Te u hoko fēfē ʻo anga faka-Kalaisi ange?

Naʻe fokotuʻu ʻe Sīsū Kalaisi ʻa e sīpinga haohaoá maʻatautolu, peá Ne fekauʻi mai ke tau hangē pē ko Iá. Naʻá Ne tā mai e sīpinga ʻo e ngaahi ʻulungaanga hangē ko e tuí, ʻamanaki leleí, ʻofa faka-Kalaisí, faʻa kātakí, angavaivaí, moʻui maʻá, faivelengá, mo e talangofuá. ʻI heʻetau ako kiate Iá mo fekumi ke fakatupulaki Hono ʻulungāngá, te tau hoko ai ki he tuʻunga ʻo e kakai fefine ʻokú Ne finangalo mo ʻetau Tamai Hēvaní ke tau aʻusiá.

Teuteuʻi fakalaumālie koe

Ko e hā ha niʻihi ʻo e ngaahi ʻulungaanga ʻo Sīsū Kalaisí? Ko e fē ʻi he ngaahi ʻulungaanga ko ʻení ʻokú ke fie maʻu ke fakatupulakí? Ko hai kuó ke mamata pe ʻiloʻi kuo hāsino mei ai ʻa e ngaahi ʻulungāngá ni?

Ko e fē ʻi he ngaahi ʻulungaanga faka-Kalaisí ni kuó ke vakai ki ai ʻi he kau finemui ʻokú ke akoʻí? Te ke lava fēfē ʻo poupouʻi kinautolu ke nau muimui ki he sīpinga ʻa e Fakamoʻuí pea hoko ʻo hangē ko Ia?

Ko e hā e ngaahi folofola mo e ngaahi lea te ne ueʻi fakalaumālie e kau finemuí ke fakatupulaki e ngaahi ʻulungaanga faka-Kalaisí?

Mātiu 26: 36–45, 50–52; Luke 23:33–34; Sione 19:25–27; 3 Nīfai 17 (Ngaahi sīpinga ʻo e ʻulungaanga ʻo Kalaisí)

Mōsaia 3:19 (Te tau lava ʻo hoko ko e kau māʻoniʻoni tuʻunga ʻi he Fakalelei ʻa Sīsū Kalaisí)

3 Nīfai 12:48; Molonai 7:48 (Ngaahi fakaafe ke nau hoko ʻo hangē ko e Fakamoʻuí)

Robert D. Hales, “Ko e Hoko ko ha Ākonga Hotau ʻEiki ko Sīsū Kalaisí,” Ensign pe Liahona, Mē 2017, 46–48

Henry B. Eyring, “Falala ki he Laumālie ʻOkú ne Takiekina ke Faileleí,” Ensign pe Liahona, Mē 2016, 16–18

Richard J. Maynes, “Ko e Fiefia ʻo e Moʻui ʻoku Fakatefito ʻia Kalaisí,”Ensign pe Liahona, Nōvema 2015, 27 – 30

“Ko e Kalaisi Moʻuí: Ko e Fakamoʻoni ʻa e Kau ʻAposetolo ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,” Ensign pe Liahona, ʻEpeleli 2000, 2–3

“Te u Fakatupulaki Fēfē ʻa e Ngaahi ʻUlungaanga Faka-Kalaisí?” Malangaʻaki ʻEku Ongoongoleleí (2004), 137–52

Vitiō: “Meʻakai Fakaʻahó: Liliu”

2:48

Ko e faiako ‘i he founga ‘a e Fakamo‘uí

ʻI he tūkunga kotoa pē, ko Sīsū Kalaisi hotau faʻifaʻitakiʻangá mo e faiakó. ʻE lava ke ke ako ʻa Hono ngaahi ʻulungāangá ʻi hoʻo lau fekauʻaki mo ʻEne moʻuí ʻi he folofolá. Naʻá ne folofola, “Ko au ko e halá, mo e moʻoní, pea mo e moʻuí” (Sione 14:6). Teuteuʻi koe ke akoʻi ʻa e kau finemuí ki he mahuʻinga ʻo hono fakakau atu ʻa e ngaahi ʻulungaanga faka-Kalaisí ʻi heʻenau moʻuí.

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ‘o e uike ní:

ʻOange ki he finemui takitaha ha tatau ʻo e ʻekitivitī ki he ʻulungāngá ʻi he peesi 150-51 ʻo e Malangaʻaki ʻEku Ongoongoleleí, pea kole ange ke ne fakaʻaongaʻi ha kiʻi taimi siʻi ke fakakakato ai hono siviʻi kitá. Fakaafeʻi e kau finemuí ke nau vahevahe e meʻa ʻoku nau ako mei he ʻekitivitī ko ʻení. Fakaafeʻi ha niʻihi tokosiʻi ke nau vahevahe ha ʻulungaanga faka-Kalaisi ʻoku nau saiʻia ai mei ha mēmipa ʻo ha kalasi ʻe taha pe ko ha mēmipa ʻo e fāmilí.
Fakaafeʻi e kau finemuí ke nau haʻu tahataha ki he palakipoé ʻo tohiʻi ha foʻi lea ʻe taha pe lahi ange ʻokú ne fakamatalaʻi e Fakamoʻuí. Hili hono maʻu ʻe he taha kotoa ha faingamālie ke tānaki ki he lisí, kole ki he kau finemuí ke nau fakalaulauloto ki ha ngaahi ʻulungaanga te nau saiʻia taha hono fakatupulakí.

Ako fakataha

ʻE tokoni e ʻekitivitī takitaha ʻi laló ke ako ʻe he kau finemuí ʻa e founga ke fakatupulaki e ngaahi ʻulungaanga faka-Kalaisí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

Fakaafeʻi ʻa e kau finemuí ke nau lau e lea ʻa ʻEletā Robert D. Hales ko e “Ko e Hoko ko ha Ākonga Hotau ʻEiki ko Sīsū Kalaisí” pea aleaʻi e founga ʻoku hangē ai ʻa e ʻulungaanga ʻo ha ākonga ko ha ngaahi feʻunu ʻoku huluni fakataha ʻi ha kupesi. ʻE fakafiefia ki he kau finemuí ʻenau faʻu haʻanau ngaahi fakaʻuhinga pē ʻanautolu—ʻo hā ai e ngāue fakataha e ngaahi kongokongá ke faʻu ha meʻa lahi ange—ke ne fakafofongaʻi e founga ʻoku tau fakatupulaki ai ha ngaahi ʻulungaanga faka-Kalaisi. Fakaafeʻi ʻa e kau finemuí ke nau fili ha taha ʻo e ngaahi ʻulungaanga faka-Kalaisi mei he leá, pea fokotuʻu ha taumuʻa ke ako fekauʻaki mo ia pea mo feinga ke fakatupulaki kakato ia.
ʻI he lea ʻa Palesiteni Henry B. Eyring ko e “Falala ki he Laumālie ʻOkú ne Tākiekina ke Faileleí,” naʻá ne akoʻi mai ai “ko e ʻuluaki meʻa kuo pau ke ke faí” he taimi ʻokú ke fie muimui ai ki he Fakamoʻuí, ko hoʻo “ʻalu ʻo tokoni mo ʻiloʻi ʻoku ʻikai ke ke ʻalu toko taha pē.” Ke tokoni ke muimui e kau finemuí ʻi he faleʻi ko ʻení, fakaafeʻi ke nau kumi ʻi he leá; ʻo fakaʻilongaʻi e ngaahi talaʻofá, ngaahi manatú mo e tukupā te nau maʻu aí; pea nau vahevahe ki he kalasí e meʻa ʻoku nau maʻu aí. Ko e hā ʻe lava ke fai ʻe he kau finemuí ke nau ngāueʻi ai e fakaafe ʻa Palesiteni ʻAealingi ke tokoni ki he niʻihi kehé? Hangē ko ʻení, te nau lava ʻo faitohi ki ha kakai ʻoku nau ʻofa ai, hangē ko e kau mēmipa ʻo e fāmilí, kaungāmeʻá, pe kaungāʻapí ʻo fakahaaʻi ʻenau houngaʻiá mo e saiʻia heʻenau meʻa ʻoku faí. Poupouʻi ke nau fakafanongo ki he ngaahi ueʻi ʻa e Laumālié ʻi heʻenau fai e tohí.
Ke tokoni ke mahino ki he kau finemuí ʻa e ʻuhinga ʻoku totonu ke fakatefito ai ʻetau moʻuí ʻia Sīsū Kalaisí, ʻe lava ke ke fakaafeʻi kinautolu ke nau fai ha kiʻi vaʻinga ʻoku fakatefito e tokangá ʻi ha meʻa (hangē ko e lī mamá pe fakapalanisi ha konga papa ʻo fokotuʻutuʻu ai ki ʻolungá). Fakaʻaliʻali ʻa e ʻuluaki miniti ʻe fā ʻo e lea ʻa ʻEletā Richard J. Maynes, “Ko e Fiefia ʻo e Moʻui ʻoku Fakatefito ʻia Kalaisí.” Ko e hā ʻoku nau ako fekauʻaki mo e mahuʻinga ʻo hono fakatefito ʻenau moʻuí he Fakamoʻuí, mei he ʻekitivitií mo e leá? Kole ki he kau mēmipa ʻo e kalasí ke nau ngāue tauhoa pea kumi ha talanoa ʻi he leá ʻokú ne fakahaaʻi e ngaahi tāpuaki ʻoku tau maʻu ʻi heʻetau fakatefito ʻetau moʻuí ʻia Kalaisí. Ko e hā te nau fai ke fakatefito lahi ange ai ʻenau moʻuí he Fakamoʻuí mo ʻEne ngaahi akonakí?
Vahevahe mo e kau finemuí e ngaahi ʻulungaanga faka-Kalaisi ʻoku hiki atu ʻi he vahe 6 ʻo e Malangaʻaki ʻEku Ongoongoleleí. Te u Fakatupulaki Fēfē ʻa e Ngaahi ʻUlungaanga faka-Kalaisí?” Kole ki he kau finemuí ke fili ha taha ʻo e ngaahi ʻulungaanga ko ʻení ʻa ia te nau loto ke fakatupulakí. Tuku ange ha taimi ʻi he kalasí ke nau ako fekauʻaki mo e ʻulungaanga naʻa nau filí, muimui ki he ngaahi fokotuʻu ʻi he ʻuluʻi tohi ko e “Ko Hono Fakatupulaki ʻo e Ngaahi ʻUlungaanga Faka-Kalaisí” ʻi he peesi 146–47. Poupouʻi kinautolu ke hokohoko atu ʻenau ako ki he ʻulungaanga naʻa nau filí, lolotonga e uike hoko maí pea vahevahe ʻa e ngaahi fakakaukau mei heʻenau akó ʻi he kamataʻanga ʻo e lēsoni ʻo e uike hono hokó.
Fakaafeʻi e kau finemuí ke lau fakafoʻituitui e taha ʻo e ngaahi potufolofola ʻoku fokotuʻu mai ʻi he fokotuʻutuʻu ko ʻení, pea fakaʻilongaʻi e ngaahi foʻi lea mo e kupuʻi lea ʻoku hā ai ha niʻihi ʻo e ngaahi ʻulungaanga ʻo e Fakamoʻuí. ʻOange ha taimi ke nau vahevahe ʻenau ngaahi ongo ki he Fakamoʻuí pea mo e ngaahi ʻulungaanga naʻá Ne fakahaaʻí. Te nau lava fēfē ke fakatupulaki ʻa e ngaahi ʻulungaanga ko ʻení ʻi heʻenau moʻuí? Te nau lava foki ke vahevahe ha ngaahi sīpinga ʻo e kakai ʻoku nau ʻilo ʻoku nau fakahaaʻi ha niʻihi ʻo e ngaahi ʻulungaanga faka-Kalaisi ko ʻení.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino kiate kinautolu ʻa e founga ʻe lava ke nau hoko ʻo anga faka-Kalaisi angé? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

Akoʻi ha lēsoni efiafi fakafāmili ʻi ʻapi fekauʻaki mo e ngaahi ʻulungaanga ʻo e Fakamoʻuí ʻo fakaʻaongaʻi ha taha ʻo e ngaahi ʻekitivitī mei he fokotuʻutuʻu ko ʻení.
Vahevahe ʻenau fakamoʻoni ki he Fakamoʻuí ki ha kaungāmeʻa pe mēmipa ʻo e fāmilí pe ʻi he houalotu ʻaukaí mo e fakamoʻoní.

Vahevahe mo e kau finemuí ʻa e meʻa te nau ako ʻi he uike hoko maí. Ko e hā ʻenau ngaahi fakakaukau mo e ngaahi fehuʻi ʻi he tefito ko ení? Ko e hā te nau lava ʻo fai ke teuteu ke ako? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku felāveʻi mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.