Ko e hā ʻoku tau totongi vahehongofulu aí?

Ko ha faingamālie toputapu ʻa e totongi vahehongofulú. ʻI he taimi ʻoku totongi ai ʻetau vahehongofulú, ʻoku tau fakahaaʻi ai ʻetau houngaʻia ki he meʻa kotoa kuo foaki mai ʻe he ʻOtuá maʻatautolú pea fakafoki kiate Ia ha konga ʻo e meʻa kuo tau maʻú. ʻOku fakaʻaongaʻi e vahehongofulú ki hono langa ʻo e ngaahi temipalé mo e falelotú, liliu mo pulusi e ngaahi folofolá, ngāue fakafaifekaú mo e ngāue ki he hisitōlia fakafāmilí, mo ha ngaahi founga kehe ʻo hono langa hake e puleʻanga ʻo e ʻOtuá ʻi he māmaní.

Teuteuʻi fakalaumālie koe

Fakakaukau ki he ngaahi tāpuaki fakalaumālie mo fakatuʻasino kuó ke maʻu mei hono totongi hoʻo vahehongofulú. Ko e hā ha ngaahi meʻa kuó ke aʻusia te ke lava ʻo vahevahe mo e kau finemuí?

Ko e hā ʻoku mahuʻinga ai ke totongi vahehongofulu e kau finemuí? Te ke akoʻi fēfē kiate kinautolu e mahuʻinga hono moʻui ʻaki e fono ʻo e vahehongofulú?

Ko e hā e ngaahi potufolofola mo ha ngaahi maʻuʻanga tokoni kehe ʻe tokoni ke mahino ki he kau finemuí e ʻuhinga ʻoku tau totongi vahehongofulu aí?

Malakai 3:8–10 pe 3 Nīfai 24:8–10; T&F 64:23 (Ko e ngaahi tāpuaki ʻoku talaʻofa kiate kinautolu ʻoku totongi vahehongofulú)

T&F 119 (Ko hono fakahā mai e fono ʻo e vahehongofulú)

Henry B. Eyring, “Ko e Ngaahi Tāpuaki ʻo e Vahehongofulú,” Liahona, Sune 2011, 4–5

David A. Bednar, “Ko e Ngaahi Matapā ʻo e Langí,” Ensign pe Liahona, Mē 2012, 48–51

Jeffrey R. Holland, “Like a Watered Garden,” Ensign, Nov. 2001, 33–35

Gordon B. Hinckley, “We Walk by Faith,” Ensign, May 2002, 72–74

“Vahehongofulú,” Tuʻu Maʻu ʻi he Tuí (2004), 205–07

“Vahehongofulú mo e Ngaahi Foakí,” Ki Hono Fakamālohia ʻo e Toʻu Tupú (2011), 38–39

Ko e faiako ‘i he founga ‘a e Fakamo‘uí

Naʻe fakaafeʻi ʻe he Fakamoʻuí ʻa kinautolu naʻá Ne akoʻí ke nau fakamoʻoni, pea ʻi heʻenau fai iá, naʻe ongo ʻa e Laumālié ki honau lotó. Te ke fokotuʻu fēfē ha ʻātakai te ne fakaafeʻi mai e Laumālié, koeʻuhí ke Ne ala atu ki he loto ʻo e kau finemuí? Te ke fokotuʻu fēfē e kau finemuí ke nau fakamoʻoni kau ki he ngaahi tāpuaki ʻo e vahehongofulú?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe fakakaukauʻi pē ʻe koe haʻo fakakaukau ke fakafeʻiloaki ʻaki e lēsoni ‘o e uike ní:

Kole ki ha kau finemui ke nau lau e talanoa kau kia Mele Filitingi Sāmitá ʻi he lea ʻa ʻEletā Sefilī R. Hōlaní “Hangē ha Ngoue ʻUheiná.” Kole ki he toenga ʻo e kau finemuí ke nau lau e talanoa kau ki he tamasiʻi ako ʻunivēsiti ʻi Palāsilá mei he lea ʻa Palesiteni Kōtoni B. Hingikelī “ʻOku Tau ʻAʻeva ʻi he Tuí.” Fakaafeʻi ke nau fakanounouʻi e ngaahi talanoá pea vahevahe e meʻa ʻoku nau ako mei aí kau ki hono mahuʻinga ʻo e totongi vahehongofulú.
Hiki he palakipoé, “Ko e hā ʻokú ke totongi vahehongofulu aí?” Fakaafeʻi e kau finemuí ke nau fakakaukauloto ki hano fai ange ʻe ha kaungāmeʻa mei ha tui fakalotu kehe e fehuʻí ni. Te nau tali fēfē nai? Poupouʻi ke nau vahevahe haʻanau aʻusia pe ko honau fāmilí fekauʻaki mo e vahehongofulú.

Ako fakataha

ʻE tokoni ʻa e ʻekitivitī takitaha ʻi laló ke mahino ki he kau finemuí ʻa e fono ʻo e vahehongofulú. Muimui ʻi he ueʻi ʻa e Laumālié ʻo fili ha meʻa ʻe taha pe lahi ange ʻe tokoni lelei taha ki hoʻo kalasí:

Kole ki he kau finemuí ke nau kumi he Malakai 3:8–10 mo e T&F 64:23 pea vahevahe e ngaahi talaʻofa ʻoku fai ki he kau totongi vahehongofulú. Kole ki he kau finemuí ke nau kumi e meʻa ʻoku finangalo e ʻEikí ke tau totongi ʻi he vahehongofulú ʻaki hano lau e T&F 119 (fakamatalaʻi ko e “tupú” ko ʻetau “paʻanga hū mai” fakataʻú). Tufa e ngaahi laʻipepa foaki vahehongofulú, pea tuku ke fakamatalaʻi ʻe he kau finemuí e founga hono ngāue ʻaki kinautolú. Vahevahe e founga kuo tāpuekina ai koe ʻi hono totongi e vahehongofulú.
Tā ha kōlomu ʻe tolu ʻi he palakipoé ʻo hiki ki ai e ngaahi kaveingá ni: Ngaahi Tāpuakí, Founga Hono Fakaʻaongaʻi ʻo e Paʻangá, mo e Tōʻongá. Vahevahe e kalasí ki ha ngaahi kulupu iiki, pea vahe ki he kulupu takitaha ha taha ʻo e ngaahi kaveingá ke fai ai ha fekumi ʻi he konga ʻoku ui ko e “Vahehongofulú mo e Ngaahi Foakí” ʻi he Ki Hono Fakamālohia ʻo e Toʻu Tupú. Kole ki he kau finemuí ke nau hiki ʻi he kōlomu totonu he palakipoé e meʻa ʻoku nau maʻú. Fakaafeʻi hanau niʻihi ke vahevahe ʻenau fakamoʻoni ki he fono ʻo e vahehongofulú.
Vahevahe e kalasí ki ha kulupu ʻe ua. Kole ki he kulupu ʻe taha ke ne lau ʻa e fakamatala ʻa Palesiteni Henelī B. ʻAealingi “Ko e Ngaahi Tāpuaki ʻo e Vahehongofulú,” pea kole ki he ngaahi kulupu kehé ke nau lau e palakalafi 2–13 ʻo e lea ʻa ʻEletā Tēvita A. Petinā “Ko e ngaahi Matapā ʻo e Langí.” Kole ki he kulupu takitaha ke hiki ha lisi ʻo e ngaahi tāpuaki ʻoku tau maʻu ʻi he taimi ʻoku tau totongi ai e vahehongofulú, pea hiki e ngaahi tāpuakí he palakipoé. Fakaafeʻi e kau finemuí ke nau vahevahe e ngaahi tāpuaki kuo nau maʻu mo honau fāmilí ʻi hono totongi e vahehongofulú. Fehuʻi ange pe ʻe tokoniʻi fēfē ʻenau nofomalí mo honau fāmili he kahaʻú ʻi hono moʻui ʻaki e fono ʻo e vahehongofulú.

Kole ki he kau finemuí ke nau vahevahe ʻa e meʻa ne nau ako ʻi he ʻaho ní. ʻOku mahino nai kiate kinautolu e ʻuhinga ʻoku tau totongi vahehongofulu aí? Ko e hā haʻanau ngaahi ongo pe fakakaukau? ‘Oku ‘i ai nai haʻanau toe ngaahi fehuʻi kehe? ʻE ʻaonga ke fakamoleki ha toe taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Tukupā ke totongi vahehongofulu kakato pea tohi e taumuʻa ko iá ʻi heʻenau ngaahi tohinoá.
Fakakakato ʻa e meʻa ʻoku fie maʻu ke aʻusia fika 7 he tuʻunga ʻulungaanga mahuʻinga ʻo e Tauʻatāina ke Filí mo e ʻEkeʻi Meiate Kita e Meʻa ʻOkú te Fai pe Taʻe Faí ʻi he Fakalakalaka Fakatāutahá..

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.