E mafai faapefea e le salamo ona fesoasoani ia te a’u i aso uma?

Na mafatia Iesu Keriso i le faasalaga mo a tatou agasala, ina ia mafai ona tatou salamo. O le salamo o se suiga o le loto ma le mafaufau, lea tatou te latalata atili atu ai i le Atua. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.

Saunia oe lava ia faaleagaga

O a ni ou aafiaga na i ai e uiga i le salamo? E aunoa ma le talanoaina o ni agasala na i ai muamua, e mafai faapefea ona e faasoa atu le auala na fesoasoani ai le salamo ia te oe, ina ia latalata atili ai i le Tama Faalelagi?

O nisi o tamaitai talavou atonu o loo tauivi ma tulaga o le lē agavaa, po o lagona o le nofosala. E mafai faapefea ona e latalata atu ia i latou ma valaaulia le Agaga e fesoasoani ia i latou ina ia mananao e salamo?

Suesue ma le agaga tatalo nei mau ma punaoa. O le a le mea na musuia ai oe ia salamo?

Isaia 1:18; Alema 34:15–16; 36:6–24; MF&F 1:32 (E ala i le Salamo, e mafai ona faamagaloina i tatou mai a tatou agasala)

Alema 19:33 (O Le Salamo e aumai ai se suiga o le loto)

Mosaea 27:35; MF&F 58:42–43 (Ina ia salamo, e ao ona tatou tautau atu ma fulitua i a tatou agasala)

Dale G. Renlund, “O Lo Tatou Leoleo Mamoe Lelei,” Ensign po o le Liahona, Me 2017, 29–32

Dale G. Renlund, “Salamo: O Se Filifiliga Fiafia,” Ensign po o le Liahona, Nov. 2016, 121-24

Linda S. Reeves, “O Le Fuafuaga Tele o le Togiolaina,” Ensign po o le Liahona, Nov. 2016, 88-90

Dieter F. Uchtdorf, “O Le A Ia Tuu Oe i luga o Ona Tauau ma Ave Oe i le Aiga,” Ensign po o le Liahona, Me 2016, 101–4

“Salamo,” Mo Le Malosi o le Autalavou (2011), 28–29

“Salamo,” Faamaoni I le Faatuatua (2004), 63–66

“ Mama,” Alualu I Luma o le Tagata Lava Ia a Tamaitai Talavou (2009), tulaga faatauaina e 4

Ata Vitio: “O Se Suiga o le Loto”

4:52

Ata Vitio: “O le Togiola E le Na o Se Taimi e Tasi”

3:1

Aoao atu i le ala a le Faaola

Na valaaulia e le Faaola isi e galulue i le faatuatua ma ola i upumoni na Ia aoao atu. Na ia maua avanoa mo i latou e aoao mai ai e ala i aafiaga mamana. O le a le mea e mafai ona e faia e fesoasoani ai i tamaitai talavou ia iloa le mana o le salamo i aso taitasi i o latou olaga?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Faaali le ata vitio “O Se Suiga o le Loto.” O le a se mea ua aoaoina mai e tamaitai talavou e uiga i le salamo, mai le aafiaga o lenei alii talavou?

4:52
Valaaulia tamaitai talavou e tusi e aunoa ma le faailoaina o le igoa, i luga o fasi pepa fesili o nonofo ma i latou e uiga i le salamo, ma ao a latou pepa. Valaaulia le epikopo e susu mai i le vasega ma taliina nei fesili.

Aoao faatasi

O gaoioiga taitasi o loo i lalo e mafai ona fesoasoani i tamaitai talavou e malamalama ai i le taua o le salamo i o latou olaga i aso faisoo. I le mulimuli ai i le taitaiga a le Agaga, filifili se tasi po o le sili atu, lea o le a sili ona lelei mo lau vasega:

Valaaulia se tasi o tamaitai talavou e faasoa mai se aafiaga o le malosi mai i se ma’i po o se manuaga. E faapefea ona faapei le faagasologa sa ia aafia ai ma le faagasologa o le faamalologa faaleagaga? O a ni aoaoga na maua e tamaitai talavou i le saunoaga a Elder Dale G. Renlund “O Lo Tatou Leoleo Mamoe Lelei” lea e uunaia i latou e saili se faamalologa mai le Leoleo Mamoe Lelei? O le a se mea e mafai ona tatou faia e faaali ai lea lava ituaiga o alofa mo i latou o siomiaina i tatou?
Valaaulia se tamaitai talavou e sau saunia i le vasega e faasoa atu se tala mai i se tasi o saunoaga ua fautuaina atu i lenei otootoga. E mafai foi ona e faaalia ia vitio a nei failauga o loo faamatalaina tala nei. O le a se mea ua aoao mai e ia tala ia i tatou e uiga i le salamo? Tusi faamatalaga i luga o ni fasi pepa e uiga i le salamo mai lauga. Valaaulia tamaitai talavou e filifili se faamatalaga ma faasoa mai mea ua latou aoaoina—muamua ma se paga ona sosoo ai lea ma le vasega. Tuu atu ia i latou le taimi e mafaufau ai i suiga ua latou fiafia e faia ona o mea sa latou aoaoina.
Fai atu i se tasi o i latou e nana se mea faitino a o matamata isi tagata o le vasega. Fai i se isi tamaitai talavou e taumafai e saili le mea faitino. (tagai Alema 39:8). O a tala o le tusitusiga paia e mafai ona faasoa mai e tamaitai talavou e faapea e le mafai ona tatou natia a tatou agasala mai i le Atua? (Tagai, mo se faataitaiga, Iona 1–2; 2 Samuelu 11–12; Galuega 5:1–11). E mafai foi ona latou iloiloina se tasi o tala i le saunoaga a Sister Linda S. Reeves “O Le Fuafuaga Tele o le Togiolaina.” Valaaulia tamaitai talavou e talanoaina fesili nei i ni vaega toalaiti: O a nisi o auala e taumafai ai tagata ina ia natia o latou agasala? O le a sau tala e fai atu e fesoasoani ai ina ia malamalama se tasi e le mafai ona tatou natiaina a tatou agasala?
Valaaulia tamaitai talavou e saili (taitoatasi pe o se vasega) punaoa e pei o vaega o le “Salamo” i le Faamaoni i le Faatuatua ma le Mo Le Malosi o le Autalavou po o le Alema 36:11–20. Fai atu ia i latou e faasoa mai a latou faamatalaga e sili ona fiafia i ai, po o manatu mai nei punaoa, ma faamalamalama le mafuaaga ua taua ai ia i latou.
Valaaulia tamaitai talavou e filifili se mau e uiga i le salamo (e pei ona fautuaina atu i lenei otootoga) ma fai se aotelega ia latou lava upu e uiga i mea ua latou aoaoina mai a latou mau. Faamata e faapefea ona latou faaaogaina nei mau e fesoasoani ai i se tasi, o le o loo manatu e le mafai ona faamagaloina o ia?
Tuu atu i tamaitai talavou se taimi i le vasega e galulue ai i le tulaga faatauaina e 4 o le Mama mai le tusi o le Alualu I Luma o le Tagata Lava Ia. Afai ua mae’a ona latou faatumuina lenei tulaga faatauaina, fai i ai e faasoa mai mea na latou aoao mai ai.

Fai atu i tamaitai talavou e faasoa mai mea na latou aoaoina i le asō. Ua sili atu ea lo latou malamalama i le mataupu o le salamo? O a lagona po o uunaiga ua latou mauaina? E i ai nisi a latou fesili? Faamata o le a fesoasoani le faaalu o se isi taimi i lenei mataupu?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Iloilo o latou olaga ma saili vaega e mafai ona latou salamo mai ai ma faaleleia.
Tusi i totonu o a latou api talaaga mea e mafai ona latou faia e salamo ai, faaleleia o latou olaga, pe faaauau ona ola ai i mataupu faavae o le talalelei.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.