Te u fakatupulaki fēfē ʻa e ʻofa faka-Kalaisí?

Ko e ʻofa haohaoa ʻa Kalaisí, ʻoku ʻiloa ko e ʻofa faka-Kalaisi, ʻa e ʻofa ʻoku māʻolunga tahá, fakaʻeiʻeiki tahá, mo mālohi tahá pea ‘oku fakafiefia taha ia ki he laumālié (vakai, 1 Nīfai 11:23). Ko Sīsū Kalaisi ʻa e sīpinga haohaoa ʻo e ʻofa faka-Kalaisí.ʻI Heʻene ngāue he māmaní, naʻá Ne “feʻaluʻaki ʻo fai lelei,” ʻo fakahaaʻi ha angaʻofa lahi ki he masivá, faingataʻaʻiá, mo e loto-mamahí (vakai, Mātiu 4:23; Ngāue 10:38). Ke fakatupulaki e ʻofa faka-Kalaisí kuo pau ke tau fekumi ki ai, lotua ia, mo muimui he sīpinga ʻa e Fakamoʻuí ʻi heʻetau fakakaukaú, leá, mo e tōʻonga moʻuí.

Teuteuʻi fakalaumālie koe

Ko fē nai e taimi kuo fakahaaʻi atu ai ʻe he niʻihi kehé e ʻofa faka-Kalaisí? Ko e hā ʻene tokoni kiate koé? Ko e fē ha taimi naʻá ke ongoʻi ai e ʻofa faka-Kalaisí? Te ke fakatupulaki fēfē ha ʻofa faka-Kalaisi ki he niʻihi kehé?

Ko e hā e ngaahi faingamālie ʻoku maʻu ʻe he kau finemuí ke fakahaaʻi e ʻofa faka-Kalaisí? Ko e hā ʻoku mahuʻinga ai ke nau ako ke ʻofa ki he niʻihi kehé ʻo hangē ko ia naʻe fai ʻe Kalaisí?

Ko e hā e ngaahi potufolofola mo e ngaahi maʻuʻanga tokoni kehe ʻe tokoni ke fakatupulaki e ʻulungaanga ʻofa faka-Kalaisí ʻi he kau finemuí?

Sēnesi 45; Luke 23:33–34; ʻAlamā 61:9 (Ngaahi sīpinga ʻo e kakai naʻa nau fakahā ʻa e manavaʻofá)

Levitiko 19:18 (ʻOfa ki ho kaungāʻapí ʻo hangē pē ko koé)

1 Samuela 16:7 (ʻOku ʻafio ʻa e ʻEikí ki he lotó.)

Sione 15:9–13 (Naʻe fakahaaʻi ʻe Kalaisi ʻEne ʻofa ʻiate kitautolú ʻaki hono tuku hifo ʻEne moʻuí)

1 Sione 4:7–11, 18–21 (Ko e ʻOtuá ko ʻofa ia)

Mōsaia 4:16 (Tokoniʻi ʻa kinautolu ʻoku fie maʻu hoʻo tokoní)

3 Nīfai 12:44 (ʻOfa ki ho filí)

Molonai 7:45–48 (Ko e ʻofa haohaoa ʻa Kalaisí ʻa e ʻofa faka-Kalaisí; lotua ke fakafonu kimoutolu ʻaki ʻa e ʻofa ko ʻení)

Thomas S. Monson, “Angaʻofá, Manavaʻofá, mo e ʻOfá,” Ensign pe Liahona, Mē 2017, 66–67

Dieter F. Uchtdorf, “ ʻOku Tekeʻi ʻa e Manavaheé ʻe he ʻOfa Haohaoá,” Ensign pe Liahona, Mē 2017, 104–7

Thomas S. Monson, “ʻOfá—ko e ʻElito ʻo e Ongoongoleleí,” Ensign pe Liahona, Mē 2014, 91–94

Dallin H. Oaks, “Ko e ʻOfa mo Feohi mo e Niʻihi Kehé Neongo e Faikehekehé,” Ensign pe Liahona, Nōvema 2014, 25–27

“ Manavaʻofá,” Tuʻu Maʻu ʻi he Tuí (2004), 118–119

Vitiō: “Fepoupouʻaki,” “Maʻa Metisoni, “Ko Hono Vahevahe ʻo e Maama ʻa Kalaisí, “Houtamakí—Tuku Ia”

Ko e faiako ‘i he founga ‘a e Fakamo‘uí

Naʻe hoko ʻa e Fakamoʻuí ʻi he tūkunga kotoa pē ko ha sīpinga mo ha faiako ki Heʻene kau muimuí. Ko e hā te ke lava ʻo fai ke hoko ko ha faʻifaʻitakiʻanga ʻo e ʻulungaanga faka-Kalaisi ʻo e ʻofa faka-Kalaisí ki he kau finemui ʻokú ke akoʻí?

Vitiō: “Tokoni Mai ke Mau ʻIloʻi e Ongoongoleleí”

Mamata lahi ange

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ‘o e uike ní:

• Tohiʻi ʻi ha ngaahi laʻipepa iiki “Ne u ongoʻi ʻa e ʻofa lahi tahá mei ha taha he taimi ___________.” ʻAve e fanga kiʻi laʻipepá ki he finemui takitaha kimuʻa pea kamata e kalasí, pea kole ange ke ne fakakaukau ki he founga te ne fakafonu ai e meʻa ʻoku fakaava atú. Fakaafeʻi e kau finemuí ke vahevahe ʻenau fakakaukaú ke kamata ‘aki e lēsoní.

• Fakaafeʻi e kau finemuí ke nau hivaʻi e “Ke Mou Feʻofaʻaki” (Ngaahi Himi, fika 200). Kole ki he kau finemuí ke nau vahevahe e ʻuhinga ʻo e ngaahi lea ʻo e himi ko ʻení kiate kinautolú.

Ako fakataha

Vakai ki he ngaahi fakakaukau kehe ki he akó mo e akoʻí .

ʻE tokoni e ʻekitivitī takitaha ʻi laló ke ako ʻe he kau finemuí ʻa e founga ke fakatupulaki e ʻofa faka-Kalaisí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

• Ko e meʻa kotoa ne fai ʻe Sīsū Kalaisi, ne makatuʻunga ia ʻi Heʻene ʻofa haohaoa—maʻatautolu mo ʻEne Tamaí. Te tau fakatupulaki fēfē ʻa e malava ke talangofua makatuʻunga ʻi he ʻofa haohaoa, ʻo hangē ko e Fakamoʻuí, kae ʻikai koeʻuhi ko e ilifiá? Vahevahe ʻa e kalasí ki ha kulupu ʻe ua ʻo ako e lea ʻa Palesiteni Dieter F. Uchtdorf ko e “ʻOku Tekeʻi ʻa e Manavaheé ʻe he ʻOfa Haohaoá.” Vahe ki he kulupu ʻe taha ke nau vahevahe e meʻa ne nau ako mei he konga “Fakamālohiʻaki e Ilifiá” mo e “Ko e Palopalema ʻo e Fakailifiá” pea ke vahevahe ʻe he kulupu ʻe tahá ʻa e meʻa ne nau ako mei he konga “Ko ha Founga Lelei Ange” mo e “ʻOku Tekeʻi Atu ʻa e Manavaheé ʻe he ʻOfa Haohaoá”. ʻOange ha taimi ki he kau finemuí ke nau hiki ʻenau ngaahi fakakaukau ki he ngaahi fehuʻi ko ʻení: Ko e hā ha founga ʻoku ou fakahoko ai ha ngaahi meʻa tupu mei heʻeku ilifiá? Ko e hā te u lava ʻo fai ke fakatupulaki ʻa e ʻofa Faka-Kalaisí? Ko e hā ʻoku ou fie liliu koeʻuhí ko e meʻa ne u akó?

• ʻOmi ha ngaahi laʻipepa ki he kalasí  (laʻipepa ʻe taha ki he finemui takitaha) ʻoku hā ʻa e taha ʻo e ngaahi leá ni ʻi ʻolunga: Angaʻofá, Manavaʻofá, mo eʻOfá. ʻAve ʻa e laʻipepa ʻe taha ki he finemui takitaha, pea fakaafeʻi ia ke ne fekumi ʻi he lea ʻa Palesiteni Monisoni ko e “ʻOfá—ko e ʻElito ʻo e Ongoongoleleí” mo e “Angaʻofá, Manavaʻofá, mo e ʻOfá,” ʻo kumi ki ha kupuʻi lea pe talanoa ʻokú ne akoʻi fekauʻaki mo e lea ʻi heʻene laʻipepá. Fakaafeʻi ʻa e kau finemuí ke nau vahevahe e meʻa ne nau maʻú. Ko e hā ha ngaahi faingamālie ʻoku tau maʻu ke tau angaʻofa ange, manavaʻofa mo ʻofa lahi ange ko e kalasi?

• Fakaafeʻi ʻa e kau finemuí ke lau ʻa e Sione 15:9–13; 1 Sione 4:7–11, 18–21; mo e Molonai 7:47–48. Ko e hā ʻoku ako ʻe he kau finemuí mei he ngaahi veesi ko ʻení ʻo kau ki he founga ke fakatupulaki e ʻofa faka-Kalaisí? Ko e hā e ʻuhinga kiate kinautolu e kupuʻi lea “ʻofa haohaoa ʻa Kalaisí”? Fakaafeʻi e kau finemuí ke kumi e ngaahi talanoa ʻi he folofolá ʻokú ne fakahaaʻi e ʻofa ʻa e Fakamoʻuí, pea kole ange ke nau fevahevaheʻaki e ngaahi talanoa ko ʻení. Te tau lava fēfē ʻo muimui he sīpinga ʻa e Fakamoʻuí? Te nau lava foki ke lau mo aleaʻi ʻa e ngaahi talanoa ʻi he taha ʻo e ngaahi lea ʻoku lisi atu ʻi he fakamatalá ni pe vahevahe ʻa e ngaahi sīpinga he taimi ne nau ʻiloʻi pe ko e kakai ʻoku nau ʻilo kuo faitāpuekina ʻe he ʻofa faka-Kalaisí.

• Hiki ʻa e ngaahi potufolofola ko ʻení ʻi he palakipoé: Mōsaia 4:16 mo e Levitiko 19:18. Vahevahe ʻa e kalasí ki ha kulupu ʻe ua, pea vahe ki he kulupu takitaha ha taha ʻo e ngaahi potufolofolá. Fakahinohinoʻi e kau finemuí ke nau ʻilo e ngaahi fekau ʻoku ʻomai ʻi heʻenau potufolofolá pea hiki ha fakamatala fakanounou ʻo e ngaahi fekaú ʻi he palakipoé ʻo hoko atu ki he potu folofolá. Ko e hā e ngaahi faingamālie ʻoku nau maʻu ke muimui ki he ngaahi fekau ko ʻení ʻi ʻapi, ʻi he akó, pea ʻi he koló? Ko e hā e ngaahi faingataʻa te ne ala taʻofi kitautolu mei he talangofua ki he ngaahi fekau ko ʻení? Te tau ikunaʻi fēfē ʻa e ngaahi faingataʻa ko ʻení? Fakaafeʻi e kau finemuí ke mamataʻi e “Houtamakí—Tuku Ia” pea aleaʻi e meʻa te nau lava ʻo fai ke moʻui ʻaki e ngaahi fekau ko ʻení ʻi heʻenau fehangahangai mo e ngaahi tūkunga peheé.

• Lau, mamataʻi pe fanongo ʻi he kalasí ki he lea ʻa  ʻEletā Dallin H. Oaks “Ko e ʻOfa mo e Feohi mo e Niʻihi Kehé Neongo e Faikehekehé.” Kole ki he kau finemuí ke nau kumi e akonaki te ne tokoniʻi kinautolu ke nau ʻofa ki he niʻihi kehé ʻi he ngaahi tūkunga faingataʻá. Ko e hā ha toe meʻa ʻe lava ke ako ʻe he kau finemuí ʻi heʻenau ako ʻi ha sīpinga fakaefolofola ha taha naʻá ne fakahaaʻi e ʻofá kiate kinautolu ne nau fakatangaʻi mo ʻitengia ia? ʻE malava ke kau ʻi he ngaahi sīpingá ʻa e Fakamoʻuí (vakai Luke 23:34), Sōsefa ʻi ʻIsipité (vakai Sēnesi 45), pe Peiholani (vakai ʻAlamā 61:9). Fakaafeʻi ʻa e kau finemuí ke nau fakalaulauloto fakalongolongo ki ha tokotaha ʻi heʻenau moʻuí ʻoku nau loto mamahi ki ai pea fakakaukau ki he ngaahi founga te nau lava ai ʻo fakahaaʻi ʻa e ʻofa faka-Kalaisí ki he tokotaha ko iá.

• Mamataʻi ha taha ʻo e ngaahi vitiō ʻoku fokotuʻu atu he fokotuʻutuʻu ko ʻení. Ko e hā ʻoku ako ʻe he kau finemuí fekauʻaki mo e ʻofa faka-Kalaisí mei he ngaahi vitiō ko ʻení? Kole ki he kau finemuí ke vahevahe ha aʻusia ʻi ha tokoniʻi kinautolu ʻe ha tokotaha ke nau ongoʻi e ʻofa ʻa e Fakamoʻuí. Ko e hā kuo akoʻi ʻe he aʻusia ko iá kiate kinautolu fekauʻaki mo Sīsū Kalaisí? Fakaafeʻi ʻa e kau finemuí ke nau fakakaukau ki ha taha ʻoku nau ʻiloʻi te ne fie maʻu ke ongoʻi ʻa e ʻofa ʻa e ʻEikí. Ko e hā nai te nau lava ʻo fai ke tokoni ki he tokotaha ko iá?

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino lelei ange nai kiate kinautolu e founga hono fakatupulaki ʻo e ʻofa faka-Kalaisí? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Tokoni fakafaiakó

“Ko e fakafanongó ko hano fakahaaʻi ia ʻo e ʻofá. ʻOku faʻa fie maʻu ki ai ha feilaulau. ʻI he taimi ʻoku tau fakafanongo lelei ai ki he niʻihi kehé, ʻoku tau faʻa tuku ai e meʻa ʻoku tau fie lea ʻakí kae lava ke nau fakamatalaʻi lelei ʻa e meʻa ʻoku nau fie lea ʻakí” (ʻOku ʻIkai ha Ui ʻe Mahuʻinga Ange he Faiakó [1999], 73).

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

• Lotua pe fakahā ha ʻofa ki ha taha naʻa nau ongoʻi tāufehiʻa ki ai.

• Fakahā ha ʻofa ki ha taha ʻe ala fiemaʻu ha tokanga makehe pe tokoni (vakai, ngaahi meʻa ʻoku fie maʻu ke aʻusia fika 3 ʻi he tuʻunga ʻulungaanga mahuʻinga ʻo e Ngaahi Ngāue Leleí, fika 5, mo e fika 6, Fakalakalaka Fakatāutahá, 54–55).

Vahevahe mo e kau finemuí ʻa e meʻa te nau ako ʻi he uike hoko maí. Ko e hā ʻenau ngaahi fakakaukau mo e ngaahi fehuʻi ʻi he tefito ko ení? Ko e hā te nau lava ʻo fai ke teuteu ke ako? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku felāveʻi mo e lēsoni ʻi he uike hoko maí.