Ko e hā ʻa e ʻaloʻofa?

Ko e ʻaloʻofá ko ha tokoni mo ha mālohi fakalangi ʻoku tau maʻu ʻi he Fakalelei ʻa Sīsū Kalaisí. ʻOku hanga ʻe he ʻaloʻofá ʻo fakamoʻui kitautolu mei he angahalá mo e maté. ʻOku fakakau atu ki he ʻaloʻofá ha mālohi ʻokú ne malava ʻo fakamālohia mo tokoniʻi kitautolu he ʻaho takitaha ke tau kātaki ki he ngataʻangá. ʻOku fie maʻu ke tau ngāue ke maʻu e kakato ʻo e ʻaloʻofa ʻa e ʻEikí.

Teuteuʻi fakalaumālie koe

Ko e hā ʻene ʻuhinga kiate koe ʻa e ʻaloʻofa? Kuo tokoni fēfē hoʻo ongoʻi ʻa e mālohi ʻo Sīsū Kalaisí ke liliu hoʻo moʻuí?

Ko e hā e meʻa ʻoku ʻilo ʻe he kau finemuí ʻo kau ki he ʻaloʻofá? Te ke tokoniʻi fēfē kinautolu ke mahino e mālohi ʻo e ʻaloʻofá ʻi heʻenau moʻuí?

Ko e hā ha ngaahi potufolofola mo ha ngaahi maʻuʻanga tokoni kehe kuo nau tokoni ke mahino kiate koe e ʻaloʻofá? Ko e hā e meʻa ne ke ongoʻi ke vahevahe mo e kau finemuí koeʻuhi ke lava ʻo mahino kiate kinautolu e ʻaloʻofá?

ʻEfesō 2:8–9; 2 Nīfai 25:23 (ʻOku fakamoʻui kitautolu ʻi he ʻaloʻofa)

Filipai 4:13; Sēkope 4:6–7 (ʻOku ʻomi ʻe he mālohi ʻo e ʻaloʻofa ʻa Sīsū Kalaisí ha mālohi kiate kitautolu)

Molonai 10:32–33 (ʻOku lava ʻe he ʻaloʻofá ʻo fakahaohaoaʻi kitautolu ʻia Kalaisi)

Ko e Fakahinohino ki he Ngaahi Folofolá, “ʻAloʻofá”

J. Devn Cornish, “ ʻOku ou Lelei Feʻunga Nai? Te u Lava Nai?” Ensign pe Liahona, Nov. 2016, 32–34

Dieter F. Uchtdorf, “Ko e Meʻaʻofa ʻo e ʻAloʻofá,” Ensign pe Liahona, Mē 2015, 107–10

David A. Bednar, “Ke Nau Lava ʻo Fua Faingofua ʻEnau Kavengá,” Ensign pe Liahona, Mē 2014

“ʻAloʻofá,” Tuʻu Maʻu ʻi he Tuí (2004), 213–15

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá pea tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Tā ha kiʻi fakatātā faingofua ʻi he palakipoé ʻo ha taha ʻoku ʻi lalo ʻi ha fuʻu luo, pea ʻoku ʻi ai ha taha ʻi ʻolunga he luó ʻokú ne tukutukuhifo ha tuʻunga. ʻEke ki he kau finemuí pe ko e hā e meʻa ʻe fie maʻu ke fakahaofi ai e tokotaha ʻi he luó? Ko e hā e fatongia ʻo e tokotaha ʻi ʻolunga he luó? Ko e hā e fatongia ʻo e tokotaha ʻi he luó? Ko e hā e meʻa ʻoku akoʻi ʻe he fakatātā ko ʻení ki he kau finemuí kau ki he founga ʻoku fakamoʻui ai kitautolu ʻe he ʻaloʻofa ʻa e Fakamoʻuí?
ʻEke ki he kau finemuí e meʻa ʻoku nau ʻilo kau ki he ʻaloʻofá. Ko e hā ʻenau fakakaukau ki he ʻuhinga ʻo e ʻaloʻofá? ʻOku anga fēfē ʻenau sio ki he ʻaloʻofá ʻi heʻenau moʻuí? ʻOku nau tui nai ki hono fakamoʻui kinautolu ʻe he ʻaloʻofá? Ko e hā haʻanau fehuʻi kau ki he ʻaloʻofá?

Ako fakataha

ʻE lava ke tokoni e ngaahi ʻekitivitī takitaha ʻi laló ke mahino ki he kau finemuí e tokāteline ʻo e ʻaloʻofá. Muimui ki he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaafeʻi e kau finemuí ke nau lau ha ngaahi konga ʻo e lea ʻa ʻEletā J. Devn Cornish “ ʻOku ou Lelei Feʻunga Nai? Te u Lava Nai?” Kole ange ke nau kumi hake ha ngaahi tali ki he ngaahi fehuʻi ko ʻení:“Ko e hā e ʻaloʻofa? Te u lava fēfē ʻo maʻu e ʻaloʻofá heʻeku moʻuí?ʻ” Te u lava fēfē ʻo moʻui taau ange ke maʻu e ʻaloʻofa ʻo e Fakamoʻuí? Te u lava nai ʻo foki ki hēvani?” Hili hano ʻoange ha taimi feʻunga ke fakalaulauloto ai e kau finemuí ki he ngaahi fehuʻi ko ʻení, fakaafeʻi kinautolu ke fakakaukau ʻo kau ki ha kaungameʻa ʻoku veiveiua ʻi heʻene tuí mo ʻene loto-falala ʻi he ongoongoleleí. ʻE ala tokoni fēfē atu e leá ni ki honau kaungāmeʻá?
Fakakaukau ke tā he palakipoé ha fakatātā ʻo ha matapā hūʻanga mo ha matapā sioʻata pea kole ki he kau finemuí ke nau kumi he kamataʻanga ʻo e lea ʻa Palesiteni Dieter F. Uchtdorf “Ko e Meʻaʻofa ʻo e ʻAloʻofá” ke ʻilo ai e fakafehoanaki ʻokú ne fai ki he ongo meʻá ni. Vahevahe e toenga ʻo e ngaahi konga ʻo e leá ki he kau finemuí pea kole ange ke nau tohi mo vahevahe ha foʻi sētesi ʻe taha te ne fakamatalaʻi fakalūkufua e meʻa kuo nau ako kau ki he ʻaloʻofá mei he konga ne vahe angé. Ko e hā te nau fai ke nau ofi ange ai ki he ʻaloʻofa ʻa e Fakamoʻuí?
Kole ki ha taha ʻo e kau finemuí ʻi ha ngaahi ʻaho siʻi kimuʻa, ke nau ako fekauʻaki mo hono ʻuhinga ʻo e toʻo kiate kitautolu ʻa e haʻamonga ʻo e Fakamoʻuí, mei he Mātiu 11:28–30 mo e lea ʻa ʻEletā David A. Bednar “Ke Nau Lava ʻo Fua Faingofua ʻEnau Ngaahi Kavengá.” Kole kiate ia ke haʻu mateuteu ki he kalasí ke ne tataki ha fevahevaheʻaki fekauʻaki mo e meʻa kuó ne ako ʻo fekauʻaki mo e founga ʻe lava ke fakafofongaʻi ai ʻe he haʻamongá hotau vā mo Sīsū Kalaisí. Poupouʻi ia ke ne vahevahe ʻa e ngaahi fakamatala mei he lea ʻa ʻEletā Petinaá ʻokú ne ongoʻi ʻe tokoni ke mahino ki he kau finemuí ʻa e ʻaloʻofa ʻo e Fakamoʻuí.
Tohi ha fakamatala fakanounou ʻo e ngaahi potufolofola mei he fokotuʻutuʻu ko ʻení pea tuku ia ʻi he holisi takitaha ʻo e lokí. Vahe ki he finemui takitaha ke ne lau ha taha ʻo e ngaahi potufolofolá pea kumi mo tuʻu ʻi he tafaʻaki ʻo e fakamatala fakanounou ʻoku hoa mo ʻene potufolofolá. Kole ki he kau finemuí ke nau vahevahe e meʻa ʻoku nau ako fekauʻaki mo e ʻaloʻofá mei heʻenau potufolofolá. Ko e hā ha fakamoʻoni pau ʻo e ʻaloʻofá ʻoku nau mamata tonu ai ʻi heʻenau moʻuí? Ko e hā ha ngaahi sīpinga ʻe lava ke nau fakakaukau ki ai mei he folofolá (hangē ko Nīfai, ʻĀmoni, mo ʻAlamā ko e Siʻí)?
Fakaafeʻi e finemui takitaha ke hiki ha lisi ʻo e ngaahi meʻa naʻá ne ako ʻi heʻene lau e fakamatala fekauʻaki mo e ʻaloʻofá ʻi he Fakahinohino ki he Ngaahi Folofolá mo ia ʻi he Tuʻu Maʻu ʻi he Tuí. Kole ki he kau finemuí ke nau vahevahe ha meʻa mei heʻenau ngaahi lisí pea fakamatala ʻa e ʻuhinga ʻoku mahuʻingamālie ai ia kiate kinautolú. Fakaafeʻi kinautolu ke nau kumi ha ngaahi fakatātā (ʻi he Tohi Fakatātā ʻo e Ongoongoleleí pe ha makasini ʻa e Siasí) ʻoku hā ai ha kakai ne nau maʻu ʻa e ʻaloʻofá pe tokoni mei he ʻOtuá, pea kole ange ke nau tauhoa pe fakakulupu iiki ʻo vahevahe ai ʻa e meʻa ʻoku nau ʻiló. Ko e hā ha ngaahi aʻusia tatau ʻi heʻenau moʻuí te nau lava ʻo vahevahe?
ʻOmai ha vaʻakau ki he kalasí, pea fakaafeʻi e kau finemuí ke nau kumi e founga ne ngāue ʻaki ʻe he Fakamoʻuí e ngaahi vaʻakaú ke akoʻi ʻaki e ʻaloʻofá ʻi he Sione 15:1–10. Ko e hā ha ngaahi fakakaukau ʻoku nau maʻu fekauʻaki mo e aloʻofá mei he ngaahi veesi ko ʻení? Fakaafeʻi ha finemui ke ne ngāue ʻaki e vaʻakau naʻá ke haʻu mo iá ke fakamatalaʻi fakanounou ki he toenga ʻo e kalasí e meʻa naʻá ne ako kau ki he ʻaloʻofá.

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino nai kiate kinautolu e tokāteline ʻo e ʻaloʻofá? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Tokoniʻi e kau finemuí ke nau hiki ha lisi ʻo e ngaahi meʻa te nau lava ke fai ke fakaʻaongaʻi ai e meʻa ne nau ako he ʻaho ní. Fakaafeʻi kinautolu ke nau fili e meʻa te nau fai he uike ka hoko maí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.