Ko e hā hono ʻuhinga ʻo e tui kia Sīsū Kalaisí?

Kuo pau ke tukutaha ʻetau tuí ʻi he ʻEiki ko Sīsū Kalaisí kae lava ke fakamoʻui kitautolu. ʻOku ʻuhinga e tui kia Sīsū Kalaisí ko e falala kiate Ia mo tauhi ʻEne ngaahi fekaú. Ko e tuí ʻoku ʻikai ko e tui pē taʻe fai ha ngāue. ʻOku fakahaaʻi ʻetau tuí ʻi he ngāué—mo ʻetau tōʻonga moʻuí.

Teuteuʻi fakalaumālie koe

ʻOku ʻuhinga ki he hā ʻa e tui kia Sīsū Kalaisí? Ko e hā ha sīpinga ʻo e tui kia Sīsū Kalaisí kuó ke mamata ai? ʻOku tākiekina fēfē ʻe he tui kia Sīsū Kalaisí hoʻo ʻamanaki lelei ki he kahaʻú?

Fakakaukau ki he kau finemui ʻi hoʻo kalasí. Ko e hā ha ngaahi sīpinga ʻo e tuí kuó ke mamata ai ʻi heʻenau moʻuí? Ko e hā ha ngaahi tafaʻaki ʻi heʻenau moʻuí te nau lava ʻo fakafalala lahi ange ai ki he ʻEikí?

ʻI hoʻo teuteú, ako ʻi he faʻa lotu e ngaahi potufolofola mo e maʻuʻanga tokoni ko ʻení. Ko e hā ha ngaahi sīpinga ʻo e tuí mei he folofolá mo e moʻui ʻa e niʻihi kehé te ke lava ʻo vahevahe mo e kau finemuí?

Sēmisi 1:5–6; 2:14–20 (ʻOku ʻalu fakataha e tuí mo e ngāué)

ʻAlamā 32:21, 26–43 (Ko e tuí ko e ʻamanaki lelei ki ha ngaahi meʻa ʻoku moʻoni ka ʻoku ʻikai lava mamata ki ai)

Molonai 7:33–41 (ʻOku fakahoko e maná makatuʻunga ʻi he tuí)

ʻĒseta 4–5; Hepelū 11:4–9, 17–29; ʻAlamā 19; 56:45–48; 57:21; ʻEta 12:6–22; Siosefa Sāmita—Hisitōlia 1:11–19 (Ngaahi sīpinga ʻo e tuí)

Ko e Fakahinohino ki he Ngaahi Folofolá, “Tuí”

Quentin L. Cook, “Ngaahi Fakavaʻe ʻo e Tuí,” Ensign pe Liahona, Mē 2017, 127–31

Bonnie H. Cordon, “Falala ki he ʻEikí pea ʻOua naʻá ke Faʻaki ki Ho Potó,” Ensign pe Liahona, Mē 2017, 6–9

Dieter F. Uchtdorf, “Fungavaka Faá, Matapā Fakaʻosí,” Ensign pe Liahona, Nōvema 2016, 15–18

Neil L. Andersen, “ ʻOku ʻIkai Hokonoa ʻa e Tuí ka ʻi hoʻo Fili Ki ai,” Ensign pe Liahona, Nōvema. 2015, 65–68

“Tui,” Fakalakalaka Fakataautaha ʻa e Kau Finemuí (2009), 13–20

“Tui,” Tuʻu Maʻu ʻi he Tuí (2004), 195–98

Vitiō:“Tui Haohaoa mo Faingofua” “Loto-toʻa”

5:30

3:17

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Tā ha kiʻi vaka siʻisiʻi ʻoku ʻaʻalo pē, pea fakahingoa ia ko e “Tuí.” Tā mo hano fohe ʻe taha ʻo fakahingoa ko e “Tuí” pea fakahingoa e fohe ʻe tahá ko e “Ngāué.” ʻEke ki he kau finemuí pe ko e hā e meʻa ʻe hoko kapau ʻoku taha pē e fohe ʻo e vaká. Ko e hā e meʻa ʻe hoko ki heʻetau tuí kapau ʻoku ʻikai ke tau ngāue ʻo fakatatau ki he meʻa ʻoku tau tui ki aí? Ngāue ʻaki e folofolá, Tuʻu Maʻu ʻi he Tuí (peesi 195-98), pe ko e Fakahinohino ki he Ngaahi Folofolá ke tokoniʻi e kau finemuí ke mahino kiate kinautolu e tuí mo e anga e fekauʻaki ʻa e fakatātā ko ʻení mo e tuí.
Kole ki he kau finemuí ke nau tohi e hingoa ʻo ha fefine mei he folofolá naʻe hā mei ai ha tui mālohi. Tānaki ʻenau laʻipepá. Lau leʻolahi atu e ngaahi hingoá, pea fakaafeʻi e kau finemuí ke nau fai e talanoa ʻo e kau fefine ko ʻení.

Ako fakataha

ʻE lava ke tokoni e ngaahi ʻekitivitī takitaha ʻi laló ke mahino ki he kau finemuí e ʻuhinga ʻo e tui kia Sīsū Kalaisí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Fakaafeʻi ha ongo finemui ke na haʻu kimuʻa he kalasí. Kole ki ha finemui ke ne feinga ke tuʻu ʻi ha founga kehekehe (hangē ko e tuʻu fakamangamanga pe fakaheihei) pea ʻai e finemui ʻe tahá ke ne kiʻi tekeʻi maʻamaʻa pē lolotonga ʻene tuʻu kehekehe ko ʻení. Ko e hā e faʻahinga tuʻu naʻe tokoni ke tuʻu maʻu ʻo ʻikai ngaue ai e finemuí? Ko e hā ʻene faʻahinga tuʻu naʻe mei tō aí? Fakaafeʻi e kau finemuí ke nau lau e lea ʻa Sisitā Bonnie H. Cordon ko e “Falala ki he ʻEikí pea ʻOua naʻá ke Faʻaki ki Ho Potó,” ʻo kumi ʻene ngaahi fokotuʻu ki he founga ke fakatupulaki ai ha falala lahi ange kia Sīsū Kalaisi mo kei fakatefito pē ʻetau tuí ʻiate Iá. ʻOku ʻi ai ha faʻahinga aʻusia ʻe lava ke vahevahe ʻe he kau finemuí, ʻo kau ki ha taimi ne nau falala ai ki honau potó pea nau foua hono nunuʻá? pe ko ha taimi ne nau falala ai ki he Fakamoʻuí pea maʻu e ngaahi tāpuakí?
Fakaafeʻi e kau finemuí ke nau lau e ʻAlamā 32:21 mo e Hilamani 5:12. Kole ki hanau niʻihi ke nau fakamatalaʻi fakanounouʻi ʻi heʻenau fakalea pē ʻanautolú, ʻa e meʻa ʻoku nau ako fekauʻaki mo e tuí mei he ongo potu folofola ko ʻení. Fakaafeʻi e kau finemuí ke nau kumi hake ha ngaahi sīpinga ʻo ha kakai ne nau maʻu ha ngaahi fakavaʻe mālohi ʻo e tuí, ʻi he lea ʻa ʻEletā Quentin L. Cook ko e “Ngaahi Fakavaʻe ʻo e Tuí” pea ko e lea ʻa ʻEletā Neil L. Andersen “ʻOku ʻIkai Hokonoa ʻa e Tuí ka ʻi Hoʻo Fili Ki aí.” Kole ange ke nau vahevahe ʻa e meʻa ʻoku nau maʻú. Ko e hā te nau lava ʻo fai ke langa ha fakavaʻe mālohi ʻo e tuí?
Fakaafeʻi e finemui takitaha ke haʻu mateuteu ke vahevahe nounou ha aʻusia ʻi ha taimi naʻá ne vilitaki ai pe ʻikai foʻi ʻi hono fakahoko ha meʻa lelei. Te ke lava foki ʻo vahevahe ha meʻa ne ke aʻusia tonu ʻi hoʻo moʻuí. Fakaafeʻi e kau finemuí ke nau lau e talanoa fekauʻaki mo e ongo faifekau ʻi he lea ʻa Palesiteni Dieter F. Uchtdorf “Fungavaka Faá, Matapā Fakaʻosí.” Ko e hā te nau lava ʻo ako mei he ongo faifekaú ʻi he talanoa ko ʻení? Ko e hā ha founga ʻoku fekauʻaki ai e talanoa ko ʻení mo e meʻa ʻoku nau aʻusiá? Te ke lava foki ʻo fakaafeʻi e kau finemuí ke nau toe fakamanatu e toenga ʻo e lea ko ʻení, ʻo kumi hake e ngaahi meʻa ʻoku akoʻi mai ʻe Palesiteni Uchtdorf ʻo kau ki he tuí pea siakaleʻi ‘a e ngaahi fakamatala ʻoku hā makehe kiate kinautolú. Ko e hā mo ha meʻa kehe ʻoku ako ʻe he kau finemuí ʻo fekauʻaki mo e tui? (ʻE lava ʻe he kau finemuí ʻo fakaʻaongaʻi e lea ko ʻení pea mo ha lea kehe ʻi he lēsoni ko ʻení ke tokoni ki hono fakakakato e meʻa fika 1 ke aʻusia fekauʻaki mo e tuí ʻi heʻenau tohi Fakalakalaka Fakatāutahá.)
Fakaafeʻi e kau finemuí ke nau tohi ha ngaahi tali ki he fehuʻi ne fai ʻe ʻEletā Neil L. Andersen: “ʻOku fēfē vakai mai ʻa e Fakamoʻuí ki heʻeku tuí?” (vakai, “ʻOku ʻIkai Hokonoa ʻa e Tuí, ka ʻi hoʻo Fili Ki ai”). Poupouʻi ke nau vahevahe ha ngaahi founga ʻe lava ke nau fakahaaʻi ai ki he Fakamoʻuí ʻenau tuí. Ko e hā ʻoku nau ako mei he lea ʻa ʻEletā ʻEnitasoní ʻokú ne ueʻi kinautolu ke nau fakahaaʻi mo fakatupulaki ʻenau tuí? Hangē ko ʻení, fakaafeʻi kinautolu ke nau toe fakamanatu e fanga kiʻi talanoa fekauʻaki mo e kau faifekau ne nau fakahaaʻi ʻenau tuí. ʻE lava foki ke ke haʻu mo ha puha kuo kofukofu hangē ha meʻaʻofá, ʻoku faʻo ha meʻa ʻi loto te ne lava ʻo fakatupulaki ʻetau tuí (vakai ki he ngaahi sīpinga ʻi he konga ʻoku ui ko e “Ngaahi Meʻafoaki ʻOkú ne Fakalahi ʻEtau Tuí”).
Kole ki he finemui takitaha ke kumi pea vahevahe ha talanoa mei he folofolá, ha tokotaha naʻá ne ngāue ʻi heʻene tui kia Sīsū Kalaisí (hangē ko ʻení, vakai, ʻĒseta 4; Maʻake 5:25 – 34; Hepelū 11:4–9, 17–29; 1 Nīfai 4; ʻAlamā 19:16–29; ʻEta 12:11–22). Fakaafeʻi e kau finemuí ke nau hiki foki mo haʻanau aʻusia pe ko ha taha ʻoku nau ʻilo ʻa ia naʻa nau fakaʻaongaʻi ʻa e tui kia Sīsū Kalaisí. Kole ki he finemui takitaha ke vahevahe ʻa e talanoa naʻá ne ʻilo ʻi he folofolá mo e aʻusia naʻá ne tohi fekauʻaki mo iá. Fakakaukau ke huluʻi e vitiō “Loto-toʻa” ko ha konga ʻo e ʻekitivitī ko ʻení.

3:17
Fakaafeʻi e kau finemuí ke nau lau e Mātiu 17:20, pea fehuʻi ange pe ʻoku nau pehē ʻoku ʻuhinga ki he hā hono hiki atu ha ngaahi moʻunga ʻaki ʻetau tuí. Vahevahe e lea ko ʻeni meia Pīsope Richard C. Edgley: “Kuo teʻeki ke u mamata ki hano hiki ha moʻunga. Ka kuó u mamata ki hano hiki ha ngaahi moʻunga ʻo e loto veiveiuá mo e siva e ʻamanakí ʻo fetongi ʻaki ia e ʻamanaki leleí mo e fakatuʻamelié koeʻuhí ko e tuí. Kuó u mamata ki hano fetongi ʻe he tuí ha moʻunga ʻo e faiangahalá ʻaki ʻa e fakatomalá mo e fakamolemolé. Kuó u mamata ki hano fetongi ʻe he tuí ha moʻunga ʻo e mamahí ʻaki ʻa e melinó, ʻamanaki leleí mo e loto houngaʻiá. ʻIo, kuó u mamata ki hano hiki ʻo ha ngaahi moʻunga” (“Tuí—ko e Fili ia ʻAʻau,” Ensign pe Liahona, Nōvema 2010, 33). Huluʻi e vitiō ko e “Tui Haohaoa mo Faingofua,” pea kole ki he kau finemuí ke nau kumi ha ngaahi faingataʻa ne toʻo atu ʻe he tuí (pe vahevahe ha meʻa naʻá ke aʻusia).

5:30

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino nai kiate kinautolu e ʻuhinga ʻo e tui kia Sīsū Kalaisí? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki e meʻa kuo nau ako he ʻaho ní. Hangē ko ʻení, ʻe lava ke nau:

Akoʻi ha taha kehe kau ki he tuí (hangē ko ha tuongaʻane kei siʻi ange pe tehina pe kaungāmeʻa).
Vakai ki ha ngaahi sīpinga ʻo e tuí ʻi he folofolá ʻi heʻenau ako e ongoongoleleí ʻiate kinautolu pē pea muimui he ngaahi sīpingá ni ʻi heʻenau moʻuí.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke nau fakaʻaongaʻi e meʻa naʻa nau ako mei he lēsoni ko ʻení.