Ko e hā ‘oku tau fie maʻu ai e Tohi ‘a Molomoná?

Naʻe tohi e Tohi ʻa Molomoná maʻa hotau kuongá. ‘Oku fakamoʻoni ia kia Sīsū Kalaisi, pea ‘oku maʻu ai honokakato ‘o ‘Ene ongoongoleleí, pea fakafoki mai ai mo e ngaahi moʻoni naʻe mole ‘i he Hē Mei he Moʻoní. Naʻe akoʻi ‘e Siosefa Sāmita ko e Tohi ‘a Molomoná “ko e maka-tuʻu-loto ia ‘o ‘etau tui fakalotú, pea ‘e ofi ange ha tangata ki he ‘Otuá ‘i haʻane tauhi ki hono ngaahi akonakí, ‘i ha toe tohi kehe”(talateu ki he Tohi ‘a Molomoná).

Teuteuʻi fakalaumālie koe

Fakakaukau ki he ngaahi meʻa ‘okú ke ongoʻi ‘o kau ki he Tohi ‘a Molomoná. Kuo anga fēfē haʻane ‘omi koe ke ke ofi ange kia Sīsū Kalaisi? Naʻe anga fēfē hono maʻu hoʻo fakamoʻoni ki he Tohi ‘a Molomoná? Kuo tokoniʻi fēfē ʻe he ʻilo ko ʻení ʻa hoʻo moʻuí?

Fakakaukau ki he kau finemui ‘i hoʻo kalasí. Ko e hā ha ngaahi meʻa kuo nau aʻusia ‘i he Tohi ‘a Molomoná? ‘E founga fēfē hano ‘omi ‘e ha fakamoʻoni ki hono moʻoní ha ivi kiate kinautolu ‘i heʻenau kei finemuí mo honau kahaʻú?

Ako ‘i he faʻa lotu e ngaahi potufolofola mo e ngaahi maʻuʻanga tokoni ko ‘ení ʻi hoʻo teuteú. Ko e hā ha meʻa te ke lava ‘o fakaʻaongaʻi ke tokoni ke ako lahi ange e kau finemuí ki he Tohi ‘a Molomoná?

1 Nīfai 13:40; 2 Nīfai 3:12; Ko e Ngaahi Tefito ‘o e Tuí 1:8 (‘Oku poupouʻi ‘e he Tohi ‘a Molomoná ‘a e Tohi Tapú, toe fakafoki mai e ngaahi moʻoni mahuʻingá mo veuveuki e ngaahi tokāteline halá)

2 Nīfai 25:23, 26; 33:10–11 (‘Oku fakamoʻoni ‘a e kau tangata tohi ‘o e Tohi ‘a Molomoná kia Sīsū Kalaisi)

2 Nīfai 29:7–11 (‘Oku fakahaaʻi ‘e he Tohi ‘a Molomoná ‘oku folofola ‘a e ‘Otuá ki Heʻene fānaú ‘i ha ngaahi puleʻanga kehekehe)

T&F 20:8–16 (‘Oku ‘i he Tohi ‘a Molomoná ‘a hono kakato ‘o e ongoongolelei ‘a Sīsū Kalaisí)

Thomas S. Monson, “Ko e Mālohi ʻo e Tohi ʻa Molomoná,” Ensign pe Liahona, Mē 2017, 86–87

Ko e peesi talamuʻaki mo e talateu ki he Tohi ‘a Molomoná.

Gary E. Stevenson, “Tafoki ki he Tohí, Tafoki ki he ʻEikí,” Ensign pe Liahona, Nōvema 2016, 44–47

LeGrand R. Curtis Jr., “ ʻOku ʻi ai e Mālohi ʻi he Tohí,” Ensign pe Liahona, Nōvema 2016, 68–71

Kevin W. Pearson, “Nofo Maʻu ʻi he Fuʻu ʻAkaú,” Ensign pe Liahona, Mē 2015, 114–16

“Ko e Vaʻa Ukameá,” Ngaahi Himí, fika 172

Faiako ‘i he founga ‘a e Fakamo‘uí

Naʻe fakamoʻoniʻi ‘e he Fakamoʻuí ‘a e moʻoní peá Ne fakaafeʻi Hono kau muimuí ke nau fai ‘a e meʻa tatau. Naʻá Ne ngāue ʻaki ʻa e lea hangatonu mo mahinongofua koeʻuhí ke fakamoʻoniʻi ‘e he Laumālié ‘a e moʻoní. ‘E anga-fēfē hano tokoniʻi ‘e hoʻo fakamoʻoní ‘a e kau finemuí ke mahino kiate kinautolu hono mahuʻinga ‘o e Tohi ‘a Molomoná ‘i heʻenau moʻuí mo fakamālohia ‘enau fakamoʻoni ki hono moʻoni ‘o e ngaahi moʻoni ‘oku maʻu aí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi meʻa kuo nau aʻusia ʻi heʻenau fakahoko ʻa e ngaahi meʻa ne nau ako ʻi he lēsoni ʻo e uike kuo ʻosí. ʻE poupouʻi heni ʻa e ului fakatāutahá mo tokoniʻi ai e kau finemuí ke nau vakai ki hono mahuʻinga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Filifili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki ‘a e lēsoni ‘o e uike ní:

Tā pe langa mo hoʻo kalasí ha ʻāleso ʻoku ʻasi hono maka-tuʻu-lotó (vakai e lea ʻa ʻEletā Gary E. Stevenson “Tafoki ki he Tohí, Tafoki ki he ʻEikí”). Kole ki he kau finemuí ke fekumi ʻi he lea ʻa ʻEletā Stevenson ʻa e ʻuhinga ʻoku hoko ai e Tohi ʻa Molomoná ko e maka-tuʻu-loto ʻo ʻetau tui fakalotú.
Kole ki he kau finemuí ke nau fakakaukau ki ha ngaahi fehuʻi ‘a honau ngaahi kaungāmeʻá ‘o kau ki he Tohi ‘a Molomoná. ‘E founga fēfē nai haʻanau tali iá? Fakakaukau ke mou toe foki ki he ‘ekitivitī ko ‘ení ‘i he ngataʻanga ‘o e kalasí, ke vakai pe ko e hā ha meʻa te nau toe tānaki atu ki heʻenau ngaahi talí.

Ako fakataha

‘E lava ke tokoni e ngaahi ʻekitivitī taki taha ʻi laló ke ako e kau finemuí ki hono mahuʻinga ‘o e Tohi ‘a Molomoná. Muimui ki he fakahinohino ‘a e Laumālié, fili ha ʻekitivitī ‘e taha pe lahi ange ‘e ‘aonga taha ki hoʻo kalasí:

Fakaafeʻi e kau finemuí ke nau talaatu ha ngaahi meʻa ʻokú ne fakatupu ha mālohi, hangē ko e maká, senoleitá (generators), uinimilá (windmills), mo e sola pēnoló. Fakaafeʻi e kau finemuí ke nau lisi ha ngaahi founga ʻoku ʻomi ai ʻe he Tohi ʻa Molomoná ha mālohi ki heʻetau moʻuí. Kole ki he kau finemuí ke nau fekumi ʻi he lea ʻa Palesiteni Tōmasi S. Monisoni “Ko e Mālohi ʻo e Tohi ʻa Molomoná, ” ʻo kumi ki ha ngaahi fakakaukau te nau lava ʻo tānaki ki heʻenau lisí. ʻOange ha taimi ki he kau finemuí ke nau fakalaulauloto ki he founga te nau fakakau ai ʻa e tukupā ʻa Palesiteni Monisoni ke lau fakaʻaho ʻa e Tohi ʻa Molomoná. Kole ange ke nau vahevahe ʻenau fakakaukaú.
Fakaafeʻi e kau finemuí ke nau fili e ngaahi talanoa ʻoku nau manako ai mei he lea ʻa ʻEletā LeGrand R. Curtis Jr. “ ʻOku ʻi ai ha Mālohi ʻi he Tohí” ke fakahaaʻi ʻi ha kiʻi tohi fakatātā nounou. Ko e hā ha meʻa ʻi he ngaahi talanoa ko ʻení ʻokú ne ueʻi fakalaumālie ai kinautolu? Ko e ha ʻoku mahuʻinga ai ke vahevahe ʻa e Tohi ʻa Molomoná mo hotau ngaahi ʻofaʻangá? Fakakaukauʻi fakafoʻituitui pe fakakulupu, ha ngaahi founga ke vahevahe ai e Tohi ʻa Molomoná. Fakaafeʻi e kau finemuí ke hiki ʻenau fakamoʻoní ʻi ha tatau ʻo e Tohi ʻa Molomona te nau foakí.
Fakaafeʻi e kau finemuí ke fekumi ʻi he lea ʻa ʻEletā Gary E. Stevenson “Tafoki ki he Tohí, Tafoki ki he ʻEikí” pe lea ʻa ʻEletā Kevin W. Pearson “Nofo Maʻu ʻi he Fuʻu ʻAkaú,” ki ha ngaahi fakamatala kau ki he Tohi ʻa Molomoná pea mo e ʻuhinga ʻoku fuʻu mahuʻinga aí. Te ke lava pē ʻo fakaafeʻi e kau finemuí ke vahevahe ha ngaahi konga lea mei he ngaahi leá pe ngaahi folofola ʻoku manakoa ʻi he Tohi ʻa Molomoná. Te ke toe lava pē ʻo fakaʻaiʻai kinautolu ke tohiʻi hifo mo vahevahe ʻenau fakamoʻoni ki he Tohi ʻa Molomoná.
Fakaafeʻi e kau fiemuí ke nau kumi ‘i he ngaahi potufolofola ‘oku fokotuʻu atu ‘i he fokotuʻutuʻu ko ‘ení mo e peesi talamuʻaki ‘o e Tohi ‘a Molomoná, ke nau maʻu mei ai ‘a e ngaahi tali ki he fehuʻi ko ‘ení: “Ko e hā e ‘uhinga ‘oku tau fie maʻu ai e Tohi ‘a Molomoná?” Fai hoʻo fakamoʻoni ki he Tohi ‘a Molomoná. Fakaafeʻi e kau finemuí ke nau vahevahe ʻa e founga ne nau maʻu ai ‘enau fakamoʻoní.
Fehuʻi ki he kau finemuí pe ko e hā ha ‘uhinga ‘e hoko ai e kupuʻi lea “Ko ha Fakamoʻoni ‘e Taha ‘o Sīsū Kalaisí” ko ha toe hingoa (subtitile) lelei ki he Tohi ‘a Molomoná. Fakaafeʻi kinautolu ke nau fakahā atu ha potufolofola mei he Tohi ‘a Molomoná ‘a ia ‘okú ne akoʻi pe fakamoʻoniʻi ‘a Kalaisi (hangē ko e 1 Nīfai 10:4–6; Mōsaia 3:5–10; 3 Nīfai 11:7–11). Kuo fakamālohia fēfē ʻe he Tohi ʻa Molomoná ‘enau fakamoʻoní?
Fakaafeʻi e kau finemuí ke nau fakamatala ki ha potufolofola mei he Tohi ‘a Molomoná ‘a ia kuó ne tākiekina ‘enau moʻuí pe tokoniʻi kinautolu ke nau ikunaʻi ha faingataʻa (pe te nau fakamatala ki ha potufolofola ‘a ia ‘oku mahuʻingamālie kiate kinautolu). Ko e hā e ‘uhinga ‘oku mahuʻingamālie ai ia kiate kinautolú? Ko e hā ha aʻusia te nau lava ʻo vahevahe ʻo kau ki hano tokoniʻi kinautolu ʻe he folofolá? Ko e hā ha meʻa ‘oku akoʻi mai ‘e he ngaahi meʻa ne hoko ko ‘ení ‘o kau ki hono mahuʻinga ‘o e Tohi ‘a Molomoná?

Kole ki he kau finemuí ke nau vahevahe ha meʻa naʻa nau ako ‘i he ‘ahó ni. ‘Oku mahino nai kiate kinautolu hono mahuʻinga ʻo e Tohi ‘a Molomoná? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ‘E ‘aonga ke tuku ha taimi lahi ange ke ako ki he tokāteline ko ‘ení.

Moʻui ʻaki e meʻa ʻoku tau akó

Fakaafeʻi ʻa e kau finemuí ke nau fakakaukauʻi pe ʻe anga fēfē haʻanau moʻui ʻaki ʻa e meʻa kuo nau ako ʻi he ʻaho ní. Hangē ko ‘ení, te nau lava ‘o:

Fokotuʻu haʻanau palani fakafoʻituitui ke nau lau ‘a e Tohi ‘a Molomoná mo kumi ‘a e tali ki he fehuʻi “Ko e hā e ‘uhinga ‘oku tau fie maʻu ai e Tohi ‘a Molomoná?” Te nau lava ‘o vahevahe ʻa e meʻa ʻoku nau ‘iló ‘i he ngaahi kalasi ‘i he kahaʻú.
Fakakakato e ngāue ki he tuʻunga ‘ulungaanga mahuʻinga ʻo e Angamaʻá ‘i he Fakalakalaka Fakatāutahá.
Vahevahe ‘enau fakamoʻoní mo foaki ha tatau ʻo e Tohi ‘a Molomoná ki hanau kaungāmeʻa pe mēmipa ‘o e fāmilí.

Vahevahe ki he kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.