Te u hoko fēfē ʻo anga faka-Kalaisi ange ʻi heʻeku tokoniʻi e niʻihi kehé?
Naʻe fokotuʻu ʻe Sīsū Kalaisi ʻa e sīpinga haohaoa ki he founga ʻo e ʻofá mo hono tokoniʻi kinautolu naʻe feohi mo Iá. ʻOku tau fuakava ʻi he papitaisó ke tokoniʻi e niʻihi kehé. ʻE lava ke tau tokoniʻi e niʻihi kehé ʻo hangē ko ia naʻe fai ʻe he Fakamoʻuí ʻi he ngaahi founga lahi, hangē ko hono tokoniʻi ʻo e kau mēmipa ʻo e fāmilí, vahevahe ʻo e ongoongoleleí ki he niʻihi kehé, mo fai e ngaahi ngāue faingofua ʻo e angaʻofá ʻi he ʻaho kotoa pē.
Teuteuʻi fakalaumālie koe
Ko e hā kuó ke ako mei he folofolá fekauʻaki mo e founga ne tokoniʻi ʻaki ʻe Kalaisi e niʻihi kehé? Ko e fē ha taimi ne tāpuekina ai koe ʻi he ngāue tokoni faka-Kalaisi ʻa e niʻihi kehé? Kuó ke muimui fēfē ʻi he sīpinga ngāue tokoni ʻa e Fakamoʻuí?
Ko e hā ha ngaahi faingamālie ʻoku maʻu ʻe he kau finemuí ke ngāue tokoní? Ko e fē ha taimi kuó ke mamata ai ki haʻanau tokoniʻi e niʻihi kehé? Ko e hā ha ngaahi meʻa te nau lava ʻo vahevahe mo e niʻihi kehé? ʻE uesia fēfē honau fāmilí ʻi he feinga ʻa e kau finemuí ke tokoniʻi lahi ange kinautolú?
Ko e hā e ngaahi potufolofola mo e ngaahi maʻuʻanga tokoni kehe ʻe tokoni ke mahino ki he kau finemuí hono mahuʻinga hono tokoniʻi e niʻihi kehé ʻo hangē ko ia ne fai ʻe Kalaisí?
Mātiu 14:13–21; Sione 9:1–7; 13:4–5, 12–17; 1 Nīfai 11:31; 3 Nīfai 17:5–9 (Ngaahi sīpinga hono tokoniʻi ʻe Sīsū Kalaisí e niʻihi kehé)
Mātiu 20:27 (ʻOku akoʻi ʻe he Fakamoʻuí ʻEne kau ākongá ko ia ia ʻoku lahi haké ko e taimaioʻeiki ia)
Mātiu 25:31–46 (ʻI heʻetau tokoniʻi e niʻihi kehé, ʻoku tau tokoni ai ki he ʻOtuá)
Luke 10:25–37 (Talanoa fakatātā ʻo e Samēlia Leleí); vakai foki ki he vitiō ʻo e Tohi Tapú “Talanoa Fakatātā ʻo e Samēlia Leleí”
Sione 13:34–35 (ʻOku totonu ke tau ʻofa ʻi he niʻihi kehé ʻo hangē ko e ʻofa ʻa e Fakamoʻuí)
Mōsaia 2:17 (Akoʻi ʻe he Tuʻi ko Penisimaní ko e taimi ʻoku tau tokoni ai ki he niʻihi kehé, ʻoku tau ʻi he ngāue pē ʻa e ʻOtuá)
Cheryl A. Esplin, “ ʻOkú ne Kole Mai ke Tau Hoko ko Hono Toʻukupú,” Ensign pe Liahona, Mē 2016, 6–9
Michael T. Ringwood, “Lelei Moʻoni pea ʻIkai Ha Kākā,” Ensign pe Liahona, Mē, 2015, 59-61.
Thomas S. Monson, “ʻOku ʻIkai ʻAupito ke Tau Tuenoa,” Ensign pe Liahona, Nōvema 2013, 121–24
“Ngāue Tokoní,” Ki Hono Fakamālohia ʻo e Toʻu Tupú (2011), 32–33
Ngaahi Vitiō: “Fakahaofi Kinautolu ʻOku Faingataʻaʻiá,”“Taimi ke Foaki,”“Maʻa Metisoni,”“Fepoupouʻakí,”“Ngaahi Faingamālie ke Fai Lelei”
Ko e faiako ‘i he founga ‘a e Fakamo‘uí
Lolotonga ʻEne ngāue ʻi he māmaní, ne tuku ʻe Sīsū Kalaisi Hono taimí ke ngāue mo tokoni kiate kinautolu ne nau feohí. ʻOku fai pehē mo e kau ākonga moʻoni ʻa Kalaisí. Ne folofola ʻa e Fakamoʻuí, “ʻI he meʻá ni ʻe ʻilo ai ʻe he kakai kotoa pē ko ʻeku kau ākonga ʻa kimoutolu, ʻo kapau te mou feʻofaʻaki kiate kimoutolu” (Sione 13:35). ʻI hoʻo akoʻi ʻa e kau finemuí, fekumi ki ha ngaahi faingamālie ke fakaafeʻi ai kinautolu ke vahevahe ʻa e founga kuo nau tokoniʻi ai ha niʻihi kehe pea ko e hā naʻá ne ueʻi kinautolu ke fai ha ngāue tokoní.
Vahevahe ʻo e ngaahi aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:
-
Fakaafeʻi e kau finemuí ke nau lau Sione 13: 34–35, pea kole ange ke nau kumi ha ngaahi fakatātā mei he Tohi Fakatātā ʻo e Ongoongoleleí pe ha makasini ʻa e Siasí ʻoku ʻasi ai hono fakahaaʻi ʻe he Fakamoʻuí pe ko e niʻihi kehé ʻa e ngāue tokoni ʻofá. Fakaafeʻi kinautolu ke nau fakahaaʻi ʻenau ngaahi fakatātaá ki he kalasí pea fakamatalaʻi e meʻa ʻoku nau ako mei he fakatātā fekauʻaki mo e ngāue tokoni faka-Kalaisí.
-
Fakaafeʻi e kau finemuí ke nau vahevahe ha ngaahi meʻa ne nau toki ʻausia ʻi hono tokoniʻi e niʻihi kehé (tautautefito ki he mēmipa tonu honau fāmilí). Naʻe tokonia fēfē kinautolu ʻe he ngāue tokoni ko ʻení? Naʻe uesia fēfē ʻa e niʻihi kehé?
-
ʻEke ki he kau finemuí pe naʻe ʻi ai ha taimi ne fakahaofi fakaesino ai kinautolu ʻi ha taimi faingataʻa. Ko e hā ʻa e ongo ne nau maʻu ki he tokotaha naʻá ne tokoniʻi kinautolú? Sio he vitioó “Rescuing Those in Need,” pea fakaafeʻi e kau finemuí ke nau aleaʻi e meʻa naʻa nau ako meia Palesiteni Monisoni fekauʻaki mo e tokoniʻi e niʻihi kehé ʻi hono fai ʻe he Fakamoʻuí.
NaN:NaN
Ako fakataha
ʻE tokoni e ʻekitivitī takitaha ʻi laló ke ueʻi hake ʻa e kau finemuí ke nau fai ha ngāue tokoni faka-Kalaisí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:
-
ʻI he lea ʻa Sisitā Cheryl A. Esplin ko e “ ʻOkú ne Kole Mai ke Tau Hoko ko Hono Toʻukupú,” ʻokú ne fai ai ha talanoa ki ha taki ʻo e Kau Finemuí naʻá ne fakalotolahiʻi e finemui takitaha ke nau feinga ke “ʻiloʻi mo tokoniʻi e niʻihi kehé—ʻo tuku e siokitá ka nau sio atu ʻo ʻiloʻi e niʻihi kehé.” Ke tokoni ke mahino e tefitoʻi moʻoni ko ʻení ki he kau finemuí, ʻe lava ke ke fai e ʻekitivitī ʻoku fakamatalaʻi ʻi he leá ni, ʻo fakʻaaongaʻi ha sioʻata mo ha meʻa ʻokú ne fakafofongaʻi ha kau-matapā sioʻata. Ko e hā ʻoku fakakaukau ai e kau finemuí ʻoku mahuʻinga ke fakatefito ʻetau tokangá ʻi he niʻihi kehé kae ʻikai ko kitautolu, he taimi ʻoku tau tokoni aí? Te ke lava ʻo fakaafeʻi e kau finemuí ke nau fakalaulauloto mo tohi e talí ki he ngaahi fehuʻi ʻe fā ʻoku fakaʻilongaʻi atu naʻe fai ʻe Sisitā Esplin he konga kimui ʻene leá.
-
Kole ki he kau finemuí ke nau fakakaukau pē ko e hā ʻokú ne fakaʻaiʻai e kakaí ke tokoní. Faʻu ha lisi ʻi he palakipoé pea feinga ke ʻiloʻi pe ko fē ʻokú ne fakaʻaiʻai ʻa e anga faka-Kalaisí mo fakaemamaní . Fakaafeʻi e kau finemuí ke nau vakaiʻi e lea ʻa ʻEletā Michael T.Ringwood ʻʻLelei Moʻoni pea ʻIkai Ha Kākā,ʻʻ o kumi pe ko e hā e meʻa ʻokú ne akoʻi fekauʻaki mo hono fakaʻaiʻai e anga faka-Kalaisí. Ko e hā ha ngaahi sipinga ʻe lava e kau finemuí ʻo fakakaukau ki ai- mei he ngaahi folofolá pe mei heʻenau ʻausia fakatāutahá- ʻo ha kakai naʻa nau faí ha tokoni faka-Kalaisí. Tukuange ha taimi ki he kau finemuí ke nau fai ha tohi fakamalo ki ha niʻihi naʻa nau fai ange ha tokoni faka-Kalaisi kiate kinautolu.
-
Vahe ki he finemui takitaha ke ne lau ha potufolofola fekauʻaki mo e ngāue tokoní mei he moʻui ʻa e Fakamoʻuí (hangē ko ia ʻoku ʻoatu he lēsoni ko ʻení), pea kole ange ke ne fakamatalaʻi nounou ʻa e talanoá ki he kalasí mo fakamatalaʻi ange pe ko e hā naʻe fai ʻe he Fakamoʻuí ke tokoniʻi e niʻihi kehé. Ko e hā ʻoku akoʻi mai ʻe he sīpinga ʻa e Fakamoʻuí fekauʻaki mo hono ʻuhinga ʻo e ngāue tokoní? Fakaafeʻi e kau finemuí ke nau fakakaukau ki ha ngaahi founga te nau lava ʻo fai ʻa e ngāue faka-Kalaisí ʻi honau fāmilí.
-
ʻEke ki he kau finemuí, “Ko e hā ne akoʻi ʻe he Fakamoʻuí ʻi he talanoa fakatātā ʻo e Samēlia leleí?” Lau fakakalasi e talanoa fakatātā ʻo e Samēlia leleí ʻi he Luke 10: 25–37 (pe sio he vitioó “Talanoa Fakatātā ʻo e Samēlia Leleí”). Fakaafeʻi e kau finemuí ke nau vahevahe ha ngaahi talanoa ki ha taimi naʻe tāpuakiʻi ai kinautolu ʻe he tokoni faka-Kalaisí ʻa e niʻihi kehé. Ko e hā ʻoku faʻa faingataʻa ai ke tau tokoniʻi e niʻihi kehé (ʻo hangē ko ia ne fai ʻe he taulaʻeikí mo e Līvaí)? Ko e hā ha ngaahi faingamālie ʻoku maʻu ʻe he kau finemuí ke “ʻalu koe, peá ke fai pehē pē” ʻo hangē ko e tangata Samēlia leleí?
5:12 -
Fakaafeʻi e kau finemuí ke nau lau e talanoa fekauʻaki mo Tifanī, mei he lea ʻa Palesiteni Thomas S. Monson ko e “ ʻOku ʻIkai ʻAupito ke Tau Tuēnoa.” Te ke lava ʻo huluʻi ha taha pe ongo vitiō fakatouʻosi ʻoku fokotuʻu atu ʻi he lēsoni ko ʻení. Ko e hā ne ongo ki he kau finemuí fekauʻaki mo e ngaahi ngāue tokoni ʻi he lea ko ʻení mo e vitioó? Naʻe ʻiloʻi fēfē ʻe he kakai ʻi he talanoá mo e vitioó ʻa e fie maʻu ke fai ha tokoní? Tuku ʻa e kau finemuí ke nau fakalaulauloto mo vahevahe ha ngaahi sīpinga kehe tatau mo ia ʻo e ngāue kuo nau mamata ki ai. Fakaafeʻi kinautolu ke nau vahevahe e meʻa naʻa nau ongoʻi ke fai hili ʻenau ako ki he ngaahi sīpinga ko ʻení.
Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino kiate kinautolu ʻa e founga hono fakahoko ʻo e ngāue tokoni faka-Kalaisí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:
-
Fakakakato ha taha ʻo e ngaahi meʻa ʻoku fie maʻu ke aʻusia ʻi he tuʻunga ʻulungaanga mahuʻinga ko e Ngaahi Ngāue Leleí ʻi he Fakalakalaka Fakatāutahá pea lipooti ʻa e meʻa naʻa nau fakahokó ʻi he kalasi hokó.
-
Palani mo fakahoko ha kiʻi ngāue tokoni, fakafoʻituitui pe ko ha ʻekitivitī Mutuale.
Vahevahe mo e kau finemuí ʻa e meʻa te nau ako ʻi he uike hoko maí. Ko e hā ʻenau ngaahi fakakaukaú mo e ngaahi fehuʻi ʻi he tefito ko ení? Ko e hā te nau lava ʻo fai ke teuteu ke ako? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻi he uike hoko maí.