Ko e hā ʻoku mahuʻinga ai ke loto houngaʻiá?

‘Oku finangalo e ‘Eikí ke tau maʻu ‘a e laumālie ‘o e loto houngaʻiá ‘i he meʻa kotoa pē ‘oku tau fai mo lea ʻakí.ʻI he taimi ʻoku tau loto houngaʻia aí, te tau maʻu ai ha fiefia lahi ange mo fiemālie ʻi heʻetau moʻuí. ʻE lava ke tau fakatokangaʻi e takiekina mo e ngaahi tāpuaki ʻa e ʻEikí.

Teuteuʻi fakalaumālie koe

Ko e hā ha ngaahi meʻa ʻokú ke mātuʻaki houngaʻia ai? Kuo fakatupulaki fēfē ʻe hoʻo loto houngaʻiá ʻa hoʻo fiefiá?

Ko e hā ʻe lava ke fakahoko ʻe he kau finemuí ke fakatupulaki ai ha ʻulungaanga ʻo e faʻa fakamāloó? ʻOku hoko fēfē hono ʻulungaanga ʻaki ʻa e loto houngaʻiá ko ha tāpuaki kiate kinautolu ʻi he taimí ni pea ʻi he kahaʻú?

Ko e hā e ngaahi potufolofola mo e ngaahi maʻuʻanga tokoni kehe ʻe tokoni ke mahino ki he kau finemuí ʻa e mahuʻinga mo e ngaahi tāpuaki ʻo hono moʻui ʻaki e loto houngaʻiá?

Saame 92:1; 100; ʻAlamā 26: 8(Ko e Fakahaaʻi ʻo e fakafetaʻí mo e fakamāloó)

Luke 17:11–19 (Ko e kau kilia ʻe toko hongofulú)

ʻAlamā 37:37 ; T&F 46: 32 (Naʻe fekauʻi kitautolu ke tau ʻoatu ha fakamālō)

T&F 59:15 – 21 (ʻOku houhau e ʻOtuá he loto taʻe houngaʻiá)

T&F 78:19 (Ko e ngaahi tāpuaki ʻo e loto houngaʻiá)

Henry B. Eyring, “Loto Houngaʻia he ʻAho Sāpaté,”EnsignpeLiahona,Nōvema. 2016, 99-102

Dieter F. Uchtdorf, “Loto Fakafetaʻi ʻi ha Faʻahinga Tūkunga Pē,” Ensign pe Liahona, Mē 2014, 70–77

Russell M. Nelson, “Fakafetaʻi ki he ʻOtuá,” Ensign pe Liahona, Mē 2012, 77–80; vakai foki ki he foʻi vitiō “Fai ha Fakamālō”

“Loto Houngaʻiá,” Ki Hono Fakamālohia ʻo e Toʻu Tupú (2011), 18

“ʻE ʻOtua ko e Tapuhā,” Ngaahi Himí, fika 38; “Tānaki Ho Ngaahi Tāpuaki,” Ngaahi Himí, fika 148

Ko e faiako ‘i he founga ‘a e Fakamo‘uí

Naʻe ʻafioʻi ʻe he Fakamoʻuí Hono kau muimuí, pea naʻá Ne ʻafioʻi e tokotaha te nau lava ʻo hoko ʻo hangē ko iá. Naʻe takiekina ʻe he ʻilo ko ʻení ʻa e founga naʻá Ne akoʻi ʻaki kinautolú. Ko e hā e founga ʻe lava ke ke maheni ai mo e kau finemui ʻi hoʻo kalasí? ʻE tokoni fēfē hoʻo ʻilo ki honau ngaahi manakó, fie maʻú, mo e ngaahi faingataʻá ki he founga te ke akoʻi ʻaki kinautolú?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Vakai ki he ngaahi fakakaukau ki he akó mo e akoʻí.

Fili mei he ngaahi fakakaukau ko ʻení pe ko haʻo fakakaukau pē ʻaʻau ke fakafeʻiloaki ʻaki e lēsoni ‘o e uike ní:

• Vahe ki he finemui takitaha ha mataʻitohi ʻe taha ʻo e ʻalafapetí (alphabet), pea ʻoange ha miniti ʻe taha ki he kalasí ke nau hiki kotoa e ngaahi tāpuaki te nau lava ʻo fakakaukau ʻoku kamata ʻaki ʻenau mataʻitohí. Ko e hā ʻoku ‘ikai ke tau faʻa fakatokangaʻi ai e ngaahi tāpuaki iiki naʻe ʻomi ʻe he ʻEikí maʻatautolú? Kole ki ha mēmipa ʻo e kalasí ke ne lau e Tokāteline mo e Ngaahi Fuakava 46:32 pe 59:21.Te tau fakahaaʻi fēfē ha loto houngaʻia lahi ange “ki ha faʻahinga tāpuaki pē ʻoku tāpuekina ʻaki [kitautolu]”?

• Hiki ʻi he palakipoé, “Ko hono lahi ʻo ʻetau __________ ko hano fua ia ʻetau ʻofa kiate Iá.” Poupouʻi e kau finemuí ke nau fanongo ki he foʻi lea ʻokú ne fakakakato e sētesí ʻi heʻenau mamata he foʻi vitiō nounou ko e “Fai ha Fakamālō.” Fakaafeʻi e kau finemuí ke nau vahevahe ha ngaahi sīpinga ʻo ha kakai ʻi heʻenau moʻuí ʻoku nau fakahaaʻi ʻi he loto houngaʻia ʻa e ʻofa ki he Fakamoʻuí.

Ako fakataha

Vakai ki he ngaahi fakakaukau ki he akó mo e akoʻí.

ʻE tokoni ʻa e ngaahi ʻekitivitī takitaha ʻi laló ke mahino ki he kau finemuí ʻa e mahuʻinga ʻo e loto houngaʻiá. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

• Tohi ʻi he palakipoé ʻa e ngaahi fehuʻi ko ʻení: “Ko e hā ʻoku mahuʻinga ai ke tau loto houngaʻiá?”  Ko e hā ʻe lava ke u fai, tautautefito ki he ʻaho Sāpaté, ke u toe loto houngaʻia ange aí? Fakaafeʻi ʻa e finemui takitaha ke fili ha taha ʻo e ngaahi fehuʻí pea kumi hake e ngaahi talí ʻi he lea ʻa Palesiteni Henry B. Eyring ko e “Loto Houngaʻia he ʻAho Sāpaté.” Ko ʻene ʻosí pē, tuku ke nau vahevahe ʻa e meʻa ne nau maʻú, pea fakaafeʻi kinautolu ke nau faʻu ha palani ke ngāueʻi ha taha ʻo e ngaahi fokotuʻu ʻa Palesiteni ʻAealingí. 

• Fakaafeʻi e finemui takitaha ke ne lau e Luke 17:11–19 pea vahevahe ‘enau fakakaukau ki hono ʻuhinga ne ʻikai fakamālō ai e kau kilia ʻe toko hivá ki he Fakamoʻuí. Ko e hā ha ngaahi meʻa te ne lava ʻo taʻofi kitautolu mei hono fakahaaʻi ʻo e loto houngaʻiá? Fakaafeʻi ʻa e kau finemuí ke nau fakakaukau ki ha tāpuaki kuo nau maʻu ka kuo teʻeki ke nau fakahaaʻi ha houngaʻia feʻunga. Ko e hā ʻoku mahuʻinga ai ke fakahaaʻi e fakamāloó? Ko e hā te nau fai ke fakahaaʻi ʻaki ʻenau houngaʻiá?

• Lau fakakātoa ʻe he kalasí ʻa e ngaahi potufolofolá mo hivaʻi ha ngaahi himi ʻo e fakafetaʻí mo e fakamāloó, ʻo hangē ko ia ʻoku hā ʻi he fokotuʻutuʻu ko ʻení. Fakaafeʻi ʻa e kau finemuí ke kumi ki ha ngaahi kupuʻi lea fekauʻaki mo ha ngaahi meʻa ʻoku nau ongoʻi houngaʻia mo fakafetaʻi ai. Fakaafeʻi kinautolu ke nau vahevahe ʻa e ngaahi kupuʻi lea naʻa nau filí, fakamatalaʻi e ʻuhinga ne nau fili ai iá, pea fakahā ʻa ʻenau ngaahi ongo ʻo e loto houngaʻiá.

• Tala pe lau ʻa e talanoa ʻo e iká mei he lea ʻa ʻEletā Lāsolo M. Nalesoni ko e “Fakafetaʻi ki he ʻOtuá.” ʻEke ki he kau finemuí pe kuo nau tokoniʻi nai ha niʻihi kehe (hangē ko e tokotaha tauhí ʻi he talanoá) ka kuo teʻeki ke fakamālōʻiaʻi kinautolu. Vahevahe ʻa e toenga ʻo e leá ʻo fakatatau ki he ngaahi ʻuluʻi tohí, pea vahe ki he finemui takitaha ha konga ke ne lau. Kole ange ki he kau finemuí ke nau hiki ha meʻa ʻoku nau ako fekauʻaki mo e loto houngaʻiá pea mo ha potufolofola ʻoku felāveʻi mo e meʻa naʻa nau akó (ʻe lava ke nau fakaʻaongaʻi ʻa e Fakahinohino ki he Ngaahi Folofolá). Tuku ke vahevahe ʻe he kau finemuí ʻa e meʻa naʻa nau hikí pea fakamatala ki ha taimi naʻa nau ongoʻi ai ha loto houngaʻia koeʻuhí ko e taha ʻo e ngaahi meʻafoaki ʻa e ʻOtuá.

• Vahe ki he finemui takitaha ke ne ako ha konga ʻo e lea ʻa Palesiteni Tieta F. ʻUkitofa ko e “Loto Fakafetaʻi ʻi ha Faʻahinga Tūkunga Pē,” kae ʻoua naʻa ʻoange kiate kinautolu ʻa e kaveinga ʻo ʻenau ngaahi kongá. Kole ange ke nau tohi ʻenau ngaahi kaveinga pē ʻanautolu—ha ngaahi kupuʻi lea pe ngaahi sētesi ʻoku nau ongoʻi ʻoku nau fakamatalaʻi fakanounou ʻa e ngaahi meʻa kuo nau akó. Fakaafeʻi kinautolu ke nau vahevahe ʻenau ngaahi kaveingá mo ha faʻahinga meʻa pē ʻoku nau ako mei he faleʻi ʻa Palesiteni ʻUkitofá ʻo fekauʻaki mo e loto houngaʻiá. Ko e hā te nau lava ʻo fai ke fakatupulaki e ʻulungaanga ʻo e loto houngaʻiá ʻoku fakamatala ki ai ʻa Palesiteni ʻUkitofá?

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. Ko e hā haʻanau ngaahi ongo pe fakakaukau? ʻOku mahino nai kiate kinautolu e mahuʻinga ʻo e loto houngaʻiá? ʻOku toe ʻi ai nai haʻanau ngaahi fehuʻi kehe? ‘E ‘aonga nai ke tuku ha taimi lahi ange ʻi he kaveinga ko ‘ení?

Tokoni fakafaiakó

“ʻOku ʻikai fakakaukau [peheni] ha faiako ia ʻoku taukei, ʻKo e hā e meʻa ʻoku totonu ke u fai ʻi he kalasí he ʻaho ní?’ ka ʻokú ne fehuʻi, ‘Ko e hā ha meʻa ʻe fai ʻe heʻeku kalasí he ʻahó ni?’; ʻo ʻikai ke ne fakakaukau, ‘Ko e hā ha meʻa te u akoʻi he ʻaho ni?’ ka ke ne fakakaukau, ‘Te u tokoniʻi fēfē ʻeku kau akó ke nau ʻiloʻi e meʻa ʻoku fie maʻu ke nau ʻiló?’” (Virginia H. Pearce, ʻi he ʻOku ʻIkai ha Ui ʻe Mahuʻinga Ange ʻi he Faiakó [2000], 68).

Vitioó: “Feakoʻiʻaki”

Mamata kahi ange

Moʻui ʻaki e meʻa ʻoku tau akó

Vakai ki he ngaahi fakakaukau ki he akó mo e akoʻí.

Fakaafeʻi e kau finemuí ke nau fakakaukau ki he founga te nau moʻui ʻaki ai e meʻa kuo nau ako he ʻaho ní. Hangē ko ʻení, ʻe lava ke nau:

• Fakahoko ha lotu fakamālō ʻataʻatā, ʻo fakamālō ki he Tamai Hēvaní ʻi he ngaahi tāpuakí pea ʻoua ʻe kole ha meʻa.

• Kumi ha ngaahi faingamalie ke fakahā ai ʻa e houngaʻiá ʻi he uiké kakato.

Vahevahe mo e kau finemuí ʻa e meʻa te nau ako ʻi he uike hoko maí. Ko e hā ʻenau ngaahi fakakaukau mo e fehuʻi ʻi he tefito ko ení? Ko e hā te nau lava ʻo fai ke nau teuteu ai ke ako? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe lava tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.