Te u lava fēfē ʻo ako ke lahi ange ʻeku kātakí?

Ko e kātakí ʻa e malava ke matuʻuaki ʻa e fakatoloí, faingataʻá, fakafepakí, pe mamahí ʻo ʻikai fai ha ʻita, loto mamahi, pe hohaʻa. Te tau lava ke fakatupulaki e kātakí ʻaki ‘etau fekumi ke fai e finangalo ʻo e ʻOtuá mo tali ʻEne taimí, ‘o falala te Ne fakahoko ʻEne ngaahi talaʻofa kiate kitautolú. ʻI heʻetau ako ke kātakiʻi e ngaahi meʻa īkí, ʻoku tau teuteu ai ke faʻa kātaki ʻi haʻatau fehangahangai mo ha ngaahi faingataʻa lahi ange.

Teuteuʻi fakalaumālie koe

Ko e hā ha ngaahi aʻusia kuó ne akoʻi kiate koe e kātakí (fakakau fakatouʻosi ai ha faingataʻa lalahi mo ha ngaahi aʻusia ne ʻikai ke fuʻu faingataʻa)? Ko e hā ha meʻa kuó ne tokoniʻi koe ke ke kātaki lolotonga e ngaahi taimi faingataʻá?

Ko e hā ha ngaahi ivi tākiekina ʻoku fehangahangai mo e kau finemuí ʻi he sosaieti ʻo e ʻaho ní te nau iku ʻo taʻe faʻa kātaki aí? Te ke tokoniʻi fēfē kinautolu ke nau ako e kātakí mo falala ki he taimi mo e ngaahi talaʻofa ʻa e ʻEikí? Ko e hā ha ngaahi tāpuaki te nau maʻu kapau te nau faʻa kātaki?

Ko e hā ha ngaahi potufolofola mo ha lea ʻe tokoni ki he kau finemuí ke nau fakatupulaki ai ha ʻulungaanga faka-Kalaisi ʻo e kātakí?

Siope 1; 19:25–26 (Ko e sīpinga ʻa Siopé)

Saame 37:7–9; Hepelū 10:35–36; Mosaia 23:21–22; ʻAlamā 26:27; T&F 24:8 (ʻOku maʻu e ngaahi tāpuakí ʻe kinautolu ʻoku faʻa kātakí)

Loma 5:3; Sēmisi 1:3–4 (ʻOku tupulaki e kātakí ʻi hono ʻahiʻahiʻi ʻetau tuí)

Mosaia 3:19 (ʻOku kau e faʻa kātakí ʻi hono siʻaki ʻo e tangata fakakakanó)

Dieter F. Uchtdorf, “Fai Atu Ai Pē ʻi he Faʻa Kātaki,” Ensign pe Liahona, Mē 2010, 56–59; vakai foki ki he foʻi vitiō “Hoko Atu ʻi he Faʻa Kātaki”

2:46

Robert D. Hales, “Ko e Tatali ki he ʻEikí: Ke Fai Pē Ho Finangaló,” Ensign pe Liahona, Nōvema 2011, 71–74

Robert C. Oaks, “The Power of Patience,” Ensign pe Liahona, Nov. 2006, 15–17

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Lau e palakalafi he kamataʻanga ʻo e lēsoní, pea fakaafeʻi e kau finemuí ke nau fakakaukau ki ha taha mei he folofolá ʻoku hoko ko ha sīpinga ʻo e faʻa kātakí (hangē ko Sēkope mo Lesielí [Sēnesi 29:10–30], ʻAna [1 Samuela 1:2–20], pe ko e fefine naʻe ʻau totó [vakai, Mātiu 9:20–22]). Pea kole ke nau vahevahe e meʻa ʻoku akoʻi ʻe he ngaahi sīpinga ko ʻení kau ki he kātakí.
Lau e palakalafi he kamataʻanga ʻo e fokotuʻutuʻu ko ʻení, pea fakaafeʻi e kau finemuí ke nau vahevahe ha ngaahi tūkunga ʻi heʻenau moʻuí ne nau fie maʻu ai e kātakí (hangē ko e moʻui fakafāmilí, akó mo e ngāué, malí, pe hoko ko ha faʻeé). Fakaʻaliʻali ha ngaahi meʻa lahi ʻoku nau fakafofongaʻi e ngaahi taimi ʻi hoʻo moʻuí naʻá ke fakahaaʻi ai e kātakí (hangē ko ʻení, ko ha tipiloma mei he ʻunivēsití, ko ha foʻi mama mali, pe ko ha pine fakafaifekau). Tuku ke mateʻi ʻe he kau finemuí pe ko e hā e fekauʻaki ʻa e ngaahi meʻa ko iá mo e kātakí, pea vahevahe hoʻo ngaahi aʻusiá.

Ako fakataha

ʻE tokoni ‘a e ngaahi ʻekitivitī takitaha ʻi laló ke mahino ki he kau finemuí hono mahuʻinga ʻo e faʻa kātakí. Muimui ʻi he ueʻi ʻa e Laumālié ʻo fili ha ʻekitivitī ʻe taha pe lahi ange ʻe ‘aonga taha ki hoʻo kalasí:

Hiki ʻi he palakipoé ha ngaahi fehuʻi kau kia Siope (Ko e tangata fēfē ʻa Siope? Ko e hā e meʻa naʻá ne siviʻi ʻene kātakí? Ko e hā e meʻa ʻokú ne akoʻi mai kiate kitautolu kau ki he faʻa kātakí?) Lau ʻe he kalasí e Siope 1; 19:25–26, pea aleaʻi e tali ki he ngaahi fehuʻí. Ko e hā e meʻa ʻoku ako ʻe he kau finemuí mei he sīpinga ʻa Siopé te ne tokoniʻi kinautolu ke nau kātaki lahi ange aí? Naʻe tokoniʻi fēfē ‘a Siope ʻe heʻene tui ki he Fakamoʻuí ke ne fehangahangai ai mo hono faingataʻaʻiá ʻaki e kātakí?
Vahevahe e talanoa ki he kātaki ʻa ha tamai mei he lea ʻa ʻEletā Lōpeti C. ʻOakesi “The Power of Patience,” pea fakaafeʻi e kau finemuí ke nau vahevahe haʻanau faʻahinga talanoa kau ki he kātakí. ʻOange ki he finemui takitaha ha kiʻi konga ʻo e talanoa ko ʻení ʻokú ke fakakaukau ʻe ala tokoni. Fakaafeʻi ke nau lau pea fakamatalaʻi fakanounou ia ki he kalasí. Ko e hā e meʻa ʻoku ako ʻe he kau finemuí mei he lea ko ʻení te ne ueʻi kinautolu ke nau falala ki he ʻEikí mo ʻEne taimí? Ko e hā ha ngaahi ʻuhinga ʻoku ʻikai ai ke tau faʻa kātakí? Te tau ikunaʻi fēfē e faʻahinga ʻulungaanga ko ʻení?
Lau ʻe he kalasí e palakalafi 9 ki he 17 ʻo e lea ʻa ʻEletā Lōpeti D. Heili “Ko e Tatali ki he ʻEikí: Ke Fai Pē Ho Finangaló,” ʻo kumi e tali ki he fehuʻi “Ko e hā hono ʻuhinga ʻo e faʻa tatali ki he ʻEikí?” Ki ha ngaahi fakakaukau lahi angé, fakaafeʻi e kau finemuí ke nau kumi e ngaahi potufolofola naʻe lau ʻe ʻEletā Heilí pea vahevahe ha toe faʻahinga meʻa ʻoku akoʻi ʻe he potufolofolá ni kau ki he kātakí. ʻE ngāue ʻaki fēfē ʻe he kau finemuí e lea ʻa ʻEletā Heilí pe ngaahi potufolofolá ni ke ne tokoniʻi ha taha ʻoku kamata ke mole ʻene ʻamanakí?
Hiki ʻi he palakipoé ʻa e “Faʻa Kātaki” mo e “Taʻe Faʻa Kātaki.” ʻOange ki he finemui takitaha ha taha ʻo e ngaahi potufolofola kau ki he faʻa kātakí ʻoku fokotuʻu atu ʻi he fokotuʻutuʻu ko ʻení. Fakaafeʻi e kalasí ke nau taufetongi ʻi hono lau e folofola naʻe vahe kiate kinautolú, aleaʻi hono pōpoakí, pea tohi he palakipoé e ngaahi tāpuaki ʻo e faʻa kātakí pe ngaahi nunuʻa ʻo e taʻe faʻa kātakí naʻe akoʻi mai ʻe he folofolá. Ko e hā ha ngaahi tāpuaki kehe mo e nunuʻa te nau lava ʻo tānaki ki heʻenau lisí? Fakaafeʻi e finemui takitaha ke ne hiki ʻi ha laʻipepa ha tūkunga ʻoku fie maʻu ai e faʻa kātakí (poupouʻi ke ʻoua te nau fakakau pē ʻa e ngaahi palopalema lalahí kae kau ai mo e ngaahi hohaʻa fakaʻahó pe ngaahi taʻefiemālié). Tuku ke nau fakafetongi pepa mo ha finemui kehe, hiki ha tali ʻe ʻasi ai e faʻa kātakí, pea vahevahe mo e kalasí e meʻa ne nau hikí.
Huluʻi e vitiō “Hoko Atu ʻi he Faʻa Kātaki,” pea fakaafeʻi e kau finemuí ke nau aleaʻi e meʻa ʻoku nau ako kau ki he faʻa kātakí mei he vitioó. Ko e hā ha ngaahi tūkunga ne ʻikai faʻa kātaki ai e kau finemuí? Fakaafeʻi e finemui takitaha ke ne lau ha konga ʻe taha mei he lea ʻa Palesiteni Tieta F. ʻUkitofa “Fai Atu Ai Pē ʻi he Faʻa Kātaki,” pea kole ke ne fakamatalaʻi fakanounou ki he toenga ʻo e kalasí e meʻa naʻá ne ako mei he konga naʻá ne laú. ʻOku tokoniʻi fēfē ʻe he faleʻi ʻa Palesiteni ʻUkitofá e kau finemuí ke nau kātaki lahi ange?

2:46

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau?ʻOku mahino nai kiate kinautolu e founga ke nau faʻa kātaki lahi ange aí? ʻOku toe ʻi ai nai haʻanau ngaahi fehuʻi kehe?ʻE ʻaonga nai ke tuku ha taimi lahi ange ‘i he tefito ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe ko e hā e founga te nau moʻui ʻaki ai e meʻa kuo nau ako he ʻaho ní. Hangē ko ʻení, te nau lava ʻo:

Fakahaaʻi ha kātaki lahi ange ʻi honau fāmilí he uike ka hokó.
Hiki ha lisi ʻo ha ngaahi founga vave ʻe tokoni ke nau mapuleʻi ʻenau ʻitá ʻi ha tūkunga feʻiteʻitani, hangē ko e lau ki he hongofulú pe ko hono hivaʻi ʻo ha foʻi himi.

Vahevahe mo e kau finemuí e meʻa te nau ako ʻi he uike ka hokó. Ko e hā haʻanau fakakaukau mo ha fehuʻi ʻi he tefito ko ʻení? Ko e hā te nau lava ‘o fai ke nau teuteu ai ke akó? Hangē ko ʻení, te nau lava ‘o lau ha lea, sio ʻi ha foʻi vitiō, pe ako ha potufolofola ʻoku fekauʻaki mo e lēsoni ʻo e uike kahaʻú.