Ko e hā ‘oku mahuʻinga ai e ‘Uluaki Mata-Meʻa-Hā-Maí?

Naʻe hā mai ‘a e ‘Otua ko e Tamaí mo Hono ‘Alo ko Sīsū Kalaisí ki he Palōfita ko Siosefa Sāmitá ‘i he faʻahitaʻu failau ‘o e 1820. ‘Oku fakaʻilongaʻi ʻe he meʻa-hā-mai ko ‘ení e kamataʻanga ‘o Hono Toe Fakafoki Mai ‘o e Ongoongoleleí, ʻa ia ko e meʻa mahuʻinga taha ia kuo hoko talu e Toetuʻu ‘a Sīsū Kalaisí. Naʻe fakaiku e lotu ‘a Siosefa Sāmitá ‘i he loto-fakatōkilaló ki hono toe fakafoki mai ‘o e ngaahi moʻoni ‘o e ongoongoleleí, mafai ‘o e lakanga fakataulaʻeikí, mo e ngaahi ouau fakamoʻuí. “ʻOku hanga ʻe he foʻi fakahā ʻe taha ko iá ʻo tali kotoa [e ngaahi fehuʻi] fekauʻaki mo e ʻOtuá mo hono natula fakaʻotuá. ... ʻOku mahino ʻaupito ʻene tokanga ki he faʻahinga ʻo e tangatá ʻo fakafou ʻi he mafai ne foaki ki he tangatá. Naʻe fakapapauʻi heni ‘a e kahaʻu ‘o e ngāué. Naʻe fakamahinoʻi ‘e he ‘uluaki Mata-Meʻa-Hā-Maí ‘a e meʻá ni pea mo ha ngaahi moʻoni nāunauʻia kehe” (Ngaahi Akonaki ‘a e Kau Palesiteni ‘o e Siasí: Tēvita O. Makei [2003], 113).

Teuteuʻi fakalaumālie koe

Naʻe anga fēfē hoʻo maʻu ha fakamoʻoni naʻe mamata ‘a Siosefa Sāmita ki he Tamaí mo Hono ‘Alo ko Sīsū Kalaisí? Naʻe anga fēfē hano tāpuekina hoʻo moʻuí koeʻuhí ko e fakamoʻoni ko ‘ení? Ko e hā hono mahuʻinga kiate koe ʻo e ‘Uluaki Mata-Meʻa-Hā-Maí?‘E anga fēfē hano fakaloloto ange ‘e he ako ki he ‘Uluaki Mata-Meʻa-Hā-Maí e fakamoʻoni ‘a e finemui taki taha ‘i hoʻo kalasí? Te ke lava fēfē ‘o tokoni ke mahino ki he kau finemuí ʻa hono mahuʻinga ‘o e meʻa maʻongoʻonga ko ‘eni ne hokó?

Ako ‘i he faʻa lotu e ngaahi potufolofola mo e ngaahi maʻuʻanga tokoni ko ‘ení mo ha ngaahi meʻa kehe te ke fili ‘i hoʻo teuteú. Ko e hā ha meʻa ‘okú ke ongoʻi ‘e mahuʻingamālie taha ki he kau finemui ‘okú ke akoʻí?

Siosefa Sāmita—Hisitōlia 1:11–19, 24–25

Vitiō: “Ko e Fakafoki Mai ʻo e Ongoongoleleí”

Dieter F. Uchtdorf, “Ko e Ngaahi Fua ‘o e ‘Uluaki Mata-Meʻa-Hā-Mai,” Ensign pe Liahona, Mē 2005, 36–38

Faiako ‘i he founga ‘a e Fakamo‘uí

Naʻe fakaafeʻi ‘e he Fakamoʻuí Hono kau muimuí ke nau fakamoʻoniʻi ki he kakai kehé ‘a hono moʻoni ‘o ‘Ene ngaahi akonakí. ‘I heʻenau fai iá, naʻe ueʻi hake honau lotó ‘e he Laumālié. Te ke lava fēfē ‘o poupouʻi e kau finemuí ke nau fefakamoʻoniʻaki?

Fevahevaheʻaki ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasí takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ‘i heʻenau fakahoko ʻa e me‘a ne nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ai e kau finemuí ke nau fakatokangaʻi hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Filifili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

• Fakaʻaliʻali ha fakatātā ʻo e ʻUluaki Mata-Meʻa-Hā-Maí. Kole ki ha taha ‘i he kalasí ke ne fakamatalaʻi nounou ‘a e meʻa ‘oku hoko ‘i he fakatātaá. Fakaafeʻi e kau finemuí ke nau fakalaulauloto ‘i ha ngaahi miniti siʻi ki hono mahuʻinga ‘o e meʻa ko ‘ení naʻe hoko. Kole ange ke nau kumi ki ha ngaahi ‘ilo makehe ‘i he lolotonga e lēsoní ‘a ia ‘e tokoni ke mahino kiate kinautolu ‘a hono mahuʻinga ‘o e ‘Uluaki Mata-Meʻa-Hā-Maí.

• Mou hivaʻi fakakalasi ‘a e himi “Ko e Fua Lotu ‘a Siosefá” (Ngaahi Himi, fika 14). Fakaafeʻi e kau finemuí ke nau fakamatala ki he meʻa ʻoku nau ongoʻi ‘o kau kia Siosefa Sāmita mo ‘ene mamata mo fefolofolai mo e Tamaí mo Sīsū Kalaisí.

Ako fakataha

Vakai ki he ngaahi fakakaukau ki he akó mo e akoʻí .

‘E lava ke tokoni e ngaahi ʻekitivitī taki taha ʻi laló ke ako e kau finemuí ki he ki he ‘Uluaki Mata-Meʻa-Hā-Mai ‘a Siosefa Sāmitá. Muimui ki he fakahinohino ‘a e Laumālié, fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

• Fakaafeʻi e kau finemuí ke nau hiki ha ngaahi tāpuaki ‘e niʻihi kuo nau maʻu koeʻuhi ko e ‘Uluaki Mata-Meʻa-Hā-Maí. Kole ange ke nau kumi ki ha ngaahi tāpuaki kehe ‘o e ‘Uluaki Mata-Meʻa-Hā-Mai ‘i heʻenau lau ‘a e palakalafi ‘e 10 fakaʻosi ‘o e lea ‘a Palesiteni Tietā F. ‘Ukitofa “Ko e Ngaahi Fua ‘o e ‘Uluaki Mata-Meʻa-Hā-Mai.” Fakaafeʻi ke nau vahevahe ha meʻa naʻa nau ‘ilo mo ‘enau ongoʻi ‘o kau ki hono mahuʻinga ‘o e ‘Uluaki Mata-Meʻa-Hā-Maí.

• Mou lau fakataha ‘i he kalasí ‘a e ‘Uluaki Mata-Meʻa-Hā-Maí ‘a Siosefa Sāmitá ‘i he Siosefa Sāmita—Hisitōliá 1:7–20. Fakaafeʻi e kau finemuí ke nau kumi ki he ngaahi moʻoni te tau lava ‘o ako mei he meʻa naʻe hoko kia Siosefá (hangē ko ‘ení, ‘oku moʻoni e Tamaí mo e ‘Aló pea ʻokú Na māvahevahe: ‘oku ʻi ai moʻoni ‘a Sētane mo hono mālohi, ka ‘oku lahi ange ‘a e mālohi e ʻOtuá, pea ‘oku ‘afioʻi mo tali mai ‘e he Otuá ‘a e ngaahi lotú; pea kuo ‘ikai ke ngata ‘a e maʻu fakahaá). Fakaafeʻi ha finemui ke ne hiki ‘a e ngaahi moʻoní ‘i he palakipoé. ‘Oku fēfē ‘a e kehe e ngaahi moʻoni ko ‘ení mei he ngaahi meʻa ‘oku tui ki ai e ngaahi tui fakalotu kehé? ‘E fēfē ha kehe ‘etau moʻuí kapau naʻe ‘ikai ke tau ‘iloʻi ‘a e ngaahi meʻá ni?

• Fakaafeʻi e kau finemuí ke nau lau fakalongolongo pea fakalaulauloto ki he ‘Uluaki Mata Meʻa-Hā- Mai ‘a Siosefa Sāmitá mo ‘ene fakamoʻoní ‘i he Siosefa Sāmita—Hisitōlia 1:11–19, 24–25 (pe sio ‘i he foʻi vitiō ko e “Ko e Fakafoki Mai ʻo e Ongoongoleleí”). Kole ange ke nau fakakaukau ki he ‘uhinga ‘oku mahuʻinga ai e ʻUluaki Mata-Meʻa-Hā-Maí ‘i he hisitōlia ‘o e māmaní. Ko e hā e ‘uhinga ‘oku mahuʻinga fakafoʻituitui ai ia kiate kitautolú? Fai hoʻo fakamoʻoni ki hono mahuʻinga ‘o e ‘Uluaki Mata-Meʻa-Hā-Maí pea fakaafeʻi e kau finemuí ke nau fakamatalaʻi ʻenau ngaahi fakakaukaú mo fai ‘enau fakamoʻoní.

• Fakaafeʻi e kau finemuí ke nau lau ‘a e ngaahi fakamatala ‘i he folofolá ‘oku kau ki ha hā mai ‘a e ‘Otua ko e Tamaí mo Sīsū Kalaisi ki he kakai ‘o e māmaní (hangē ko e Mātiu 3:13–17; Ngāue 7:54–60; 3 Nīfai 11:3–10). Te ke lava foki ʻo fakaʻaliʻali ‘a e ngaahi fakatātā ‘o e ngaahi meʻa ko ‘ení (vakai, Tohi Fakatātā ‘o e Ongoongoleleí,35, 63, mo e 82). Kole ange ke nau fakamatalaʻi fakanounou ‘a e fakamatalá taki taha. Hili ia pea fakaafeʻi ke nau lau ‘a e Siosefa Sāmita Hisitōliá 1:17 (vakai, Tohi Fakatātā ‘o e Ongoongoleleí90). ‘Oku anga fēfē e faitatau ‘a e ‘Uluaki Mata-Meʻa-Hā-Mai ‘a Siosefa Sāmitá mo e ngaahi mata-meʻa-hā-mai kehe mai ko ‘ení? Naʻe anga fēfē ‘ene makehé? Fakaafeʻi e kau finemuí ke nau fakamatala ki hono ‘uhinga ‘oku mahuʻinga ai kiate kinautolú ‘a e ‘Uluaki Mata-Meʻa-Hā-Maí.

Kole ki he kau finemuí ke nau fakamatalaʻi e meʻa ne nau ako ‘i he ‘aho ní. ‘Oku mahino lelei ange nai kiate kinautolu ‘a e ‘Uluaki Mata-Meʻa-Hā-Mai ‘a Siosefa Sāmitá? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he tokāteline ko ‘ení?

Tokoni fakafaiako

“Fehuʻi ki hoʻo kau akó pe ko e hā ‘enau fakamatalá kapau ‘e fie ‘ilo ha taha ki he meʻa kuo nau ako mei he lēsoní” (ʻOku ‘Ikai ha Ui ‘e Mahu’inga Ange ‘i he Faiakó [1999], 111).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau akó. Hangē ko ‘ení, te nau lava ‘o:

• Hiki ‘enau fakamoʻoni ki he ‘Uluaki Mata-Meʻa-Hā-Mai ‘a Siosefa Sāmitá ‘i heʻenau tohinoá.

• Fai ‘enau fakamoʻoni ki he ‘Uluaki Mata-Meʻa-Hā-Mai ki honau fāmilí.

Fakamatalaʻi ki he kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike ka hoko maí.