Hoko ʻo Anga Faka-Kalaisi Ange

“Pea tala ange ʻe Sīsū kiate ia, Ko au ko e hala, mo e moʻoni, pea mo e moʻui” (Sione14:6).

ʻE tokoni ʻa e ngaahi fokotuʻutuʻu ʻo e ʻiuniti ko ʻení ki he kau finemuí ke nau ako mo fakatupulaki ʻa e ngaahi ʻulungaanga faka-Kalaisí. Kuo fekauʻi kotoa kitautolu ʻe Sīsū Kalaisi, “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí” (3 Nīfai 12:48). ʻE tokoni ʻa hono fakatupulaki ʻe he kau finemuí ʻo e ngaahi ʻulungaanga faka-Kalaisí ke nau fakahoko honau tufakanga fakalangi ko e ngaahi ʻofefine ʻo e ʻOtuá. Te nau fie maʻu ʻa e ngaahi ʻulungaanga ko ʻení ʻi heʻenau fehangahangai mo e ngaahi pole ʻo e moʻuí ʻi ha ngaahi taimi fakatuʻutāmaki pea ʻi heʻenau teuteu ke ohi hake ha fāmili māʻoniʻoni ʻi he kahaʻú.

Ngaahi Fokotuʻutuʻu ke Fili mei ai ʻi he Mahina Ní

• Te u lava fēfē ʻo hoko ʻo anga faka-Kalaisi ange?

• Te u fakatupulaki fēfē ʻa e ʻofa faka-Kalaisí?

• Te u lava fēfē ʻo anga faka-Kalaisi ange ʻi heʻeku tokoni ki he niʻihi kehé?

• Te u ako fēfē ke toe lahi ange ʻeku kātakí?

• Ko e hā ʻoku mahuʻinga ai ke maʻu e loto houngaʻiá?

Mutualé

Fakakaukau ki he founga te ke lava ʻo palani ai e ngaahi ʻekitivitī ʻoku fehokotaki mo e meʻa ʻoku ako ʻe he toʻu tupú. ʻOku ʻi ai ha saiti ki he Ngaahi ʻEkitivitī ʻa e Toʻu Tupú ke tokoni atu kiate koe. ʻE lava ke fakaʻaongaʻi e lahi taha ʻo e ngaahi ʻekitivitī ako ʻi he ngaahi fokotuʻutuʻu ko ʻení ko ha ngaahi ʻekitivitī lelei ʻo e Mutualé. Ngāue fakataha mo e kau palesitenisī fakakalasí ke fili mo palani ha ngaahi ʻekitivitī feʻunga ʻoku nau fakamālohia e meʻa ʻoku ako ʻe he kau finemuí ʻi he Sāpaté.