngaahi aʻusiá ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau kehe ki he akó mo e akoʻí.

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

• Vahevahe e talanoa kau ki he pīpī momokó he lea ʻa Palesiteni Gordon B. Hinckley ko e “Fakamolemolé.” Ko e hā e meʻa ʻoku ongoʻi ʻe he kau finemuí ʻi he talanoá ni? Fakaafeʻi e kau finemuí ke nau fakakaukau pe hiki ha hingoa ʻo ha taha ne nau faingataʻaʻia ke fakamolemoleʻi. Poupouʻi kinautolu ke nau fakakaukau ki he tokotahá ni ʻi he lēsoni ko ʻení.

• Kole ki he kau finemuí ke nau fakakaukau ki ha taimi ne fie maʻu ke nau fakamolemoleʻi ai ha taha. Fakaafeʻi kinautolu ke vahevahe ʻenau aʻusiá, kapau ʻoku nau ongoʻi fiemālie ke fai pehē. Ko e hā hono olá? Ko e hā ha ngaahi kehe ne mei hoko kapau naʻe ʻikai ke nau fakamolemole?

Ako fakataha

Vakai ki he ngaahi fakakaukau kehe ki he akó mo e akoʻí .

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí ʻa e mahuʻinga hono fakamolemoleʻi ʻo e niʻihi kehé. Muimui ʻi he fakahinohino ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

• Vahevahe fakakulupu e kau finemuí, pea ʻoange ki he kulupu takitaha ha ngaahi tatau ʻo ha lea ʻe taha mei he lesoni ko ʻení (pe ha lea kehe naʻá ke fili kau ki he fakamolemolé). Fakaafeʻi kinautolu ke tuku ha ngaahi miniti siʻi ke lau e leá mo fakaʻilongaʻi e fakamatala ʻoku ʻuhingamālie kiate kinautolú (tala ange ke ʻoua te nau hohaʻa ki hano lau kotoa e leá; kae fakamamafa ki he mahuʻinga ʻo e fakalaulauloto ki he pōpoakí). Kole ange ke nau vahevahe mo e kalasí e meʻa ne nau maʻú pea fakamatalaʻi mo e ʻuhinga ʻoku ʻuhingamālie ai kiate kinautolú.

• Lau fakataha ʻa e talanoa fakatātā ʻo e tamaioʻeiki taʻeʻofa ʻi he Mātiu 18:23–35 (pe huluʻi e vitiō “Fakamolemoleʻi Tuʻo Fitungofulu Lau ʻe Fitu”), pea kole ki he kau finemuí ke fikaʻi pea fakafehoanaki e ongo moʻua ʻo e tamaioʻeikí mo hono kaungā tamaioʻeikí (vakai “ Weights and Measures” ʻi he Bible Dictionary). Ko e hā ʻoku ako ʻe he kau finemuí mei he talanoa fakatātā ko ʻeni fekauʻaki mo e fakamolemolé? Fakaafeʻi e kau finemuí ke kumi pea vahevahe ha ngaahi potufolofola kehe ʻoku nau akoʻi e mahuʻinga hono fakamolemoleʻi e niʻihi kehé (hangē ko e ngaahi potufolofola ʻoku fokotuʻu atu ʻi he fokotuʻutuʻu ko ʻení).

• Kole ki he kau finemuí ke nau fakafehoanaki ʻa e ngaahi sīpinga ʻi he folofolá ʻo e kakai ʻoku nau fakamolemoleʻi e niʻihi kehé. ʻE lava ke mou vakaiʻi e ngaahi sīpinga ʻa Siosefa ʻi ʻIsipité (vakai, Sēnesi 45:1–7), Nīfai mo hono ngaahi tokouá (vakai, 1 Nīfai 7:21), ko Sīsū Kalaisi ʻi he kolosí (vakai, Luke 23:34), pe niʻihi kehe. Ko e hā ʻoku fuʻu mahuʻinga ai ke fakamolemoleʻi ʻa e kau mēmipa ʻo e fāmilí? Huluʻi ha taha ʻo e ngaahi vitiō ʻoku fokotuʻu atu ʻi he fokotuʻutuʻu ko ʻení, pea kole ki he kau finemuí ke nau vahevahe ʻenau ngaahi ongó. Ko e hā ha ngaahi sīpinga kehe ʻo e fakamolemolé te nau ala vahevahe?

• Kole ki he kau finemuí ke nau kumi ʻi he folofolá ha akonaki ʻa e Fakamoʻuí fekauʻaki mo e fakamolemoleʻi e niʻihi kehé pea vahevahe e meʻa ʻoku nau ʻiló mo e kalasí (vakai, Mātiu 5:44; 6:14–15; 18:22–23). Kole ange ke nau vahevahe ha ngaahi aʻusia ʻo e ongoʻi nonga mei hono fakamolemoleʻi ʻo ha niʻihi kehé.

• Hiki ʻa e ngaahi fehuʻi ko ʻení ʻi ha ngaahi laʻipepa, pea tufa ke taki taha e kalasí: Ko e hā e ʻuhinga ʻoku fie maʻu ai ke tau fakamolemoleʻi ʻa e tokotaha kotoa pē, kau ai hono fakamolemoleʻi kitá? Ko e hā ʻoku hoko ai e ʻEikí ko e tokotaha pē ia ʻe lava ke Ne tuʻutuʻuni ke fakamolemoleʻi ha taha pe ʻikai? Ko e hā ʻoku angahala lahi ai e taʻe fakamolemolé? Fakaafeʻi e kau finemuí ke nau fakalaulauloto ki heʻenau fehuʻí lolotonga ʻenau lau ʻa e Tokāteline mo e Ngaahi Fuakava 64:9–11 pea ke nau vahevahe ʻenau ngaahi fakakaukaú mo e ʻiló.

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino nai kiate kinautolu e mahuʻinga ke fakamolemoleʻi e niʻihi kehé? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Tokoni Fakafaiakó

“ʻOku hanga ʻe he kau faiako ʻoku lahi ange honau taimi akonakí mo ʻenau tali e fehuʻi kotoa peé ʻo ʻai ke loto-siʻi e kau akó mei he kau mai ki he kalasí” (ʻOku ʻIkai ha Ui ʻe Mahuʻinga Ange ʻi he Faiakó [2000], 71).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, ʻe lava ke nau:

• Hiki ki heʻenau tohinoá ha faʻahinga fakakaukau ne nau maʻu ʻi heʻenau fakamolemoleʻi e niʻihi kehé. Ko hai ʻoku fie maʻu ke nau fakamolemoleʻí? ʻE tāpuekina fēfē ʻenau moʻuí ʻi heʻenau fakamolemoleʻi e niʻihi kehé?

• Ako maʻuloto ha himi pe potufolofola kau ki he fakamolemolé.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.