Ko e
Tohi ʻa Molomoná

Ko ia, ko ha fakanounou ia ʻo e lekooti ʻo e kakai ʻo Nīfaí, kae ʻumaʻā foki mo e kau Leimaná—Naʻe tohi ki he kau Leimaná, ʻa ia ko ha toenga ʻo e fale ʻo ʻIsilelí; kae ʻumaʻā foki ki he Siú mo e Senitailé—Naʻe tohi ia ʻi he fekau, pea ʻi he laumālie foki ʻo e kikité mo e fakahaá—Naʻe tohi mo fakamaʻu hake, pea fufuuʻi hake ki he ʻEikí, ke ʻoua naʻa fakaʻauha—Ke toki ʻomai ʻi he foaki mo e māfimafi ʻo e ʻOtuá ke toki liliu ia—Naʻe fakamaʻu ʻe he nima ʻo Molonaí, pea fufuuʻi hake ki he ʻEikí, ke toki ʻomai ʻi hono taimi totonú ʻo fou mai ʻi he kau Senitailé—Pea ʻe liliu ia ʻi he foaki ʻa e ʻOtuá.

ʻOku ʻi ai foki mo ha fakamatala nounou naʻe toʻo mei he Tohi ʻa ʻEtá, ʻa ia ko ha lekooti ʻo e kakai ʻo Sēletí, ʻa ia naʻe fakamovetevete ʻi he taimi naʻe veuveuki ai ʻe he ʻEikí ʻa e lea ʻa e kakaí, lolotonga ʻenau langa ha taua ke aʻu ki he langí—Koeʻuhi ke fakahā ai ki he toenga ʻo e fale ʻo ʻIsilelí ʻa e ngaahi meʻa maʻongoʻonga kuo fai ʻe he ʻEikí maʻa ʻenau ngaahi tamaí; pea ke nau ʻiloʻi ai ʻa e ngaahi fuakava ʻa e ʻEikí, ke ʻoua naʻa kapusi atu ʻa kinautolu ʻo taʻengata—Pea ki hono fakalotoʻi foki ʻo e Siú mo e Senitailé ko Sīsū ko e Kalaisí, ko e ʻOtua Taʻengatá, ʻokú Ne fakahā ia ʻe ia ki he ngaahi puleʻanga kotoa pē—Pea ko ʻeni, kapau ʻoku ʻi ai ha ngaahi meʻa hala, ko e ngaahi fehalaaki ia ʻa e tangata; ko ia, ʻoua naʻa fakaangaʻi ʻa e ngaahi meʻa ʻa e ʻOtuá, koeʻuhi ke lau ʻa kimoutolu ʻoku mou taʻe-ha-mele ʻi he fakamaauʻanga ʻa Kalaisí.