Ko e hā e Fakalelei ʻa Sīsū Kalaisí?

ʻOku tokoni e Fakalelei mo e feilaulau ʻa Sīsū Kalaisí ke tau ikunaʻi e angahalá, faingataʻá, mo e maté. Ne fakahoko e feilaulau fakalelei ʻa Sīsuú ʻi he Ngoue ko Ketisemaní pea mo e kolosi ʻi Kalevalé. Naʻá ne totongi ʻetau ngaahi angahalá, ʻo ne toʻo kiate Ia e maté, pea toetuʻu. ʻOku tala ʻe he Fakaleleí e ʻofa taupotu taha ʻa e Tamai Hēvaní mo Sīsū Kalaisí.

Teuteuʻi fakalaumālie koe

Ko e Fakaleleí e meʻa mahuʻinga taha he hisitōlia e faʻahinga ʻo e tangatá. Ko e hā e feilaulau fakalelei ʻa Sīsū Kalaisí? Ko e hā ʻene ʻuhinga kiate koe ʻa e Fakaleleí?

Ko e hā e meʻa ʻoku ʻilo ʻe he kau finemuí kau ki he meʻa ne hoko ʻi he Ngoue ko Ketisemaní mo e kolosí? Ko e hā ha meʻa ʻoku nau ʻilo mei he folofolá ʻokú ne fakalolotoʻi ʻenau fakamoʻoni ki he Fakalelei ʻa Sīsū Kalaisí? Ko e hā e meʻa te nau lava ʻo feakoʻiʻaki aí?

Ko e hā e folofola mo e lea ʻe tokoni ki he kau finemuí ke nau ongoʻi e mahuʻinga ʻo e Fakaleleí mo mahino e feilaulau ne fai ʻe he Fakamoʻuí maʻanautolú?

Mātiu 26–27 (Ne totongi ʻe Sīsū Kalaisi ʻetau ngaahi angahalá pea toʻo kiate Ia ʻetau ngaahi mamahí ʻi Ketisemani pea mo e kolosí)

Mātiu 28:1–10 (Ne ikunaʻi ʻe Sīsū Kalaisi e maté ʻi Heʻene Toetuʻú)

2 Nīfai 9:6–16 (Ne ikunaʻi ʻe Sīsū Kalaisi e angahalá mo e maté ʻi Heʻene Fakaleleí)

ʻAlamā 7:11–13 (Ne toʻo ʻe Sīsū Kalaisi kiate Ia ʻetau mamahí, mahamahakí, faingataʻaʻiá, mo e angahalá)

“Ko e Kalaisi Moʻuí: Ko e Fakamoʻoni ʻa e Kau ʻAposetoló” Liahona, ʻEpeleli 2000, 2–3 (vakai foki Tuʻu Maʻu ʻi he Tuí, 82-84; Fakalakalaka Fakatāutahá, 102)

Russell M. Nelson, “Ko Hono Tohoakiʻi Mai e Mālohi ʻo Sīsū Kalaisí ki Heʻetau Moʻuí,” Ensign pe Liahona, Mē 2017, 39–42

Carole M. Stephens, “Ko e ʻEiki Faifakamoʻuí,” Ensign pe Liahona, 9–12

Linda K. Burton, “Kuo Tohi Koā ʻi Hotau Lotó ʻa e Tui ki he Fakalelei ʻa Sīsū Kalaisí?” Ensign pe Liahona, Nōvema 2012

“Ko e Fakalelei ʻa Sīsū Kalaisí,” Tuʻu Maʻu ʻi he Tuí (2004), 27-34

Vitiō: “An Apostle’s Easter Thoughts on Christ”

4:25

Ko e faiako ‘i he founga ‘a e Fakamo‘uí

Ne ngāue ʻaki ʻe he Fakamoʻuí e folofolá ke akoʻi Hono misioná. Naʻá Ne akoʻi e kakaí ke nau fakakaukau ki he folofolá. Ko e hā e meʻa te ke lava ke fai ke tokoniʻi e kau finemuí ke nau fakaʻaongaʻi e folofolá ke mahino kiate kinautolu e Fakalelei ʻa Sīsū Kalaisí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ʻo e uike ní:

Fakaafeʻi e kau finemuí ke nau fakakaukau ki hano kaungāmeʻa ʻi ha tui fakalotu kehe ʻoku haʻu ki he lotú ʻo fanongo ki ha fakamatala ʻa ha taha ki he Fakalelei ʻa Sīsū Kalaisí. Ko e hā haʻanau tali kapau ʻe ʻeke ange ʻe honau kaungāmeʻá, “Ko e hā e Fakalelei ʻa Sīsū Kalaisí?”
Fakaʻaliʻali ha fakatātā ʻoku hā ai ha taha e meʻa ʻoku hoko ʻi he Fakaleleí (hangē ko e mamahi ʻa e Fakamoʻuí ʻi he Ngoue ko Ketisemaní, Hono Tutukí, pe ko ʻEne Toetuʻú), pea kole ki he kau finemuí ke nau vahevahe e meʻa ʻoku nau ʻilo kau ki he meʻa ko iá. ʻOku ʻi ai nai haʻanau fehuʻi?

Ako fakataha

ʻE lava ke tokoni e ngaahi ʻekitivitī takitaha ʻi laló ke ako ai e kau finemuí ki he Fakalelei ʻa Sīsū Kalaisí. Muimui ki he tataki ʻa e Laumālié ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí.

Fakaafeʻi e kau finemuí ke nau fakamanatu e lea ʻa Palesiteni Russell M. Nelson “Ko Hono Tohoakiʻi Mai e Mālohi ʻo Sīsū Kalaisí ki Heʻetau Moʻuí” pea kumi ke ʻilo e ngaahi potu folofola ʻoku ʻasi ai e ngaahi meʻa naʻe folofola ʻaki mo fai ʻe he Fakamoʻuí. Ko e hā te tau lava ʻo ako fekauʻaki mo e Fakamoʻuí mei he ngaahi potu folofola ko ʻení? Ko e hā e faleʻi naʻe fai ʻe Palesiteni Nelson ke tokoni ke tau tohoakiʻi mai ai e mālohi ʻo e Fakamoʻuí ki heʻetau moʻuí? Fakaafeʻi e kau finemuí ke nau fakakaukau ki ha ngaahi founga te nau lava ʻo tali ai e pole naʻe fai ʻe Palesiteni Nelson ki he kakai lalahi kei talavou ʻo e Siasí. Fakaafeʻi e kau finemuí ke nau mateakiʻi e ngaahi meʻa ne nau fili ke faí. Palani ha taimi he kahaʻú te nau lava ʻo vahevahe ai e ngaahi aʻusia ne nau maʻu ʻi he ako fekauʻaki mo e Fakamoʻuí.
Kole ki he kau finemuí ke fakahoa ha meʻa ne hoko lolotonga e ngaahi houa fakaʻosi he moʻui ʻa e Fakamoʻuí mo e folofola fakafekauʻaki ʻi he Mātiu 26–28. Ko e hā ʻoku ako ʻe he kau finemuí kau ki he Fakamoʻuí mo ʻEne Fakaleleí mei he ngaahi meʻá ni? Fakaafeʻi ha kau mēmipa tokosiʻi ʻo e kalasí ke nau vahevahe ʻenau ongo kau ki he Fakamoʻuí.
Fakaafeʻi e finemui takitaha ke ne lau ha taha ʻo e ngaahi tefitoʻi moʻoni ʻo e Fakaleleí ʻi he lea ʻa Linda K. Burton “Kuo Tohi Koā ʻi Hotau Lotó ʻa e Tui ki he Fakalelei ʻa Sīsu Kalaisí ?” Kole ke ne kumi ha taha ʻi he kalasí naʻá ne lau ha tefitoʻi moʻoni tatau, pea fakaafeʻi ke na vahevahe e meʻa ne na akó mo vahevahe ha sīpinga mei heʻena moʻuí pe moʻui ʻa ha kakai ʻokú na ʻilo ʻoku hā ai e tefitoʻi moʻoni ko iá. Kole ki ha taha mei he hoa takitaha ke na vahevahe mo e toenga ʻo e kalasí e meʻa ne na aleaʻí.
ʻEke ki he kau finemuí pe ko e hā e meʻa ʻoku nau ako kau ki he Fakamoʻuí mo ʻEne Fakaleleí mei Heʻene folofola fakaʻosi ʻi he kolosí (vakai, Luke 23:34, 39–43, 46; Sione 19:26–30).
Fakaafeʻi e kau finemuí ke nau lau e 2 Nīfai 9:6–26 pe sio ha foʻi vitiōi ʻe taha pe lahi ange ʻi he lēsoni ko ʻení mo fakafanongo ki he ʻoku nau ako fekauʻaki mo ʻetau fie maʻu e Fakalelei ʻa Sīsū Kalaisí. ʻOange ha taimi ki ha kau finemui ke nau vahevahe ai e ngaahi potu folofola ne nau filí mo e meʻa ʻoku akoʻi mai aí. Fakalotolahiʻi kinautolu ke nau fai ha tohi ki ha taha ʻoku ʻikai tui ki he ʻOtuá pea fakaʻaongaʻi e ngaahi potu folofolá ni ke fakamatalaʻi ʻaki e ʻuhinga ʻoku mahuʻinga ai e Fakalelei ʻa e Fakamoʻuí pea mo e ʻuhinga ʻoku tau fie maʻu ai ha Fakamoʻuí. Kole ange ke nau fevahevaheʻaki ʻenau ʻū tohí.
Kole ki he kau finemuí ke nau hiki he palakipoé ha ngaahi ʻahiʻahi, faingataʻa, pe mahamahaki ʻoku fehangahangai mo e kakaí. Fakaafeʻi kinautolu ke nau lau ʻa e ʻAlamā 7:11 – 13 mo ha ngaahi konga naʻe filifili mei he lea ʻa Sisitā Carole M. Stephens “Ko e ʻEiki Faifakamoʻuí.” Ko e hā ʻoku ako ʻe he kau finemuí fekauʻaki mo e Fakaleleí mei he ngaahi maʻuʻanga tokoni ko ʻení? Te tau maʻu fēfē ʻa e mālohi ʻo e Fakaleleí, ke tokoniʻi kitautolu ʻi he taimi ʻo e faingataʻá? (vakai, Mōsaia 24:12–14). Kole ki he kau finemuí ke nau fakakaukau ki ha ngaahi founga ʻe lava ke nau vahevahe ai e meʻa kuo nau ako fekauʻaki mo e Fakaleleí ke tokoni ki he ngaahi faingataʻa ne nau hiki he palakipoé.

Kole ki he kau finemuí ke nau vahevahe e meʻa ne nau ako he ʻaho ní. ʻOku mahino lelei ange nai kiate kinautolu e Fakaleleí? Ko e hā ha ngaahi ongo pe fakakaukau ʻoku nau maʻu? ʻOku toe ʻi ai mo haʻanau ngaahi fehuʻi kehe? ʻE ʻaonga nai ke toe fakamoleki ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki nai ʻa e meʻa kuo nau ako he ʻaho ní. Hangē ko ʻení, ʻe lava ke nau:

Hiki ʻi heʻenau tohinoá e meʻa ʻoku nau ʻiló mo ʻenau ongo kau ki he Fakaleleí. ʻI he lolotonga e uiké, ʻe lava ke nau fakakaukau ki he anga hono tāpuekina ʻenau moʻuí ʻe he Fakaleleí pea tohi ʻenau ngaahi fakakaukaú ʻi heʻenau tohinoá.
Vahevahe e meʻa ne nau akó ki ha mēmipa ʻo e fāmilí pe ha kaungāmeʻa.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.