ʻE lava fēfē ke tokoniʻi au ʻe he fakatomalá he ʻaho kotoa pē?

Naʻe mamahiʻia ʻa Sīsū Kalaisi he nunuʻa ʻo ʻetau ngaahi angahalá koeʻuhi ke tau lava ʻo fakatomala. Ko e fakatomalá ko ha liliu ʻo e lotó mo e ʻatamaí ʻokú ne ʻomi ai ke tau ofi ange ki he ʻOtuá. ʻOku kau ai e tafoki mei he angahalá pea hanga ki he ʻOtuá ke maʻu ha fakamolemole. ʻOku fakatupu ʻe ia ha ʻofa ki he ʻOtuá mo ha holi moʻoni ke talangofua ki Heʻene ngaahi fekaú.

Teuteuʻi fakalaumālie koe

Ko e hā haʻo ngaahi aʻusia fekauʻaki mo e fakatomalá? ʻOua naʻa aleaʻi ha ngaahi angahala kimuʻa, ka ʻe anga fēfē haʻo vahevahe e founga ne tokoni ai e fakatomalá ke ke toe ofi ange ki he Tamai Hēvaní?

Mahalo ʻe ʻi ai ha kau finemui ʻoku nau feʻao mo e ongoʻi taʻetāú pe halaiá. ʻE anga fēfē haʻo matuʻaki tokanga kiate kinautolu pea fakaafeʻi e Laumālié ke ne tokoniʻi kinautolu ke nau maʻu e holi ke fakatomalá?

Ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā e meʻa ʻokú ne ueʻi koe ke fakatomalá?

ʻIsaia 1:18; ʻAlamā 34:15–16; 36:6–24; T&F 1:32 (ʻE lava ke fakamolemoleʻi ʻetau ngaahi angahalá ʻi heʻetau fakatomalá)

ʻAlamā 19:33 (ʻOku ʻomi ʻe he fakatomalá ha liliu ʻo e lotó)

Mōsaia 27:35; T&F 58:42–43 (Ko e fakatomalá, ko e pau ke vete mo liʻaki ʻetau ngaahi angahalá)

Dale G. Renlund, “Ko Hotau Tauhisipi Leleí,” Ensign pe Liahona, Mē 2017, 29–32

Dale G. Renlund, “Fakatomalá: Ko ha Fili Fakafiefia,” Ensign pe Liahona, Nōvema 2016, 121–24

Linda S. Reeves, “Ko e Palani Lahi ʻo e Huhuʻí,” Ensign pe Liahona, Nōvema 2016, 88–90

Dieter F. Uchtdorf, “Te Ne Hili Koe ki Hono Umá ʻo Fua Koe ki ʻApi,” Ensign pe Liahona, Mē 2016, 101–4

“Fakatomalá,” Ki Hono Fakamālohia ʻo e Toʻu Tupú (2011), 29

“Fakatomalá,” Tuʻu Maʻu ʻi he Tuí (2004), 50-54

“Angamaʻá,” Fakalakalaka Fakatāutaha ʻa e Kau Finemuí (2009), aʻusia mahuʻinga fika 4

Vitiō: “Ko ha Liliu ʻo e Lotó”

Vitiō: ”Not a one-time thing“

Ko e faiako ‘i he founga ‘a e Fakamo‘uí

Ne fakaafeʻi ʻe he Fakamoʻuí e niʻihi kehé ke nau ngāue ʻi he tuí mo moʻui ʻaki e ngaahi moʻoni naʻá Ne akoʻí. Naʻá Ne maʻu e ngaahi faingamālie ke nau ako ai mei ha ngaahi aʻusia mālohi. Ko e hā ha meʻa te ke fai ke tokoniʻi ai e kau finemuí ke nau sio ki he mālohi fakaʻaho ʻo e fakatomalá ʻi heʻenau moʻuí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau kehe ki he akó mo e akoʻí.

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

• Huluʻi e vitiō ko e “Ko ha Liliu ʻo e Lotó.” Ko e hā e meʻa ʻoku ako ʻe he kau finemuí kau ki he fakatomalá mei he meʻa ʻoku aʻusia ʻe he talavoú ni?

• Fakaafeʻi e kau finemuí ke ʻoua ʻe hiki honau hingoá ka nau tohi ha ngaahi fehuʻi ʻi ha laʻipepa kau ki he fakatomalá, pea tānaki e ngaahi laʻipepá. Fakaafeʻi e pīsopé ke haʻu ki he kalasí ʻo tali e ngaahi fehuʻí ni.

Ako fakataha

Vakai ki he ngaahi fakakaukau kehe ki he akó mo e akoʻí .

ʻE lava ke tokoni e ngaahi ʻekitivitī takitaha ʻi laló ke mahino ki he kau finemuí e mahuʻinga ʻo e fakatomalá ʻi heʻenau moʻui fakaʻahó. Muimui ki he tataki ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.

• Fakaafeʻi ha taha ʻo e kau finemuí ke nau vahevahe ha meʻa ne nau aʻusia ʻi haʻanau fakaakeake mei ha puke pe lavea. Ko e hā ha founga ʻoku tatau ai e meʻa naʻá ne fouá pea mo e founga ʻo e fakamoʻui fakalaumālié? Ko e hā ha ngaahi akonaki ʻoku maʻu ʻe he kau finemuí ʻi he lea ʻa ʻEletā Dale G. Renlund “Ko Hotau Tauhisipi Leleí” ʻoku poupouʻi ai kinautolu ke nau fekumi ke maʻu ha fakamoʻui mei he Tauhisipi Leleí? Ko e hā te tau lava ʻo fai ke fakahaaʻi ai e manavaʻofa tatau ko ʻení ki he niʻihi ʻoku tau feohí? 

• Fakaafeʻi e kau finemuí ke nau omi mateuteu ki he kalasí ke vahevahe ha talanoa mei he taha ʻo e ngaahi lea ne fokotuʻu atu ʻi he lēsoni ko ʻení. Te ke lava foki ʻo huluʻi e vitiō ʻo e tokotaha leá ʻi heʻene fai e talanoá. Ko e hā ʻoku akoʻi mai ʻe he ngaahi talanoá ʻo kau ki he fakatomalá? Hiki ha fakamatala fekauʻaki mo e fakatomalá mei he ongo leá ʻi ha fanga kiʻi laʻipepa. Fakaafeʻi e kau finemuí ke fili ha fakamatala pea nau vahevahe ʻa e meʻa ʻoku nau akó— ʻo ʻuluaki fai ia ki honau hoangāué pea toki fai ki he kalasí. ʻOange ha kiʻi taimi ke nau fakakaukauloto ai ki he ngaahi liliu ʻoku nau ongoʻi ke fai ko e tupu mei he meʻa kuo nau akó.

• Kole ki he taha ʻo e kau finemuí ke nau fūfuuʻi ha meʻa, lolotonga ko iá ʻoku sio pē e toenga ʻo e mēmipa ʻo e kalasí. Kole ki he kau finemuí ke nau fekumi ki he meʻa ne fufuú. Ko e hā e meʻa ʻoku akoʻi kitautolu ʻe he sīpinga ko ʻení ʻo kau ki hono fūfuuʻi e angahalá mei he ʻOtuá? (vakai, ʻAlamā 39:8). Ko e hā ha talanoa mei he folofolá e lava ʻe he kau talavoú ʻo vahevahe, ʻoku akoʻi ai kitautolu he ʻikai te tau lava ʻo fūfuuʻi ʻetau angahalá mei he ʻOtuá? (vakai, ki ha sīpinga, Siona 1–2; 2 Samuela 11–12; Ngāue 5:1–11). Te nau lava foki ʻo fakamanatu ha taha ʻo e ngaahi talanoa ʻi he lea ʻa Sisitā Linda S. Reeves “Ko e Palani Lahi ʻo e Huhuʻí.” Fakaafeʻi e kau finemuí ke aleaʻi fakakulupu e ngaahi fehuʻi ko ʻení: Ko e hā ha ngaahi founga ʻoku fūfuuʻi ai ʻe he kakaí ʻenau ngaahi angahalá? Ko e hā ha meʻa te ke lava ʻo talaange ki ha taha ke tokoni ke mahino ʻoku ʻikai ke tau lava ʻo fūfuuʻi ʻetau ngaahi angahalá?

• Fakaafeʻi e kau finemuí ke nau fekumi (fakafoʻituitui pe fakakalasi) ʻi he ngaahi maʻuʻanga tokoni hangē ko e konga ʻo e “Fakatomalá” he Tuʻu Maʻu ʻi he Tuí mo e Ki Hono Fakamālohia ʻo e Toʻu Tupú pe ʻAlamā 36:11–20. Kole ke nau vahevahe ha ngaahi fakamatala pe fakakaukau ʻoku nau manako ai mei he ngaahi maʻuʻanga tokoni ko ʻení pea fakamatalaʻi e ʻuhinga ʻoku mahuʻinga mālie ai kiate kinautolú.

• Fakaafeʻi e kau finemuí ke nau fili ha potufolofola kau ki he fakatomalá (hangē ko e meʻa ʻoku fokotuʻu atu ʻi he fokotuʻutuʻu ko ʻení) pea nau fakamatalaʻi fakanounou ʻi he lea pē ʻanautolu e meʻa ne nau ako mei heʻenau folofolá. Te nau ngāue fēfē ʻaki e ngaahi folofolá ni ke tokoniʻi ai ha taha ʻoku fakakaukau he ʻikai lava ke fakamolemoleʻi ia?

• Tuku ha taimi ki he kau finemui ke nau ngāue ai ʻi he kalasí ki he aʻusia mahuʻinga fika 4 ʻo e Angamaʻá mei he kiʻi tohi ko e Fakalakalaka Fakatāutahá. Kapau ne nau ʻosi fakakakato e aʻusia mahuʻinga ko ʻení, kole ke nau vahevahe e meʻa ne nau ako mei aí.

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino lelei ange nai kiate kinautolu e tokāteline ʻo e fakatomalá? Ko e hā e ngaahi ongo pe fakakaukau ʻoku nau maʻú? ʻOku ʻi ai mo haʻanau toe ngaahi fehuʻi? ʻE ʻaonga nai ke toe fakamoleki ha taimi lahi ange ki he tokāteline ko ʻení?

Tokoni fakafaiako

“Ko e fānau akó ʻoku fie maʻu ke fakangāueʻí. ʻI he taimi ʻoku fakatefito ai e tokangá ʻi ha faiakó, peá ne hoko ko e tokotaha mahuʻinga taha he lokiakó, fai kotoa e talanoá mo ne puleʻi kotoa e ngaahi ʻekitivitií, ʻoku meimei fakapapauʻi ai ʻokú ne fakafeʻātungiaʻi e ako ʻa e kau mēmipa ʻo e kalasí” (Asahel D. Woodruff, ʻi he ʻOku ʻIkai ha Ui ʻe Mahuʻinga Ange ʻi he Faiakó [1999], 68).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau pe te nau moʻui ʻaki fēfē nai ʻa e meʻa kuo nau ako he ʻaho ní. Hangē ko ʻení, ʻe lava ke nau:

• Vakavakaiʻi ʻenau moʻuí pea kumi e ngaahi tafaʻaki ʻoku lava ke nau fakatomala mo fakalakalaka aí.

• Hiki ʻi heʻenau tohinoá e meʻa te nau lava ke fakatomalaʻí, fakatupulaki heʻenau moʻuí, pe hokohoko atu ʻi hono moʻui ʻaki e ngaahi tefitoʻi moʻoni ʻo e ongoongoleleí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.