Ko e hā e fatongia ‘o Siosefa Sāmita ‘i hono Toe Fakafoki Mai ‘o e Ongoongoleleí?

Naʻe toe fakafoki mai ‘e he ‘Eikí ‘a Hono Siasí mo hono kakato ‘o e ongoongoleleí ‘i he Palōfita ko Siosefa Sāmitá, hili ha ngaahi senituli ‘o e hē mei he moʻoní. Naʻe kamata Hono Toe Fakafoki Mai ‘o e Ongoongolelei ko ‘ení ‘i he ‘Uluaki Mata-Meʻa-Hā-Mai ‘a Siosefá ‘a ia naʻe hā mai ai e Tamai Hēvaní mo Sīsū Kalaisí. Naʻe ‘omai ‘e he ‘Eikí ‘i he Palōfita ko Siosefa Sāmitá e Tohi ‘a Molomoná mo ha ngaahi folofola kehe, toe fakafoki mai mo e mafai ‘o e lakanga fakataulaʻeikí, pea fokotuʻu mo Hono Siasí.

Teuteuʻi fakalaumālie koe

Kuo tāpuekina fēfē hoʻo moʻuí ‘e he ngaahi moʻoni kuo toe fakafoki mai ‘ia Siosefa Sāmitá? Naʻá ke maʻu fēfē hoʻo fakamoʻoni kia Siosefa Sāmitá? Te ke poupouʻi fēfē e kau finemuí ke nau maʻu haʻanau fakamoʻoni ‘iate kinautolu pē?

‘E fakaloloto ange fēfē e fakamoʻoni ‘a e finemui takitaha ‘i hoʻo kalasí ʻi heʻenau ako ki he moʻui, fakamoʻoni, mo e feilaulau ‘a Siosefa Sāmitá? ‘Oku tokoni fēfē ʻete fanongo ki he fakamoʻoni ‘a e niʻihi kehé?

ʻI hoʻo teuteú, ako ‘i he faʻa lotu e ngaahi potufolofola mo e ngaahi maʻuʻanga tokoni ko ‘ení. Ko e hā ha meʻa ‘okú ke ongoʻi ‘e mahuʻingamālie taha ki he kau finemui ‘okú ke akoʻí?

T&F 35:17–18 (Naʻe toe fakafoki mai ‘e he ‘Eikí e kakato ʻo e ongoongoleleí ‘i he Palōfita ko Siosefa Sāmitá)

T&F 76:22–24 (Ko e fakamoʻoni ‘a Siosefa Sāmita kia Sīsū Kalaisí)

T&F 135:3 (Naʻe foaki mai ‘e he ‘Eikí ha toe folofola kehe ʻo fakafou mai ‘i he Palōfita ko Siosefa Sāmitá)

Siosefa Sāmita—Hisitōlia 1:1–25 (Naʻe hā ‘a e ‘Otua ko e Tamaí mo Sīsū Kalaisi kia Siosefa Sāmita ko e tali ki heʻene lotú)

Craig C. Christensen, ““Te u Fokotuʻu Hake Ha Tangata Kikite Mahuʻinga”,” Ensign pe Liahona, Nōvema 2016, 27–30

Neil L. Andersen, “ʻOku ʻIkai Hokonoa ʻa e Tuí, ka ʻi hoʻo Fili Ki ai,” Ensign pe Liahona, Nōvema. 2015, 65–68

Neil L. Andersen, “Siosefa Sāmita,” Ensign pe Liahona, Nōvema 2014, 28–31

“Ko Hono Toe Fakafoki Mai ‘o e Ongoongolelei ‘o Sīsū Kalaisí ‘ia Siosefa Sāmitá,” Malangaʻaki ‘Eku Ongoongoleleí (2004), 41–43

“Siosefa Sāmita,” Tuʻu Maʻu ‘i he Tuí (2004), 180–81

Vitiō:“Siosefa Sāmita: Ko e Palōfita ʻo e Ongoongolelei Kuo Toe Fakafoki Maí,”

12:50

“ʻOku Mau Fakamālō,” Ngaahi Himí, fika 16

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e meʻa ne nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakaafeʻi e kau finemuí ʻi ha uike ʻe ua pe tolu kimuʻa he kalasí, ke nau tali e tukupā ʻa ʻEletā Niila L. ʻEnitasoní: “Maʻu ha fakamoʻoni fakatāutaha ki he Palōfita ko Siosefa Sāmitá. Tuku ke tokoni ho leʻó ki hono fakahoko e lea fakakikite ʻa Molonaí ʻo lea lelei fekauʻaki mo e Palōfitá.” Poupouʻi e kau finemuí ke nau muimui ki he faleʻi ʻa ʻEletā ʻEnitasoní ke vahevahe e ngaahi potufolofola ʻi he Tohi ʻa Molomoná ki honau kaungāmeʻá mo e fāmilí “mo fakahaaʻi naʻe hoko ʻa Siosefa ko ha meʻangāue ʻi he toʻukupu ʻo e ʻOtuá,” pea lau e fakamoʻoni ʻa e Palōfitá. (Vakai, “Siosefa Sāmita,” Ensign pe Liahona, Nōvema 2014, 30.) ʻI he kamataʻanga ʻo e kalasí, kole ange ke nau vahevahe atu e ngaahi potufolofola ne nau filí pea mo ha faʻahinga ongo ne nau maʻu ʻi heʻenau lau e fakamoʻoni ʻa Siosefa Sāmitá.
Hiki ‘i he palakipoé ‘a e, “ʻOku mahuʻinga ‘a Siosefa Sāmitá, koeʻuhí __________.” Fakaafeʻi e kau finemuí ke nau fakafonu ‘a e lainé. Kole ki he kau finemuí ‘i he ‘osi ‘a e kalasí ke nau toe fakafonu ‘a e lainé ‘aki ha meʻa naʻa nau ako mei he lēsoní.

Ako fakataha

‘E lava ke tokoni e ngaahi ʻekitivitī takitaha ʻi laló ki he kau finemuí ke nau ako fekauʻaki mo e misiona fakalangi ‘o Siosefa Sāmitá. Muimui ki he ueʻi ‘a e Laumālié, ʻo fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

Fakaafeʻi e kau finemuí ke lau e lea ʻa ʻEletā Craig C. Christensen ““Te u Fokotuʻu Hake Ha Tangata Kikite Mahuʻinga”,” ʻo kumi ha ngaahi tāpuaki ʻoku tau maʻu koeʻuhi ko e Palōfita ko Siosefa Sāmitá. Kole ke nau hiki he palakipoé e meʻa ʻoku nau ʻiló. Ko e hā ha ngaahi tāpuaki kehe ʻoku pehē ʻe he kau finemuí ʻoku tau maʻu koeʻuhí ko Siosefa Sāmita? Fakakaukau ke vahevahe ʻa e founga ne tupulaki ai hoʻo fakamoʻoni kia Siosefa Sāmitá mo e founga ne tāpuekina ai hoʻo moʻuí ʻe hono Toe Fakafoki Mai ʻo e ongoongoleleí.
Fakaafeʻi e finemui takitaha ke hiki ha lisi ‘o e ngaahi meʻa naʻá ne ako ʻi heʻene lau fekauʻaki mo Siosefa Sāmitá ʻi he Tuʻu Maʻu ‘i he Tuí (peesi 180–81) pe Tokāteline mo e Ngaahi Fuakava 135:3. Kole ki he finemui takitaha ke vahevahe ha meʻa ‘e taha mei heʻene lisí mo fakamatalaʻi e ‘uhinga ‘oku mahuʻingamālie ai ia kiate iá.
Hivaʻi fakakalasi ha himi fekauʻaki mo Siosefa Sāmita (fakaʻaongaʻi ‘a e ngaahi kaveinga ‘a ia ‘oku ‘i mui ‘i he tohi himí ke kumi ha himi). Ko e hā ha meʻa ‘oku akoʻi ‘e he himi ko ‘ení ki he kau finemuí ‘o kau kia Siosefa Sāmita mo hono Toe Fakafoki Mai ‘o e Ongoongoleleí? Tuku ke vahevahe ʻe he kau mēmipa ʻo e kalasí ʻenau ngaahi ongó mo ‘enau fakamoʻoni ki he Palōfitá.
Fakaafeʻi e kau finemuí ke nau lau ‘a e fakamatala ki he ‘Uluaki Mata-Meʻa-Hā-Mai ‘a Siosefa Sāmitá ‘i he Siosefa Sāmita—Hisitōlia 1:7–25, pea kumi ki he ngaahi moʻoni ‘o e ongoongoleleí te nau maʻu ‘i he fakamatalá (hangē ko e ngaahi moʻoni fekauʻaki mo e natula ‘o e ‘Otuá, ko e mālohi ‘o e lotú, pe ko e Hē Fakaʻaufuli mei he Moʻoní). ‘Oku uesia fēfē ʻe he ngaahi moʻoni ko ʻení ‘etau moʻuí?
Kole ki he kau finemuí ke nau fakakaukauloto ‘oku fehuʻi ange ʻe ha kaungāmeʻa siasi kehe kiate kinautolu ʻo pehē, “Ko e hā ‘oku mahuʻinga ai ‘a Siosefa Sāmita ‘i homou Siasí?” Fakaafeʻi kinautolu ke nau kumi ha ngaahi tali ki he fehuʻi ko ʻení ʻi he vitiō “Siosefa Sāmita: Ko e Palōfita ʻo e Ongoongolelei Kuo Toe Fakafoki Maí” pe ʻi he lea ʻa ʻEletā Loueni E. Kolopilisi “Ko e Palōfita ko Siosefa Sāmitá.” Te ke toe lava foki ʻo lau e vahe ʻoku fakahingoa “Ngaahi Fehuʻi Angatonu” mei he lea ʻo ʻEletā Neil L. Andersen “ʻOku ʻIkai Hokonoa ʻa e Tuí, ka ʻi hoʻo Fili Ki ai” ke tokoni kiate kinautolu ke nau ako ʻa e founga te nau lava ai ʻo tali ha fakaanga ʻo kau kia Siosefa Sāmita.

12:50
Fakaʻaliʻali ha ngaahi fakatātā ‘o ha ngaahi meʻa naʻe hoko ‘i he moʻui ‘a Siosefa Sāmitá (vakai, Tohi Fakatātā ‘o e Ongoongoleleí, 89–97). Kole ki he kau finemuí ke nau fakamatalaʻi e ngaahi meʻa ‘oku fakaʻaliʻali mai ‘i he fakatātaá. Kapau ʻe faingamālie, tokoniʻi kinautolu ke nau kumi e ngaahi potufolofola ‘oku nau fakamatalaʻi e meʻa ‘oku hokó (‘oku fokotuʻu atu ha ngaahi potufolofola ‘e lava ‘o ngāue ʻaki ‘i he kamataʻanga ‘o e Tohi Fakatātā ‘o e Ongoongoleleí). Fakaafeʻi ha niʻihi ke nau vahevahe ‘enau fakamoʻoni kia Siosefa Sāmitá.

Kole ki he kau finemuí ke nau vahevahe ha meʻa naʻa nau ako ‘i he ‘ahó ni. ‘Oku mahino nai kiate kinautolu ‘a e fatongia ‘o Siosefa Sāmita ‘i hono Toe Fakafoki Mai ‘o e Ongoongoleleí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ki he tokāteline ko ‘ení?

Moʻui ʻaki e meʻa ʻoku tau akó

Fakaafeʻi ‘a e kau finemuí ke nau fakakaukau ki ha founga te nau moʻui ‘aki ai ‘a e meʻa kuo nau ako ‘i he ‘aho ní? Hangē ko ‘ení, te nau lava ‘o:

Hiki ‘enau fakamoʻoni kia Siosefa Sāmitá ‘i heʻenau tohinoá.
Fai ‘enau fakamoʻoní ki honau fāmilí.

Fakamatalaʻi ki he kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.