Naʻe toe fakafoki fēfē mai ʻa e lakanga fakataulaʻeikí?

Naʻe toe fakafoki mai e lakanga fakataulaʻeikí kia Siosefa Sāmita ‘i hono hilifaki ia ʻe kinautolu naʻa nau maʻu ia ‘i he kuonga muʻá. Naʻe toe fakafoki mai ‘e Sione ko e Papitaisó ‘a e Lakanga Taulaʻeiki Faka-‘Ēloné, ‘i Mē 1828, pea hili ha taimi siʻi mei ai, ne toe fakafoki mai e Lakanga Taulaʻeiki Faka-Melekisētekí ‘e Pita, Sēmisi, mo Sione, ‘a ia ko e toko tolu ‘o e ‘uluaki kau ‘Aposetolo ‘a e Fakamoʻuí. Naʻe toe fakafoki mai ‘e Mōsese, ‘Ilaisiā mo ‘Ilaiase ha toe ngaahi kī kehe ‘o e lakanga fakataulaʻeikí ‘i he ‘aho 3 ‘o ‘Epeleli 1836.

Teuteuʻi fakalaumālie koe

‘Oku makehe fēfē e Kāingalotú ʻi hono lau ʻoku tau maʻu e mafai ‘o e lakanga fakataulaʻeikí? Kuo tāpuekina fēfē hoʻo moʻuí ‘e he lakanga fakataulaʻeikí?

Ko e hā ha meʻa kuo ‘osi ‘ilo ‘e he kau finemuí kau ki hono toe fakafoki mai ‘o e lakanga fakataulaʻeikí? Te ke tokoni fēfē nai ke mahino kiate kinautolu ‘a e ngaahi tāpuaki kuo nau maʻu tuʻunga ‘i hono toe fakafoki mai ‘o e lakanga fakataulaʻeikí?

ʻI hoʻo teuteú, ako ‘i he faʻa lotu e ngaahi potufolofola mo e ngaahi maʻuʻanga tokoni ko ‘ení. Ko e hā nai ha ngaahi meʻa ‘okú ke ongoʻi ke vahevahe ki he kau finemuí?

Hepelū 5:4 (Kuo pau ke uiuiʻi ʻa e tangatá ʻe he ʻOtuá ke ne maʻu e lakanga fakataulaʻeikí)

T&F 2 (ʻE fakahā mai ʻe ʻIlaisiā ʻa e lakanga fakataulaʻeikí; ʻoku fakatō ki he loto ʻo e fānaú e ngaahi talaʻofa ʻa e ngaahi tamaí)

T&F 13; Siosefa Sāmita—Hisitōlia 1:66–72 (Naʻe toe fakafoki mai ‘e Sione Papitaiso ‘a e Lakanga Taulaʻeiki Faka-‘Ēloné)

T&F 27:12–13 (Naʻe toe fakafoki mai ‘e Pita, Sēmisi, mo Sione ‘a e Lakanga Taulaʻeiki Faka-Melekisētekí)

T&F 110:13–16 (ʻOku foki mai ʻa ʻIlaisiā ʻo tuku mai e ngaahi kī ʻo e kuonga ko ʻení ʻo hangē ko e palōmesi ʻa Malakaí)

Ngaahi Tefito ‘o e Tuí 1:5 (‘Oku foaki ‘a e lakanga fakataulaʻeikí ‘i he hilifaki ‘o e nima ‘e ha taha ‘okú ne maʻu ‘a e mafaí)

Vitiō: “Ko Hono Toe Fakafoki Mai ʻo e Lakanga Fakataulaʻeikí”

Faiako ‘i he founga ‘a e Fakamo‘uí

Naʻe akoʻi ‘e he Fakamoʻuí Hono kau muimuí ʻaki hono tokoniʻi kinautolu ke nau sio ki he ngaahi sīpinga ‘o ‘Ene akonakí ‘i heʻenau moʻui fakaʻahó. Naʻá Ne fakaʻaongaʻi ha ngaahi talanoa faingofua, talanoa fakatātā, mo e ngaahi sīpinga moʻoni ‘o e ngaahi meʻa ‘oku hoko ‘i he moʻuí ‘a ia naʻe mahuʻingamālie kiate kinautolú. Te ke fakaʻaongaʻi fēfē ha ngaahi sīpinga ke akoʻi ki he kau finemuí ‘a hono toe fakafoki mai ‘o e lakanga fakataulaʻeikí mo e founga e ngāue ‘a e lakanga fakataulaʻeikí ‘i heʻenau moʻuí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi kuo nau aʻusia ʻi heʻenau fakahoko ʻa e meʻa ne nau nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ai e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Filifili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki ‘a e lēsoni ‘o e uike ní:

• Fakaʻaliʻali ki he kau finemuí ha fakatātā ‘o hono fakanofo ‘e Mōsese ‘a ‘Ēloné (vakai ki he Tohi Fakatātā ‘o e Ongoongoleleí, 15) mo e fakatātā ‘o ha talavou ‘oku fakanofo ki he lakanga fakataulaʻeikí (vakai, Tohi Fakatātā ‘o e Ongoongoleleí, 106)? Ko e hā ha ngaahi meʻa ‘oku nau sio ‘oku faitatau ai ‘a e ongo fakatātā ko ‘ení? Ko e hā ha ngaahi moʻoni ‘o e ongoongoleleí ‘okú ne fakafōtunga maí?

• Fakaafeʻi e kau finemuí ke nau vahevahe ha meʻa ‘oku nau ‘iloʻi ‘o kau ki he anga hono toe fakafoki mai ‘o e lakanga fakataulaʻeikí. Kuo tāpuekina fēfē ʻe he lakanga fakataulaʻeikí ʻa ʻenau moʻuí?

Ako fakataha

Vakai ki he ngaahi fakakaukau ki he akó mo e akoʻí .

‘E lava ke tokoni e ngaahi ‘ekitivitī taki taha ‘i laló ke ako e kau finemuí ki hono toe fakafoki mai ‘o e lakanga fakataulaʻeikí. Muimui ki he fakahinohino ‘a e Laumālié, fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

• Hiki ʻi he palakipoé ha ngaahi potufolofola ‘oku kau ki he founga mo hono ‘uhinga ‘o hono toe fakafoki mai ‘o e lakanga fakataulaʻeikí (hangē ko e T&F 13; 27:12–13; Siosefa Sāmita—Hisitōlia 1:66–72; Ngaahi Tefito ‘o e Tuí 1:5). Fakaafeʻi e kau finemuí ke nau lau fakafoʻituitui pe ʻi ha fanga kiʻi kulupu iiki ‘a e ngaahi potufolofolá, pea nau hiki ‘i he palakipoé hano fakamatalaʻi fakanounou ‘o e potufolofola takitaha. Ko e hā ha meʻa ‘oku akoʻi ‘e he ngaahi potufolofola ko ‘ení ki he kau finemuí ‘o kau ki hono toe fakafoki mai ‘o e lakanga fakataulaʻeikí? Kuo anga fēfē hano tokoniʻi ‘enau moʻuí ʻi hono toe fakafoki mai ‘o e lakanga fakataulaʻeikí?

• Vahevahe ‘a e malanga ‘a ‘Eletā Sefilī R. Hōlaní “ Ko Hotau ‘Ulungaanga Makehe Tahá ” ‘i he kau finemuí. Kole ki he kau finemuí ke nau fakatotolo ‘i heʻenau konga ‘o e malangá ‘o kumi ha ngaahi tali ki he fehuʻi “ʻOku anga fēfē hono foaki ‘o e lakanga fakataulaʻeikí?” mo e “Ko e hā e ‘uhinga ‘oku foaki ai e lakanga fakataulaʻeikí ‘i he foungá ni?” Fakaafeʻi e kau finemuí ke nau lau ‘a e Hepelū 5:4 mo e Ngaahi Tefito ‘o e Tuí 1:5 ke hoko ko ha konga ‘o e fealēleaʻaki ko ‘ení. Ko e hā nai e ‘uhinga ‘oku mahuʻinga ai ki he kau finemuí ke nau ‘ilo ki hono toe fakafoki mai ‘o e lakanga fakataulaʻeikí?

• Fakaʻaliʻali ha ngaahi fakatātā ‘oku hā ai ha ngaahi meʻa naʻe hoko ‘i hono toe fakafoki mai ‘o e lakanga fakataulaʻeikí (vakai ki he Tohi Fakatātā ‘o e Ongoongoleleí 93–95), pe sio ‘i he foʻi vitiō “Ko Hono Toe Fakafoki Mai ʻo e Lakanga Fakataulaʻeikí.” Kole ki he kau finemuí ke nau fakahā mai ha kakai mahuʻinga naʻa nau kau ‘i he ngaahi meʻa ko ‘ení (hangē ko Siosefa Sāmitá, Sione ko e Papitaiso, mo ‘Ilaisiā) pea nau lau ‘a e ngaahi potufolofola ‘oku kau ki he ngaahi meʻa naʻe hoko ko iá (hangē ko e ngaahi potufolofola ko ia ‘oku fokotuʻu atu ‘i he fokotuʻutuʻu ko ʻení). Fakaafeʻi e kau finemuí ke nau aleaʻi e founga ʻe lava ke tāpuekina ai ‘e hono toe fakafoki mai ‘o e lakanga fakataulaʻeikí ‘a ‘enau moʻuí ‘i he taimí ni mo e kahaʻú. ‘Oku anga fēfē hano tāpuekina ‘e he lakanga fakataulaʻeikí ‘a e kakai fefiné mo e ngaahi faʻeé?

• ʻI hano fakangofua ʻe he pīsopé, fakaafeʻi mai ‘a e tamai ‘a ha taha ‘o e kau finemuí pea ko ha tokotaha maʻu lakanga fakataulaʻeiki kehe ke ‘aʻahi mai ki he kalasí ‘o fakamatala ki he laine ‘o hono mafai ‘i he lakanga fakataulaʻeikí ki he kau finemuí, mo fakamatalaʻi hono ‘uhinga e laine ‘o e mafaí. Ko e hā ha meʻa ‘oku akoʻi ʻe he laine ‘o e mafaí ki he kau finemuí ‘o kau ki hono toe fakafoki mai ‘o e lakanga fakataulaʻeikí? Fai hoʻo fakamoʻoni ki hono toe fakafoki mai ‘o e lakanga fakataulaʻeikí pea fakaafeʻi e kau finemuí ke fai ‘enau fakamoʻoní.

Kole ki he kau finemuí ke nau vahevahe ha meʻa naʻa nau ako ‘i he ‘ahó ni. ‘Oku mahino nai kiate kinautolu ‘a hono toe fakafoki mai ‘o e lakanga fakataulaʻeikí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ke ako ki he tokāteline ko ‘ení?

Tokoni fakafaiako

“Kapau ‘oku fie tali pe fakamatala ha niʻihi tokolahi fekauʻaki mo ha taumuʻa, te ke lava ‘o pehē ange, ʻTe tau ‘uluaki fanongo ki hoʻo talí pea toki hoko mai koe.’ ‘E maau leva ho‘o kau akó he ‘oku nau ‘iloʻi te nau maʻu ha faingamālie ke lea ai” (ʻOku ‘Ikai ha Ui ‘e Mahuʻinga Ange ‘i he Faiakó [2000], 76-77).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau ki ha founga te nau moʻui ‘aki ai ‘a e meʻa kuo nau ako ‘i he ‘aho ní. Hangē ko ‘ení, te nau lava ‘o:

• Talanoa ki hanau kaungāmeʻa pe mēmipa ‘o honau fāmilí ‘okú ne maʻu ‘a e lakanga fakataulaʻeikí ‘o ʻeke ki ai ‘o kau ki he meʻa naʻá ne aʻusia ‘i heʻene maʻu ‘a e lakanga fakataulaʻeikí.

• Kole ke ne akoʻi ha lēsoni efiafi fakafāmili ‘i ‘api ‘o kau ki hono toe fakafoki mai ‘o e lakanga fakataulaʻeikí.

Fakamatalaʻi ki he kau finemuí ʻa e meʻa te nau ako ki ai he uike kahaʻú. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.